الخميس، 30 ديسمبر، 2010


تعبت من كوني محبوبة
ومن لعب أدوار البطولة
وما عادت مراكز الصدارة تستهويني
ولا تشبيهي بأميرات الأساطير
فما وجدت فارسا ينقذني
ولا حبيبا يحميني
فصارت كل حكايا الحب لدي
بلا معنى

السبت، 25 ديسمبر، 2010

أشعار


عندي أشعار
يهيج لها البحر إن ألقيت فيه
وترعد السماء إن تليت عليها
وتتزلزل الأرض.. بجبالها وهضابها وسهولها
إن ردد صوتي لحنه الحزين
كلمات لا حصر لها.. يختزنها قلبي
وعقلي وأوراقي
صارت حبيسة أدراجي
وماعلمت لها من مفر
بداخلي أشعار
عن الوطن.. عن الأمل
عن الحب وعذابه
والجرح وويلاته
عن البشر.. سعيدهم وتعيسهم
عن بسمة طفل.. تلمع في عين أم ثكلى
وعن صرخة ألم امتزجت بصرخات ميلاد جديد
عن الدنيا.. أفراحها وأتراحها
بكل متناقضاتها
عن قصص عشق لم يكتب لها أن تتم
وأخرى انتهت قبل أن تبدأ
وأخرى استهلكت.. فصارت ذكرى
تلوكها الألسنة ثم تلفظها لبئر النسيان
قصص عن عوالم خرافية.. تصدق فيها الوعود الوردية
وتنتهي دائما بـ " وعاشا معا بسعادة للأبد "
بداخلي قصص
أشعار وحكايا لا تنتهي
عن طفل وطفلة
عن كهل وقطة
عن عصفور وثعلب
عن وطن وغاصب
وعلاقات دولية فاسدة
وأناس يتظاهرون بالسذاجة وآخرين تحكمهم السذاجة
أشعار وقصص وحكايا
نصبت لها أسواق عكاظ
والتف من أجلها الرعاة حول نار الشتاء
وتلتها الجدة على الصغار
والآن
ترفل أشعاري بين حنايا قلبي
كاسحة.. قوية
لا يقبل بها رعديد... ولا هي تفعل
بداخلي طوفان أزرق
يطرق أبوابي المغلقة
فمن منكم يدنو ... لينهل؟



أحب جراحي
أن تصبح فتحات على بحور شعري

أحب أن تسيل دمائي
فتملأ دوايا حبري
فأكتب

أحب أن أنزع منظاري الوردي
فأرى الحياة مجردة من كل زيف

وأحب أن يسيل دمعي
فيوقد نيران الفكر في عقلي

فأظل أسيرة قلمي
ﻷكتب وأكتب

لكني لن أحب أبدا.. أن أعيش الهزيمة
أن أكون كسيرة

وإن جف يوما مداد حزني
فلن يعني بأني سعيدة

الجمعة، 19 نوفمبر، 2010

الدرس انتهى - صلاح جاهين


الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال

ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..

ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …

ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس

الخميس، 18 نوفمبر، 2010

أسبوع


يوم السبت: اتلاقينا

يوم الاحد: اتواعدنا

يوم الاثنين: بالحب بحنا لبعضينا

يوم الثلاثاء: سحابة صيف عدت علينا

يوم الأربعاء: حاولنا نحل مشاكلنا.. وماكانش بإيدينا

يوم الخميس: كان فراقنا

يوم الجمعة: لملمت اشلائي.. أعدت حساباتي..واتسلحت بقوة

لأسبوع جديد

الجمعة، 12 نوفمبر، 2010

اه ياني ياني ياني.... مش هاشرب منها تاني


في يوم مشرق وجميل كنت قاعده في شغلي لا بيا ولا عليا

لقيت واحد صاحبي - شاب كفاءة - اتصل بيا وقالي الحقي يا بت يا وينكي اخيرا اشتغلت

قلتلي لولولولولي ياخويا اخيرا فيه واحد حل مشكلة البطالة في مصر

وبتشتغل فين ان شاء الله؟

قالي: باشتغل في شركة مياه

طبعا كنت متفرجه قبليها بيوم على فيلم " السقا مات " واتخيلت صاحبي وهو حليوة ومسمسم كده وشايل القربة على ظهره ورايح يوزع مية على الخلق....

