الاثنين، 16 يوليو 2012





في عز لحظات حزني
بحس ان ربنا جنبي
حنين عليا قوي
بيطبطب عليا وبيقولي ما تزعليش


يابت يا عبيطة انا بعمل كده عشان اخليكي أقوى
عشان تعرفي تكملي الامتحان اللي انا عاملهولك في الدنيا


وبرغم صعوبة الامتحان
لكن بحس انه دايما معايا وجنبي
امتحان open book
بيقولي اعمل ايه وامشي ازاي وايه الخطوة الجاية
بس بيسيبنى انا اللي أمشيها بنفسي


ربنا حنين عليا قوي
مهما كنت حزينة ومتضايقه بحس انه بيصالحني
لما بتنزل دموعي لازم تصادفها حاجة حلوة بتكفكفها
وكأنه مش هاين عليه يشوفني زعلانه


أختي أحيانا بتضرب ابنها لما يحط صباعه في كبس الكهربا
مابحبش أشوفها بتضربه
لكن اكيد مش هاكون فرحانه ولا هي هاتضحك لما تلاقيه بيضر نفسه ويتكهرب
ربنا بيوجعنا عشان عاوز يشوفنا أحسن
بيبتلينا عشان يختبر معادننا
عمال يصهر في الحديد ويزيد النار من تحتيه عشان يصفى ويروق
ويزيح عنه كل الشوائب


يارب
"إن لم يكن بك علي غضب فلا أبالي"

2 حط دماغك:

يا مراكبي يقول...

فاتني 12 بوست

نص المرة اللي فاتت :-)

البوست الجديد ده جميل، دايما أمر المؤمن كله خير حتى وان كان ظاهر الأمر عكس ذلك، عشان كده في أي مصيبة تحصل لازم نكون متأكدين انه هو ده الخير والأفضل لينا

---

فيه بوستس تانيين كانوا مميزين جدا وعجبوني جدا

امتى هتقوم في مصر ثورة؟ هو ده الكلام الحقيقي والعملي والفعلي، وغير كده هيبقى مجرد أوهام مش هتوصلنا لحاجة

امتحان الرسم وقصتك اللي بتلخص باتقان كيفية قتل الإبداع لدى المصريين من الصغر

عربية السيئات وشرح طُرق الاستهبال المختلفة لدى الرجال، موضوع قيّم ومحتاج وقفة بجد

أحييكِ

وينكى يقول...

هههههههههههههههه
أهلا أهلا يا مراكبي
ماينفعش اكتب بوست من غير ما يعدي عليك.. انت صاحب بيت دلوقتي

بقالك كتير ما كتبتش.. مستنيه جديدك:)
خلي بالك بقى عشان معدل انتاجي هايزيد الفترة الجايه
عندي كتير اكتب عنه