الجمعة، 18 أكتوبر 2013

الطريق


ولسه البحر موجه عالي
ولسه البحر وحوشه كتير
قالوا عني قبطان فاشل
قالوا لسه الشط بعيد
بس خلاص
مسكت الدفة
قريت البوصلة
ومشيت في طريق
ولا يبعدني أقوى عدو
أو ألف صديق
فردت شراعي ..نويت السفر
تحت المطر
تحت صقيع
او حتى تهت وسط الريح
هارجع أكيد
لنفس الطريق


الجمعة، 21 يونيو 2013

أنا استويت


كما التفاحة المستوية
في سقوطها من فرع الشجرة
أنا استويت 
واكتفيت
وماعاد عندي خلق للمعافرة
والمشي جوا الحيط
أنا بعلنها
علاقتي بيها
وذكرياتي
وحبي ليها
راح واندفن
وشوقي ليها
ودفاعي عنها 
منه انتهيت
أنا استويت
واكتفيت
وبطلت خلاص
المشي جوا الحيط

الثلاثاء، 28 مايو 2013

عودة


قررت أسيب عالم الفيس بوك الصاخب المبهرج الزحمة دا لفترة
وأرجع لبيتي القديم
مدونتي اللي اهملتها كتير وهجرتها إلا كل فين وفين

ميزة البيوت المهجورة ان ماحدش بييجي عليها كتير
مدق غير مطروق ماحدش يعرفه او ماحدش يتوقع انك ترجعله وتستخبى فيه شوية من معارك الحياة
محتاجة لشوية هدوء وترتيب افكار
محتاجة أولي المدونة شوية اهتمام تستحقه

محتاجه استرجع حاجات معينة
واولهم.. شتات نفسي

معرفش ليه


معرفش ليه
بنبقى احيانا اغبيا
طريقنا مليان علامات
ومع كده بنتوه
ونغلط فى الاتجاه
معرفش ليه بنعاند نفسنا
شايفين قدرنا وحاسينه
ومع كده بنحاول
نعوم وسط التيار
وفي الاخر نتكسر
نتعب
ونغرق في صمت
معرفش ليه
عندنا امل زائف اننا هاننجو
واننا هانطلع من الحادثة بسلام
لمجرد ان احنا هو احنا مش اى حد تاني
وكأن ف ايدينا عصاية الساحر
او صدقنا نفسنا
ان احنا بطل الفيلم
بجد معرفش ليه
بنعمل كده ف نفسنا
وبنزعل قوي
لما تيجي الضربة تفوقنا
وياريتنا نفوق

معرفش ليه

فاكس!!!


فاكس!!!
كلنا فئران تجارب في نفس المختبر
كلنا مسيرين مش مخيرين
كلنا واقفين على نفس الشعرة
وهانتاخد النهاردة ولا بكرة
عشان الاختبار
كلنا هاتعدي علينا نفس الظروف
حقن عضلات
كهربا.. كيماويات
أو حتى تشريح.. سلخ .. تمثيل بجثة
ماحنا مجرد فئران
مش مهم من حياتها وموتها غير تفاعل هايهم بني البشر
السادة الارقى مرتبة من وجهة نظرهم
كله فاكس
قوانين الحياة
قوانين الدنيا والكون
ماعادتش تفرق هى ايه
او رايحة لفين
طب يمين او شمال
كله فاكس
دى حلقة فيها بندور وهانرجع لنفس الطريق
فاخلاص بقى

