الخميس، 29 ديسمبر 2011

اول واخر

زمان قالوها في الامثال
ياما دقت ع الراس طبول
وانتو لا أول ولا اخر ناس
تجرحني.. تظلمني
وتسيل دمعي على خدي
لانتو اول ولا اخر ناس
تزيف.. تدلس
ترمي الضحكة قدام الوش
وتغيب خناجرها ورا ظهري
ماقدرش ألومكم او اعاتب
الذنب ذنبي اني مافهمتش
ولا اتعلمت
ان الوشوش واحدة كما القلوب
والعبيط اللي ينجرح ولا يتوب
خليني كده
اعاني هموم الطيبة ف قلبي
واشتكي وجعي للمخدة
بكرة الايام تلف تلف
والزمن يشيل الذكرى
حتى لو ندوبه ملتني
وفضلت فاكرة
مش لازم انسى
اني رجعت تاني اقول
انا استاهل اني اتغشيت
ولا انتو اول ولا اخر ناس
أقول ماخلاص
بقوا خبر كان

الأحد، 25 ديسمبر 2011



زمان قوي
كنت ببص للسما
وأشوف السحاب عالي قوي
اعلى حاجة قدام عنيا
عشان كده لما كنت بتخيل شكل ربنا
كنت بتخيله شبه السحابة
عنده وش زي البشر
وعشان ينزل علينا المطر
كان بينفخ جامد اوي في السحاب اللي حواليه
ولما يخبط السحاب في بعض يطلع شرار
وينزل المطر
وكبرت شوية
وحاولت ابعد الصورة دي عن دماغي
فيه الاعلى من السحاب
فتخيلته شخص رجولي.. مش قادره أحدد ملامحه
بيبص علينا من فوق السحاب
ومستخبي وراه
وعشان ينفذ أي مشيئة
كفاية انه يشاور بصباعه عشان تتحقق


وكبرت حبه كمان
ولما حسيت ان اللي فكرت فيه ده حرام
اكتشفت اني مش لوحدي اللي تخيلت شكل ربنا
ابراهيم من زمان
رفع عينه للكواكب والشمس والقمر
وقال هذا ربي
ماعرفش كان عنده كام سنة
بس اكيد كان اكبر مني


وفيه الاكبر واكبر مني
وعلى حيطانهم راسمين صورة ربنا
بس من جوايا
مش مهم أشوف ربنا
مادام هو دايما جوا قلبي
وبحس انه جنبي 
حاميني.. راعيني.. بيحبني
يمكن بزعله كتير وعارفه اني هازعله اكتر
لكن ماقدرش استحمل فكرة انه زعلان مني
لاني بحبه قوي


بحبك يا ربنا.. ونفسي تفضل تحبني على طول

ليه؟



ليه مابقيتش مصدقة
اني ممكن اشوف رجل شرطة شريف
زي ماعمري صدقت 
ان فيه عسكري مرور مش مرتشي
او موظف حكومة بيشتغل سبع ساعات في اليوم بجد
ليه مش قادرة اصدق
ان فيه شارع مرصوف ومتسفلت لله ف لله
من غير مايكون ساكن فيه وزير
او ابن مراد بيه
او طالب ثانوية عامة يطلع الاول على الجمهورية
من غير دروس خصوصية


ليه مش متخيلة
شارع في مدينة متوسطة
من غير اكوام زبالة على الصفين
او شط بحر مفتوح
ماتعومش فيه فضلات أشكال والوان


ليه عمري ما هتطمن
ان وظيفتي مضمونة بعد تخرجي
او اكمل لاخر الشهر بمرتب وظيفة واحدة
أو آكل اكل صحي بجد
أو حتى اشم هوا نضيف
أو امشي في شارع من غير ما ضغط دمي يعلى
أسمع كلمة ترجني
أو إيد ردية تنتهك حرمتي
أو حتى أكون متطمنة
اني هارجع بيتي سليمة
مش مسروقة ولا مخطوفة
والأهم
أرجع حتة واحدة على بعضها


في الدنيا دي كل يوم مغامرة جديدة
وفي بلادنا دي
كل ساعة هاتعيش الخطر
سواء بجد
أو دماغك هي اللي تتعبك


ومع كده
كلنا بنعرف نشد لحافنا علينا
ونغمض عيوننا ونناااااام

تصبحوا على خير

السبت، 24 ديسمبر 2011

كفايه بقا



كفاية بقا
بطلوا تتكلموا باسمها
وكأنكم
من بقية أهلها

كفاية بقا
تقولوا بندافع عنها
وكأنكم
بس اللي ماشيين على أرضها

كفاية بقا
كدب وخداع وتضليل
كفاية تجريح في قلبها
وكأنكم
كما الديابة ف مرعى الغنم
تغرف وتنهش وتملا كروشها منها
وترجع تقول
دنا اللي حامي عرضها

