الثلاثاء، 9 يونيو 2009

عطور.. وبخور


جربتو تمشوا قبل كده من جنب جامع اكيد.. مش كده؟

ايه اكتر حاجه لاحظتوها هناك؟؟

لا مش قصدى الشحاته اللى شايله عيل وبتصوت بيه

ولا أبو رجل مسلوخة اللي عاوز يلم حق عملية رجله .. مع ان رجله عفنت بقالها 3 سنين وكل يوم نفس القعدة ومتكيف معاها تماما وماعندهوش اى مشاكل

أمال ايه اللى اقصده بقى؟

العنوان باين يعنى.. صندوق الاسنسات وعلب البخور والعود والمسك والذى منه

كميات مهووووووووولة من الحاجات دى.. وكل ما كبر الجامع او كان بيطل على موقع استراتيجي تلاقى الكم بتاع السلع دى زاد

كتير لدرجة تخليك تفتكر لو انت من سكان خارج البلد دى ان كل الناس اللى فى مصر ريحتهم مسك وعنبر

وبعد كده تصدم بالحقيقة المرة ان اللى ماشيين فى الشارع - رجال وسيدات - لا تفوح منهم إلا ريحة واحدة.. العرق

بطريقة مفزعة ومقرفة.. العالم دى مش بتستحمى ولا ايه؟؟

دا حتى مزيلات العرق فى كل حته

طب ايه الحكاية بقى

ليه فيه عرض قوى من سلعة الطلب عليها مش قوى

وليه الحاجات دى مابتلاقيهاش - غالبا عشان ما ابقاش كدابه - إلا فى الاماكن دى

أكيد ليها عشروميت سبب

لكن انا عاوزه اتكلم عن صورة واحده بس

صورة الشيخ اللى لابس جلابية بيضا

ودقنه طويلة وكثيفة

بيبيع العطور والبخور ومعاها كتب دينية وكتيبات صغيرة كلها بتتكلم عن عذاب القبر وحجاب المسلمة والمسيخ الدجال وليلة الزفاف وعلامات الساعة ... إلخ

وأغلبية الكتب دى مش بأقلام مصرية

أنا مش باوجه تفكير اى حد لأنه تبع تنظيم معين او حاجه .. وباقول من اولها اهوه عشان ماحدش يستظرف ويقول عليا انى بهاجم حد

انا بهاجم فكر معين..

أعتقد ان من أهم الحاجات اللى أدياننا حثتنا عليها هى العمل.. دا جميل جدا

بس العمل ده لازم يكون انتاجي.. مفيد للبشرية.. يخلى الانسان واللى حواليه يتقدموا

فين الحاجات دى بقى من اللى بيبيع السلع دى

انا على فكرة زبونه ليهم وباحب اشترى بخور ومسك من هناك

بس اكيد مش عايشه حياتى عليهم

واستغرب جدا من الكميات المهولة من الحاجات دى والطلب عليها مش متساوي

يعنى اللى بيتاجر فى الحاجات دى شايف انه كده بيرضي ربنا وبيتاجر فى حاجه حلال

طب هو نفع غيره بإيه؟؟

خلى ريحتهم حلوة.. وبعدين


مش عارفه.. جايز اكون مكبرة الموضوع او باتكلم على حاجه عبيطة

بس ماعتقدش ان دى السلعة الوحيدة اللى ربنا بيبقى راضي عن اللى بيشتغل فيها

فيه حاجات كتير جدا محتاجه ناس تفكر فيها وتشتغل فيها

ليه الناس ما تبتكرش وتجرب تنتج حاجه كويسه غيرها يستفيد بيها وهما كمان يستفيدوا

عندنا موارد وايدي عامله بالهبل

بس ماعندناش ابتكارية ولا تخطيط

عشان كده تلاقى أسهل حاجه على الواحد انه يسرح بمناديل وفلايات

وعطور وبخور

7 حط دماغك:

micheal يقول...

ملحوظة في محلها يا وانكوك
:)
تحياتي

!!! عارفة ... مش عارف ليه يقول...

موافقك في الموضوع ده
بالإضافة إنه ممكن يكون عائق في طريق المصليين اللي داخلين الجامع

وافتكر ان فكرة الاستسهال دي مسيطرة علينا جدا يعني نشوف مشروع ناجح يفتح جنبه عشرة لحد ما يعيني الراجل يضرب تفليسة ونوقف حال بعض

نسأل الله العفو والعافية

تحياتي
وليد

يا مراكبي يقول...