كله فاكس

الثلاثاء، 7 مايو 2013

فعل الأنوثة الأولي



اقرأوا معي هذا المشهد
طفلة صغيرة تلعب الـ "سيجه" مع جيرانها فوق سطح بيتهم
تمرح.. تضحك.. تحتدم المنافسة بينها وبين جارها الصغير، تجلس "عفاف" على الأرض متربعة تولي اهتمامها للمباراة امامها.. وإذا فجاة تشعر بشيء ما يسيل منها
دماء تلوث ثيابها.. تنساب من بين ساقيها لتلوث رقعة السيجة.. الاطفال يصرخون.. انها تبول دما
يركض الطفل الساكن في الطابق اسفل السطح ليحضر اباه، ويفهم الأب ماحدث بنظرة واحدة.. يهدئ من روع الطفلة ويحملها لدارها
تستقبلها الأم بعدما سمعت القصة من أفواه الاطفال الذين رددوها على الجميع الف مرة.. انها تبول دما.. والطفلة مذعورة مذعورة.. تشعر أنها ارتكبت خطأ.. أفسدت شيئا في جسدها لا تعلمه.. تبكي بحرقة الصدمة الأولى التي وارتها عنها امها.. امها التي بدت على شفتيها ابتسامة خفيفة.. ولسان حالها يقول: مرحبا بك في عالم الموصومين.
تركها الجار في دارها وولى دونما كلمة واحدة.. عندها خرج الاب من الحمام بصابون الحلاقة يغطي نصف ذقنه، يبدو كشيطان آت من الجحيم
"يابنت الكلب".. وهو يخلع الخف من قدمه
"يابنت الكلب".. وهو يحاصرها فى ركن الحجرة
"يابنت الكلب".. وهو ينهال على وجهها وصدرها وكل ماطالته يداه بالخف
والطفلة تصرخ وتصرخ.. كل ما تبادر في ذهنها أنها افسدت شيئا لا يمكن اصلاحه.. انها تعاقب على مالم تعلم بعد ماهو
تحاول الام أن تذود عنها.. فتنالها الضربات
عاقبها الأب لأنها ارتكبت فعل الانوثة الأولي أمام شهود من الذكور
ذكور شهدوا فضيحة خروج طفلة من عالم اللامحدودية إلى عالم تحديد الهوية الجنسية..
تلك الهوية التي مافتئ البعض يتمنون لو اختفت من على ظهر البسيطة.. حبسا أو كبحا أو قهرا أو وأدا.. لا فارق..
كانت تعاقب المسكينة لأنها ولدت انثى
كان هذا المشهد وصفا لاحدى مشاهد رواية "السنجة" للعظيم احمد خالد توفيق
لا أدري لم اثار هذا المشهد حفيظتي للكتابة
أشعر بألم الانثى المغدورة عشر مرات على الاقل.. مغدورة في حقها للمعرفة، ومغدورة في معاقبتها على أنوثتها، ومغدورة في كافة فصول حياتها الآتية وحتى مماتها.. حين علمت أنها انثى بالطريقة الصعبة.

