الخميس، 31 ديسمبر، 2015

عاوزه أنام

الساعة ٤ الفجر!
ولسه مش قادره أنام
أنا مش متعودة اني انام الظهر.. بس رجعت البيت على ٦ تقريبا (اعملوا نفسكو مش واخدين بالكو انه مش الظهر ) ونمت بالضبط ٣ ساعات
٣ ساعات يا مؤمن!.. ٣ ساعات يخلوني ألف حوالين نفسي كده؟؟
عملت كل حاجه ممكن تتعمل.. شعل وخلصته.. مواعيد ورتبتها (اه رتبت مواعيد واتفقت مع اصحابها الساعه ٤ الفجر وايه يعني!)  اصحابي ومعارفي على الفيس رازيت فيهم ورازوا فيا
واللي على الايميل والواتساب صبحت ومسيت عليهم

لعبت كل الألعاب.. بطارية الموبايل فصلت وشحنتها ع الاخر وانا بتفرج عليها "فراغ عاطفي تقولوا ايه"
هو انا لازم اتعذب كده وافضل مفنجلة طول الليل واجي قبل معاد صحياني الصبح الاقي جفوني مدهونه عسل؟؟؟
يرضيك كده؟...طاب ايه طاه!!

الاثنين، 28 ديسمبر، 2015

دفا البيت القديم

مدونتي حبيبتي

بيت جدتي القديم اللي مابرتاحش إلا فيه
سعيدة انك موجودة عشاني وبين ايديا
بحسك المكان الدافي الهادي اللي بهرب ليه من زحمة الدنيا.. مش دايما ببقى هنا كتير
بس احنا عشرة عمر مش كدة؟
بقوا ٨ سنين ولا ٩؟
أو جايز أكتر كمان
افترقنا كتير وتهنا عن بعض كتير بس لسه روحك جوا قلبي
زمان كنت بفضفضلك بكل اللى جوايا.. وسط زحمة الناس وتواصل البشر
دلوقتي ماعادش فيه حد حوالينا
كلهم مشيوا.. وماعادش فيه غيرنا
بالضبط وكأني كنت في عزا .. صاخب ومليان ناس.. بيبكوا او يتباكو
بيرغوا ويستعرضو وينظروا
ومع اللحظة اللى بقفل فيها الباب ورا اخر مزعج منهم.. والتفت عشان الاقي البيت الدافي الفاضي
اقعد بهدوء.. مع الذكريات.. ومع الحيطان والاركان
وكل شبر حواليا بينطق.. بيطبطب ويحضنني ويحسسني بالدفا
انا مش لوحدي وانتي معايا
احنا شركاء في حياتنا سوا
عشناها على الحلوة والمرة
بتأملك.. ألمس أركانك
اتنفس هواكي وأحس روحك
وابتسم لأن معايا صديقتي وبيتي وحته كبيرة مني
بقيت بدل ما بفضفضلك بتكلم عنك
يمكن دا اللي باقيلي دلوقتي؟

الأربعاء، 23 ديسمبر، 2015

Blogger on my mobile!!

مش عارفه ليه لقيتني بفكر ادور على ابليكيشن بلوجر على الموبايل.. فكرة ملحة بقالها فترة مش عاوزه تسيب دماغي
والفكرة نجحت ولقيته.. ياللسعادة :D

كده اكتب كل اللي نفسي فيه وقت ما احب في اى مكان
مش فاهمه انا ليه الاندرويد ما نزلش من بدري شوية -٢٠٠٧ كده ولا حاجة- كنت ساعتها اتدفست تحت بطانيتي ونزلت تدويناتي براحتي بدل ما كنت اقوم فى عز الضلمة واتخبط فى صباع رجلي فى اي حاجه عشان افتح الكمبيوتر واكتب فكرة خايفه عليها تهرب مني!!
هييييييييح... يلا مش ازمة
صباحك جميل يا ونكوكتي... صباحكم جميل ياللي معديين من هنا

السبت، 26 سبتمبر، 2015

بشر.. واختيارات

فيه ناس عرفتهم في حياتك دلوقتي أو في وقت فات أو لسه هاتعرفهم

ناس هاتحس انهم بيملوا فراغك.. بيجملوا حياتك وبيخلوك أسعد
مشكلتهم بس حاجة واحده.. ان اللدعة منهم مؤلمة بجد .. وللاسف جاية جاية