كفاية بقا
الدمع سال كما الدما على أرضها
والقلب انفطر.. قول انفجر
وزاد النواح على بختها
وبقيت أبص ساعة صباح
أو في المسا
أفزع وأقول
دا مش شكلها
بقيتي غريبة يا بلدي والكره طافح منها

كفاية بقا
ياتسيبولي أرضي الحزينة
يا إما تحن عليا
وتاخدني في حضنها

الخميس، 15 ديسمبر 2011

تقلبات



تبدأ حالة السكون المعتادة بالسيطرة علي
تليها فترة خواء روحي واحساس عميق بالوحدة
ألجأ إلى قائمتي المعتادة والتي تبثني المزيد من الشجن
وحين تبدأ عيناي ببث قطرات نداها أقف عند لحظة استشعر فيها قوى تمردية تسيطر على كل خلية بداخلي
أود أن أصرخ وأصرخ
أمزق ما يقيدني بل وبكل ما يحيط بجسدي الذي سرى به فوران الغضب
استشعر الصراخ في حلقي.. لا أريد مقاومته
أود أن أصرخ وأصرخ
أتمايل كالمجاذيب وتخامرني الرغبة في الرقص المجنون
بلا قواعد أو قيود
أود أن أركض آلاف الكيلومترات في مكاني.. أن أمتلك جناحي براق


وبعدها
لا شيء
يهدأ إعصار جنوني.. واستكين مرة اخرى على فراشي
اشعر بالإنهاك والهدوء يسيطران علي
وبعض الخمول
تشتد دقات قلبي.. واستشعر نغمات دافئة تتسلل إليه فتكون وقوده
أشعر بالحنين .. والحب
أشعر بالتفاؤل أحيانا، ثم يعاودني الشجن
يسترجع عقلي أحزاني القديمة كي يبكيها
في نفس الوقت الذي يسترجع فيه صورا ملونة طالما أسعدتني
اشعر بغصة غبية تملأ حلقي فلا أكاد أتنفس
ماذا أريد؟ ولماذا أشعر بأن كل ما حولي سخيف
لكم أود ان ألكم أحدهم الآن
أشعر بالجوع من شدة الملل
أعود وأطقطق أصابعي المسكينة التي ستصاب - لا ريب - بالتهاب المفاصل
استشعر آلام جسدي الموهومة.. أي طبيب سيستقطع الجزء القادم من راتبي؟


ماذا سيحدث إن ضربت رأسي بالجدار؟؟
لعبة كنت أحبها وأنا طفلة.. حين كنت أتفنن في استيلاد الكهرباء الاستاتيكية من بين خصلات شعري


زحام الافكار بداخلي يخنقني
حين يكون اللامنطق هو المعقول
أود الهروب من كل شيء
أغمض عيني لأنام ولسان حالي يقول:

" ألا لعنة الله على ألاعيب الهرمونات.. لكم أكره نوبات اكتئابي "

الخميس، 8 ديسمبر 2011

مصر



مصر الفرعونية
مصر البطلمية
مصر القبطية
مصر الإسلامية
مصر الفاطمية
مصر الإخشيدية
مصر الأيوبية
مصر الفاطمية
مصر العثمانية
مصر المستعمرة
مصر الملكية
مصر الجمهورية
مصر الليبرالية
مصر الصوفية
مصر الإخوانية
مصر السلفية
مصر العسكرية
مصر السلمية
مصر الغنية
مصر المديونة


من قبل الـ 7000 سنة ومصر موجودة
كل العصور دي عدت عليها وماغيرتش فيها
ليه حاطين ايدينا على قلوبنا ورافضين أي تغيير دلوقتي؟؟
ايوه رافضين التغيير حتى لو عملنا ثورات عشان نغير


" إن الله لا يغير ما بقوم حتى يغيروا ما بانفسهم" :)

الثلاثاء، 6 ديسمبر 2011

؟؟؟؟؟!!!!!!!!!!


أنا نفسي افهم حاجة
هي ليه الناس بتسمع وتشوف اللي هي عاوزاه وبس حتى لو الحقيقة قدامهم؟؟
ليه الناس بيغمضوا عنيهم ويدوا ظهرهم للشمس في عز الظهر ويقولوا الشمس مش موجودة
في نفس الوقت اللي بيبصوا لاخر الصحراء على السراب ويقولوا شفتوا فيه ميه هناك اهيه واللي يقول غير كده هاطلع عينه