أقرأ هذا وأتذكر .. كيف كانت صدمة أنوثتي الأولى
أذكرها تلك الليلة.. أرتدي ثيابي السود التي فرضها علي هذا المجتمع المغلق استعدادا للذهاب إلى الحديقة.. غدا يوم عطلة وهذا هو المتنفس الوحيد لنا كعائلة.
لم أشعر بأي شيء.. فقط دخلت دورة المياة قبل ان أترك المنزل، وهناك رايت دلائل اكتمال أنوثتي الاولى تتبدى على استحياء
لم أصدم.. لم ارتبك.. بل والحق يقال كنت في انتظار تلك اللحظة.. بعد عمليات الاعداد النفسي التي خضعت لها على مدى عام كامل -  مذ أن لاحظت استطالة جسدي وانفجار وجهي بتلك الزوائد السخيفة التي تزيدني بشاعة - على يد أمي ومعلمتي بالمدرسة.
كان حديثنا نحن فتيات المدرسة يتحاشى دائما مثل تلك الأمور، وإن حاولت معلمة التربية الدينية أن تمهد لهذه المرحلة من حياتنا بشكل منهجي مطمئن، تصاعدت صيحات الاستنكار.. حتى أن من كانت تستقبل دروس المعلمة بجنان ثابت أمسى ضدها دليل إدانة لا يقبل الشك أنها صارت موصومة بفعل الانوثة الاولي.
كان يسيطر علينا الخجل.. رهبة الانتقال من عالم الطفولة اللامحدود إلى عالم يتم تصنيفك فيه حسب هويتك الجنسية..  عالم آخر لم ندر كنهه بعد، تتحفظ الامهات والشقيقات الكبريات حال الحديث عنه.. الكثيرات لو لم يتم إعدادهن في المدرسة كما حدث معي لصارت صدماتهن عنيفة للغاية كصدمة طفلتنا المسكينة "عفاف".
أتذكر يومي الاول.. ناديت أمي لأخبرها.. تقبلت الأمر ببساطة وكأنه شيء يحدث كل يوم، أعطتني ما يقي ثيابي من الاتساخ، وقالت هيا إلى الحديقة.
ذهبت حينها وكل ماكان يسيطر على عقلي فكرة واحدة.. أنا لم أعد طفلة.. ماذا سافعل؟... ماهو احساسي الان؟؟
هل ستعاف نفسي اللعب مع اصدقائي في الحديقة هذا اليوم؟؟.. هل ستقودني قدماي لا إراديا حيث تمجلست حلقات الكبار لأحذو حذوهن؟
هل سأستمتع مثلهن بجلسات النميمة والجلوس متخشبة لعدة ساعات على البساط الأرضي فوق أعشاب الحديقة؟؟
أقلقتني هذه الفكرة... أريد أن ألعب.. أريد أن أركض.. أريد أن أذهب حيث شئت وأتعارك مع الصبية.. كيف سافعل هذا اليوم وقد غدوت فتاة كبيرة؟.. هل سأضحي بكل مباهج حياتي الآن؟... كلا؛ إن هذا لن يكون.
وحينها اتخذت قراري حالما وصلت إلى الحديقة.. ركضت كما لم اركض من قبل، لعبت كل الألعاب التي طالتها يداي وقدماي، كان نشاطا مبالغا فيه فقط لأثبت لنفسي أن الطفولة اختيار.. وقد كانت هي اختياري.
وان لم يمنعني هذا من الاستمتاع بممارسة دور الناضجة على بقية الأطفال.. حين جمعتهم في حلقة كما الكبار.. لأقص عليهم قصص الأشباح والعفاريت وما يشاع عن مدرستي من وجود جثث متحللة تطوف الطرقات الخالية ليلا..
كنت سعيدة بشكل ما.. واثقة من نفسي، طمأنتني أمي حينما تعاملت معي بهدوء وبساطة.. فقط افعلي هذا واحذري من ذاك.. وحين دار كوكبنا حول نفسه عدة مرات آذنا باختلاف الحال.. علمتني أمي كيف أتخلص من آثار فعل الأنوثة الأولي.. كنت سعيدة بانتهاء التجربة.. حتى أنني أوصيت أبي يومها عدة مرات ألا ينسى أن يوقضني لصلاة الفجر كما اعتاد منذ بلوغي سن المدرسة.
تمر الأشهر.. وألاحظ تدريجيا الاختلافات تطرأ على سلوكي.. صرت أثقل حركة، وأكثر ميلا للهدوء.. وكل ماكنت اخافه وأهابه من افتقادي للعب مع الصبية في الحديقة اصبح مرحبا به في حياتي الجديدة.. اختلفت صداقاتي وإن لم أتخلص تماما من الطفولة الكامنة بداخلي..
اتذكر هذه المرحلة من عمري الآن وأنا على أعتاب نهاية عقدي الثالث.. كبيرة؛ أجل.. ناضجة؛ ربما.. عاقلة؛ لا أتوقع هذا كثيرا.. لكني أعلم أن بداخلي لازالت تلك الشيطانة الصغيرة التي تهوى الركض والقفز والمشي على الأسوار وإخافة الصبية بحكاياتها عن العفاريت
هل يتقدم بي العمر للامام أم يعود للخلف؟؟
حقيقة لا ادري ولا اهتم.. المهم أنني سعيدة
سعيدة بنفسي .. حتى لو نظر لي العالم على أني موصومة بعار الانوثة.. لن أهتم
فمنذ متى اهتمت الشمس بشهيب اخترق غلاف جوها.. بل أحرقته !!
قد يعترض الكثير على مثل هذا المقال.. قد يصرخ البعض بوجهي.. مافائدة الكلام في مثل "هذه الأشياء"؟؟؟.. نحن مجتمع محافظ لا يجوز أن نصرح بمثل "تلك الأشياء" الفاضحة على الملأ.
حينها سأجمع كل هؤلاء في زاوية ما.. لأضع عليهم بطاقة كتب عليها: هؤلاء هم السبب.. حاكموهم بذنب "عفاف" وكل عفاف تعيش في عالمنا
فما ذنب لنا إلا أن تواجدنا على ظهر الأرض مع أمثالهم في نفس التوقيت.

