الثلاثاء، 27 أكتوبر 2009

لحظات دافئة


البوست ده انا كتبته من فترة طويله.. حوالي سنة أو سنتين
حاسه ان نفس الكلام ده انا محتاجه أقوله دلوقتي
يمكن.. يوصل رساله
****


ربي راعي وسلامى عمرى ما احتاج لسواه
في الجدوب هو طعامى في العطش نبع الحياه
وإن بوادى الموت مشيت ليه أخاف وأنا معاه
خيرى فيه مضمون وكافي كل أيام الحياه


قاللى متخافش في دخولك وفي خروجك من الخطر
هاسترك م الريح وإيدى تكون مظلة من المطر
تختبر في كل يوم إنك علي قلبي عزيز


اسمه برج حصين وأمن للى يلجأ لحماه
واللى من قلبه يأمن يلقى في الرب النجاه
دا الظلام أن زاد وغطى عالأراضى والبشر
نوره يشرق مجده يملى أرض من طلبه وصبر


يمتلي الفم بمديحه وافتخر طول عمرى بيه
من هدانى للمراعى من حملنى على منكبيه
لا عوز للى ينادوله للى يتكلوا عليه
دى الأسود بتجوع ولكن يشبع الناظرين إليه
إيه رأيكوا فى الكلام ده؟
قد ايه هو رقيق وجميل ويمس القلب
دى واحدة من الترانيم اللى غنيناها فى الحفلة
يمكن الموضوع يكون غريب شويه.. لكن هو ده احلى مافيه
الحفله كانت بتضم موشحات ومدائح نبوية والسيرة الهلالية وأغاني تراثية وزجل وترانيم وأغاني من الفولكلور النوبي
كل ده انصهر فى بعضه فى قالب واحد عشان يطلعلنا عمل فني مصري صميم
واحنا بنغني وايدينا متشبكه
والضحكه الصافيه طالعه من القلب على موقف أو نكته
يوم رائع موت
والاروع منه لما نكون فى رمضان ونتفق على يوم نفطر فيه كلنا مع بعض.. مسلمين ومسيحيين
كل واحد يطبخ حاجه ويجيبها معاه.. وكله يصوم إسلامى لحد المغرب ما يدن
وتبتدى المعركه بقى
هات حته من دى... ناولني البتاع اللى هناك ده
الله.. مين اللى عامل الفراخ دى
وطبعا انا...... ابعدوا البتنجان عنييييييييييييييييييي
اسمع ضحكة جاكلين المجلجله من على بعد سنه ضوئيه كلها مرح وتفاؤل
دى البنوته اللى كانت قاعده جنب ماما فى الحفله بتاعتى وكانت طايره من الفرح بيهم وبيا
وكارين .. أو كوكي زى ما بنسميها اللى مصره تسمينى ام اسماعين .. نسبة إلى الأغنيه اللى اتشهرت بيها فى الفرقه
مواقف حلوه قوى قوي... وعندى منها كمان كتير

