السبت، 28 مارس، 2009

تجميعة أفكار

بقالي كتير ماكتبتش
ودماغى هاتنفجر من كتر الأفكار اللي متحوشه فيها
من غير مقدمات.. نبتدي:

****

اسمه محمد العلي

رائد مسرح لم يغب
مهندس الدراما الخليجية

ممثل سعودي اتعودت اتفرج على المسلسل الرمضاني القصير بتاعه ( خليك معي) وانا صغيره.. واللي بيتكلم عن مظاهر سلبيه في المجتمع السعودي وبيسلط الضوء عليها بطريقة فكاهية
من اكتر الممثلين احتراما لفنه ولرسالته .. كان صاحب فكرة مشروع قائم دلوقتى في السعودية..وهو عبارة عن هيئة بتساعد الناس اللى دخلوا السجن بسبب الديون فالهيئة دي بتجمع تبرعات من الناس او الهيئات عشان تساعد الناس دول
في يوم من كام سنه.. وقعت في ايدي مجلة عربية.. وعلى الهامش قريت خبر نعيه
مات فى هدوء متأثرا بأزمة قلبية فجائية
ماتتصوروش اتأثرت ازاي.. ومن ساعتها وانا باترحم عليه كل ما افتكره
جميل قوى انك تعمل حاجه فى الدنيا الناس تترحم عليك بسببها او تفتكرك بالخير حتى لو ماتعرفكش او حتى مش من نفس بلدك
محمد العلي... الله يرحمك ويحسن اليك.. ويجعل مثواك الجنة.. ويكون مشروعك صدقه جارية تفك بيه كرب كتير قوى من اخواتك فى الانسانية

****

البطاقة الحمراء

للي ما يعرفهاش - والعهدة على الراوي .. اللى حكالي يعني - دي شهادة بتطلع في الجيش للي عندهم اعفاء من التجنيد لأسباب تتعلق بنقص رجولة المجند ( وخلينا مؤدبين ومانتكلمش عن أبعاد الموضوع الاخرى)

الطريف فى الموضوع ان الشهادة دى بتتبعت على يد محضر لبيت المجند.. ولاااااااااازم واحده من حريم الدار هي اللى تستلمها

فضيحه بجلاجل يعني

هل ياترى ده له علاقه بإن البطاقات الانتخابية كلها لونها أحمر؟؟؟

****

النهارده 28 مارس

التاريخ ده بيمثلكم أى حاجه؟؟

لا مش عيد ميلادي.. والنهارده مش أجازة رسميه ولا حاجه

النهارده بس... يوم كوكب الأرض

تضامنت أكتر من تسعين دوله على مستوى العالم انهم يعبروا عن استياءهم من ظاهرة الاحترار العالمي والتلوث والتغير المناخي

فهايعملوا ايه بقى

كل اهل ال90 دوله دول هايطفوا أنواهم ومش هايستعملوا الكهربا خالص لمدة ساعه واحده

من الساعه 8:30 ولحد الساعه 9:30

اعتراضا منا كشعب الارض على الظاهرة دى اولا .. وهاتكون تجربه لطيفه اننا نعيش ساعه كامله بدون مسببات التلوث

والأرض كمان هاترتاح ساعه فى عمرها

لأول مره الدول دى كلها - ومنهم مصر - يتفقوا على حاجه واحده

سمعت ان الكهربا هاتقطع عشان عارفين ومتأكدين ان محبي الفذلكه هايقولوا واحنا مالنا

بدليل النهارده كنت بانشر الفكره على بعض المواطنات

اول واحده قالتلى: يعنى الواحد يقعد ساعه فى الضلمة.. انا بخاف م الضلمة

وتضحك بسخريه

والتانيه تقول: يعنى هى الساعه دى اللى هاتفرق

والتالته تقول: اه ياختى باين عليكي قاريه ومثقفه

الموضوع اخد منى شويه وقت عشان اشرحلهم ان الموضوع اكبر من التريقه.. واننا لازم نشترك ولو مره واحده فى حياتنا فى عمل شيء موحد

وان خلال خمس سنين جايين كل القاهريين هايجيلهم صداع مزمن بسبب التلوث.. وان منطقة الدلتا هاتغرق تماما خلال اقل من عشر سنين بسبب ارتفاع منسوب الميه الناتج عن ذوبان ثلوج القطبين

وان اغلب الواليد دلوقتى بيتولدوا بحساسية على الصدر وبنسبة رصاص فى دمهم وبيموتوا بسبب تطرف الجو والتلوث