عمرو حمزاوي كسب في الانتخابات عن دايرة مصر الجديدة
بعيدا عن اني مش بحب الراجل ده وان اللي انتخبوه ليهم اسباب كتيرة جدا.. الراجل كان ليه فيديو بيتكلم عن الجواز المدني
بعد ما كسب في الانتخابات الناس طلعت الفيديو ده وعماله تقول: شفتوا اللي انتخبتوه.. مصر خربت يا ولاد.. وكلام عبيط من ده
مش ده اللي غايظني وفاقع مرارتي بصراحة
اللي غايظني ان لسه فيه ناس لحد دلوقتي بتقول على البرادعي انه أمر بضرب العراق!!!!
نعم!!.. امتى؟؟... مين؟؟؟... ليه؟؟!!!... فييييييييييين... وازاي واصلا كان سبب كره أمريكا للراجل ده انه كان واقف زي الشوكة في زورهم وقدام مطامعهم ومصالحهم فى الشرق الاوسط وكتب عشروميت تقرير يقول فيه ان العراق مافيهاش نيله نووي وانه بيرفض ضربها
والفيديوهات موجودة والكلام موجود ومش محتاج اكتر من صفحة نت وعليها الحاج جوجل يجيبلك كل اللى انت عاوزه في ثانيتين ونصف
ليه الهبل والازدواجية في المعايير والمعاملة دي... ليه الناس بتهاجم اللي عاوزه تهاجمه سواء يستحق او ما يستحقش لمجرد انه متعارض مع شكلهم ومصالحهم

ليه الناس بقت بتبص بنصف عين على اللي هي عايزه تشوفه وتقراه وبس حتى لو الحقيقة واضحة قدامهم
ولمصلحة ميييييييين؟؟؟؟؟؟؟؟؟؟
بجد بجد بجد.... آفة مصر هي الجهل

الأحد، 4 ديسمبر 2011

عسراء


أنا عسراء
مذ ظهرت على وجه الحياة ولم استخدم سوى يدي اليسرى
يسارية متطرفة.. اكتب واتلقف وأحمل حقيبتي بيدي اليسرى
عائلتي .. بذلت جهدها كي تمنع عني هذه العادة
بان ربطوا يدي في قائم السرير
أنزلوا بي كافة أنواع العقاب حينما رأوني أطعم بيدي اليسرى
يد الشيطان
وكنت أبكي وأبكي عذاب من لا يفهم لمن لا حيلة له
من لم يفهم أن الحكم لوظائف المخ أولا ومركز التفكير
حينها قرروا الحل الوسط
استعملي يسراك كما يحلو لك.. شرط أن تاكلي بيدك اليمنى
وكان الاتفاق
وكان التوازن بين القوتين.. وبين اليدين
وكانت الوسطية

السبت، 26 نوفمبر 2011

بالهداوة كده


في تاريخ التشريع الإسلامي.. نزلت الأوامر الإلهية على لسان الرسول محمد صلى الله عليه وسلم عشان تعزز كل القيم الجميلة ومكارم الأخلاق اللي كانت موجودة عند العرب وعند كل العالم.. وتمنع كل الخصال والأفعال السيئة اللي اتعود البشر انهم يعملوها
ولو بصينا على طريقة الانتشار دي هانلاقي ان كل حاجة كويسة كانت بتبرز وتتعزز بسرعة.. وكل خصلة وحشة أو محرمة كانت بتتمنع بالتدريج.
ودا من رحمة ربنا على عباده اللي ما صدمهمش بالمنع مرة واحدة كده لكن جابهالهم بالتدريج والتعود عليه
بالأمثلة الموضوع هايكون أوضح.. يعنى مثلا حكم تحريم الخمر.. العرب كانوا مدمنين للخمر وحياتهم كلها بتعتمد عليه.. ابتدى الموضوع بالتدريج انه في الأول يقول "وإثمهما اكبر من نفعهما" يعنى الحاجة للي انتو بتعملوها فيها نفع .. بس الضرر منها أكبر.. وساب الموضوع شوية لعقول العاقلين.. اللي أول ما فهموا الموضوع دلقوا مخزون الخمر فى الشوارع طاعة لربنا.. وجت المرحلة اللي بعد كده " ولا تقربوا الصلاة وأنتم سكارى حتى تعلموا ما تقولون".. وهنا ربنا قالهم على أهم ركن من أركان الإسلام وأول حاجة هايتحاسب عليها العبد يوم القيامة ماتعملوهاش مادام مش هاتكونوا فى وعيكم وانتو بتعملوها
يعني تخيلوا بقى لما أهم ركن في عقيدة المسلم ربنا يمنعك إنك تعمله عشان حاجة معينة .. وقالك برضه ان المنع ده له سبب مقنع.. " حتى تعلموا ما تقولون" يعني ركز واعقل كده عشان البتاع اللي هاتشربه ده هايطيرلك مخك وعشان الصلاة حالة مقدسة قوي بين الإنسان وبين ربه .. يبقى ما تصليش ولا تقرب للصلاة حتى إلا لما تركز..
ونفس اللي حصل برضه في موضوع منع الرق أو الاستعباد
ماوردتش آية صريحة محددة تحرم الرق.. لأن رأس مال العربي ساعتها كان بيدخل فيه العبيد.. وصعب لما تيجي لواحد وتقوله تخلى عن نص رأس مالك كده مرة واحدة عشان ترضي ربنا.. ماكانش حد هايسمع الكلام وكانوا هايخرجوا من الملة
عشان كده ربنا جابهالهم واحدة واحدة عن طريق الترغيب.. خلى عتق الرقاب من أكتر الحاجات اللي ربنا بيجازي عنها خير الجزاء في الآخرة.. وكمان خلاها أول كفارة يقدر عليها الإنسان لما يعمل حاجة تستحق الكفارة.. زي القتل الخطأ والحلف بالله على حاجة ماعملتهاش وغيره وغيره
يعنى من الآخر العبيد كانوا هايتحرروا هايتحرروا وماكانش أسيادهم هايبقوا زعلانين.. بالعكس هاتكون ترضيتهم عند ربنا تعويض كافي ليهم جدا