أصعب حاجة انك تقرب من انسان وتديله ثقتك وبعد كده تكتشف ان الصورة الجميلة اللى فى مخك تتحطم

ممكن يكون آذاك.. ممكن يكون عرفك عشان يستغلك ويكسب من وراك
أو حتى يعاملك كصفيحة مهملات يرمي فيها أوجاعه ويمشي
أو كحباية مسكن ياخدها بعد جرح عاطفي اول ما يطيب هايرمي شريط الدوا اللي هو انت.. أو حتى يسلف منه حباية لحد تاني موجوع


مشكلة الناس دى انك مش عارف اللدعة دى جاية امتى.. والمشكلة الاكبر لما تكون مش قادر تميزهم عن بقية أصناف البشر التانيين
ممكن حياتك تتدمر بسببهم
وممكن تتحلى بالقوة وتعتبرها خبرة حياتية جت بالطريقة الصعبة
الدروس المستفادة.. ياما هانشوف وياما هايعدى علينا
ماتزعلش قوي وماتوقفش عند المحطة دى، الدنيا عمرها ماكانت حاجة او شخص
الدنيا هى كل حاجة انت عاوز تتفاعل معاها .. اختياراتك ملكك
اختار انك تقف او تكمل.. محدش له فيه
اللي ما بيختارش .. مايستاهلش يكون بنى ادم

الاثنين، 13 يوليو، 2015

بين اسمهان ودينا الوديدي

طيب
بما اني بمر بمرحلة نفسيا انا فيها down قوي
قلت احسن حاجة اخف عن قلبي شوية
هاتكلم فى ايه؟؟ مش فى حاجة معينة

يعنى مثلا.. انا بحب الغنا .. من زمان قوي قوي كمان وشايفه ان صوتي حلو
لما كبرت وخالطت مغنيين لقيت نفسي ناقصنى حاجات كتير قوي
مش عارفه بقى هل دى قلة ثقة بالنفس ولا انا فعلا ناقصنى حاجات ولا دا جلد للذات ولا انهي بتنجان!!
بس انا كبرج الثور غيورة جدا.. اغير قوي لو لقيت حد احسن مني او بيتفوق عني في حاجة
دايما من ساعة ماكنت صغيرة وانا عايشة في منافسة طويلة مالهاش اخر
مع ان محدش بيحس او بيعيش الجو ده غيري
ماليش دعوة
لازم اكون الاولى دايما
لازم ابقى الاحسن والافضل والاذكى والاكثر كاريزما وثقافة 
لازم أكون إلهه م الاخر
ولو ده ما اتحققش بأي شكل من الأشكال هانقلب على النقيض تماما
وابتدي احس اني مش نافعه وفاشلة وماليش لازمة وعمرى ما هانفع فى حياتي ووجودي مالوش اي لازمة ولا تأثير فى الحياة
يا كده يا كده!!!!
ببص بشوف ابن اختي اللى عنده اربع سنين.. لازم يكون رقم واحد
لازم يكسب كل اللعب ولازم ياخد كل حاجة حلوة ويلعب في أي مرجيحة تيجي على باله حتى لو قوم كل الاطفال والناس التانيين
هو مش بشع كده .. بس هو طفل.. عاوز حاجة معينة
انا بقى عامله زيه.. مين فينا شبه التاني معرفش.. بس بحكم الاقدمية فى الحياة اكيد هو وارث الطبع ده مني :(
مشكلتي فى الـ Extreme دائما وابدا
بنسى احيانا الحاجات الحلوة الموجوده فيا
ومش موجوده فى حد تاني ببساطة عشان انا هو انا ومفيش حد تاني يبقى انا

ايام باسم يوسف.. اختي شافت الحلقة اللي استضاف فيها دينا الوديدي
وسعتها قالتلى اول ما شفتها افتكرتك على طول.. شبهك وفيها من روحك
ساعتها بس سمعت اغانيها.. حلوة.. ظريفة.. طبيعية مش مصطنعة
ليها ستايل خاص بيها
مش مطربة بس مؤدية ممتازة
ودخلت قلبي

