الجمعة، 24 ديسمبر 2021

امبارح حلمت

 امبارح حلمت

 بكل حاجة ودعتها.

بس لأول مرة أدركت..

 أنا ليه ودعتها غير مأسوف عليها.. 

وجبت القوة دي منين

 اني أقدر أفارق بسهولة كده.

امبارح حلمت.. 

بكل اللي كان داير في الكواليس..

 بالحاجات اللي اتمنعت عنك في ساعتها 

رحمة بيك. 

بالناس والخيبات اللي جت من وراهم..

بكل سكينة اتوجهت وكل طعنة اتضربت..

وماشفتهاش في ساعتها..

 او الحقيقة.. ماصدقتهاش..

شفت النوايا في الحدث..

 شفت طراطيش الكلام اللي من ورا الظهر..

 شفت المؤامرة واللي عملها

شفت وفهمت.. بعدين سكتت

 شفت حاجات عدى عليها سنين.. 

مافهمهاليش الزمن.. او كانت دي طريقته انو يقولي 

شفتي حميتك من إيه! شفتي بعدتك عن ايه؟

 ماكنتيش هتفهمي.. ماكنتيش هتقدري

كنتي طفلة بريئة وعبيطة.. وكان عاجبك شكل النار

 دلوقتي بس

 مسموحلك تعرفي. مسموحلك تفهمي

 تشوفي لمحة من زمن فات

شفت.. عرفت.. فهمت

وسكتت

جايز ارتحت.. 

وجايز زعلت..

بس الزعل .. عشان افتكرت

أنا شفت حلم.. شكرا للحلم

 لأنه فوقني




الخميس، 30 سبتمبر 2021

نقابة ‏المهن ‏العلمية.. ‏اقفلوها ‏أحسن

الاسم نقابة.. والفعل!!!
مفيييييش
بجد إيه لازمتها في الحياة؟
لاعارفه أستفيد منها ولا عارفه أعمل بيها حاجة ولاهي فارقة أصلا في حياتي وحتى لو طلعت معاش مش هأمل اني أخد منها حاجة
بجد هي موجودة ليه؟ لمجرد ان المفروض يبقى فيه نقابات  وخلاص؟؟
قريت من كام يوم خبر ان مبروك يا ولاااد .. أخيرا المعلشات بتاعت النقابة هتتصرف بعد توقف دام سنتين
اللي هو نعم!!
طبعا مش هاكلم على المعاش الرهيب الفظيع المريع اللي لا يتعدى ال ٥٠ أو ال ٨٠ جنيه أصلا.. وكمان مش قادرين تدفعوهم ياعرر.
وخناقات خناقات خناقات .. ومشاكل وفساد وبلا أزرق ونيلة على دماغهم.
طب إيه بجد؟؟... ليه يعني؟؟
أصعب احساس ممكن يمر على الواحد هو الاحساس بالتخلي.
يافرحتي بعلوم وسمعة علوم والدنيا كلها اتخلت عني.. لا شغل في المجال ولا تعيين وكمان ولا نقابة؟
أبص على خصومات الأشعات والتحاليل بتاعت النقابات التانية وببقى هعيط.. اللي هو فيه إيه؟ احنا مش بني أدمين للدرجادي؟
أعرف ان دبلومة التغذية العلاجية باخد مزاولة مهنتها من هناك .. مفيش دقيقتين وأعرف انهم ما بيقبلوش بتاعت الجامعة الامريكية وبيقبلوا بتاعت معهد التغذية وبنات عين شمس! اللي هو انتو مجانين وكمان معفنين!!!
لا بجد قولولي انتو لازمتكو ايه؟؟؟؟
شكرا يا علوم على كل حاجة عملتيها معايا.. ولو استفدت منك بحاجة فدا عشان انا اللي عملت مش انتي.
إلى مزبلة التاريخ.. 