من أجمل المواقف اللي عدت عليا برضه... واحنا بنزين شجرة الكريسماس
باغنى ترنيمة ليلة عيد بتاعت فيروز مع البنات واحنا بنزين الشجره.. أنا ونوووز.. البنتين المحجبتين الوحيدتين فى المكتب, ونودى وتامر وبوب.. كنا بنساعد ماجي وجاكي وكارين.. وطبعا كنا نازلين تريقه على القصيرين اللى لازم يقفوا على كرسي عشان يحطوا الحاجات على الشجره من فوق
جو كله ضحك فى ضحك ومرح
مديرة المكتب جابتلنا شيكولاته على هيئة اجراس... استأذنت يوميها بدري عشان تلحق تعمل شعرها عند الكوافيره قبل ما تروح الكنيسه
ومافيش نص ساعه لقيتها راجعه وبتقولى... انا لقيت وسط البلد كلها .. إني ألاقي خروف لعبه
مش لاقيه خالص
من كتر ماتعبت فكرت أجيب خروف صاحي وأخلص
وقعدنا ندور ساعتها على صورة خروف على النت وطبعناه
المكتب بقى فيه شجرة كريسماس وصور خرفان فى كل حته
وصممت بطاقات مكتوب عليها
عيد أضحى مبارك& كريسماس سعيد
طبعا الناس ماعجبهاش الوضع... قالوا عاوزين الخروف صاحي
مش ناويين تجيبولنا خروف ندبحه ونشويه
طبعا اللى قال الكلام ده واحد طول بعرض بارتفاع مستعد ياكل عشر خرفان مع بعض
يوم الفالنتاين
نزلت من البيت عاوزه أشتري ورد لكل اللى فى المكتب
طبعا كنت متغاظه من ارتفاع اسعار الورد وكتبت بوست عنه قبل كده
اشتريت عشر وردات للكل... وزعتهم على زمايلى كلهم
وضحكت قوى لما لقيتهم جايبينلى شيكولاته.. المهم كان لونها أحمر
وورد من نفس النوع اللى أنا جبته
أعتقد كلنا جبنا الورد من نفس المحل باين
يوم كان عندى شغل فى مركز المؤتمرات
معرض دولي كبير
طقت فى دماغي انى اجيب حلويات شرقيه, والكل هياكلوا معايا
طبعا احنا المفروض منظمين للجهة بتاعتنا .. يعنى نفضل واقفين زى الالف ومانتحركش
اتخيلوا بقى لما ييجى ناس عاوزه تتكلم معانا عن نشاطنا وتلاقى خمس شباب قاعدين على الأرض بياكلوا بسبوسه؟؟؟؟
أى حد يبصلنا بس.. نقوله.. اتفضل معانا
ويقتنع ان البسبوسه أفيدله.. وياكل ويمشي
اللى كنت فطسانه على روحى من الضحك بسببها... بنوته اسمها ساندي
حاجه كده رقيقه وصغنونه وهشه موت.. تنفخ فيها تطير
قدرت أخليها تنسى الايتيكيت ومامى ودادي .. وقلبناها أم سيد
طلعت بنت البلد من جواها
باقضى أوقات سعيده قوى قوى وسط عيلتي دى
مافيش فرق بينا.. ماحدش بيسأل التاني انت جاى منين ولا ملتك ايه
لما جت ذكرى وفاة اخت زميلتنا مسيحيه , كنا لابسين اسود كلنا
ولما عرفنا ان مرات زميلنا المسلم حامل.. زغرطناله كلنا
أو انا بس اللى زغرطت عشان مابقاش كدابه
:)
مش فاهمه بجد
إزاى فيه ناس فى مصر بتكره بعضها عشان خاطر ديانه او جنس او لون
هى العالم دى هبله؟؟؟



الواحد وهو ماشي فى الشارع بتخطر على باله حاجات غريبة
الجميل انها بتبقى حاجات لطيفة جدا وانا شايفه انها ممكن تتحط فى خانة الحكم والامثال
( أنا اللي باتكلم يا بشر.. واللي مش عاجبه لازم هايعجبه :q )
دول 3 حاجات كتبت واحده منهم قبل كده والباقيين جم على بالي النهاره
1- ضل راجل ولا ضل حيطة!!.. ضل حيطة ولا ضل راجل!!!.. وأمشي في الضل ليه أصلا؟؟

2- لو عايز تشوف فيلم رعب.. بص على الشارع المصري
ولو خايفين الكلمة دى تجيب اخواننا البعدا بتوع قمل الدولة ممكن تقولوها.. لو عايز تشوف فيلم رعب.. بص على فواتيرك

3- الستات بتطالب بحقوقها!!.. الرجاله بتطالب بحقوقها!!!.. اشمعنى المصريين ما بيطالبوش بحقوقهم؟؟

اتمسوا بالخير يا شباب :)