ياوينكي.. انتى يابنتى رحتي فين

انا معاك يامعلم... قلتلى بتعمل ايه بقى؟؟

لا انا مش هاقول... انا هاجى اوريلك الشغل على الطبيعة

وفعلا شرفنى الراجل بزيارة للشغل وبعد ازيك وعامله ايه والذي منه اكتشفت ان الشركة اللي بيقول عليها بتشتغل في معالجة المية

- ياحراااااااااام.. ماكنتش عارفه ان المية بتاعتنا عيانه..

عيانة ايه يابنتى.. دانتى اللى عيانه

الله يسامحك ياعم..

يابنتى افهمي.. انا باتكلم بجد

انتو فاكرين المية اللي بتشربوها دي مية بنى ادمين.. دى نسبة التلوث اللي فيها تجيب للبنى ادم 100 مرض... تعالي اثبتلك

وتخيلوا ايه اللى حصل

عمل تحليل للمية لقى فيها بلاااااااااااااااااااااااااااااااااوي

رصاص... كلور..... صدأ " المية مصدية يا جدعااااااااااان "

وبكتيريا

و.... احم احم... لا مؤاخذة.... فيها بيبّي

ياااااااااااااااااااااااااااااااااااااااااااع :s

نهار اسود ومنيل... احنا بنشرب الحاجات دي

طب ايه السبب؟؟؟

قالي اساسا المية ما بتتنقاش كويس والمواسير بتاعتنا متنيلة على الاخر وانسي ان مواسير مصر كلها تتغير عشان حاجه هايفة زي صحة عامة الشعب

(افتكرت ساعتها دكتورة طب مجتمع كانت بتدرس لاختي وقالت للطلبة: بصوا.. م الاخر، كل دولة بتنضف ميتها على قد فلوسها)

وطبعا احنا عارفين كويس قوي قوي ميتنا ايه وفلوسنا ايه وكان الله بالسر عليم :(

قلتله طب والحل ايه؟؟ نشرب مية معدنية!!!

انتي فاكره ان المية اللي بتشربوها دي معدنية بجد؟؟؟

يالهوييييييييييييييييييي... امال ايه؟؟

دي ميه معبأة يا ماما.. انتى لو هاتشربي مية معدنية بجد هاتلاقى القزازة بـ 75 جنيه

عاااااااااااااااااااااا... انا يجيلى جفاف احسن ما اعمل كده

طب وبعدين..كلنا نركب فلاتر يعنى؟؟؟

لقيته بصلي وبرق قوي وكاني شتمت عيلته واحد واحد وقالي: انتى عارفه الفلاتر بتعمل ايه؟؟؟؟

الفلتر اول مرة بينضف المية وبيحجز الشوائب والبكتيريا ميه ميه

تاني مرة البلاوي دى بتتضاعف فى المية.. ماهو بسلامته بيحوشهملك

واللى بعدها اكتر واكتر

بااااااااااااااس... بس بس الله يكرمك.. ايه فيلم الرعب ده

طب والعمل ايييييييييييييه؟؟؟؟

" معالجة المية طبعا".. بصي..