الأربعاء، 8 سبتمبر 2021

مشاركة ‏وجدانية.. ‏وثرثرة ‏اخر ‏الليل

أنا زعلانة قوي على مايكل جاكسون
وزعلانة على مارلين مونرو وعلى الأميرة ديانا
زعلانة على كل حد مهما كان القمة اللي وصلها فهو عايش مأساة حزينة ومؤلمة وتهد جبال
زعلانة على كل شخص بيسعد اللي حواليه حتى لو هو مش سعيد وبيتألم.
وانا صغيرة كان نفسي أكون صديقة لمارلين مونرو.. الصديقة اللي تعتمد عليها وتحبها وأكون سبب انها ماتحسش بالوحدة في العالم.
ومعما تمر السنين والأحاسيس الطفولية دي لسه جوايا
حايه ان أي حد حزين أو متألم نفسي أشيل عنه وأحسسه انه مش لوحده..
بس في نفس الوقت.. والجديد بقى
اني ابتديت اقتنعان انا مش صديقة كوبسة ولا حاجة.. ومقدرش أشيل عن حد شيلته.. 
مقدرش أوعد حد اني هكون جنبه وانا عارفه اني مش هعمل كده.
في يوم وعدت واحده اني هكون جنبها في مناسبة حزينة وماقدرتش.
ووعدت نفس الحد اني هكون معاها في مناسبة مهمة وماقدرتش
وتفوت سنة ورا سنة والوعد ده مقيدني لدرجة تخنق.. للأسف الذاكرة انتقائية بزيادة وبتحب تركز على شوية حاجات سخيفة وتنسى حاجات تانيه بطريقة أسخف.
انا اخري أتعاطف وأشيل مشاعر كتير جوايا لكن ما اعبرش عنها وافضل بعيد .. دا الاحسن
انا بحب قوي.. بحب الخير وبحب الناس وبحب اكون محبوبة.. لكن الحب التزام.. ومش شايفه نفسي قده.
يكفيني التزامي بحياتي الشخصية.. وأخلى عقلي وروحي في العالم الواسع.
المشكلة ان كم المشاعر ده مربك جدا .. وكأني بعيش ألف حياة تلنية بتسحب فيها من قفايا غصب عني .. بحس بأحاسيس ناس تانية وبعيش معاناتهم وافراحهم وافكارهم البسيطة.. بتبنى وجهات نظرهم وبنفعل ليها وكأنها تخصني.. يمكن ده اللي بيحسسني بالأحاسيس دي ناحية جاكسون ومونرو وديانا!

من كام يوم قررت اتواصل مع العالم وابعت رسالة للناس اقولهم اني بحبهم.. انا بتواصل واكيد قاصده رد فعل ايجابي ما.. لما جه الرد ارتبكت وخفت وكنت همسحالبوست.. وكأني عاوزه استخبى وادوب ومحدش ياخد باله مني.
بترعب من لفت النظر معاني بطلبه وبجري وراه
دي تروما دي ولا تغيير في الشخصية ولا ايه مش عارفه

غالبا .. غالبا.. انا حاسه بفراغ اكتر من اللازم مخلي دماغي تنشط في اتجاهات غريبة.

قومي نامي احسن

الجمعة، 2 يوليو 2021

سيدة ‏السفينة

فيه ناس بتشبه حياتها بمحطة القطار.. واقفين في المحطة وبيعدي عليهم قطار الدراسة وقطار الشغل وقطار الجواز.
اللي بيلحقهم.. واللي بيفوتهم.
وفيه اللي بيشبه حياته بالقطار نفسه.. قاعد على الكرسي وبيعدي بالمحطات دي ومحطات تانيه في حياته.. بيشوفها من قزاز الشباك، يطلع منها اللي يطلع وينزل اللي ينزل، يتحرك القطار لمحطة تانية وهكذا.
لحد ماتيجي محطته النهائية.. وينزل من القطار.
أنا بشبه حياتي برحلة بحرية.. سفينة سياحية بتلف المواني، وعند كل ميناء ترسى والناس تنزل تتفسح شوية ويرجعوا يكملوا الرحلة تاني.
والرحلة نفسها غنية.. البحار والمحيطات مابتشوفش غيرها باتساع مجال الرؤية ومعاها احتمالات لانهائية بأحلام وفرص.. تنزل الميناء تلف وتشوف وتعيش تجربة مختلفة على قد ما وقتها وظروفها تسمح.. وترجع تاني تسيب الميناء وتدور على مغامرتك الجديدة.
علوم كانت ميناء.. المجتمع المدني كان ميناء.. الكونسرفاتوار والأوبرا كانوا ميناء.. أنا مصري كانت ميناء.. كل ميناء فيهم له طعمه وله ذكرياته اللي حبيتها أو كرهتها..اتعلمت منها وعمري ماهنساها.
وكل ميناء طلعت منها بهدايا وتذكارات أخدتها معايا على السفينة وبتفكرني بيها.
بعد كل زيارة من دول..بركب سفينتي وأبحلق في البحر الواسع والسما .. اغوص في اللاشيء واطلع ب possibility جديدة.. البحر او الطريق هو اللي بيديني الوقت افكر وادور جوا نفسي.. اكتشفها وأطلع بطاقة جديدة وتوجهني ناحية الميناء اللي جاي.
وأنا دلوقتي داخله على ميناء جديد.. ❤️

