السبت، 21 فبراير 2009

حلم


ولسه باحلم

ببيت صغير

في شارع قديم

رغم شيبته كان نضيف

ضمني ف يوم

لما كنت في بلد غير البلد

أول مكان لعبت فيه

وفي العيد حلين ضفايري

حطيتلي روج زي الكبار

ونزلت جري

عشان ألعب مع ولاد الجيران

أنام وأصحى

مش يوماتي

لكن كل فين وفين

وطيف الحلم لسه ف خيالي

عدى مرة

ألف مرة

أول مرة كان من سنين

مسكني حنين

قلت يمكن عشان

يادوب لسه مفارقاه

ودلوقت

فاتت سنين

عشر سنين

ولسه برضه الحلم إياه

بلقى طيفه في المنام

بيت صغير

في شارع قديم

رغم شيبته كان نضيف

أول مكان لعبت فيه

لما كنت في بلد

غير البلد

14 حط دماغك:

tamer.sala7 يقول...

ربنا ينولك اللي في بالك... ويحقق الحلم قبل قانون الايجارات الجديد

اعشق فى الليل ضوء القمر يقول...

حلو حلم جميل فى ليله دافيه كلها حنين
أتمنى يتحقق

مثلية فقط يقول...

أول مكان لعبت فيه

في شارع قديم ... نضيف

شو هالحنين القوي ... جد كلمات بسيطة بس عميقة و قوية

تحياتي

micheal يقول...

ممممممممم..جميل..بوست عن حلم ونيولوك أسود
نصيحة أخوية..ابعدي شوية عن الواد اللي اسمه مايكل
:))
تحياتي يا وانكوك

اسماء عوني يقول...

حلو البوست ده
وحلو شكل المدونه جدا
اسلوبك حلو كده . حسيت انها حدوته كده

على باب الله يقول...

لما كنا في بلد غير البلد

متهيألي إحنا ما سافرناش .. البلد هي اللي سافرت

أحمــــــــدبــــــــــلال يقول...

بقالى مدة بفكر فى اصحابى بتوع زمان
و اتفرج على الصور و الفيديوهات و الحاجات دى كلها
مش عارف ليه بحن للماضى الايام دى
يمكن لان الواقع و الحاضر طلع قاسى شوية

مش حلمك لوحدك ده حلم ناس كتيييير

احساس لسه حى يقول...

عزيزتى

الاحلام بقيت كلها صعب تتحقق

واللى بيحلم دلوقتى بيفضل يحلم للابد

احلمى بس لو الحلم طال اعملى حسابك انه مش هيتحقق

دورى على حلم تانى

ما انى شايف حلمك بسيط

ومن حقق تحققيه

بخصوص موضوع ايمى

احيكى على انك طلبتى تتاكد من نص الفتوى

وانا علقت تعليقين قبلك وضحت نص الفتوى وكلامه بالضبط الفتوى

علشان ولا مظلم حد ولا بلد

علشان محدش يظلمنا ولا يفترى على بلادنا بغير الحقيقه

تحياتى

سلام

Unknown يقول...

البيت اللي بيمثل الاستقرار هو حلمي

جميل النص

وينكى يقول...

تامر صلاح
هو بقى لسه فيها قانون ايجارات جديد
انا ساكنه فى ملكى ياعم
:)
اعشق فى الليل ضوء القمر
الحلم مش هايتحقق
لكن انا راضيه اقرب منه بس
مثلية فقط
دا حلم حقيقي باحلم بيه
شكرا لرأيك
مايكو
اكيد ماغيرتش النيولوك عشان سواد عيونك
انا غيرته عشان لقيت عليه صور ناروتو وساسكي
انا باعشق الكارتون ده
اسماء عوني
متهيالى دى اول مره تقريلي فيها حاجه عدلة
غيري انطباعك بقى عنى
D:
على باب الله
البلد زى ماهي
الناس هى اللى بتتغير
والنفوس بتتغير
احمد بلاااااااااال
الحاضر الغائب
يخرب بيتك انت فين يابنى
بقالى 7 سنين بحاول ادور عليك
ايه اللى حصلك؟؟؟
احساس لسه حي
عامله حسابي انه مش هايتحقق
الزمن ما بيرجعش لورا حتى لو اتفسر كلام اينشتاين على انه قابل للتحقيق
وشكرا عشان جبن نص الفتوى
بجد استفدت منهم قوى
مياسي
ربنا يرزقك بيه
تحياتى:)

romansy يقول...

ما اجمل الاحلام والذكريات ولكن عندما نحلم سوف نحقق ما نتمناه ولكن فقط ينقصنا الاراده

Zika يقول...

صباح الخير
تقريبا كده
اول مره ادخل وماحسش اني داخل مجلة الوسيط
البوست هايل بصراحه
بحب طريقة السرد والوصف دي
وعاجبني النيولوك الجديد
علي فكره انا كتبت تعليق قبل ده
بس ماعرفش راح فين
دوري كده يمكن تلاقيه
هههههه
تحياتي

وينكى يقول...

رومانسي
انا واثقه ان الانسان يقدر يصنع المعجزات.. وزى ما قلت المهم الارادة
زيكااااااا
الوسيط؟؟؟؟
احمد ربنا انى بساهم فى توثيق روابط الصلة بين المدونين والمدونات
استنى عليا بس وانا هاتحفكم كل يوم بحاجه متظبطه زى كده
اى خدمه
D;

Zika يقول...

ايون ومالها يا بنتي الاعلانات
انا لو عليا كل يوم هابقي في الساقيه واحضر اي حفله تتعمل
ان شالله لو شكوكو هو اللي هيغني