الاثنين، 6 مايو 2013

الشيطان اخره وسوسة




من فترة طويلة مش فاكره كام سنة بالضبط.. والدتي حكتلي عن قصة واحده حكتهالها عن شخص متجوز هي بتحبه – الواحدة اللي بتحكي لأمي – كانت جايه بتحكيلها وفرحانه ان الراجل ده طلق مراته
ليه بقى؟؟
اصل هو كان مسافر في مأمورية شغل والست كانت بتخاف تبات لوحدها راحت جايبه واحد زميلها في الشغل يبات معاها!!
قام الجيران اتصلوا بجوزها اللي جه جري على البيت وكانت فضيحة بجلاجل ورمى عليها يمين الطلاق
ساعتها سألت أمي: هو شافهم في وضع مخل؟؟
بصتلي على اساس اني المفروض ما اسألش سؤال بديهي زي ده... بس قالت: هي ماقالتش بس الست آل ايه بتخاف تبات لوحدها.. هى اللى جابته لنفسها، أكيد طبعا كان لازم يحصل حاجة.. ما اجتمع رجل وامرأة......
نبعد شوية عن الموقف الصريح وخليني ادخلكم معايا في الجو الفلسفي اللي وصلتله من الموضوع
مبدئيا انا مش هاقول ان موقف الزوجة دي صح ولا غلط.. مش مشكلتي ومش هاقول غير انها حطت نفسها في موضع شبهة مالوش اي تلاتين لازمة لو كانت فعليا نيتها صافية – واحسبها كذلك لأنى مش بحب افكر في الاحتمالات الأسوأ – ومش هاتني كلمة على موضوع وكان الشيطان ثالثهما لأنه أكيد كلام صحيح
بس لما يكون الشيطان ثالثهما.. هل ده معناه انه خلاص بقى امر مفروغ منه وغصب واقتدار ان يحصل بينهم "شيء مخالف"؟
بسرح بخيالي في غرفة فيها اتنين زي العرايس في حجم الكف ممسوكين في ايدين شيطان أحمر بقرون وديل زي ما بتصوره افلام الكارتون وهو عمال يحركهم زي ما كنا بنحرك العرايس وهما صغيرين ويمشيهم وينططهم ويقربهم لبعض
شكلها مش لايق .. مش كده؟؟
عشان فعليا مش ده اللي بيحصل
اللي بيعمل اي حاجة فى الدنيا بيعملها بإرادته الحرة.. ممكن يكون تحت كم لا نهائي من المشاكل والضغوط وحواليه وساوس النفس والشياطين اللي فى العالم
لكن فى الواقع مين اللي اتحرك؟؟.. مين اللي اتقدم.. مين اللي لمس؟؟.. مين اللي مسك الطبنجة وضرب النار على الثوار.. مين اللي مسك السكينة ودبح صاحبه عشان خمسه جنيه.. مين اللي اغتصب ومين اللي اتحرش؟؟
ارجوكم عيب نرجع الموضوع للقوى الخفية والضعف البشري
وعشان خاطري اوعى حد يقول دا قدر ومكتوب.. احنا مسيرين في الدنيا
اه احنا بشر واه احنا ضعاف.. بس احنا عندنا إرادة هي اللي بتخلينا بشر مكلفين
عندنا عقل من غيره يسقط عنا التكليف زى الحيوانات والمجانين - وماحدش يتضايق اني حطيتهم في خانة واحدة.. ياللي هاتتضايقوا المفروض تتضايقوا من نفسكوا انكم مش فاهمين الاتنين صح وكل فكركوا عنهم من الأفلام - 
ولو على منطق مسير ام مخير فانا مؤمنة إيمان كامل اننا مخيرين في كل حاجة في حياتنا
اه احنا مخيرين في اننا نعيش حياة من ضمن نطاق واسع من الاختيارات محدود داخل إطار محدود ببشريتنا احنا مسيرين جواه
ايه ... الكلام كبير؟؟
زي كده ديموقراطية محمد صبحي.. انت من حقك تختار أي طريقة انت عاوزها عشان تنفذ بيها اللي انا عاوزه
انت مخير.. من ضمن اختيارات على اتساعها محدود ببشريتك انت
انت مخير بين انك تكسب فلوسك بالحلال او تسرق عشانها او تنصب او تلاقيهم فى الشارع.. بس فى النهاية انت مسير فى ان مبلغ من الفلوس جالك النهارده
انت مخير عشان كده بتتحاسب
وضحت كده
ربنا عشان يخفف الحمل من علينا ادانا الفرصة ورا الفرصة.. اعمل الغلط وتوب.. انت مش بنى ادم لو ما غلطتش
انا خلقتك يابن ادم عشان تغلط وتضبش وتجرب وتقع وتقوم وتبتكر وتعمل كل حاجة انت تقدر عليها في اطار بشريتك اللي انا محددهالك
ولو ماعملتش كده هاجيب غيرك عشان يغلط ويسألني اني اغفرله
الخطأ صفة بشرية .. والمغفرة صفة إلهية
ودي اجمل حاجة فيها
تخيلوا لو كانت المغفرة في ايد بني ادم كان ايه اللي حصل ؟؟ J
يبقى خلينا نرجع تاني للقصة اللي كانت بتتحكيلي.. بكل الشماتة وسوء النية تجاه قصة حصلت اخدنا فيها دور القاضي والجلاد
وحكمنا غيابيا بثبوت التهمة مع سبق الاصرار والترصد والوصم والبصم انه حصل المحظور وكل واحد وخياله