الثلاثاء، 22 يونيو 2021

أرتورو ‏رومان.. ‏والكراهية ‏الموجهة

حد شاف مسلسل Money Heist؟
أو لو هنقول اسمه الحقيقي الأسباني La casa de pepel.. ويارب أكون كتبتها صح؟
لو متابعه هتعرف أنا بتكلم عن مين.. ولو مش متابع هقولك اني هتكلم عن شخصية لزجة سئيلة مريضة وجبانة.. وواقعية جدا.
شخصية مكتوبة مخصوص عشان تكرهها.. برغم انه بالمقاييس العادية الطفولية يعتبر في الجانب الطيب اللي تبع العدالة وبيحارب الأشرار.
مدير دار سك العملة الأسبانية اللي حصل عليها هجوم من مجموعة لصوص هدفهم انهم يطبعوا فلوسهم بنفسهم واحتجزوا ٦٧ رهينة ومعاهم ترسانة أسلحة جيوش كاملة.
وكل اللي كان بيعمله انه بيحاول يقاومهم ويخرج الرهائن ويحقق بطولة ما.. حلو لحد كده؟.. يتكره ليه ده بقى؟
اتقل على رزقك..
على علاقة بالسكرتيرة بتاعته وحملت منه.. ولما قالتله الخبر تنصل منها لأنه متجوز وعنده ٣ أطفال!
مش عارف يختار بينها وبين مراته.. عاوز الاتنين بس مش عاوز مسئولية الطفل..في البداية على الأقل..
هتقاطعني وتقولي.. دي مسألة شخصية.. والمفروض نفصل بين الأخطاء الشخصية والتهديدات الإرهابية ومش سبب كافي اننا نكرهه..ممكن..
بس المسلسل ده قائم على الإنسانيات بشكل أساسي
العصابة اللي انت هتحبها وهتحب سلاحها عشان هتحب إنسانياتها.. هتحب علاقاتهم ومبادئهم وهتعيط معاهم.. هتتغاظ منهم لكن مش هتكرههم.
لكن ببساطة هتكره أرتورو رومان.. لأنه داس على الصورة الانسانية..
لما حب يعمل بطل استخبى ورا أي حد زي الجبان.. يحرض على الثورة وهو مش قدها.. نجحت كان بها.. مانجحتش هو مالوش دعوة.. حتى لو وسوس لطفل او طفلة.. حتى لو ضغط على أعصاب ونفسية الناس وأجبرهم انهم يعملوا اللي فوق طاقتهم.. حتى لو استغل سلطته وهدد الناس.
لما حب يعمل بطل ويهرب الرهائن أول حاجة فكر فيها أنه يسرق الفلوس اللي العصابة بتطبعها.. يعني حرامي كمان!!
مع أنه وظيفيا عارف ان الفلوس دي هتسبب تضخم للاتقصاد.. بس وهو مهتم ليه؟ مافيه عصابة هتتحمل كل المسئولية.
ولما حياته اتدمرت بعد ما خرج حب يعمل فيها بطل ومتحدث على المنصات.. لكن الدافع الوحيد له هو الغل.. الفراغ.. الجوع للبطولة.
السرقة دي حبسته جواها لدرجة ان العصابة لنا هجمت على بنك إسبانيا اللي فيه احتياطي الدولة من الدهب والأسرار كلها ماقدرش يمسك نفسك وهرب على جوه.. ببساطة مالوش حياة بره.
وحب يعمل بطل تاني.. بس بقذارة بقى.. وهعتبره قدامي وأقوله اللي في نفسي..
أولا.. والنبي.. عشان خاطري.. الكلام التحفيزي والهبل ده ماتديهوش لحد مش محتاجه عشان شكلك بقى عبيط قوي
ثانيا.. نفس الpattern القديم.. وسوس للناس عشان يعملوا اللي انت مش عارف تعمله.
بس لو عاوز تبقى بطل ياريت هرموناتك ماتخونكش وتخليك تتحرش وتغتصب وانت عامل فيها الصدر الحنين و تخدر ضحيتك.. وترجع تشكك في كلامها وتتهمها في عقلها وتتريق عليها.
ماتجرحش في الناس وتتهمهم انهم معندهمش الرجولة الكافية عشان يجعجعوا زيك ويبقوا عبط.
مونيكا سابتك زي مانت سبتها.. بس نفسيا بعد مافقدت مراتك.. اللي هجرتك واخدت العيال وماعرفتش تعمل حاجة زي العبيط.. بلاش تخرب عليها حياتها وتضغط عليها وتسببلها مشكلة بينها وبين دنفر.
م الاخر.. الدور مخليني عاوزه ادخل جوه الشاشة بسكينة واقعد اقطع فيه على مهلي..
وهكذا يا سادة.. السينما او المنصات عرفت تكرهنا في شخص المفروض انه مع الحق.. لما شخصنت الموضوع.
وانا كبني ادم متفرج عادي جدا شايفه المؤامرة قدامي ومبيوطة عادي وبكره اللي المفروض أكرهه لأن مش طبيعي اني اقعد أتفرج وأحلل ٢٤ ساعة.. منا بتفاعل وبنفعل وبعيش قصص .. وفي الاخر بدور على ساعة entertainment قدام نتفليكس.. وعادي جدا شايفه الاتجاه العالمي وهو بيعظم من أدوار الشر وبيحبب الناس في الشرير وبيطلع الطيبين وحشين .. وعارفه ان ده كله بغرض خطة ما وبلا بلا بلا كتير كده.
بس كل ده مش هيمنعني اني أحب العصابة الحرامية وأكره الحكوميين العالميين.. وأول من هكرهه
أرتورو رومان.