لما فات الوقت ودخلت الاوبرا وسمعت زميلتي وهى بتغني لأسمهان.. حسيت اني فى حتة بعيييييييدة قوي 
اسمع مغنيات الأوبرا أجلد نفسي أكتر واقول انا لسه بعيييييييييييييد
دا غير كم البني ادمين اللي بيلعبوا على الـ self esteem بتاعي بقصد او من غير
وارجع اتقوقع تاني
واشيل جوايا واحس بالفشل
واني ولا حاجة :(

امبارح سمعت بنت في ثانوي بتغني نفس أغنية اسمهان
وحسيت اني بعيدة اكتر
واني ماليش مكان فى العالم ده
ماليش مكان في العلوم
وماليش مكان في الادب
وماليش مكان في الفن
مكاني الوحيد هو اني اقفل على نفسي باب اوضتي واتقوقع لوحدي قدام الشيء الوحيد اللي فالحه فيه
اتفرج على كارتون يعيشنى فى عالم تاني.. او العب اي حاجة تفصل دماغي مني
او اراقب تحركات البشر على الكوكب واتحسر واتمنى اكون مكان كل واحد فيهم
لدرجة اني احيانا بوصل لمرحلة اني بحسد أصحاب الاعاقات الموهوبين وبقول ياريتني كنت معاقة كده
يا اما اثبت ذاتي.. يا اما هاقول انا على قد حالى والمفروض اعمل ايه يعني
انا مش قادره
انا فعلا عندي إعاقة.. اعاقة نفسية رهيبة مش قادره اطلع منها
عايشه على الهامش
مابحاولش اساعد نفسي
وحتى اللي بيحاول يساعدني ببعده
وارجع جوه القوقعة
مع ان عقلي بيقولي دينا الوديدي مش لازم تبقى اسمهان
واللي بيسمع دينا مش لازم يكون بيحب اسمهان
ليه لازم الناس تكون كلها شبه بعض
زي فكرة قصة الزهرة السوداء بتاعت نبيل فاروق.. عالم كل البشر اللى فيه شبه بعض
مستنسخين من اصل واحد
كل الرجالة نفس الخلقة
وكل الستات كذلك
هل كنت هاكون سعيدة لو كنت واحده من الوحايد دول؟
احيانا بقول عاوزه ادوب وسط زحمة الدنيا ومحدش يعرفني
وخلاص بقى حطيت الفكرة فى دماغى
الاقي تصرفاتي كلها بتقول للعالم انا هنا.. حبوني
دا جنان ايه ده ياربي :(