عشان ماتتخضوش لما أنط على النقطة اللي عاوزه أتكلم فيها أصلا.. أنا مش هاتكلم على طريقة التشريع قد ما عاوزه أتكلم على سياسة التغيير
وبرضه عشان ماحدش يهاجمني ويفتكر إن كلامي له علاقة بأي حاجة بتحصل في التحرير أو على الصعيد المصري والعربي دلوقتي هاقول إن لو كل حاجة في الدنيا كانت بتتغير بالتدريج ماكانش ربنا فرض الجهاد .. وكانت كل الشعوب اللي جنب الجزيرة العربية أسلمت بمجرد إن الرسول عليه الصلاة والسلام كان يدعيلهم إن ربنا يهديهم
وربنا بالفعل قادر على كده بدليل أن أفريقيا وآسيا معظم شعوبها دخلت في الإسلام بسبب حسن معاملة التجار المسلمين للأهالي مش بالمعارك


برضه لسه ما اتكلمتش على اللي عاوزه أتكلم فيه :)
وهو سياسة الإستمالة والتدريج.. 
سبب البوست الأصلي بقى واللي عاوزه اتكلم فيه من الصبح.. هو فيديو اتنشر بسرعة الصواريخ النووية على النت
اسمحولي اني ما أتكلمش في تفاصيل خاصة بيه مع أني متاكدة انكم كلكم هاتفهموا قصدي.. بس عشان مش عاوزه أديله أهمية كبيرة كفيديو قد منا عاوزه اتكلم في ردود الافعال للأشخاص اللي كانوا فيه


فيديو صوره شخص وقع تحت طائلة قانون الآداب الخاص بمكان عام.. وكان واضح جدا انه متعمد يقوم بالفعل ده هو وشريكته وكان بيصور الفيديو عشان بعد كده يحطه على الحساب بتاعه ويقول: شفتوا.. احنا كنا بنناضل من أجل حرية الرأي والفكر والحرية الشخصية ووقفنا في وجه البعبع الأمني وعملنا اللي احنا مؤمنين بيه
بس اللي حصل واللي قريته من الفيديو ده كذا حاجة
أولا: هو ماكانش بيستند على منطق في عناده.. بمعنى انه كان بيعاند لمجرد العناد وبيستند على حجة.. مافيش قانون مكتوب ومنشور بيمنع ده.. والحجة دي تم إبطالها بذكاء قائد المكان اللي جابله نص قانون مكتوب من درج مكتبه - الراجل ماكانش مستعد للموقف ده ولا حاجة.. ودا معناه ان وجود القانون ده وغيره أمر حتمي وفعلي - بيناقش المخالفة اللي قام بيها هو وشريكته
ثانيا: صاحب المخالفة كان متحدي وجعجاع أكتر من اللازم.. وانا اتعلمت من كتب وزارة التربية والتعليم ان" صوتك العالي دليل على ضعف موقفك".. واللي كشف الجعجعة دي هو الهدوء والبساطة والحكمة اللي تعامل بيها الطرف الأمني في الموضوع.. بصراحة القائد كان زي العسل وعجبني قوي في هدوئه الساخر وحبيته جدا وانحني له احتراما " بس عشان أسلوبه وطريقة نقاشه"
ثالثا: محاولة اصطياد الأخطاء.. المشكلة كلها قامت على مخالفة آداب مكان عام قام بيها شخصين.. لما القائد طلب البطاقات الشخصية ليهم قال للشاب.. هات بطاقة العروسة كمان.. وساعتها الدنيا قامت وماقعدتش
هي تزعق وتقول: يعنى ايه عروسة دي.. وزميلها يقول.. كلمها باحترام اكتر من كده.. ورد الفعل بتاعهم كان مبالغ فيه وكأنهم ماصدقوا يمسكوا حاجة.. أو يتشعلقوا في حاجة تديلهم نقطة قوة.. أنا طبعا أرفض الاستهزاء والتحقير بأي شكل من الأشكال.. بس النقطة اللي بتكلم فيها هي.. ما اتشطرتش على الحمار وبتتشطر على البردعة :)
القائد عشان هو سياسي بارع تراجع فورا عن كلمته واعتذر بهدوء وغير لفظ عروسة إلى آنسة .. وبرضه طلب البطاقة الشخصية بكل هدوء.