الجمعة، 18 يونيو 2021

عن الموتى.. والمنسيين.. وخشبات مسرح

 


حلمت بسيد زيان الله يرحمه

كان قاعد في مكان.. راجل كبير في السن.. مرهق، إجهاد السنين ووجع جهل الناس معلمين عليه.

سلمت عليه بفخر.. ورد السلام بفرحة.. قعدت معاه أديله شوية ونس.. وزي أي كبير في السن قعد يحكي عن ماضيه.

كلمني عن مسرحية ما عملها في شبابه واعتذرتله بخجل اني ما اعرفهاش مع وعد اني "أذاكرها".

كلام في الهوا.. بريح بيه روح إنسان

تاني يوم كان فيه مسابقة.. المسرحية دي أسئلتها.

وماعرفتش أجاوب.. كان يوم funfuna عادي

وبعدها قعدت مع صديقة من المدونين.. كانت بتلومني على شيء ما.. وبتفكرني بصديقة تانية كنا بننصحها زمان بنفس النصيحة.. وإزاي تقعي في نفس الموقف.. وأنا كنت بقولها ان اللي ايده في الميه مش زي اللي إيده في النار.. وخلص الحلم.

صحيت بفكر في سيد زيان.. وفي الناس اللي بتموت وحيدة.. منسية.. 

افتكرت اللحظة اللي عديت فيها من جنب محمد نجم الله يرحمه عند مستشفى أبو الريش الياباني لو كان دا اسمها.

راجل كبير في السن.. بيدور على المعرفة في عيوني، وانا حرمته منها.. كانت لحظة خاطفة وكملت طريقي مافكرتش أبص ورايا .. جايز هو عملها وجايز كمل طريقه.. مش متوقع ان واحدة من جيلي ممكن تعرفه.

لقيتني بدخل أدور على تاريخ وفاته.. طلع 2019.. اتصدمت بصراحة..

مات من سنتين اتنين !

كان عايش كل ده ومحدش يعرف.. محدش فاكره.. كنت فاكراه ميت من زمان قوي.. انا شفته في 2008 او 2009.. 

ياترى الوحدة هي اللي قتلته؟ هي اللي سببتله السكتة الدماغية؟ ولا الألم؟

افتكرت بعدها " محمد أبو الحسن".. اللي ماكنتش فاكره اسمه وعارفاه انه " شفيق جوز فوزية في مسرحية سك على بناتك"

اتعمل معاه حوار وكان متفاجئ ان الناس لسه فاكراه وما افتكروهوش مات..