المفروض ان شركتنا بتروح للعملاء بتعملهم اختبار للمية بتاعتهم وبتشوف نسبة التلوث عندهم قد ايه قبل ما تحدد طريقة المعالجة

تكلفة الزيارة دي حوالي 300 جنيه بس عشان انتى صاحبتى وشابة كفاءة هاخلى اى حد يجيلى من طرفك مايدفعش جندي

طبعا كمصرية صميمة ما بحبش أفوت العروض والفرص اللى زي دى قلت لازم استغل الراجل بشركته ابشع استغلال

فاللي يحب يتعمل عنده فى بيته او شغله كشف على المية لقياس نسبة التلوث ويشوف الحاوي... قصدي الباشمهندس وهو شغال على عينك ياتاجر يبعتلي نمرة موبايله على إيميلي

romamory@gmail.com

وهايلاقي انسة حلوة مقطقطة بتتصل بيه عشان تشوف مواعيده ايه

يلا هاستناكو يا شباب ويا صبايا :)))

واى خدمة.. عدوا الجمايل بقى

السبت، 9 أكتوبر، 2010

مجرد محاولات... لاستعادة ما مضى


حين يستبد بك الحنين إلى شيء ما لا تدري كنهه
تشتاق لشيء بعيد بعيد... قد تكون ذكرى طفولة عشتها.. نغمة بصوت شجي أحببتها
رائحة كانت أو حنين لمكان ما
تتحرك مشاعرك شوقا لهذا الشيء فتسعى حثيثا لتطفيء نار اشواقك

حين تشعر بالوحدة والغربة تسعى للاتصال بكل من كنت تعرفهم قديما
تستشعر رعشات قلبك حين تسمع الصوت الناعس على الطرف الآخر يرد: ياااااااااااااااااااه... فينك من زمان يابني

تشعر بالحنين للمنزل الذي نشأت فيه قديما فتسعى للوقوف في شرفته القديمة المتهالكة وتجول امام ناظريك خيالات لطفال صغار كنت أنت واحدا منهم
تصنع قدح القهوة فقط كي تتذكر الرائحة المنبعثة من جدتك حين تجلسك امامها ساعة عصر يوم دافيء لذيذ لتحكي لك أقاصيصا من ذكريات طفولتها
تلمح الصورة المعلقة وسط الردهة.. يعلو زجاجها غبار السنين وشريط اسود مائل على أحد الجنبين
قد تفر من عينيك دمعة شوق.. وقد تفلت من بين شفتيك ابتسامة حنين
وفى الحالتين.. تقف فى خشوع تتلو صلوات الرحمة من أجل صاحبها
تتعمد المشي في الشوارع الترابية الزلقة بفعل المطر ... هذا درب سلكته طويلا في سني دراستك

حتى حلوى الطفولة... يصبح لها مذاق آخر يختلف عن مذاقها السكري الرخيص
مذاق اكتسب قيمتها من خزانة الذكريات

حنين... حنيييييييييييييييييييييين لكل شيء
رحلة قصيرة تعود بعدها لدوامة الحياة اليومية
هاتفك المزعج ومكتبك المريع
التكنولوجيا المبهرة المجنونة حولك والتي تسربت برودتها وآليتها إلى مشاعرك واعصابك
ترتسم ابتسامة باهتة على شفتيك وتتمتم
" كانت ايام حلوة بجد "

الأربعاء، 18 أغسطس، 2010

كلام من القلب

(الكلام ده كتبته في أغسطس 2007... يمكن حاجات كتير قوي اتغيرت ويمكن لسه زي مانا.. المهم حبيت استرجع افكاري من تاني هنا)

- انتي سمعتي ألبوم أنغام الجديد؟

  • اه ...لسه سامعاه النهارده الصبح

- وايه رأيك فيه؟؟

  • جميل قوي..الكلمات تحفه وان كنت حاسه ان اللحن والتوزيع قديم

- ماهى دى العبقريه

  • اكيد طبعا ..رجعتنى لجيل التمانينات فى بعض الأغانى

- وشفتى كلمات الاغانى قويه ازاى... عاجبانى قوى أغنيه باغير

  • مش هاخبى عليك...الأغنيه عاجبانى جدا ولمستنى جدا...بغباء يعنى

وبصوت منخفض: يارب ارزقنى بواحد أغير عليه كده

- انتى بتقولى حاجه؟

  • لا أبدا

- نظرة بنص عين بمعنى: على بابا!!