بعد ما زالت السحابة.. كان الموقف لصالح الأمن تماما.. اتنين هايتعملهم محضر آداب ومرفق بيه انه تم تصوير الأمن بغير إذنهم.. ودى المفروض قضية تانية.. وحتى لما سقطت كل دفاعات الشريكين بقى شكلهم منهزم جدا وبلا أي حيلة.. لأن منطقهم كان مجرد من المنطق


معلش استحملوني.. أنا ماكنتش عاوزه أتكلم برضه عن قضية الفيديو ده وأمحور الكلام عنه.. لكن كنت حابه أناقش السبب اللي في اعتقادي انهم بيحاولوا يوصلوه
وهو تغيير المجتمع.. بغض النظر بقى عن الطريقة اللي هما بيحاولوا يوصلوا بيها للهدف ده.. وبغض النظر عن النوايا الحقيقية اللي هي استعراضية تماما.. والكل واخد باله ان السبب الوحيد ليها هو الظهور
لكن خلونا نناقش القضية اللي هما بيحاولوا يشيلوها على أكتافهم
وهي تغيير المجتمع
انك تحاول تعمل صدمة للمجتمع وتمارس أفعال ما اتعودش عليها المجتمع - مش هاقول بيرفضها عشان كان فيه ناس موافقة على اللي حصل - عشان تثبت انك إنسان حر وبتحاول تبين حريتك دي قدام كل الناس


يبقى دا معناه اننا محتاجين نعرف مفهوم الحرية بشكل واضح
يعنى إيه حرية؟؟


الحرية زي ما الحاجة ويكيبيدا قالت: ( الحرية هي حالة التحرر من القيود التي تكبل طاقات الإنسان وإنتاجه سواء كانت قيودا مادية أو قيودا معنوية، فهي تشمل التخلص من العبودية لشخص أو جماعة، التخلص من الضغوط المفروضة على شخص ما لتنفيذ غرض ما، أو التخلص من الإجبار والفرض.)
يعني م الآخر الحرية انك تعمل أي حاجة أنت عاوزها بدون ما يكون فيه حد بيفرض عليك قيود بي شكل من الأشكال أو تكون تابع لي حد تاني


كلام جميل جدا.. بس هل الحرية بمعناها المطلق ده ممكن تكون موجودة فعلا؟؟
فيه مفكرقال كلمة جميلة جدا - أعتقد انه انجليزي بس مش فاكراه قوي- : (من الحرية أن تلكم الهواء.. لكن هذه الحرية تنتهي عندما تبدأ أنوف الآخرين)
وزي ماكانوا بيكتبوا برضه على ظهر كتب الوزارة: " أنت حر مالم تضر"


يبقى الحرية الحقيقية هي كل حاجة انت تقدر تعملها براحتك خالص.. بس من غير ما تضايق أو تؤذي أي حد حواليك

من الحرية اني أمسك خرطوم مية وأرش الشارع قدام بيتي
لكن الحرية دي بتنتهي لو هاغرق حد معدي قدامي بالمية أو هاتسبب فى وجود بركة طين ممكن توسخ للناس هدومها أو تصعب على المارين حياتهم وهما بيعدوا الشارع أو ترهق أهلي اللي بيدفعوا فاتورة المية بفلوس زيادة أنا مش هاعوضهم عنها حاجة من جيبي

من الحرية انك تحضن صاحبتك في مكان عام أو تقلع ملط وتتصور أو تنزل فيديو ليلة دخلتك على النت
لكن حريتك بتنتهي مادام منظرك بيؤذي العائلات والأشخاص اللي حواليك أو بيثير اللي معديين جنبك أو اللي بيتفرجوا عليك أو بيحرض غيرك أنه يعمل كده مع طرف تاني موافق أو مش موافق.. بالرضى أو بالإكراه

هاتقولي ما ضربتش حد على إيده علشان يبص عليا أو كل واحد بيعمل وبيتفرج وبيشوف بمحض إرادته الحرة


هاقولك مادام انت حطيت الحاجات دى على النت يبقى انت من جواك عاوز الناس تشوفها.. يعني انت بتحرضهم من الآخر على انهم يعملوا زيك أو بتتمنظر عليهم انك بتعمل حاجة ياي أوريجينال خالص فيعملوا زيك.. وبتلعب على ان الناس ماتقدرش تقاوم فضولها أحيانا، وافتكر " إنما الأعمال بالنيات"
مش كل الناس بتفكر نفس التفكير وعندها نفس العقل
عشان كده الرسول عليه الصلاة و السلام قال: "خاطبوا الناس على قدر عقولهم"
ومن أهم قواعد الدين والحياة اللي لازم نمشي عليها: (درء المفاسد مقدم على جلب المصالح)