انا ماافتكرتش اسمه إلا دلوقتي.. وعشان أعرف عايش ولا ميت لازم أدخل أدور.

وانا بدور على محمد نجم.. عدى من قدامي اسم مسرح فريدة سيف النصر

سرحت في فكرة.. هو امتلاك مسرح خاص أيام زمان كان سهل قوي كده؟ ولا الناس اللي عملت مسارحها الخاصة دي كانت ناس كبيرة قوي.

محمد نجم كان عنده مسرح.. فريدة سيف النصر.. جلال الشرقاوي.. وأخر حد كان عنده مسرح كان عادل إمام بمسرح الزعيم.

هل فترة الإيمان بالمسرح راحت مع الثورة؟ 

بشوف محاولات إحياء للمسرح بس مش حاسه ان الناس مهتمة زي زمان.. وكأن الأيام دي ولت

حاجة متحفية تتفرج عليها من بعيد لبعيد أو تتعلم منها قبل ما تخش مجال التمثيل السينمائي أو التليفزيوني.. أو تضيع فيها وقتك في فرق الجامعة قبل ما تتخرج وتواجه الدنيا.. ولو حبيت تكمل هتبقى من الناس في الفئة رقم اتنين.

معرفش.. بس بقيت حاسه ان المسرح دلوقتي بقى من التراث.. والمجد للـ streaming والأونلاين.. أنا حتى ما بشوفش تليفزيون.

وكمان افتكرت.. سامي مغاوري.

لحظة شفته فيها في الأوبرا.. كان بيبصلي.. يمكن مستنيني أسلم عليه.. أنبسط اني شفته.. بس ماعملتش كده.

وكأني أكبر من اني أبين مشاعر فرح أو انبهار بحد مشهور.. أو شايفه اني كده تقيلة وكوول..

ونسيت ان الناس دي أهم حاجة عندها انهم يحسوا بالحب.. نظرة الحب والتقدير من جمهورهم.

ماعرفتش ده إلا لما اتحطيت في مكانهم .. ووقفت على مسرح واستنيت الحب.

بقالي كتير عندي الاحساس ده.. اني حاسه اني مديوناله باعتذار.. وحب.. وكلمة شكر.

انت مارد وشوشني اللي ماحصلش ولا هيحصل زيه.. انا بحبك.. بقولها حتى لو مش هتوصلك.


من الناس اللي كنت فاكره اني شفتها برضو.. حسن عابدين.

يمكن لحد ربع ساعة فاتت كنت مصدقة اني شفته بشحمه ولحمه.. لحد لما عرفت انه مات سنة 1989..

أكيد ماكانش هو.. ممكن يكون شخص شبهه.. أو ممكن يكون هو!

عمرك صدقت انك ممكن تشوف شخص ميت ماشي في الشارع؟ أو قاعد قدامك؟

ممكن يكون لابس شخص تاني.. مش زي تلبيس الجن.. جايز مش عارفه أشرح قصدي.. بس..

حصلت معايا قبل كده.. واقفه على مسرح وبغني.. وشفت من الحضور جدتي الله يرحمها.. هي.. بابتسامتها.. وفستانها الازرق

تنحت وفضلت باصالها.. ويمكن الناس أخدت بالها

وبعد الحفلة نزلتلها.. لقيتها واحده تانية.. بفستان أصفر.. ونظارة.

معنديش تفسير منطقي.. جايز Illusion عادي جدا.. بس جايز أنا اللي مش عايزه أفسره كده

جايز عاوزه أصدق انهم موجودين حوالينا وبيتواصلوا معانا

أو أنا فعلا مصدقة كده.


وبعد كل ده.. ماعرفتش أنام تاني.. غالبا اتمرنت بوزن زايد أكتر من اللازم.. أتمنى ما اكونش سببت لنفسي مشكلة.