دا غير الامراض اللهم احفظنا التانية

المهم انى لأول مره احس بالامتنان للقرار الحكومي بقطع الكهرباء تماما فى الوقت ده

****

الوداع يا بطاقتى الحبيبة

هاتفارقيني بعد عشرة سبع سنين قضيتيهم معايا وعمرك ما طلعتى من شنطتي ولا خذلتيني غير مره واحده حسيت فيها بقيمتك ساعتها

موضوع تجديد البطاقه دا مفيد جدا .. خلال سبع سنين الواحد اتغيرت فى حياته حاجات كتير قوى

غيرت وظيفتك.. غيرت سكنك

غيرت حالتك الاجتماعية.. او حتى طلعوا قرار فى موضوع خانة الديانه

والأهم من دا كله.. هتتلافى عيوب صورتك الأولانية D:

المشكله بقى فى اللفه الادارية اللى لازم اجرى فيها وأسابق الزمن عشان استخرج بطاقه جديدة.. المشكله مش فى اللفةبصراحه

المشكله فى الوقت بالنسبالي.. اجيبلها وقت تانى منين دي

هييييه.. دنيا مشاغل.. هانعمل ايه بقى

****

مخي مليان أفكار كتير.. بس انك تلاقي وقت تنقل أفكارك للكيبورد دي مشكلة

أشوفكم على خير في يوم ما

8 حط دماغك:

احساس لسه حى يقول...

عزيزتى
ايه كمية الافكار دى

طبعا الله يرحم محمد العلى ويرحمنا جميعا

انا كنت فى الجيش سمعت عن البطاقه دى بس مظنش انها لازم تسلم على يد محضر ولامراه متوصلش لكده

هما بس بيبعدوه عن الجيش علشان العساكر فى سن صغير وفى جبل

شوفى يوم الارض يوم حضارى وجميل

بس مينفعش يكون واحد واقف فى طابور العيش ولا طوابير الحكومه وتقوليله طفى النور

هيقولك بيطفى غصب عن اهلى كل شويه لما بيقطع ويوم الارض عندى كل يومين بيحصل الناس دى مش حضارية دى مرفهه

ده راى ومتزعليش

جميل موضوع البطاقه الجديده دى بس انتى عارفه ولسه قايلك عندنا فى مصر

بلد المليون طابور

يعنى هيطلع عينك علشان تغيريها

مستنى مزيد من الافكار

تحياتى

سلاك

micheal يقول...

جميل قوى انك تعمل حاجه فى الدنيا الناس تترحم عليك بسببها او تفتكرك بالخير حتى لو ماتعرفكش او حتى مش من نفس بلدك
عجبتني أوي الجملة دي يا وانكوك
قشطة عليكي يا بتاعة الكوكب يا صديكة البيئة أنتي
:)
بقولك ايه هو ححوار تغييبر البطاقة ده بجد
الظاهر أني واخد تعسيلة
:)
تحياتي

يا مراكبي يقول...

إنتي كنتي بتجري وإنتي بتكتبي البوست ده وألا إيه؟

4 مواضيع مرة واحدة في بوست واحد إنجاز برضه

----

الأهم في ده كله موضوع الإتفاق على عمل جماعي موحد .. ده شيء من أبعد ما يكون عن تفكير الشعب ده .. وبيعتبروه نوع من الهطل .. وده اللي مطمن الحكام إن عمرنا ما هنتحرك سو أبدا .. رغم إننا الغالبية وهما الأقلية .. سبحان الله

Zika يقول...

أيه تفريغ العقل ده
انا ساعات بعمل كده بارضه
بتبقي في دماغي حاجات كتير اوي
بقوم عاوج راسي علي الكيبورد ودالق منهم شويه
:D
انا ماعرفش موضوع البطاقه الحمرا ده خالص وبصراحه ماظنش انه حقيقي :D

يوم الارض ده كان يوم مسخره
انا الوحيد تقريبا اللي في مصر وكنت قاعد انا وماما في الشقه لوحدنا
وقومنا طفينا النور كله وحطينا شمع
وقعدنا نقول كلام رومانسي هع هع هععععععععع
اه بس بصراحه كنا مشغلين التليفزيون
ماهو مش معقوله بارضه هنقعد وشنا في وش بعض وكمان في الضلمه

وينكى يقول...

