الثلاثاء، 23 يونيو، 2009

خاص .. لكل اللى اتعاملوا معايا وشايفين انهم يعرفوني


جايز تكون فكرة هبلة

جايز تكون وسوسة بزيادة حبتين

لكن طقت فى دماغي اني أعمل استفتاء صغنون عني

المرادي أنا موضوعه.. وانا السؤال وانا الإجابة

ومن النهارده مافيش حكومة.. انا الــ... احم احم

ماعلينا


قبل ما ابتدي هاقولكم انا بافكر في ايه

فيه عندي مشكله صغنونه انا بعاني منا في حياتي

انا مش عارفه انا عايزه ايه ولا عارفه انا عايزه اوصل لإيه

صحيت في مره لقيت نفسي باعمل حاجات كتير قوي على التوازي والمحصلة مش عاجباني

حاسه الى حد ما بالتشتت وان السكينة سارقاني

ولو ضفنا عليه احساسى اللى مسيطر على كياني ان العمر ماعادش فاضل فيه كتير وبيعدى بسرعة البرق ولازم الحق اعمل كل حاجه

اكيد هاتحسوا بجزء من اللى انا عايشه فيه


كل واحد او واحده كلمتة.. اتعاملت معاه

هزرت معاها او اديتلها رأي

اتفقنا او اختلفنا

عرفنا افكار بعض ووافقنا بعض عليها او عاندناها

كل انسان وانسانة شايفين انهم عرفوني بجد.. طالبة منكو المساعدة


كل واحد يكتبلي الحاجات دي:

- أقوى خمس مميزات شايفهم فيها

- أوحش خمس عيوب مش طايقنى بسببهم

- خمس طرق شايفنى المفروض امشي فيهم وابني مستقبلي على أساسهم


طبعا لو حد عنده أكتر أو أقل مافيش اى مشاكل.. بس أرجوكم ماحدش يطنش

انا محتاجه اعمل تقييم شامل لحياتى ومحتاجه وجهات نظر كتيرة

انا بقيت فأر تجارب يعنى وانتو دكاترة المعمل.. يافرحتك بيا يامه :)


انا مش هانشر التعليقات المرادي ومش هارد على التعليقات دي ( عشان ماحدش يغش من التانيين :) ).. اسمحولي أعرضلكم النتايج وأشرحلكم الفكرة بشكل عملي فى البوست الجاي ان شاء الله


شكرا بجد واتمنى انكم تساعدوني فى الدراسة دي

الخميس، 18 يونيو، 2009

مش لازم


في حياة كل منا تجربة.. ماحدش يقول انه مامرش بيها

وهي تجربة الحب من طرف واحد

ماحدش فينا ماعاناش من نار الحب واتألم مرتين

مرة عشان حبه ومرة عشان حبيبه مش حاسس بيه


مشاعر جميلة .. هفهافة.. جايز حزينة

نقلهالنا علي الألفي بصوته في أغنيته الجديدة ( مش لازم ) اللى باحتفل هنا معاه ومعاكو بيها لأنها أول أغنيه تتسجل أستوديو

جايز يكون كتير منكم سمعوها قبل كده.. خصوصا اللي حضروا اخر حفلة ليه فى الساقية

بس المرادي هاتسمعوا حاجه جامده جدا بجد


مبروك ليك يا علي.. وميرسي انك قدمتلنا موضوع جديد.. تقريبا ماحدش اتكلم فيه

وعقبال حفلتك الجايه ان شاء الله اللي هاتكون في الساقيه يوم 6 يوليو على ما أفتكر :)


ممكن تسمعوا وتحملوا الاغنيه من هنا يا شباب:



الثلاثاء، 9 يونيو، 2009

عطور.. وبخور


جربتو تمشوا قبل كده من جنب جامع اكيد.. مش كده؟

ايه اكتر حاجه لاحظتوها هناك؟؟

لا مش قصدى الشحاته اللى شايله عيل وبتصوت بيه

ولا أبو رجل مسلوخة اللي عاوز يلم حق عملية رجله .. مع ان رجله عفنت بقالها 3 سنين وكل يوم نفس القعدة ومتكيف معاها تماما وماعندهوش اى مشاكل

أمال ايه اللى اقصده بقى؟

العنوان باين يعنى.. صندوق الاسنسات وعلب البخور والعود والمسك والذى منه

كميات مهووووووووولة من الحاجات دى.. وكل ما كبر الجامع او كان بيطل على موقع استراتيجي تلاقى الكم بتاع السلع دى زاد

كتير لدرجة تخليك تفتكر لو انت من سكان خارج البلد دى ان كل الناس اللى فى مصر ريحتهم مسك وعنبر

وبعد كده تصدم بالحقيقة المرة ان اللى ماشيين فى الشارع - رجال وسيدات - لا تفوح منهم إلا ريحة واحدة.. العرق

بطريقة مفزعة ومقرفة.. العالم دى مش بتستحمى ولا ايه؟؟

دا حتى مزيلات العرق فى كل حته

طب ايه الحكاية بقى

ليه فيه عرض قوى من سلعة الطلب عليها مش قوى

وليه الحاجات دى مابتلاقيهاش - غالبا عشان ما ابقاش كدابه - إلا فى الاماكن دى

أكيد ليها عشروميت سبب

لكن انا عاوزه اتكلم عن صورة واحده بس

صورة الشيخ اللى لابس جلابية بيضا

ودقنه طويلة وكثيفة

بيبيع العطور والبخور ومعاها كتب دينية وكتيبات صغيرة كلها بتتكلم عن عذاب القبر وحجاب المسلمة والمسيخ الدجال وليلة الزفاف وعلامات الساعة ... إلخ

وأغلبية الكتب دى مش بأقلام مصرية

أنا مش باوجه تفكير اى حد لأنه تبع تنظيم معين او حاجه .. وباقول من اولها اهوه عشان ماحدش يستظرف ويقول عليا انى بهاجم حد

انا بهاجم فكر معين..