الأحد، 7 مارس 2021

كلمتين ‏أفتكرهم

انتي انسانة جميلة ومليانة طاقة..  ومش ضروري الناس اللي حواليكي زيك او هتفهمك
كوني نفسك بكل ظروفك..  وماتتغيريش لحد او عشان حد. 
الناس هتفضل عنصرية وطبقية وكل فصيل بيكره اي حد مش زيه..  ابعدي عن كل ده..  خليكي وسط اللي شبهك. 
دايما بتحاولي تتعرفي وتنفتحي وتقربي وتنزلي للناس ومستنية انك تلاقي المقابل وبتزعلي لما مايحصلش..  وأخيرا أدركتي الواقع البسيط اللي انتي فيه واللي مش هيتغير. 
فياريت انتي كمان تقدري قيمة نفسك وماتتغيريش عشان حد..  اتغيري للاحسن عشانك انتي.. حاوطي نفسك بالأحسن عشان انتي تستاهلي ده..  وبطلي تجلدي ذاتك،  حبي نفسك شويه على سبيل التغيير..  هي تستاهل تتحب. 
بطلي تجري ورا اللي باعك،  افتحي صفحة جديدة واقطعي القديم وارميه..  الصاحب الحقيقي بيتعرف في مواقف معينة،  واللي صعبانه عليكي عشرتهم هما اللي باعوا وخسروا كمان. 
ارجعي اقري الكلام ده كل شوية عشان ماتنسيش انتي مين وقيمتك ايه..  وهتبقي في أحسن حال. 

الاثنين، 1 مارس 2021

توازن. ‏. ‏ ‏واختيارات

حياة الواحد قائمة على اختيارات..  والاختيارات دي هي اللي بتحدد الطريق اللي هتمشي فيه. 
والاختيارات لازم تحقق نسبة معينة من التوازن اللي بيرضيك عن عيشتك،  وعشان تحقق التوازن ده لازم هتتخلى عن حاجات في مقابل حاجات تانيه هتكسبها. 
الانسان طماع بطبعه..  وبيحب يكدس كل حاجة ويعمل كل حاجة ويبقى أحسن واحد في كل حاجة (بلاش أعمم وأقول الانسان وخليني أتكلم من وجهة نظري أنا)..  أحيانا الواحد بيمشي في طريق وحاسس انه هو ده،  بس في نفس الوقت بيبص على حاجات تانيه هو  يقدر يعملها وبيقول انا عاوز من ده وهو ده اللي هيديني اللي انا عاوزه،  يسيب الطريق الاولاني ويمشي في التاني ويرجع يقول منا كنت بعرف اعمل الحاجة الاولانية ودي انا وبتاع..  ويلاقي نفسه في وسط الطرق وبين السكك ومش عارف يمشي بجد في حاجة حقيقية لأنه ببساطة ماحددش أولويته. 
انا مش بقول ان الواحد لازم يبقى حاجة واحدة او يعمل شيء معين..  الانسان هو مجموع تجارب وخبرات اكتسبها عبر السنين..  وماينفعش الانسان يتوصف بمرحلة واحده في حياته او شيء واحد بيعمله..  بس لازم يبقى فيه أولوية في الحياة يديها حته أكبر من وقته وذهنه ومجهوده ويزق نفسه فيها لقدام (وهو ده تعريفي للكارير)..  
أنا فلكية..  ومغنية.. وبعمل مسرح عرايس ومسرح عادي وغنائي..  انا كاتبة وقارئة وروحانية..  انا بعمل meditation وعاوزه أمارس يوجا بجانب تدريب الفتنس.. بعرف انطق أي لغة وبتعلم بسرعة وعندي شغف اعرف اي حاجة وكل حاجة. 
انا بحب المشي والجري وبتعلم ألعب تنس أرضي وطاوله..  أنا بحب الناس  وأبقى وسط الناس. 
كل حاجة بعملها بتقنها ودي ميزة،  بس مش لازم كل حاجة بعرف اعملها تبقى هي الكارير بتاعي. 
انا ممكن أسيب بصمة في العالم بأي شكل،  مش لازم اخد نوبل،  مش لازم ابقى الانسان المثالي على ظهر الكوكب،  مش لازم ابقى ملكة الأرض. 
اهدي شوية على نفسك وركزي..  جميل الانطلاق في الحياة وجميل الشغف،  المهم الواحد يعيش مبسوط مش كده؟  بس ماتقوليش ان ده كارير مادام مابيطلعلكيش منه فلوس مستدامه. 
بفكر نفسي وهفضل افكرها..  انتي جميلة ورائعة وعندك كل مقومات النجاح..  محتاجة بس شوية ركوزوهتبقي زي الفل. 
وهرجع اقول اختاري..  اختاري وركزي عاوزه تعملي ايه،  وحطي الحاجة في أولويات وهتبقي زي الفل. 