وكلهم نسيوا او تناسوا......... ان الشيطان آخره وسوسة

الأحد، 14 أبريل 2013

سعادة.. حب.. فرحة.. رضى



احساس حلو قوي لما تعرف قد ايه انت كبير عند الناس
وقد ايه انت شخص مؤثر في حياتهم
وان حب الناس دى هبة ربانية بيرزقها ربنا لعباده عشان يقويهم بالحب

احساس جميل لما تعرف ان مهما زاد البعاد بينك وبين احبابك فهما برضه لسه فاكرينك
بحب اسمع قوي كلمة: ياااااااااااااااااه... فينك يابنتى من زمان.. والله مشتاقين :)
ولما اخرج في اى مكان حتى لو جديد عليا تماما... واحده واحده ابتدي اعرف ان اللي حواليا كلهم يعرفوني او بينا معارف مشتركين
بحس بالدفا ساعتها قوي.. وان الدنيا صغيرة
وانى مش لوحدي ♥

احساس جميل لما تكون السبب في فرحة حد 
سواء كان قريب منك او حتى ما تعرفوش
تطلع من قلوب الناس دعوة حلوة تخليك ماشي منشكح طول اليوم :D
لما تقول لحد كلمة بسيطة من غير قصد بس يكون ليها مفعول السحر عليه
تحسس الناس انهم مش لوحدهم.. عشان ده في يوم هايتردلك مهما حصل