الجمعة، 23 أكتوبر 2009

نبحث عن شىء ما


لازلت أبحث عنك فى كل مكان
أنت يامن تجيد التعامل مع الأنثى
تعرف كيف ومتى تحتويها بحنان
كيف تقدر كل ما تفعله من أجلك
كيف ترفع من قدرها أمام نفسها وأمام من تعرف
كيف تتحاور معها بعقلانية حين تشتد الأزمات والمشاكل
أبحث عنك .. يامن ستكون سندى وملاذى فى هذه الحياة
يامن تمنحنى الأمان الكامل بكل معانيه
أبحث عنك ياأبى.. وأخى .. وطفلى الصغير
أبحث عنك يامن تكفينى نظرة عينيك كل صباح
يامن تعوضنى لمساتك كل حرمان
أبحث عنك .. يامن عرفتك فى أحلامى قبل أن أراك
أبحث عنك وأنتظرك.. لأنى أعلم أنك تبحث عنى
تشتاق لقدى.. ولودى
تشتاق لعقلى وجنونى
حين تستبد بك الهموم.. تريح رأسك المكدود على صدرى
تستنزف منى كل حنانى .. فلا ينفد
أحفظ أسرارك وعيوبك
أتحمل منك كل قصور
تبحث عنى لتجدنى.. لك أماً وأختاً وطفلة
تبحث عن ذات العقل الراجح , التى تصنع منك عظيماً
عن تلك التى لا تبهر الأنظار بجمالها.. لكنها تحنى الرؤوس احتراماً لها
عن الطائشة.. مجنونة الحب تلك.. التى ستعيش معها كل يوم قصة حب جديدة
عن تلك التى يكفيها سرير و موقد.. ومكتبةُ للكتب
أبحث عنك.. وتبحث عنى.. يامن أكفيك وتكفينى
أنا هنا .....فأين أنت؟؟

الأربعاء، 21 أكتوبر 2009

ضفدع كان بيغني


عامل البناء كان شغال في الموقع، بيكسر طوب.. بيرفع طوب
شال قالب كبير من فوق الارض بالعتلة.. لقى قدامه صندوق قديم
ساب العتلة وقلب الصندوق في ايديه باستغراب
فتح الصندوق بشويش.. وقبل ما يبص جواه نط لبره الصندوق ضفدع
لابس طربوش وماسك عصاية .. نط على الارض وغنى ورقص
ترلالالاااا... ترلم لم لم.. غنى اغاني كتيييييير قوي
العامل برق عينيه باستغراب.. ماكانش مصدق
بعد كده ابتسم ابتسامة خبيثة.. فرك إيديه .. ومن دماغه طارت علامات الدولارات اللي كان بيحلم بيها
اتسحب جري وأخد الضفدع جوا الصندوق تحت دراعه
جري على مديره في مكتبه الفخم الشيك
عمل نفسه مدير صالة الاستعراض وفتح الصندوق ودلق اللي فيه على المكتب
ترراااااااااااااااااااااااا
نزل من الصندوق ضفدع
هو هو نفس الضفدع
بس كان مجرد ضفدع.... كواااااااااااااااااااااااااااااااااااك
شكله بئيس وغلبان ياحرام
والعامل كان غلبان أكتر منه
شد خدود الضفدع عشان ترجعله ضحكته.. مافيش فايده
حاول يمسكه عصايته ويلبسه طربوشه.. مافيش فايده
حاول يشرح الموقف لمديره.. طرده من المكتب ومن الشغل
قعد العامل ياحرام في بيته.. دقنه طويله.. بيبص من الشباك حزين
والضفدع على الشباك نازل غنا ورقص وتنطيط
ترلالالاااا... ترلم لم لم.. غنى اغاني كتيييييير قوي
فجاة.. نورت لمبة الفكرة فوق دماغ العامل
باع البيت وقبض تمنه.. باع عفشه وحتى هدومه
بنى مسرح كبييييير.. ودعاية جامدة عليها صورة الضفدع المغني.. بيرقص بالعصاية والطربوش
وف ليلة العرض.. وقدام الكراسي اللي كانت مليانه ناس
وتحت الاضواء.. قدم الضفدع فوق الترابيزة
ضفدع غلبان.. كواااااااااااااااااااااك
والناس مستنيين
حاول يزق الضفدع عشان يتنطط.. مافيش فايدة