احساس لسه حي
معلش دى تجميعة افكار صغنونه وان شاء الله البقية تاتى قريبا
زي ماقلتلكو.. انا سمعت حاجه معينه سواء كانت صح او غلط
لكن اللى كنت اقصده هو البطاقه الحمرا التانيه اللي عاوزين كل الناس تاخدها
دى اللى تستحق التعليق فى نظرى
يوم الأرض كان محتاج وعى اكتر وكان محتاج دعايه اكتر
الناس كانت فاكره ان الكهربا هاتقطع
كل واحد بيفكر لوحده وعشان نفسه
مش مهم نموت السنه الجايه بالتلوث والسرطان ولا ان الدلتا تغرق ولا ان الدنيا تولع
المهم ما نموتش الشهر الجاى من الجوع
مع ان السنه عباره عن شهور بس ماحدش بقى ياخد باله
انا رحت مكتب العمل عملت كعب عمل ورحت السجل المدنى طلعت شهادتين ميلاد وقدمت ورق البطاقه واتصورت واخدت الوصل ومشيت
وكل ده فى اقل من ساعه واحده بس
يابلاش:)
مايكيييييييي
الحق اعمل بطاقتك لو كنت عاملها من 2002
ماتخافش ماعتقدش ان نحسك المتأصل ممكن يعاندك ساعتها
صديكة بيئة ايه بس
ياجدعان انتو ليه بتحسسوانى انى المدلله المترفه اللى بتهتم بحاجات فارغه وبعتمل جمعيات للدفاع عن حقوق الكلاب الشيواوا
الموضوع خطير.. مش هانلاقى هوا نتنفسه بعد كده
هايعبوهولنا فى قزايز وهانشترى الهوا زى انابيب الغاز بعد كده
تخيلوا بقى ايه اللى هايحصل ساعتها
يامراكبي
انا كنت باجرى فعلا لأنى كان عندى حفله ساعتها ومتأخره على البروفة
:)
كنت عاوزه اكتب اكتر بس رأفه بالقراء قلت كفايه عليهم الجرعه دى
انت قلت كلمه حلوه قوى
الاتفاق على راي واحد بنعتبره هطل
طب لييييييييييه
( فرق تسد)
زيكا
مقدره احساس الامتلاء النافوخى ده
بجد متعب قوى
انا مش عارفه موضوع البطاقه ده 100% وزى ما قلتلك العهدة على الراوي
وبرضه المقصود من البوست ده هو البطايق الحمرا التانيه

نيفين جرجس يقول...

سلام المسيح يسوع

صديقتي اود طلب مساعدتك

انا الاخت نيفين جرجس

يدخل الى مدونتي صديق لك يدعى لورد

يشتمني ويسبني على المدونه وعلى الايميل

ارجو منك لو لديك اي علاقه به ان توقفيه

لان ذلك عيب

وليس بمقدوري سوى ان اصلي له
ان تخلصه روح المسيح من الارواح الشريره التي تدعوه لإهانة المخلصات واليسوعيات

نحن نؤدي دورنا

ولا حاجه له ان يدخل الينا ويشتمنا
فهذه طريق الارهاب والظلم عند غير المسيحين الصادقين المحبين للسلام

ارجو ان تساعديني لو سمحتي
هذا هو عنوانه

http://lord-m-m.blogspot.com/

اترك في قدسية المسيح
+++++ باركك الرب

عبد من عباد الله يقول...

ايه ده الف سلامه يا وينكي ...

انا كنت من متابعي مدونتك بس مره واحده لقيتها اتحذفت .. هو ايه اللي حصل ؟

وينكى يقول...

نيفين جرجس
اهلا بيكي
بجد انا استغربت جدا من الموضوع ده
لورد واحد من اعز اصدقائي.. اعرفه من 3 سنين وهو انسان فى منتهى الاحترام والأخلاق والأدب وعمرة ما تطلع منه كلمة مسيئة
انا دخلت عندك وعنده عشان اتقصى الموضوع بنفسي
انا متأكده مليون فى المية ان اللى عمل كده مش لورد اللى اعرفه
احنا فى عالم مفتوح وانا واثقه ان حد منتحل شخصيته وبيعمل كده لسبب او لآخر
انا نفسي اتعرضت لموقف كده.. حد انتحل شخصيتى وكان بيدخل يشتم الناس على مدونتى.. بس هو كان متآمر واهبل وانكشف بسرعه
انتى ممكن تشغلي الموديراشن وتتحكمي فى التعليقات اللى جايالك عشان مشاعر زوارك ما تنجرحش
شكرا لثقتك فيا ودمت بخير
:)
عبد من عباد الله
يابنى انا كل يومين بكارثه
انا هادخل موسوعه جينيس فى عدد الحوادث اللى حصلت لمدونتى الغلبانه
بس انا اهو
لسه عايشة وباتنفس وهاكمل
:) شكرا لسؤالك