يلا.. مود وهايعدي


السبت، 30 مايو، 2015

طفولة سعيدة.. هييييييح


بناء بيوت بالمخدات.. النط من فوق السلم بالباتيناج
نمشي فوق انبوبة البوتاجاز ونقلد موسيقى السيرك.. لا لا لالالا لالالا
احنا اول من ملا البلالين بالمية وعملنا حرب البلالين بيها ‏‎grin‎‏ رمز تعبيري
نلعب استغماية ونخبي اختى الصغيرة جوا الغسالة ونغطيها بالهدوم او نخبي اخويا الصغير جوا الديب فريزر ‏‎grin‎‏ رمز تعبيري (بعد ما نفصله طبعا ‏‎angel‎‏ رمز تعبيري )
نطلع فوق الدولاب وننط على سرير بابا وماما عشان كان زي البيت النطاط فى الملاهي
كنت بطلع فوق سور الفراندة وادلدل نفسي من على السور وانا ماسكه فيه برجليا ‏‎grin‎‏ رمز تعبيري .. واطلع وامسك فرع النخلة اللى فى الجنينة وانط بيه واقلد طرزان واقول آآآآآآآ آآآآآآآآآآههه.. وحتى بعد النطة دي لما حطيت رجلي في جبيرة وبقيت بمشي بعكازات، كانت العكازات بالنسبالى وسيلة لعب جديدة وبقيت أتشعلق عليه وانط بيه لاعلى واطول مسافة اقدر عليها وانط بيه من فوق السلالم ‏‎grin‎‏ رمز تعبيري
اخد حاجات من المطبخ او الجنينة واعمل بيها معمل اختبارات واهلي ما فكروش انهم يكسروا لوحة keep out اللي حاطاها
الاقي بابا بيساعدني وبيجيبلى رمل ناعم عشان انفذ تصميم الساعة الرملية اللي اتعلمت اعمله وانا فى تانيه ابتدائي (مهندس الميكانيكا العبقري).. وماما تديني طبق بايركس وعلبة القهوة عشان اعمل تجربة الترسيب .. وتعلمني ازاي أعرف احدد فصيلة دمي بالكواشف وعلمتني اول قوانين علم الوراثة والاحتمالات وانا فى رابعه ابتدائي لانها قدمتهالى على هيئة لعبة (اذكى مدرسة كيمياء وبيولوجي ممكن حد يقابلها)
اي قطع غير مستخدمة في البيت ومركونة كنا بناخدها ونعمل خيالنا فيها ونبني اختراعات واسلحة عشان لو "صدام حسين" قرر يدخل علينا البيت يتشنكل ويتكعبل وتضربه كورة الطين دى ويقع عليه الجردل ده
عاصرت حرب الخليج هناك بكل غاراتها واقنعة الغاز وصفارات الانذار .. واكياس البلاستيك السودا اللى على الشبابيك والاغذية المعلبة في دولاب الهدوم والتقوقع كلنا فى اوضة واحدة سدينا بابها بقطع القماش المبلولة عشان الغاز السام ما يدخلناش.. والاهم والاحلى (مفييييييش مداااارس ‏‎grin‎‏ رمز تعبيري ) وكل الظروف دي كانت بالنسبالنا لعبة كبيرة

طفولتي انا واخواتي كانت زي الفل
خمس عفاريت مطلوقين عملوا كل ما بدالهم واكتشفوا الدنيا بلعبهم .. وماما وبابا ربنا يخليهم لنا كانوا بيساعدونا مش بيمنعونا
ما افتكرش حد فيهم عدل على لعبنا او حتى بخل علينا بوقته انه يلعب معانا  
أنا فخورة بطفولتي 

من أبويا وأمي.. اتعلمت

من أبويا وامي... اتعلمت الحكمة
اتعلمت ازاي لما ابص ف وش الفرد.. أعرف مكنونة
واعرف مدى جمال روحه من عينه
او ان كان مليان قطران

* * * 
من أبويا وامي.. اتعلمت الاحترام
وان الكلمة الحلوة تلين الحجر
احترم الكبير واعطف على الصغير
و هين قرشك ولا تهين نفسك
وان كل شيء يتكسر.. إلا كرامة الانسان
* * * 
من أبويا وامي .. اتعلمت الحب
بدون شروط.. بدون قيود
ابتسم فى وش الناس.. حب الناس
واوعى الكره لايصيب قلبك
فتصير اعمى
ممكن حبهم يخنقك حبه
ماتفهموش حبة
سنك وشيطانك يشتغلوا على عقلك المقفول 
فتقول.. ماحبونيش
بس يا أهبل
* * * 
من أبويا وامي.. اتعلمت المنطق
وازاي عندى عقل يفكر
وازاي احكم.. من غير ما اغلط
ولا احابي .. ولا انافق
من قبل ما يجيلي عم ديكارت 
قالولي افكر.. انا موجود
 * * * 
من ابويا وامي.. اتعلمت أعرف
ولازم أدوق ولازم اشوف
ولازم اقرا ثقافة الغير
واعيش فى الدنيا ألفين غير
لان اللى ما يعيش كل يوم فى دنيا جديدة
أحسنله يموت
* * *
من أبويا وامي.. اتعلمت أكون انا
مش إمّعة
ومش ماشية مع التيار
وعقلك في راسك تعرف خلاصك
ومهما الدنيا تحط عليك مهياش دايمة
فماتتغيرش.. اثبت
وفي الاخر.. كله زائل.. وربنا هو الباقي
* * * 
حبي ليكم مالهوش وصف
مالهوش حد
قليلة قوي كلماتي عليكم
بس شافعلي.. انكو عارفين
من غير ما اتكلم
أعمل ايه... مهو قلبي فتن :D