وبس كده. 😊

الأربعاء، 27 يناير 2021

حلم ‏فيلم

حلمت اني جوا طيارة،  والطيار بتاعها هو (أنتوني هوبكنز)  وكان قاعد جنبي ابن الطيار اللي هو (لي مين هو)..  ابن الطيار شاب مهذب جدا وناجح لكن فيه مشكلة ما بينه وبين أبوه..  أبوه مش قابل بيه من صغره والابن بيحاول يثبت نفسه لأبوه بأي شكل. 
تحصل مشكلة ما في الطيارة يقوم الأب يقتل ابنه بعد الاقلاع ويرمي الجثة من الطيارة. الابن كان قاعد جنبي وانا حسيت بغيابه وابتديت أسأل..  كان قاعد حواليا شلة جوالة كلية الزراعة بياكلوا تورتات ومكبرين دماغهم..  الطيارة كان من ضمن ركابها محقق (المحقق اللي كان في My Holo love) هو الوحيد اللي اهتم بالموضوع ويبتدي ينخرب ورا الحادث. 
الطيار بينفي ان ابنه كان من ضمن الركاب أصلا..  والمحقق كان عمال بيستعرض تفاصيل حياة الولد..  ازاي انه ناجح ومتفوق ومتخرج من كلية كبيرة جدا مع ان أبوه ماصرفش عليه مليم..  ساعتها الطيار يقوله ان الولد أخد منحة دراسية كاملة،  والمحقق بيوصفه انه ال Golden boy بس حس ان الاب مش فخور او مش مهتم كفاية وابتدى يشك. 
كان فيه دليل ما على موبايل والطيار منع أي حد من عيلته (ماما ومها) انه يستعمله..  والموبايل في أوضة مراته والباب مقفول.  رحت أقنعت البنت انها تخبط على أمها وتقولها ان مفيهاش حاجة هو هي (الام)  استعملت الموبايل عشان تشوف اي حاجة هي عاوزاها وفعلا اول ماقفلت الباب فتحت الموبايل وقعدت تتصفح حاجات،  واحنا من بره بموبايلاتنا بنحاول نوصل لحاجة معينة مرتبطة بالموبايل الدليل لحد ماوصلنالها.  والأم حست أو عرفت وطلعت من الأوضة ( اوضة طنط مايسة وعمو زكريا)  وكانت زعلانة ومستاءة وبتهدد بنتها وبتقولها كلام مش فاكراه دلوقتي لكنه يوجع. 
ورجعت تاني للكرسي بتاعي في الطيارة وفريق الجوالة لسه عمالين ياكلوا تورتات وجاتوهات بالفراولة والشيكولاتة وبيعزموا عليا..  وأحمد سعيد اداني ساندوتش وقالي مافيهوش كالوريز كتير ومن وصفه عرفت انه عيش كيتو..  أخدت الساندوتش ووديته للطيار عشان ياكله وفرصة اني أدخل جوا الكابينة وأراقب. وهو تقريبا حس وخرجني بره في الطرقة وقفل الباب.  كان قدامي صندوق مستطيل كبير معرفش دلوقتي كان بتاع ايه،  ودخلت على الدرجة الاقتصادية في الطيارة ومرة واحدة الطيارة اترفعت بزاوية حادة لفوق رحت واقعه على الأرض وكان قدامي المحقق قاعد ورابط الحزام. 
في أوضة الطيار هنلاقي مجلات مصورة هو بنفسه مألفها كقصص أطفال..  الطيار قعد يتفرج عليها.. اول قصة كان فيها تمساح كبير وابنه تمساح صغير كان بيجري ويهرب لحد ما سفينة كبيرة خطفته وهي بتترفع وتطير في السما والاب عمال يصرخ في ابنه عشان يرجع..  الطيار شكله كان متأثر قوي لدرجة انه كلم المحقق بنفسه واعترف انه هو قتل ابنه فعلا..  الولد دخل جوا كابينة القيادة وكان بيتكلم مع ابوه ومسك حاجة زي شفاطة شفافة زجاج ومليانة بودرة بتلمع كأنه زجاج مطحون والاب راح خبطه بحاجة على دماغه عشان يمنعه ومات بدون قصد. 
بعدها بيتغير المشهد تماما وبشوف المحقق جوا بيت فيه اعداد كتير من مجلة الاطفال اللي الطيار ألفها من مدة طويلة..  كان ده بيت الابن الميت وكان محتفظ بكل اعداد المجلة،  مجلة بيقراها كان فيها طفل افريقي خطف حاجة وبيجري جوا سوق فاضي تماما وخايف عشان حد بيجري وراه وبيستنجد بكلامه وبعيونه.  المحقق لاحظ ان القصص دايما بتتكلم عن طفل ايا كان نوعه او شكله ودايما حد بيجري وراه ودايما أبوه خايف عليه.  وقدر يوصل لتفكير ان الاب او الطيار مش زي ماهو بيدعي انه مش مهتم بابنه. 

