الثلاثاء، 31 يوليو، 2012

رؤى




اتعلمت
أشوف الرؤى
أصدق احلامي
جرس إنذاري
اللي تنبيهي دايما عليه
اتعلمت
أنام وأشوف
علامة شر
دايما شر
أصحى وقلبي م الخوف مقبوض
كنت بكدّب
وأقول راح أنسى
أطنش.. أغلوش
بس بجد ولا مرة نسيت
لحد الآن
كل علامة
تتبينلي
رأي العين
قلت راح انسى
ولا يوم نسيت
فاتعلمت
أشوف الرؤيا
واصدق حلمي
جرس انذاري
اللي تنبيهي دايما عليه

الاثنين، 30 يوليو، 2012

فنجان شاي




حين دعوتك لمنزلي لنتشارك الشاي
كنت أعلم أن في الأمر شيئا
حين صببت لك السائل الأحمر البلوري
كنت جد حريصة مما قد يفاجئ
أو ما كنت أتوقع
وحدث المتوقع
فانكسر فنجانك
أنا لا أؤمن بالفأل
لكن أؤمن أن للجمادات حياة خاصة
تتواصل مع ما حولها
وتشعر بطاقات البشر
فترحب بهم على طريقتها
حينها شعرت ان شيئا ما سيحدث
ولم يخب ظني كثير
فكما انكسر فنجانك
انكسرت صورتك أمام ناظري
وكما فنجانك.. لا سبيل لإصلاحها

الأحد، 29 يوليو، 2012





الخبر ده لقيته النهارده على اليوم السابع وبجد خلاني أقف قدامه مدة طويلة
وقلت لازم أعلق عليه


الحد الأدنى لدخول كلية الطب بقنا جامعة جنوب الوادي هو 100.1%.. نعم!!!!!!
مين فيه ايه!!!
دا اللي هو ازاي يعني


يعني لازم أجيب مجموع أعلى من المجموع الرسمي بتاع الثانوية العامة أصلا عشان أبقى أقل واحد ممكن يدخل كلية أقاليم - مع احترامي ليها طبعا بس بتكلم على أساس البعد الجغرافي وعدد اللي هاينتسبوا لها مش أكتر - .
دا على كده اللي جايبين المجموع ده من القاهرة هايكتبوا رغباتهم على قنا كنوع من الاستخسار المتعارف عليه مصريا.


بس والله خبر لطيف... دا معناه ان فيه عدد كبييييييييييير من الطلبة جابوا فوق الـ100% في الثانوية العامة.. للدرجة اللي تملأ مدرجات دفعة كاملة في كلية الطب لجامعة أقاليم واحدة.
ياترى دا بركات البلاك بيري ولا بركات الدروس الخصوصية ولا الجيل ده بياكل الكتب بجد؟؟؟


بس حاجه توجع القلب قوي لما تشوف ناس تعبت وجابت 97% وكان حلمها تلحق أي حاجه من أوكازيون كليات القمة ومالقتش
هي صدمة كبيرة بالنسبالهم بما ان العقلية المصرية فرضت عليهم الطريقة دي من التفكير.
97%....!!!!!!!
على أيامي المجموع ده كان يدخل طب القاهرة... أنا كنت جايبه 91.6% وكان ساعتها ليا صيدلة أقاليم - أسيوط تحديدا -  ورفضت أكتبها في استمارة الرغبات من أساسه عشان كان حلمي اني ادخل علوم :)
اه بجد والله.
وقلت هادخل علوم القاهرة .. وقد كان


نفسي الناس تبطل تقول كليات قمة وكليات قاع
هو ده السبب الأساسي في استهبال المجاميع اللي احنا شايفينه دلوقتي والانهيار اللي الناس بتعاني منه


مصر مش هاتقوم على أكتاف الأطباء والمهندسين والصيادلة بس
محتاجين علماء ومعلمين في المدارس ومدربين رياضيين وناس بتفهم في التجارة
وفنانين ومرشدين سياحيين .. وكل بني ادم يقدر يؤسس شغله الخاص حتى لو عربية فول


عموما مالهاش لازمة النصايح دلوقتي... هايعرفوا كل الكلام ده بعدين :)
زي ماحنا عرفناه بالضبط بس بننساه او بنتناساه قدام أولادنا من داخلي الثانوية العامة.


ربنا يكون مع الجميع

الأحد، 22 يوليو، 2012

عذر



التمست لك سبعين عذرا
واتهمت نفسي بسوء الفهم
فماذا بقي؟
وصلتك لتفهمني الحقيقة
فقطعتني
ثم تبدى لي بالقطع
أن خطئي الوحيد
أنني التمست لك عذرا
وأن الحقيقة رغم تباين أوجهها

واحدة

عنقاء




كما العنقاء دائما
أبعث من رمادي
مكللة بالخلود
لأكمل ما بدأت
وهذه قصة حياتي

الاثنين، 16 يوليو، 2012





في عز لحظات حزني
بحس ان ربنا جنبي
حنين عليا قوي
بيطبطب عليا وبيقولي ما تزعليش


يابت يا عبيطة انا بعمل كده عشان اخليكي أقوى
عشان تعرفي تكملي الامتحان اللي انا عاملهولك في الدنيا


وبرغم صعوبة الامتحان
لكن بحس انه دايما معايا وجنبي
امتحان open book
بيقولي اعمل ايه وامشي ازاي وايه الخطوة الجاية
بس بيسيبنى انا اللي أمشيها بنفسي


ربنا حنين عليا قوي
مهما كنت حزينة ومتضايقه بحس انه بيصالحني
لما بتنزل دموعي لازم تصادفها حاجة حلوة بتكفكفها
وكأنه مش هاين عليه يشوفني زعلانه


أختي أحيانا بتضرب ابنها لما يحط صباعه في كبس الكهربا
مابحبش أشوفها بتضربه
لكن اكيد مش هاكون فرحانه ولا هي هاتضحك لما تلاقيه بيضر نفسه ويتكهرب
ربنا بيوجعنا عشان عاوز يشوفنا أحسن
بيبتلينا عشان يختبر معادننا
عمال يصهر في الحديد ويزيد النار من تحتيه عشان يصفى ويروق
ويزيح عنه كل الشوائب


يارب
"إن لم يكن بك علي غضب فلا أبالي"

الحلم



أمر عبر الحلم
خلف الليل المعشوشب فوق جدارات الغمام
ألملم زغب اليمام
من ومضات الريح على أشرعة البرق
وستائر الليلك
أمر عبر الموت الآخر
كي أرنو إليك


الخميس، 12 يوليو، 2012



سأبني مملكتي من جديد
كي أعود متوجة على عرشي
سأقيم جسورا قد هدمتها
سأقض سدودا قد بنيتها
سأقوم أكواخ الحي المحترق
وأعيد ري الأرض الجدباء


ساعود لعرشي ولملكي
لمدينتي الوردية التي هجرتها
ولشعبي القانع الطيب المشاكس حينا


سأعود لحفيف الريح ورقرقة البلور
لتكسر الأمواج على شطآني
سأعود للمعة قمر أزرق في السماء
لطعم الليمون اللاذع في ليلة صيف


سأعود جديدة .. أصيلة.. 
كما أنا لا كما كنت
سأعود لقلبي ... لعقلي
 لوقار صحوي وهذيان جنوني


فلتقرع الأجراس.. فلتنثر الزينات
فلتصدح القيان بأعذب الالحان
فلتتمايل أوراق الشجر على الغصون


فلقد عدت :)