الجمعة، 22 مايو، 2015

طالبه المساعده


عاوزه حد يساعدني ويقولي ازاي أربط مدونتي بالفيس بوك
فيه بعض المدونين بشوف صفحة التعليقات عندهم بتبقى تعليقات خاصة بالفيس بوك
متهيألي كل المدونين اللي فى العالم عملوا الموضوع ده ماعاداي :( 

فاطبعا ومن منطلق مواكبة العصر.. انا محتاجه اعمل التعديل ده واعرف ايه الجديد في التمبلات بتاعت بلوجر

لو حد يقدر يساعدني في ده فليتفضل مشكورا على صفحة التعليقات 

نصيحة #6

"Write a review of a movie that was very forgettable"

اكتب ملخص لفيلم احداثه بتتنسي بسرعه

الصراحه انا مش عارفه دا ممكن يكون ممتع من انهي زاوية بالنسبالك.. انا عن نفسي لما بتفرج على حاجة بتشدني قوي او بتغير فيا بكتب عنها
سواء مسلسل او شخصية او انطباع حر عن حاجة عشتها
بحس اني عاوزه اشارك نظرتي دى مع الدنيا كلها عشان يشوفوها زي منا شايفاها
مهما عبر الكلام عنها فابرضه مش هاتوفيها بحقها

اعتقد مهنة النقد بدأت في الوجود بالشكل ده :D

وانت بقى.. بتحب تكتب عن ايه :) 

نصيحة # 5

"Rent a movie you love"
أجر فيلم انت بتحبه

طبعا دي حاجة قديييييييمة
فكرة تاجير أفلام الفيديو والسهرة على الفيلم ويلا تعالوا اتفرجوا عشان هانرجع الفيلم بكرة 
بقالى فترة عماله بفكر.. ياترى كل محلات الفيديو وشرايط الكاسيت دلوقتى حصلها ايه!!
كانوا كتير قوي فى شارعنا وكان دي صناعة محترمة بالنسبالهم.. ومحلات الاتصالات او السنترالات اللي كان فيها دقيقة الموبايل ب50 قرش والمحل بيبقى كذا كابينة جنب بعض.. وأيام الكروت الميناتل اللي اجهزتها موجوده فى كل شارع والأجيال الجديدة بقت فاكرة الحاجات الخضرا دي أكشاك للتبول (اللهم احفظنا)

الإجابة: كلهم قلبوا محلات موبايلات واكسسوارات موبايلات وبيع خطوط
وفيه واحد منهم قلب محله عصير قصب

حاجات اختفت من حياتنا وحاجات ظهرت.. بس الشيء الموجود دايما هو فكرة انك تستمتع بوقتك وتعمل حاجة حلوة
نزل فيلم انت بتحبه واتفرج عليه.. أنا بحب قوي اني أنزل أفلام رعب بناءا على طلب ماما ونقعد نتفرج عليها مع بعض بالليل مع شوية فشار او بطاطس محمرة.. ونقعد نضحك على بعض لو واحده فينا اتخضت :D

من وقت للتاني قضي لحظة جميلة تفرحك.. هايفرق معاك كتير


نصيحة # 4

"write notes to yourself for encouragement and stick it somewhere"

شجع نفسك
ارفع من همتك
كنت بعملها ايام الثانوية العامة ومازلت بعملها لدلوقتي
أعلق أوراق على حيطة اوضتي.. اشجعني.. أشد همتي
أكتب الحاجات اللي عاوزه أداوم عليها
أعمل نظام ليومي
لا دا طبعا غير معادلات الكيمياء العضوية اللي كنت كاتباها على الحيطان وعلى السقف لدرجة فزعت ماما لما دخلت تنضف اوضتي في يوم ما.. الست افتكرتني اتجننت .. ومافهمتش ازاى وصلت للسقف برضة :P
اي نعم لحد دلوقتي عمري ما مشيت على حاجة فيهم :D  والاعتراف بالحق فضيلة
ودا راجع لاني بني ادمة بتحب تكسر اي روتين

بس كفاية عليا اني اعلق بطاقة صغننة فوق مرايتي مكتوب عليها " انتي هايلة.. انتي اجمل من امبارح.. استمري"

طبعا دي حاجات مفروغ منها.. طبعا طبعا :D