أعتقد ان من أهم الحاجات اللى أدياننا حثتنا عليها هى العمل.. دا جميل جدا

بس العمل ده لازم يكون انتاجي.. مفيد للبشرية.. يخلى الانسان واللى حواليه يتقدموا

فين الحاجات دى بقى من اللى بيبيع السلع دى

انا على فكرة زبونه ليهم وباحب اشترى بخور ومسك من هناك

بس اكيد مش عايشه حياتى عليهم

واستغرب جدا من الكميات المهولة من الحاجات دى والطلب عليها مش متساوي

يعنى اللى بيتاجر فى الحاجات دى شايف انه كده بيرضي ربنا وبيتاجر فى حاجه حلال

طب هو نفع غيره بإيه؟؟

خلى ريحتهم حلوة.. وبعدين


مش عارفه.. جايز اكون مكبرة الموضوع او باتكلم على حاجه عبيطة

بس ماعتقدش ان دى السلعة الوحيدة اللى ربنا بيبقى راضي عن اللى بيشتغل فيها

فيه حاجات كتير جدا محتاجه ناس تفكر فيها وتشتغل فيها

ليه الناس ما تبتكرش وتجرب تنتج حاجه كويسه غيرها يستفيد بيها وهما كمان يستفيدوا

عندنا موارد وايدي عامله بالهبل

بس ماعندناش ابتكارية ولا تخطيط

عشان كده تلاقى أسهل حاجه على الواحد انه يسرح بمناديل وفلايات

وعطور وبخور

الجمعة، 5 يونيو، 2009

عته ماركة Only In Egypt

موضوع النهارده ممكن يكون غريب شويتين
يمكن وجه غرابته انه بقى منتشر أكتر من اللازم للدرجة اللى خلتنا نعتقد أنه امر مسلم بيه وبيحصل فى كل مكان
ماشيه فى امان الله فى الشارع.. محل جديد موجود وافتتاح على صوت هشام عباس وأسماء الله الحسنى.. وبعد ما ينتهي يبدأ بعرور بالتسأول عن ظن حبيبه إذا كان بيلعب بيه ولا لأ
مش هى دى النقطة اللى هاتكلم عليها دلوقتى وإن كانت جديرة بالتساؤل برضه.. بس خليها لوقت تانى
المهم.. محل شيك جدا..صاحبه شيخ بجلابية بيضا ودقن طويلة
المحل اسمه: ( البخاري ) ملابس محجبات.. ملابس أطفال.. لانجيري !!!!
على اليافطة مرسوم صورة واحده لابسة إسدال.. وجنبها طفل لابس أرنوب وشكله سكر خالص....
وجوا المحل في أبرز مكان.. متعلق فى كل حتة الجزء التالت.. اللانجيري
طب ازاي.. مين .. ليه
ايه ياجدعان اللى بيحصل ده
هو الخاج صاخب المخل نظامه ايه بالضبط؟؟
على ما اعتقد ان حد بيقدم لنفسه على انه مستشيخ يبقى لازم الصورة عنده تكون متكاملة
ازاي يحط ملابس محجبات جنب لانجيري!!!!!
طب ازاااااااااااااااااااااااى
دا بيخلينى أفكر بجد فى ظاهرة تعليق الحاجات دى - اللهم احفظنا - فى الشوارع فى أكتر الاماكن المكشوفة
وكل اللى بيبيعوها رجاله
الظاهرة اللى علق عليها احد أصدقائي اللى مش مصريين بقوله: دا نتيجة كبت جنسي فى مصر
دا ما بيحصلش فى اى دولة تانية
حسبي الله ونعم الوكيل.. فضحتونا قدام الاجانب
طب هو الراجل اللى بيبيع الحاجات دى عادى عنده كده يعنى؟؟
طب واللى رايح واللى جاي مافكرش فيهم
لو حسبها هايتأكد من ان الفئة الوحيدة اللى بتبص على - البضاعة - هى من الذكور فقط
الإناث بتودى وشها الناحية التانيه أصلا خجلا من المنظر المشين.. أو بتحمى نفسها من ان حد يتحمرش بيها على اساس انها بتبص على حاجه ياي يبقى هى عايزه كده
طب فين العقل ياللى بتشتكوا من لبس البنات وبتخلوه سبب وحجة عبيطة بتبرروا بيها التحمرش بيهم؟؟؟
يخرب بيت الاستعباط بجد
هو الموضوع ده مالوش حل؟؟؟؟
متهيألي الحاجات دى عورة.. ماينفعش انها تنكشف كده قدام اللي رايح واللي جاي وكل ذو خيال مريض.
انا مش رافضه بيع النوع ده من السلع.. أنا رافضة طريقة تسويقها
هاحترم جدا المحل اللى حاطط هدوم البني ادمين في الفتارين للبني ادمين
واللي عاوز لانجيري يخش يشوفه جوه
ولا إيه؟