يارب ارزق كل انسان فى العالم بفرحة كبيرة قوي تملا قلبه وتحسسه بالسعادة والرضى
حياتنا مش حلوة قوي.. دايما بنشوف فيها حاجة ناقصة
بس هى كمان مليانه حاجات حلوة.. المهم احنا بنشوفها من انهي زاوية
يارب املا قلوب كل الناس بالحب.. خليهم يحبوا بعض وخلي كل شر او كره يختفي من العالم
انا عارفه انه صعب.. ويكاد يكون مستحيل.. بس مفيش حاجة بعيدة عنك يارب

فكروا دايما في 4 كلمات
السعادة.. الحب.. الفرحة.. الرضى
انقشوهم على جدران قلوبكم وجوا عيونكم وف كل مكان حواليكم
ازرعوها على ارصفة الشوارع وفى الاراضي البور وعلى وجوه الاطفال

مين عارف
هايتردلكم ويتردلي امتى

ليلتكم سعادة وتفاؤل... وأمل

الثلاثاء، 9 أبريل 2013

ABC Test


كتير قوي من الناس سألوني: ياترى ايه هي مواصفات الزوج المناسب اللي انتي بتتمنيها؟
او: أي الرجال تحبين؟ .. أو: مين الراجل اللي ممكن يشد انتباهك؟
دا مش سؤال ممكن أعتبره خاص او شخصي.. قد ما بعتبره طريقة تفكير السواد الاعظم من الناس
بنشوف حوالينا علاقات كتير.. احيانا بتكون ناجحة جدا مع اننا جزمنا بفشلها من اول لحظة
واحيانا بنشد شعرنا ذهولا من التطورات المؤسفة اللي بتشهدها علاقة ما كنا شايفين انها ناجحة وتستحق دخول كتب التاريخ
دا غير العلاقات اللي ماشية بالقصور الذاتي.. يوم ورا يوم بيعدي والحياة بتمشي وخلاص
طب ازاي نعرف من البداية نحكم على العلاقة دي من قبل ما تبدأ اذا كانت هاتنجح ولا هتفشل؟
الموضوع صعب مش كده؟
عموما انا عندي طريقة.. هي مش ملكية خاصة، بس اكاد اجزم انها مفيدة جدا في الحياة واشكر الاشخاص اللي فتحوا عنيا عليها..
خليكو معايا..
ربنا لما خلق الانسان.. خلى جواه 3 قوى بتتحكم فيه
مفيش حاجة في حياة الانسان ده ممكن تخرج عن واحدة من القوى دي

A.      العقل
B.      الروح "العاطفة"
C.      الجسد "الغريزة"
فكر كده حواليك.. أي تصرف بيقدم عليه الانسان إما هو ناتج عن عملية عقلية او احساس عاطفي او غريزة من غرائز البقاء جواه.
كلام جميل.. حد هايسألني طب ايه علاقة ده بالارتباط؟
بتختلف مفاهيم الارتباط من شخص لاخر حسب طبيعة تفكيره واللي هو محتاجه
فيه انسان بيشوف واحدة حلوة وساعتها يدق القلب .. وبسسسس.. هي دي اخيرا لقيتها
فيه انسانة بتتعامل مع انسان وتحس انه طيب وحنين وبيخاف عليها وتبقى مش عايزة فى الدنيا غير انها تكون جنبه وتستمتع بالحنية دي
فيه اتنين مابنشوفش منهم غير نقاشات فكرية حامية الوطيس.. تحليلات نقدية ووجهات نظر.. وهوب مرة واحدة نلاقي الكوشة جمعتهم