من حقك انك تحلم بالحرية وبالعقليات المتفتحة.. لكن ما تسببش للناس صدمة وتعاند بيها مجتمعك عشان اللي بيحصل بعد كده هو حالة من الاشمئزاز والرفض التام .. وجيت تكحلها عميتها :)
وعلى فكرة.. الحرية مش لازم تكون بقلع الهدوم أو عرض تفاصيل الحياة الشخصية على الملأ
ما تحاولوا تحصلوا على حرياتكم كأفراد جوا دولة وتشجعوا الناس التانيين على الحصول على حرياتها الإنسانية والسياسية الأساسية الأول؟؟
مهو من الحرية برضه اني أعيش في وطن مافيهوش رشوة ولا محسوبية وأقدر أعيش وألبي احتياجاتي الأساسية وشوية من الرفاهيات من غير ما أمد ايدي لحد أو أشتغل زي الساعة طول اليوم عشان أعرف أعيش

من الحرية اني أذاكر وأتعب وأنجح وألاقي المكان المناسب اللي هاستفيد وهافيد فيه من غير ما أبقى خايفه ان مكاني ده يروح لحد تاني أو لازم أدفع عشان آخده
من الحرية اني أكون مؤمنة بفكرة وأقولها بهدوء من غير ما تتهمني اني متخلفة أو منحلة أو فلول أو عاوزه أخرب البلد.. مادامت الفكرة مش مؤذية ومش مروجة لحاجة مخربة.
من الحرية اني لو احتجت لحد أو جهة تساعدنى ألاقيه جنبي مش أدخل في متاهات ودهاليز والبيه مش فاضي وفوت علينا بكره وانت مين انت عشان تقابل الباشا والكلام ده


هانتكلم عن الحرية يبقى لازم نتكلم عن تفاصيل ودقائق حياتنا كلها.. حتى الحرية في شراء نوع المناديل اللي بتفضلها.


كفاية كده عشان رغيت كتير :)

الأربعاء، 23 نوفمبر 2011

حين تفرقت بنا السبل

الساعة دلوقتى 4:03 من فجر يوم الأربعاء 23 نوفمبر 2011
دخلت على جوجل وكتبت في محرك البحث كلمة " وينكى"
عادة عبيطة ماعملتهاش من زمن.. كنت عاوزه أشوف هل النتائج اللي هاتطلعلي مختلفة عن النتائج اللي كانت بتطلعلي زمان

البحث بالصور من اسهل واجمل الحاجات.. واكثرهم إثارة للذكريات
مدونات.. مدونات.. مدونات لا حصر لها.. في كل مدونة ومع كل مدون صاحبها فيه ذكريات جميله خلتني أبتسم وعيني تدمع
أسماء كتيييييرة قوي عدت عليا.. يا الله.. كل الناس دول كنت اعرفهم وكانوا يعرفونى ف يوم من الأيام؟؟

ابص على التواريخ بتاعت المدونات... أقرب واحد فيهم كتب اخر بوست ليه في 2010
احسن حالا من اللي اخر تواريخ موضوعاتهم كانت 2007، 2008

فين الناس!!!... راحوا الناس

مكان في القلب.. سكوت هانصوت.. رسالة من تحت الماء.. زحل الفلكي وعلي الالفي وهستيريا
عاليا حليم والبيدا.. حفصوتشا والصراحة خنقة وكراكيب وروكا وسمراء النيل وعاليا حليم ونبضات
كريم واحمد اسماعيل واحمد بلال وهالة ومايكل وعمرو وآدم المصري ومريم ومي ومانو وفيمتو وإيليان ونادين ومحمود
صاصا والصباغ وانسان جديد وحياة افضل وياسمين واسفة لو الذاكرة ما اسعفتنيش افتكر الباقي
كل اصحابي المدونين اللي بره مصر من الشام والاردن وعمان وكندا وامريكا
يمكن خالد الصاوي من اكتر الناس المثابرة اللي لسه على الساحة.. بس مشاغل الحياة حولت بيتنا التدويني الكبير الجميل إلى صحف الكترونية مش اكتر
مابقتش المدونات هي النادي الفكري والادبي اللي بنتبادل فيها الاراء والأفكار والنقاشات.. واخبار الحياة كمان
كنت كتبت قبل كده موضوع عن المحاربين القدماء واصحاب الاقلام التدوينية القديمة.. وبجد بناشدهم انهم يرجعوا لبيوتهم تاني
دلوقتي انا مفتقدة بيت العيلة الكبير والقلوب الصافية والاصحاب اللي بجد
أيام الاجتماعات التدوينية في الاوبرا وعلى البورصة والدقي
حفلات موسيقية واعياد ميلاد ومسرحيات وحفلات توقيع كتب وتصوير وإذاعة وصحافة وتليفزيون... وحفل نجاح وتخرج :)

