الخميس، 20 مارس 2014

حفلتي الجاية


يوم السبت 22 مارس 2014
المسرح الكبير - دار الاوبرا المصرية

الساعه 8 مساءا

الأحد، 9 مارس 2014

صباحك ابتسامة.. مدونتي الحبيبة

والله بحس بالذنب اني ببعد عنك كده
بس هاعمل ايه.. طبعي اتغير
مابقيتش عاوزه أزعجك على اي تفصيلة هايفة تحصل في حياتي.. او جايز حياتي ماعادش فيها تفاصيل مميزة ينفع أحكيهالك
بس حابه أسترجع معاكي شوية ذكريات :)
انا عارفه انك بتحبي كده قوي
فاكرة أيام ماكنت طالبة في الجامعة وكتبت مرة على صفحاتك "نفسي أغني قوي".. الغنا بالنسبالي كان حلم بعيييييييد قوي مش عارفه سكته ولا اوصله ازاي
مش عشان نقص موهبة.. لا عشان ما كنتش عارفه الناس اللي بتقف على مسرح دي بتعمل ايه عشان تبقى في المكان ده
فاكرة لما جيتلك بعدها بكام سنة وقلتلك اني اخيرا لقيت فرصتي وغنيت في فرقة شبابية :)
كانت أيام حلوة.. ما استمرتش كتير للاسف.. بس اخدت منها خبرة كبيرة سواء على المستوى الفني او على مستوى فهم طبائع البشر
من ساعتها دنيا تشيلنى وتوديني وتجيبني
عملت حاجات كتير قوي ودخلت فى مجالات كتير قوي.. وفضل الحلم معايا

فاكرة لما جيت حكيتلك في يوم انى وانا صغيرة كنت ببص على سور الاوبرا من بعيد واتمنى لو بس أدخل الجنينة بتاعتها :D
كنت عبيطة صح؟؟ هيهيهيهيهي
كنت فاكرة انها مش للمصريين.. او انها للى بيحضروا حفلات ام تذكرة بـ 3000 جنيه.. وبعد كده عشت فيها على انها بيتي المصون

احلام احلام.. ببص على ذكرياتي وابتسم.. قد ايه الاحلام جميلة.. وقد ايه بتبقى اجمل لما تتحقق
المهم الواحد مايبقاش كئيب ونكدي واول ما يوصل للحاجة اللى كان بيحلم بيها يحس انها حاجة عادية قوي وانه كان واخد فيها قلم
ممكن تكون الحاجة اللى بتحلم بيها في حقيقتها عادية.. بس حلمك بيها بيديها وزن
انا دلوقتي بقيت مغنية محترفة.. وبقى شغلي الرسمي في دار الاوبرا.. في واحدة من اقوى الفرق الموجوده هناك
بعتز وبفتخر ان كورال اكابيلا ضمني بين صفوفه.. دا اللى كنت اقصد بيه طريقي الجديد اللي لقيته لو تفتكري البوست الي كتبته في اكتوبر اللي فات
انا ركبت صاروخ وعمال بيطلع بيا.. بتقدم وبكتسب خبرة.. واهم من اى حاجة انى اخيرا لقيت نفسي وحسيت بالسعادة اللى كنت مفتقداها
عملت كذا حفلة لحد دلوقتى.. حفلات كورال وصولو ومسرح اوبرا.. شيء رائع انى اعمل كل ده فى اقل من سنة .. انا فخورة بنفسي وحاسه ان لسه قدامى كتير اعمله
اتمنيلي اكون احسن.. عشان انا هاكون احسن .. عندي حلم ماشية في سكته.. هابقى اقولك عليه كل ما احقق منه خطوة .. اتفقنا؟ :D
أشوفك بعدين