بصوا شوية على الـ 3 نماذج دول.. حاسين بايه؟؟
تمام.. كل حالة لوحدها ما تنفعش تقوم بيت سليم.. كل حاجة على جنب كده هاتعمل علاقة ناقصة
محدش بيتجوز عشان الجمال بس ولا عشان الطيبة بس ولا عشان العقلية وطريقة التفكير بس
الجواز شراكة كاملة بين اتنين حياتهم قائمة على تفاصيل دقيقة كلها بتلعب في المساحة بين التلات زوايا دول
ومن هنا نشأ الـ ABC test

A.      العقل: مقصود بيه كل ما يتعلق بالتحليل المنطقى والتفكير المنظم وردود الافعال القائمة على التفكير
B.      العاطفة: مقصود بيها كل الافعال والاحاسيس النابعة من القلب مباشرة وردود الافعال العاطفية البحتة
C.      الغريزة: كل ماهو قائم على الغريزة ولا يتدخل به عقل او عاطفة
وكل نقطة منهم متمركزة في منطقة ما من جسم الانسان كما هو موضح في الشكل

عندنا هنا نقطتين ممكن يلخبطونا شوية
العاطفة والغريزة.. ازاي أقدر افرق بينهم؟
ممكن بني ادمة تشوف شخص ما ومن اول نظرة تتشد له وتحس انه هو ده حب حياتها.. وسهر ليل بقى وبتاع
ساعتها بكل ثقة هاقولها.. ان قرارها ده نابع من غريزة مطلقة وليس عاطفة.. العاطفة محتاجة تفاعل اكتر من كده وقرب وحوار عشان تقدر الروح تحس بمدى جمال الروح اللي قصادها
الغريزة أبسط من كده بكتير واكثر مباشرة والأسرع في التأثير... يمكن عشان كده بنقول دايما ان الحيوانات بتمشيها غرائزها
ودا بيبان فى التصرفات اللي بتعملها الحيوانات بشكل جماعي زي هجرة الاسماك وتحديد اتجاه البحر بالنسبة للسلاحف او بناء العناكب لشباكها فى اتجاه الجنوب وانفراد انثى الأسد بالصيد و..و..
معتقدش ان فيه حيوان قبل كده وقف مع نفسه وقفة وفكر.. هو انا بعمل كده ليه؟؟.. ولا هو بيحب طريقة حياته دى ولا لأ J
طيب.. نرجع لمرجوعنا تاني
مامدى التوازن او التكافؤ بين شخصين عقليا وعاطفيا وغريزيا
الاختبار ده المفروض الشخصين اللي بيفكروا فى الارتباط يعملوه مع بعض.. بس محدش يغش من التاني J
كل واحد يجيب ورقة وقلم
ويرسم الشكل اللي فوق ده وحط نقاط القوى التلاته على الرسم زي ماهو موضح
دلوقتي بقى كل واحد يسأل نفسه سؤال:
A.      الشخص ده.. متوافق معايا عقليا وفكريا قد ايه؟
طريقة التفكير والتحليل والنقاش.. هانحل مشاكلنا مع بعض ازاي.. مدى القدرة على استبصار الصواب والتصرف الصحيح في المواقف المختلفة.. وكل حاجة ممكن يكون العقل هو المتحكم الاول فيها
مش هانتكلم عن المثالية هنا.. هانتكلم عن التوافق بشكل اساسي
وحط درجة من 1 – 5 بحسب مدى التوافق العقلي ما بينك وبين الطرف الاخر
كل واحد فيكم عمل التقييم.. جميل جدا.. نتنقل على السؤال التاني
B.      الشخص ده.. متوافق معايا عاطفيا قد ايه؟
بمعنى.. حنيته وخوفه عليا.. بشاشته ورغبته فى اسعادى.. احساسه بالاخرين.. هايحب الاطفال زي منا بحبهم ولا لأ.. هايتسبب في انه يخليني اشعر بالحزن ولا لأ.. وكل ماهو له علاقة من قريب او بعيد بالعاطفة
خلي بالك.. ممكن تكون صفات الانسان عاطفيا مثالية جدا من وجهة نظر جميع الناس بس بالنسبالك انت حاسس انها اوفر
يعنى درجات بالسالب J
حط درجة التوافق مابينكو برضه من 1 – 5
وانقل على السؤال التالى
     C.    الشخص ده .. متوافق معايا غريزيا قد ايه؟