ياترى هنرجع تاني؟؟



الصورة دي من أكبر تجمع تدويني حصل في تاريخي الطويل... حفلة المدون علي الالفي مع فرقة step by step
تقريبا كان أول تجمع تدويني أعمله دعاية بجد :) أيام وكالة وينكى للدعاية والإعلان و Blogger radio station
كانت أياااااااااااااااااااااام :)

رسائل إلى حبيبي 3

حبيبي
من غيرك ينقصني الاحساس بالامان
احساس غريب واعتراف أغرب انه يصدر مني انا بالذات
لأني عشت حياتي اللي فاتت كلها مش محتاجه غير عقلي واطرافي وصحتي في الدنيا
انا اللي كنت بادي الاحساس بالامان لغيري
والمساعدة والمشورة
والتفهم والودن اللي بتسمع
حالي اتغير كتييييير من يوم ما عرفتك.. وصدقنى لو قلتلك.. دا جه في الوقت المناسب
التغيير حلو في بعض الاحيان حتى لو كان بانك تفقد بعض من خصائصك
مادام انت عارف انها جزء اصيل منك ومش ممكن تفقده بسهولة
بس دا ما يمنعش... محتاجه الاحساس بالامان اللي كنت بستمده منك

اني أحس ان فيه شخص ممكن أكلمه في أي وقت من اليوم وأصحيه من احلى نومة عشان أقوله اني زهقانه او مخنوقة أو حتى عاوزة اسمع صوته.. وانا متأكده انه هايسمعني بقلب مفتوح من غير ما يقفل السكة ف وشي ويقولي.. روحي نامي


لما اكون مشحونة ومتضايقه طول اليوم هاعرف ان فيه شخص هايمتص مني كل الاحاسيس السلبية دي بمنتهى الهدوء والعقل


حد يحسسني اني ممكن أكون مفيدة فى الدنيا وأساعد بحاجات كتيرة قوي تفرق فى حياة البنى ادمين


حد يدفعني لقدام ويشجعنى دايما وفخور بيا قدام نفسي وقدام كل الناس وعلى طول مؤمن بيا ومؤمن بقدراتي مهما بدا قدامه العكس.. لأن الإيمان محله القلب مش العين أو الودن


حتى يوم ما نتخانق ونقطع بعض.. كل واحد فينا عارف حدوده كويس عشان احنا متأكدين ان ساعة الزعل بتروح.. لكن الكلمة الجارحة تاثيرها بيفضل في القلب على طول


وجودك جنبي بيديني الاحساس بالأمان من الناس السخيفة .. القريب منهم قبل البعيد، في مجتمع فيه كل واحد هايتوفى لو ما رماش كلمة مقرفة ف وشك لمجرد انه يحسسك قد ايه انت حالتك غم.. في الظاهر هو متعاطف معاك على حالك وفي الباطن هي رغبة سادية مريضة ان كل واحد يحس انه أحسن من اللي قدامه في اى حاجة وخلاص


بقعد أفكر.. ياترى لو انت هنا دلوقتي.. كنا هاننزل الميدان مع بعض؟
كنت هاتمسك ايدي ونفضل نجري وسط اخواتنا ونلحق مكان في الصفوف الامامية؟
ولما واحد منهم يقع نكون أول ناس تشيله وتحاول تسعفه


الحكاوي جوا قلبي ما بتخلصش.. والاسئلة جوايا عمالة تزيد ونار شوقي خلتها Grilled


بحبك قوي

الخميس، 17 نوفمبر 2011

إنه حقا... مختلف

في يوم كنت بتفرج على فيلم في التليفزيون
الفيلم اسمه 5th element بتاع بروس ويلز 
الفيلم لا يخلو من الإبهار البصري والأمركة والهيافة... بس الفيلم ده اثر فيا ولسه فاكراه عشان حاجة واحدة بس

مغنية الأوبرا الفضائية.. اللي فعلا صوتها تحس انه من كوكب تاني وتصدقها بجد


 خطفت قلبي وعقلي وفضلت فاكراها وفاكرة الفيلم لحد ما شفته تاني بعدها بسنتين
صعب تصدقوا اني شفت فيلم وقعدت مستنياه ييجي تاني لمدة سنتين كاملتين.. لكن ده اللي حصل
بس في المرة التانية قلت لازم اوصلها