الموضوع فيه شقين: شق انا موافق عليه وشق انا مش موافق عليه

اللي انا موافق عليه هي ارتباط السلع دي بالمساجد واعاقة الحركة في الدخول والخروج من المسجد وكمان الكتب اغلبها بيكون مجهول المصدر او متطرف

اما اللي انا مش موافق عليه هو التقليل من شأن النوع ده من الاتجار .. لأن كل السلع التجارة فيها حلال وكلها مطلوبة حتى وان ظهرت تافهة

mohra يقول...

وجهه نظر مناسبه لو بصينا للمجتمع كله و تقدرى تطبقيها كمان على كل انواع التجاره للاسف بقينا شعب مستهلك و لا ننتج اى شيئ تقريبا

اما على مستوى انسانى فالشخص اللى بيبيع العطور هيفضل موجود و ممكن يكون هو ده اللى فى ايده فى الوقت ده

قصدى ان فى اى مجتمع هيتواجد اللى يبيع حديد جنب اللى يبيع مصاصه ...طبيعى يعنى

أحمد مختار عاشور يقول...

وينكي..وينكي..وينكي..
اعذريني لو بتأخر عليكي..

موافقك مليون في المية في كل اللي قولتيه
....

بس انا ليا تعليق ع الاغنية اللي حاطاها
انا في الاول كنت منبهر بيها بس اكتشفت ان كلماتها عبيطة كمعظم كلمات اغاني محمد عدوية

"والجواب صعب انه يرضينا..ولو غريب نقول ازاي"

لا يا شيخ!

ما هو لو غريب لازم نقول ازاي

............
إلا مسعد اتأخر ليه بالكاكاو؟

سارة نجاتى يقول...

أنت بس مش قادرة تستوعبى - و انا زيك 0 ايه علاقة الشرطية بين الحاجات دى و الجامع ؟؟ و انا كمان زيك

بس هو تقريبا السبب ان فى ناس كتير من مرتادى المساجد ( أو المسلمين بشكل عام ) بيعتقدوا أن فى انواع معينة من الوايح و العطور حلال و الاخر حرام , فاللى جنب الجامع و اللى غالبا بتبقى ذات تركيبة مختلفة دى الحلال
أما بخصوص الكتب الدينية , فمفيش فى مصر أساسا كتب دينية جيدة الا القليل
تلاقى بقى ليلة الزفاف و الثعبان الأقرع و الكلام اللى بالك فيه ده

سلام يا باشا

وينكى يقول...

مايكي
مبروك عليك الالبون السادس وعقبال اليوبيل الفضي :)
عارفه.. مش عارف ليه
اهلا بيك يا وليد
التزاحم والتقطيع على بعض
تصدق ماكانوش فى بالى لما كتبت الموضوع
دى وجهة نظر جديدة انت اضفتهالى
شكرا ليك :)
يامراكبي
معاك حق تماما
انا مش باقلل من شان السلع دى.. زى ماقلت انا نفسي باستعملها
ومادام حلال يبقى خلاص
بس اتضايق من اعتبارها الحاجه الحلال الوحيدة اللى ربنا صرح بتجارتها
معترضه على الكم مش اكتر
مهرة
موضوع الشعب الاستهلاكى ده بقى زايد عن حده
دوريلى على حد بيعرف يخيط هدومه بنفسه دلوقتى
مثل بعيد شويه.. بس فى مرة حد قالى اتعلمى تطبخى لنفسك وتخيطي هدومك بنفسك لو عايزة تعرفى تعيشي فى البلد دى
بس كلنا بنستسهل وبنعتمد على ناس تانيه
عاشووووووووووور
حمد لله على السلامه
فينك من كتير ياراجل
مسعد زمانه جاى.. هاتلاقيه قبل ما الشتا يدخل معاه الكاكاو :)
انا بحب محمد عدويه قوى.. صوت واحساس ومزيكا بجد حاله رائعه
ماهو قالك ازاى اهوه.. عادى يعنى
:)
سارة نجاتي
اللى بيعتبروه عطر حلال اللى مش بيخالطه سبرتو.. على اساس انه مسكر ونجاسة
فاتلاقى كلها زيوت عطور واسنسات خام
بس برضه بيبقى فيها نسبة كحول
آل يعنى الناس هاتشربها
بقى الواحد هايتشرى عطر يشربه ولا أسهله يلفله سوجارة بانجو؟؟ عجايب