السؤال ده احيانا بتكون الاجابة عليه صعبة، خصوصا في مجتمع شرقي لا يتيح الفرصة للكشف عن الحياة الغريزية لشخص ما قبل الزواج.. عشان كده بيكون قائم بشكل اساسي على الاعتقاد
هل الشخص ده عاجبني من ناحية الشكل والمظهر؟.. هل الشخص ده هايحققلي الاشباع اللي بتمناه؟.. هل الست دي هاتملك قلبي ومعدتي؟.. هل الراجل ده كريم ومش هايخليني محتاجه لحاجة ولا بخيل وجلدة؟.. عدد الاطفال.. الشكل الاجتماعي.. وكل مايتمنى الشخص الوصول إليه غريزيا
حط كمان درجة من 1 – 5 وشوف النتيجة
دلوقتى عندنا 6 درجات لـ 6 تقييمات مختلفة
3 منها هو تقييم الرجل للمرأة والـ 3 التانيين هو تقييم المرأة للرجل
الدرجات دي لاتنفصل.. هانجمعهم كلهم على بعض ونشوف النتيجة النهائية كام من 30
وهانجيب النسبة المئوية ليهم.. حد عارف ازاى يحسب النسبة المئوية ولا اجيبلكوا حد من اعدادي يحسبها؟
تمام جدا
بقت عندنا فى الاخر نتيجة حلوة.. نسبة مئوية محتملة لعلاقة لسه فى بدايتها
النسبة دي مش بتحكم على العلاقة القائمة بالنجاح او الفشل.. يعنى ماحدش يقول انا جبت 60% يعنى احتمالات النجاح مش كبيرة وخلاص نفضها سيرة
الفكرة هي.. مدى التوافق بين الاتنين 60%.. فيه حاجات ممكن تكون اخدت الدرجة الكاملة عند طرف ما فى المقابل تكون اخدت درجة ضعيفة عند الطرف الاخر.. ساعتها ممكن الاتنين يساعدوا بعض من الناحية اللى هما الاتنين اخدوا درجة عاليه فيها
يعنى ايه الكلام ده
لو واحد من الاتنين شاف ان درجة شريكه العاطفية 1، وشريكه شاف ان درجته العاطفية 5, والاتنين درجاتهم العقلية والغريزية 5، ممكن ساعتها يتم تقويم القصور الموجود من الناحية العاطفية بمساعدة النواحى الاخرى.. دا يتطلب ذكاء وتمرين .. وصبر
وممكن اتنين تكون النسبة المئوية للتوافق مابينهم 90%.. بس الـ 10% ممكن تيجي في حتة قاتلة تماما بحيث مفيش اى حاجة ممكن تصلحها
بس اللي انا متاكدة منه.. ان النسبة دي لو قلت عن الـ 40%.. يبقى دي مش علاقة اصلا ولايمكن انها تتم او حتى تبدأ.. لان نقاط التقابل بين الشخصين لا تكفي لاقامة حياة كاملة.
بتسألوني دلوقتى عن الشخص المناسب ليا من وجهة نظري؟؟
هو الشخص اللي هاجيب معاه في الـ" ABC test" 100%
انا مش مثالية ومش كاملة.. بس انا بدور على الانسان اللي يتوافق معايا فكريا وعاطفيا وغريزيا بشكل يرضينا احنا الاتنين
والتوافق مش معناه اننا لازم نكون شبه بعض.. بس برغم اختلافاتنا لازم نكون بنلعب في حيز التعايش والتكيف مع بعض
متهيألي صعبة.. بس مش مستحيلة
مادام انا موجودة.. يبقى اكيد هو موجود :D