شكرا لليوتيوب اللي سهلي حياتي
واللي عرفني ان مغنية الاوبرا دي.... واحد راجل

اسمه Vitas
روسي الجنسية
صوته ... مش عارفه اوصفه
بس بجد حالة مختلفة
اول فيديو شفتهوله بعد كده كان بيغني Avi Maria
بعيدا عن اني بحب الاغنية دى جدا لكن بصوته حولها لصلاة ملائكية مالهاش وصف
بعدها.. ممكن تتوقعوا انا عملت ايه
بقيت زي المدمن اللي بيدور على جرعة من المخدر بتاعه
وكان مخدري هو Vitas
انا واحدة بقدر الفن جدا.. وبقدر يعني ايه بنى ادم ممكن يتنقل بصوته بين الطبقات بنعومة واحترافية وسرعة من غير ولا غلطة
فيه ناس ممكن تكون شايفه انه شخص بيصوت وخلاص
بس اعتقد ان هو كده.. يا تعشقه بجنون... ياماتفهموش وبالتالي تكرهه بجنون :)

معلومة كمان عرفتها عنه... والفضل يرجع لصديقتي الروسية تاتيانا اللي قابلتها في لبنان
vitas  من اشهر المغنيين في روسيا.. زي فيروز كده في لبنان لا يختلف عليه اتنين
دا غير انه قديم كده ومن زمان زي محمد منير عندنا كده
تاتيانا وعدتني انها هاتبعتلي احدث البوماته من سنتين تقريبا وبعد كده اختفت.. لما شوفها بس :@
ولحد ما اعرف عنها حاجة.. هافضل برضه ادور على اى فيديوهات ومعلومات عنه.. واسيب نفسي وروحي لصوته بكل قوته ونقائه

شكرا Vitas
You're Simply the BEST

 دا فيديو Avi Maria


ودي نفس أغنيته اللي عرفته منها في فيلم 5th element... بس بجد بقى


الأربعاء، 16 نوفمبر 2011

رسائل إلى حبيبي - 2


حبيبي... أخبارك ايه النهارده؟
أخيرا انفتحت أبواب السماء ونزل المطر
عارف يعني ايه المطر ينزل؟

يعني أجمل لسعة برد بحس بيها على خدودي.. واجمل نسمة هوا نضيفة بحسها جوا صدري
هو أنا قلتلك قبل كده اني بحب الشتا قوي؟
حتى لو ماقلتلكش أكيد انت عارف.. ماحنا الاتنين بنحب نفس الحاجات
من قبل ما اقابلك وانا كنت بتمنى اني لما اقابلك نمشي سوا تحت المطر واحنا ماسكين ايدين بعض

ولما المطر يبقى شديد نجري ونصوت بعلو صوتنا ونقول ياهووووووووووووووو
هيييييييييييييييييه
ونضحك من قلوبنا زي الاطفال.. أو احنا بجد اطفال كبار
ماينفعش المطر ييجي من غير ما افتكرك وابتسم
والاهم من دا كله.. بارفع ايدي للسما وبدعي بكل حاجة نفسنا فيها

خلي بالك لحسن يجيلك برد.. انا عارفاك ما بتستحملش وبتعاند نفسك
أصلك في دي برضه زيي تمام :)

تصبح على خير

الاثنين، 14 نوفمبر 2011

رسائل إلى حبيبي


حبيبي.. وحشتني قوي
انا عارفه ان مافاتش على فراقنا اكتر من يومين.. لكن بجد غيابك مأثر فيا فوق ما تتصور
احساس بالفراغ .. والوحدة.. وغربة مالهاش حدود فى عالم واسع بقيت بحس بالوحشة فيه
معقول للدرجادي اتعودت انك تكون في حياتي؟.. معقول أكون وصلت للدرجة دي من الإدمان؟
انا عارفه ان فراقنا كان غصب عننا.. بلدنا احتاجتك تخدمها بعلمك وبسلاحك.. ومافيش غير اننا نقول السمع والطاعة.. بقلوبنا قبل لساننا
ياترى عامل ايه؟.. ياترى بتفكر فيا زي ما بفكر فيك؟
وحشتك زي ما انت واحشني قوي كده؟

بادعيلك في كل صلاة ان ربنا يوفقك ويكون جنبك وينورلك طريقك.. ويصبرني على بعادك
ياترى هل لما كنت انا اللي ببعد وبسافر كنت بتحس نفس اللي انا حاسه بيه دلوقتي؟
دانت على كده بطل في الصبر :)

احب اطمنك عليا.. أنا كويسة الحمد لله وبخير.. الواحد دايما متعود انه يقول الحمد لله في السراء والضراء.. او جايز عشان لسانه أخد على الكلمة مش اكتر :)
ما تخافش عليا.. انت عارف حبيبتك صلبة وقوية وتهزم 100 عفريت.. وكل صعب في حياتي هايهون إن شاء الله.. 

خلي بالك من نفسك.. اتعلم واستفيد من كل لحظة بتعدي عليك.. ولما اوحشك قوي.. افتكر اني دايما جنبك على طول

بحبك قوي