مسك ايديه ورجلية وحاول يرقصه.. مافيش فايدة
بص للناس وعلى وشه نظرة ياحرام
بوووووووووووووووووووووووووووووووووووه.. وحدفوا عليه الطماطم والبيض
مشي فى الشارع بلبس المخابيل.. والضفدع بيغني أغنية فرايحي
نام على الرصيف وهو مفتح عينيه الحمراء ومليانه عروق.. بيبص للضفدع وهو بيغنى أغنية حزينة
حط الجاكيت فوق دماغه .. عشان مايسمعش من الضفدع الأغنية العاطفية
ركب مركب وسط البحر وفضل يجدف يجدف.. وصوت الضفدع ما بتكتمهوش علبته
رمى الضفدع في وسط البحر ورجع وهو بيضحك زي المجانين
فات يوم.. أسبوع.. شهر.. سنة.. قرن، ويمكن اكتر
وعامل البناء بيكسر قوالب الطوب ببندقية الليزر
فتفت أكبر طوبة قدامه.. لقى قدامه صندوق قديم
ساب البندقية وبص للصندوق باستغراب
فتح الصندوق بشويش.. وقبل ما يبص جواه نط لبره الصندوق ضفدع
لابس طربوش وماسك عصاية .. نط على الارض وغنى ورقص
ترلالالاااا... ترلم لم لم.. غنى اغاني كتيييييير قوي
العامل برق عينيه باستغراب.. ماكانش مصدق
بعد كده ابتسم ابتسامة خبيثة.. فرك إيديه .. ومن دماغه طارت علامات الدولارات اللي كان بيحلم بيها
اتسحب جري وأخد الضفدع جوا الصندوق تحت دراعه

.
.

وخلص فيلم الكارتون على كده

الثلاثاء، 13 أكتوبر 2009

فراشه


فراشه جميله
نظرها ضعيف
طارت كتير
تعبت مشاوير
كتر التدوير
ويوم ما تلاقى
بقعة نور
تطير بشوق
ترفرف فوق
ولما تقرب
تلاقيها نار
وآه م النار
حرقت جناح
ووراه جناح
وقعت بسرعه
ع الأرض البراح
------
فراشه نونو
لسه جديده
فى دنيا قاسيه
عليها لاموا
عليها قاموا
مين ما يفرق
بين نار ونور؟؟
ونسيوا انها
يا دوب نونو
علمتها الدنيا
حاجتين اتنين
هزى جناحك
ولاقى النور
------
فراشه غلبانه
بجراح مليانه
ع الأرض تزحف
وسط العيون
فيها الشماته
يعدى قط
يقول غدايا
تعدى رجل
ممكن تدوس
يمر طير
يحلم يشيل
جسم الفراشه
م الأرض شيل
عنده الولاد
فى البيت بالجوع
وجسم الفراشه
من غير جناح
أصبح متاح
------
لكن الفراشه
تحمى البقيه
من الأشلاء
بين الشجر
تحت الورق
لسه الأمل
جواها موجود
أروح للنور
ولو زاحفه
ممكن ألاقى
النور بجد
مايكونش نار
أو يكون
ساعتها بس
أقول وصلت
تفنى حياتها
لهدف وحيد
أروح للنور
وبعده الحياه
مالهاش لزوم
***

الثلاثاء، 6 أكتوبر 2009

والله انا عندى دم.. ياهووو


البوست ده قديم شويتين بس لقيته بالصدفه وحبيت أنشره تاني مش عارفه انتو قريتوه ولا لأ بس اهو هانشره وخلاص