والحلم وقف لحد كده..  ومش قادره أفتكر تفاصيل تانية. 

الأربعاء، 6 يناير 2021

خيال ‏لواقع

مش لاقيه اسم للتفكير اللي هفكره دلوقتي
ومش ده موضوعي دلوقتي.
بس الفكرة ألحت عليا في لحظة.
دلوقتي على مستوى المؤسسات الفنية من ساعة ماطلعت.. فيه رعاة بيرعوا فنانين، والفنانين بيطلعوا تلاميذ ليهم.. ماشي؟
التلاميذ دول بياخدوا منهج أساتذتهم ويكملوا بيه ويضيفوا عليه عشان الحركة الفنية تتطور وهو ده اللي طلع الجديد على مر الوقت..
طب دلوقتي نفترض ان فيه جيل معين كانوا عظماء وكل حاجة بس أنانيين وقرروا انهم ما يعلموش حد.. ..وجيل التلامذة بتوعهم طلعوا جهلة ومايعرفوش حاجة.. ولما كبروا واخدوا دورهم كأساتذة ماعرفوش يعلموا حد..ومش فاضيين حتى يشتغلوا على نفسهم فن بجد والموضوع قلب معاهم سبوبة خالصة مخلصة.. والتلامذة بتوعهم طلعوا شيطاني كده مايعرفوش حاجة ولا عاوزين يعرفوا حاجة لانهم اتربوا على ان الفن سبوبة وأكل عيش..
وجيل أساتذتهم تفنن في انه يمحي أي منافسة ويقضي على أي بديل ممكن ييجي ياخد مكانه وفعلا بقوا هما اللي اخدوا زمنهم وزمن غيرهم.
فبقى عندنا تشوه ما... جيل عجوز وجاهل مسيطر .. والجيل اللي أصغر منه جاهل وحتى مش هيعرف يكبر ويبقى عنده تلامذة في يوم من الأيام.
اللي هيحصل ان السن والزمن أكيد هيخلص (إن لم يكن الأوبئة) .. وهيتبقى الفراغ..
فراااااااغ
مفيش جيل يعلم.. ومفيش حد يتعلم
ساعتها هيحصل حاجة من اتنين
يا إما تخبط رهيب.. وأي حد هيحاول يمسك ويطلع ويعمل أي بتنجان لحد ما الcorrection يحصل مع نفسه.. ولازم دا هيحصل مهما طال الوقت لان العقل البشري مفطور على التطوير.
يا إما هيحصل استعانة بأطراف خارجية من ناس فاهمه الفن صح.. ونبتدي من نقطة الصفر تاني.
هي مش هتبقى صفر قوي.. يمكن الاعتمادية هي اللي أقصد بيها نقطة الصفر باعتبار اننا لسه هنربي كوادر من أول وجديد.. بس دا في حد ذاته هيبقى شيء صحي لأننا هنبدأ من حيث انتهى الاخرين.
هل اللفة دي مقتصرة على الفن بس؟ 
إطلاقا
هنشوفها في أي حتة فيها ناس المفروض انها تنقل رسالة وتعلم بس كانت أنانية وغير مسئولة وتسببت انها تكسر ال flow ده، وتمشي ضد القوانين الطبيعية.
كل اللي الموضوع محتاجه شوية وقت ي wash away الفيروس اللي سبب الخلل عشان السيستم يرجع تاني.
والcorrection هيحصل هيحصل.
وادينا مستنيين.