الخميس، 26 فبراير 2009

لولولولولولولييييييييي

تحديث هااااااااام جدااااا
أنا هاغني مع علي في الحفلة ياخواناااااااااااااا
وبس خلاص
***

عارفين مين ده طبعا يا شباب

دا أعظم مطرب على أرض مصر

صوته جمع القوة والحنية والرقة والرومانسية

وروحه ماتلاقيش أطيب منها ودمه مافيش أخف منه

بلوجري قديم بيحلم بالغنا من زمان

وربنا كتبهاله اخيرا والحمد لله

المرادي حفلة ومش زي أي حفلة

المرادي باعزمكوا على أول حفلة خاصة لعلي الألفي.. صاحب مدونة تفاصيل

واللي انتو عارفينه من زمان لما كان بيغني مع فرقة ستب باي ستب وبيغني دلوقتى مع أيامنا الحلوة

اللي عارف علي الألفي انا متأكده انه هاييجي على طول من غير كلام

واللي مش عارفه.. ممكن يسمع أغنية ليه هايحملها من هنا

المهم ومن غير كلام كتير.. الحفله هاتبقى يوم الاتنين 2 مارس ، الساعه 8:30 مساءا في قاعة النهر بساقية الصاوي

هاستناكو كلكوووووووووو

ومبروك بجد يا لول.. صبرت ونلت أخيرا ويارب تبقى انجح حفله فى الدنيا كلها

وليك عندي زغروطة كمان :)

السبت، 21 فبراير 2009

حلم


ولسه باحلم

ببيت صغير

في شارع قديم

رغم شيبته كان نضيف

ضمني ف يوم

لما كنت في بلد غير البلد

أول مكان لعبت فيه

وفي العيد حلين ضفايري

حطيتلي روج زي الكبار

ونزلت جري

عشان ألعب مع ولاد الجيران

أنام وأصحى

مش يوماتي

لكن كل فين وفين

وطيف الحلم لسه ف خيالي

عدى مرة

ألف مرة

أول مرة كان من سنين

مسكني حنين

قلت يمكن عشان

يادوب لسه مفارقاه

ودلوقت

فاتت سنين

عشر سنين

ولسه برضه الحلم إياه

بلقى طيفه في المنام

بيت صغير

في شارع قديم

رغم شيبته كان نضيف

أول مكان لعبت فيه

لما كنت في بلد

غير البلد

الأحد، 8 فبراير 2009

اللي انكسر.. يتطوح

أخيرااااااااااااااا
وبعد طول انتظار
الشاعر الجامد جدا قوي خالص
أحمد شلبي
المدون صاحبنا: دكتور زيفاجو
طلع ديوانه الشعري اللى انكسر يتطوح
انا مش هاقدر اتكلم عن الراجل ده لأني مهما اتكلمت عنه كشاعر فامش هاقدر اوفيه حقه
ولو اتكلمت عنه كبني ادم وكصديق
برضه مش هاوفيه حقه
اللي يعرفوه هايأمنوا على كلامى
واللى ما يعرفوهوش.. ادخلوا مدونته او هاتوا ديوانه وانتو تعرفوه
واتحدى أي شخص يقدر يقاوم سحر كلماته وابداعه اللي فاق الوصف
هاتقولولي انا باقول كده ليه دلوقتى
اخونا وحبيبنا عنده حفله توقيع
أي والله.. حفلة توقيع وندوة شعرية غنائية هاتتعمل في ساقية الصاوي يوم الخميس الجاي
12 فبراير الساعه 7 مساءا فى قاعة الكلمة
***
ملحوظة: وكالة وينكى للدعايه والاعلان متوقفة بقالها فترة
وأهي رجعت تاني تشتغل عشان لقت اللي يستحق انه يتعمله دعايه
ألف مبروك يا زيفاجو.. وان شاء الله هانشوفك كلنا يوميها
ماتتأخروش بقى يا شباب
الراجل بورسعيدي وحاسس انه مالوش ظهر فى القاهرة
عاوزين نبينله قد ايه المدونين عيلة وظهر وسند
:)