قبل أي حاجه كل سنة وكلكو طيبين وحلوين وواكلين كحك كتيييير إلا طبعا اللي
بيعملوا ريجيم او عندهم حالة كحكوفوبيا (على رأي ألبيدا الله يمسيها بالخير)
المهم بالف على المدونات من شويه باسلم على البنى
ادمين اللى اتحرمت منهم بقالى كتير لقيت موضوع خفيف الدم كاتباه مها زين على مدونة فرنسا والضاحكون
فكرنى بالذى مضى أيام الكليه وحملات التبرع بالدم
هيييييييييييييه.. دى كانت ايام
اول مره اشوف عربيات اسعاف منتشره جوا الجامعه بالكثافة دى
دول كانوا بينافسوا اكشاك الاكل جوا الجامعة عند كل كليه
جربت فى مره حظى .. عاوزه اروح اتبرع، انا مش أقل وطنيه من اى حد، دا غير
انى مش بخاف من الحقن ولا الدبابيس ولا حاجه خاااااااالص -ابقوا افتكروا الكلمه دى عشان رأيي هايتغير عشروميه وتمانين درجه بعد اللى حصلى-
رحت وفارده ايدي وانا باقول بمنتهى الحماس انا عاوزه اتبرع
وياااااااااه على الانبساط اللى لمحته فى عيون الناس اللى جوا العربيه
زفه بجد زى زفة شهداء الاقصى
واحد مسك استماره وملأ بيناتها انقلب وشه تماما لما عرف انى ساعتها أصغر من 18 سنه
هييييه.. كنت عيله بقى
وقالى ما ينفعش.تقريبا اتحسر على الاستماره اللى باظت عليه
اسم الله ليه يعنى؟.. مريض السرطان هايتضايق لما ياخد دم من عيله صغيرة؟
دانا اكبر منهم كلهم طبعا مشيت وانا حاسه بالإهانة
دا كانه تف عليا وقالى امشي العبى بعيد..
تانى مره رحت اتبرع برضه كانوا حاطين ورقه شروط عجيبه كده
الاسم والسن والعنوان وتاريخ الميلاد وفصيلة الدم وبرجى ايه ونوع المكرونه اللى بحبها وبحب اكل الشيكولاته بيضا ولا سودا
جاوبت عن كل ده بنجاح ساحق وجيت عند نقطه .. انت عملت عمليات فى الاسنان خلال سنه كاملة ولا كنتى حامل قبل كده ولا طستك عربيه ونقلولك دم
قلتلهم بكل براءة.. انا باحشي او باخلع ضرس كل أسبوع
نفس النظرة المكفهرة و: سورى.. ماعندناش اكياس تتبرعى فيها
هو فيه ايييييييييه!! يعنى ياخدوا دمى وكمان يتشرطوا؟
اهئ اهئ اهئ
عااااااااااااااااااااااااااا

تالت مره بقى رحت اتبرع
انا ميه ميه وماحدش قدى وكله متظبط لقيتهم مسكوا ايدي يقلبوا فيها ويبصوا لبعض
محاورات ومشاورات.. فكرتنى بأفلام زمان لما الدكاتره بترطن مع بعض وواحد يطلع منهم يقول
للأسف.. مافيش فايده ضحينا بالجنين عشان الأم
تعيش.. أو انت فاضلك عشر دقايق وتسلم نمر يا احمد
لقيتهم بصولى كده وقالولى
الجمله اللى اتكررت بعد كده كتييييير قوى( عشان رحت أعملها 6 مرات بعد كده)
ماعندكيش وريد
طبعا انا بقيت مسخرة الشله اللى قالولى عشان تعرفى انك ماعندكيش دم
بقيت على الحال ده سنتين تلاته لما ابقى زهقانه وملاقيش حاجه اعملها اروح عربيات الدم والبلازما يهللوا ليا ويرحبوا بيا وبعد كده
واق واق واااااااااااااااااق( موسيقى خيبة الأمل فى أفلام الكارتون)
ماعندكيش وريد لحد ما جه اليوم الموعود
تاتاتاتاااااااااااااااااااااااااااااان
انا وتيتي صاحبتى كنا بنستمشى ناحية كلية تجارة وعربيه من اياهم واقفه وتبرعوا
يا اهل الخيرقلتلها تعالى نجرب
رحت والشوكة فى ايدي( بتاعت الشياطين دى) وقلت هاعمل مقلب فيها وانا هاخلع منها قابلتنا بنت قلوقه كده شكلها اول مره تشوف دم اصلا.. دخلتنا جوه
تحسست نفس الدراع الغلبان والابتسامه ماليه
وشي لقيتها راحت تجيب خابوووووووور قاد كده وربطتلى ايدي
طبعا الابتسامه اتخيطت والشوكه اتركنت بره وعلمت اننى دخلت القفص
خلوا بالكوا م اللى جاى ده البهاريز كلها هنا
ممدده زى الجثث على السرير العجيب البنت داخله عليا
بالخابور وتتردد ف ودنى موسيقى حسره عليها يا حسرة عليها
يدخل سن الابره فى دراعى