  • قلت بعدها : باقول نفسي ربنا يرزقنى بواحد أغير عليه كده

- نظرة عين بمعنى: كل البنات مسروعه على الجواز ليه؟؟؟


وانا مروحه دار الحوار ده فى دماغى
ماحستش انى عاوزه أنظم قصيده ولا انى أكتب قصه..... حاسه انى عاوزه أفضفض واتكلم زى ما الأفكار بتدور فى دماغى بالضبط

أنا عشت عمرى كله أعاند فى نفسي وأقول أنا كده كويسه وقشطه وتمام
أنا مش عايزه أتجوز...أنا عايزه أبقى حرة نفسي


الجواز نكد أزلى وتقييد للحريه وواحد يتحكم فيا زى ماهو عايز
جواز يعنى تحمل مسئوليه أنا مش قدها...هو أنا أعرف أعمل حاجه لنفسي عشان أبقى مسئوله عن عيله؟؟


ولا لما الأطفال ييجوا بقى...دى بلوى تانيه مش عارفه حلها ايه
أطفال يعنى كائنات بتتشكل ولازم أشكلهم صح
لازم أكون مسئوله عن كل كبيره وصغيره جواهم

لااااااااا...دى مسئوليه جباره أنا عمرى ماهاقدر عليها ولا هابقى قدها فى يوم
وسط زميلاتى البنات ..فى الكليه ..الجارات... معارف أى نشاط
لقيت البنات بتفكر نفس تفكيرى... اللى تقول


مالناش فى الانحراف ده
دا مش وقته خالص
لسه قدامى مشوار طويييييييييل ولازم أمشيه
بلا جواز بلا هم

وكلام من ده كتييييير
وانا متأكده مليون فى الميه ان الكلام ده من ورا قلوبهم
بس عاوزين الصراحه...وكلام من القلب واعتراف بقى
أنا عايزه اتجوز...أنا عايزه أرتبط

عايزه يكون ليا انسان ملكى لوحدى ولو حتى لـ7 ساعات فى اليوم وأكون أنا ملكه
حد يكمل معايا طريقى .. نتسند على بعض

نفكر مع بعض.. نحلم مع بعض...نحزن مع بعض ....ونتمنى مستقبل أحلى مع بعض


أفظع حاجه فى الدنيا هو الاحساس بالوحده ...يوم لما الواحد يحس انه راجع بيته بالليل وشايف كل البيوت اتقفلت وكل واحد قاعد وسط عيله دافيه وهو راجع لبيت فاضى بارد كئيب


أنا مابقيتش خايفه من الكلمه "أنا مسروعه على الجواز" بس مش لأى سبب
ولا أى انسان

عاوزه العاقل المجنون اللى يفهم مخى ماشي ازاى
نتخانق ونزعق ونرمى بعض بالمخدات وبعد كده نتصالح لأننا عارفين ان كل واحد فينا مالوش غير حضن التانى
عاوزه المرح المنطلق وابن البلد الشهم الجدع... متفتح العقل وفى نفس الوقت محافظ على قيمه ومبادئه

عاوزه المتدين اللى عارف ربنا وعارف ازاى يصونى من غير مايربى لحيه ولا يمشي بقال الله وقال الرسول اللى بيخبى وراهم جهل شنيع بأبسط واجباته وحقوقه

عاوزه اللى يستحق انى اديله كل طاقة الحنان اللى جوايا وعشت مخزناها عشانه هو بس
الأب الحنون اللى بيتحول فى لحظه لطفل صغير لما يحتاج لمامته جنبه
حد يفكر فى الحاجات اللى أنا مافكرتش فيها ويضيفلى واضيفله
يدينى من خبراته وياخد من خبراتى
واحد يفخر لما يمشى وسط الناس واحنا ماسكين ايدين بعض ويعرفنى للناس ويقول حبيبتى قبل مراتى