ولا شيء!!!!!
مافيش نقطة دم طلعت
تخرج سن الابره شويه وتدخله فى مكان تانى( والابره نفسها لسه تحت الجلد).. برضه مافيش
تيتي طبعا فطست على روحها من الضحك من المنظر وعرفت ان الدفعه كلها هاتعرف انى فعلا ماعنديش دم
والبتاعه اللى باركه على نفسي دى عماله تدخل وتخرج سن الابره تحت الجلد
قلتلها بمنتهى الهدوء.. متهيألى ابتدت توجعنى
راحت مزعقه فيا وقالتلى:
استنى بقى..يا دكتور رأفت.. يا دكتور رأفت
جه دكتور رأفت وبضربه واحده دخل الأبره.. تك
والمكنه طلعت قمااااااش
اتفرج على دمى وهو بيفارقنى وبيروح لمكنة فصل البلازما مافيش دقيقه لقيت البت اياها عماله بتصوت: يا دكتور رأفتتتتت
يادى النيله.. الراجل جه جرى وبص للشاشه لقيته مره واحده ومن غير كلام
راح ساحب الابره من دراعى اليمين وراح رازعها فى الشمال
طبعا كان منظر جميل لما ماكانش فيه دم برضه فى الدراع التانى والأجمل انهم سابوا دراعى اليمين
ينزف مع نفسه فى هدوء وسكينه
وبمنتهى الهدوء والأدب قلتلها: لو سمحتى.. دراعى اليمين بينزف
راحت شاخطه فيا وقالتلى: يووووه..ماتستنى بقى شويه
وراحت ساحبه الابره من الدراع الشمال وغرزتها فى اليمين تانى وساااااااابت الشمال ينزف
يخرب بيت الملل ده مافيش حاجه جديده هاتحصل ولا ايه
اهو حصل اهوه حاسه ببرد فظيييييييييع، جسمي كله بيترعش وكأنه مندف قطن
قلت لتيتي وانا باترعش: وصيتك العيال يا ام رتيبه انا شكلى هاودع
ونزل عليا حالة ضحك هستيريه ساعتها مش عارفه ليه بس تقريبا دماغى خفت .. او يمكن الدم خرج بهمومى
بانزف من 3 اماكن وبرررررررررررررررد
لا هو ماكانش برد دى كانت رعشه بس كانوا مشغلين ساعتها اغنيه لحكيم دويتو مع جيمس براون كان ألبوم السلامو عليكو للى يفتكره
الرعشه مش عاوزه تروح وابتديت احس انى مش قادره اتنفس ومش قادره ابطل ضحك
باضحك لدرجة قلقت تيتي عليا جت البت القلوقه اياها( هاموت واعرف دى ممرضه ازاااااااااى) وقلتلها بنفس الاسلوب المهذب.. بس باترعش غصب عنى
انننا حاسسسه انى مشششش قادره اتنفسسس.. هو ده طبيعييييى
راحت مصرخه فيا المرادى.. بس اسكتى بقى
يا دكتور رأفت.. الحقنى يا دكتور رأفت
ايه المعاملة الزفت دي!!
يادى النيله عليكى وعلى رأفت فى يوم واحد دانا لو كنت واحده تانيه كنت مت من الرعب بسبب
اسلوبها ده لوحده..دى بتقوله الحقنى.. يانهار اسود.. هاهاهاهاهاهاها
عاوزه ابطل الكوميديا اللى انا فيها دى مش قادره، كل ده ومافتكرونيش حتى بعلبة عصير..
اه يا ولاد اللذينا.. انا عطشااااااااانه
اخيرا انتهت عمليه التعذيب.. خرجت منها مخلخلة الاوصال
لسه باترعش.. ولسه مش قادره ابطل ضحك
طلعنا من العربية انا وتيتي وكل واحده معاها هاند باج
رحنا للشله وساعتها حسيت ان دراعاتى طلعلها عضلات
عضلات؟؟
لالالا دا ورم الاتنين ورموا وبقى لونهم اخضر طحلبي مسود( حد يعرف اللون ده)

من ساعتها وانا بقيت افكر الف مره قبل ما أمر من قدام عربية تبرع بالبلازما او بالدم
أشوف الأول... فيه بنات جواها ولا أدخل عادى؟
شكرا مها عشان فكرتيني بالموضوع ده
وكل سنه وانتو طيبين يا أولاد ويا بنات:)