واحد لو مهما حصل... مايطلعش كلمه او يسمح للفته انها تطلع بره البيت ويبقى متأكد انى مستحيل أعمل كده
يعرفنى على أصحابه ويعرف أصحابى ونبقى اجتماعيين جدا
كل يوم بالنسبالنا لازم ييجى بحاجه جديده
مايسمحش لأهله او أهلى انهم يتدخلوا فى حياتنا ويملوا دماغنا وكلام من نوع الست العاقله تنتف ريش جوزها أو ادبحلها القطه والكلام الفارغ الأهبل العقيم ده
ولا الزن على الودان ومش ناويين تفرحونا بحتة عيل كده

ولو جه العيل يقولولك انتوا سايبينه كده ليه..مش تلحقوا تخاووه
وانتوا مالكوا يا باردين يارخمين


مين سمحلكوا انكوا تجرحوا حياتنا وتتدخلوا فيها بالطريقه البشعه المهينه دى؟؟؟؟؟
ولو تأخر الحمل شويه تبتدى الوصفات الخزعبليه والتشكيك وروحوا للدكاتره وروحوا اعملوا زار


ولا روح اتجوز واحده تجيبلك الولد
طب أنا واحده مش عاوزه تخلف أول ماتتجوز على طول...حد شريكى؟؟؟
شريكى ساعتها هابقى متفقه معاه على كده...مش فيه طفل كبير لازم يتربى الأول؟؟؟
وانا مش لازم بابا يعودنى عليه الأول ويحسسنى انى مافيش على الحجر غيرى ولا ايه؟؟؟
أنا عاوزه ارتبط عشان أعيش حياتى مش عشان أتدبس واتحول لمكنه لزيادة الجنس البشرى فى المجتمع


أنا عارفه انى خايفه وباستهبل على نفسى وباسوف وباتحجج بحجج عبيطة وباطفش اللى يتقدملى لأسباب فارغه وهايفه جدا
مع انى عارفه ومتأكده انى خايفه من الفكره على قد احتياجى ليها
يمكن لأنى شايفه كل قصص الحب حواليا فشلت أو جفت بسبب عوامل الزمن
يمكن عشان مابقيتش شايفه حواليا نموذج كويس للانسان اللى فى خيالى وسط الظروف الصعبه الطاحنه وحالة الجفاف العاطفى اللى بيمر بيها كل الشباب

خايفه ان حظى يبقى وحش وأظلم أو أتظلم
خايفه وخلاص...مش لازم أبرر خوفى ده او اشرح أسبابه...المهم انه موجود
لكن وسط غابة الخوف دى ... فيه زهرة امل واحده... أنا مؤمنه انى فى الدنيا دى فيه انسان واحد بس مناسب ليا
نصى التانى اللى اتقسمت عنه وتهنا فى أطراف الأرض وبندور على بعض زى مابتقول الأساطير


ممكن أكون مغرقه فى رومانسيه بلهاء... بس أنا كده ودى أحلامى أنا
ومتأكده انو فيه واحد دلوقتى بيفكر نفس تفكيرى وبيحلم نفس أحلامى
ولما نلاقى بعض هانقول لبعض... ياااااااه ..انت كنت بتفكر فى الفكره دى فى نفس اللحظه اللى انا كنت بافكر فيها
وانا داخله من باب البيت طليت على القمر وقلت
انت لو موجود حواليا بجد ...أرجوك تعالى وماتخافش
مش مهم ظروفك ايه.. مش مهم انت فين
مش مهم أى حاجه... عرفنى بس انك موجود... وانك حاسس بيا
امنحنى الفرصه انك تكون جنبى...واسمحلى انى أكون جنبك
وأوعدك المرادى انى مش هخاف ومش هاعمل حساب لأى حاجه مهما كانت
هاتخلى عن كل التمثيليات اللى كنت باعملها على نفسي قبل ماباعملها على أى حد تانى
هانزع قناع القسوه واللامبالاه من جوايا قبل ما أشيلهم من على وشي
والمرادى بجد هاوعدك
انى هاغير عليك