الثلاثاء، 23 يونيو 2009

خاص .. لكل اللى اتعاملوا معايا وشايفين انهم يعرفوني


جايز تكون فكرة هبلة

جايز تكون وسوسة بزيادة حبتين

لكن طقت فى دماغي اني أعمل استفتاء صغنون عني

المرادي أنا موضوعه.. وانا السؤال وانا الإجابة

ومن النهارده مافيش حكومة.. انا الــ... احم احم

ماعلينا


قبل ما ابتدي هاقولكم انا بافكر في ايه

فيه عندي مشكله صغنونه انا بعاني منا في حياتي

انا مش عارفه انا عايزه ايه ولا عارفه انا عايزه اوصل لإيه

صحيت في مره لقيت نفسي باعمل حاجات كتير قوي على التوازي والمحصلة مش عاجباني

حاسه الى حد ما بالتشتت وان السكينة سارقاني

ولو ضفنا عليه احساسى اللى مسيطر على كياني ان العمر ماعادش فاضل فيه كتير وبيعدى بسرعة البرق ولازم الحق اعمل كل حاجه

اكيد هاتحسوا بجزء من اللى انا عايشه فيه


كل واحد او واحده كلمتة.. اتعاملت معاه

هزرت معاها او اديتلها رأي

اتفقنا او اختلفنا

عرفنا افكار بعض ووافقنا بعض عليها او عاندناها

كل انسان وانسانة شايفين انهم عرفوني بجد.. طالبة منكو المساعدة


كل واحد يكتبلي الحاجات دي:

- أقوى خمس مميزات شايفهم فيها

- أوحش خمس عيوب مش طايقنى بسببهم

- خمس طرق شايفنى المفروض امشي فيهم وابني مستقبلي على أساسهم


طبعا لو حد عنده أكتر أو أقل مافيش اى مشاكل.. بس أرجوكم ماحدش يطنش

انا محتاجه اعمل تقييم شامل لحياتى ومحتاجه وجهات نظر كتيرة

انا بقيت فأر تجارب يعنى وانتو دكاترة المعمل.. يافرحتك بيا يامه :)


انا مش هانشر التعليقات المرادي ومش هارد على التعليقات دي ( عشان ماحدش يغش من التانيين :) ).. اسمحولي أعرضلكم النتايج وأشرحلكم الفكرة بشكل عملي فى البوست الجاي ان شاء الله


شكرا بجد واتمنى انكم تساعدوني فى الدراسة دي

19 حط دماغك:

Vegie يقول...

أقوى خمس مميزات شايفهم فيها

1- انك بسيطه جدا اتمني اني ابقا زي كده بس للاسف انا بعقد الامور كتير

2-منطلقه

3-طيبه

4- انك صوتك حلو ههههه انا نفسي اوووي اني اغني بس عمري ما هعملها في حياتي لاني زي ماقلت بعقد الامور

5-اعتقد انك بتحبي الحياه وده حاجه حلوة يعني ماعتقدش انك متشاءمه ده اللي انا شايفاه مش عارفه انا صح ولا غلط


أوحش خمس عيوب مش طايقنى بسببهم

طبعا في تعليق يعني اكيد لو مش طايقاكي مش هدخل هنا ^^ مفيش غير حاجه واحده هي اللي ممكن تبقا حلوة فيكي بس ممكن تتضايق

1-بصي الناس ليها شخصيات كتير اووي بس انتي ممكن بتبقي شايفه حاجه احسن وفعلا بتبقا احسن للناس بس في حاجات كتير في الناس مش بتنفع تتغير انتي فهمتيني؟؟ ^^


خمس طرق شايفنى المفروض امشي فيهم وابني مستقبلي على أساسهم

1-هو طريق واحد مافيش غيره انا كتضايقه اووي عليكي عشان انا لو اطول اني ابقا في الكليه بتاعتك والقسم بتاعك عشان انتي عارفه اني بحب القسم بتاعك وكان حلم من احلامي اني ادخله بس للاسف في بلدنا المتخلفه مافيش حد هيقدر قيمه الناس اللي زيك اللي بتحب حاجه مختلفه نفسي اني اشوفك احسن واحده في مجالك عشان بجد الدنيا محتاجه حد يقدر قيمه العلم اللي احنا ممكن نوصله ^^


2-يعني لو ممكن كمان طريق تبقي مغنيه جامده ولا يقولك هيفا ولا ضايعه ولا الكلام اللي مالوش لازمه ده ههههههه

سلاو

Vegie يقول...

على فكره انا وشوشني عشان انا غيرت المدونه زي ما قلتلك

غير معرف يقول...

مش لوحدك فى هذا الوضع دى مشكلة معظم هذا الجيل ولااعرف حل لها
asaad shaker

أحمــــــــدبــــــــــلال يقول...

أقوى خمس مميزات:
فنانة
متفتحة العقل
مرحة
أجتماعية جداً
أنسانة بجد
صوتك حلو


خمس عيوب:
الانقطاع عن الناس
تعدد الانشطة
قلة الثقة بالنفس
صادقة فى زمن لا ينفع فيه الصدق
كثرة التفكير


خمس طرق:
الفن الغناء بشكل خاص
الكتابة شعر أو صحافة
التليفزيون أعداد برامج
مش لاقى حاجة تانية
بس هو الغالب ان اتجاهاتك فنية أوى

و شكراً و ربنا يوفقك للى فيه الخير

Magi Mostafa يقول...

بصى انا معرفكيش اوى يمكن معرفكيش خالص لكن بتابع بلوجك من زمان حتى قبل معمل البلوج بتاعى
اجمل حاجه فيكى هى حيويتك وحبك للحياه واظن دول اهم حاجه انك تعيشى حياتك بالطريقه الى تعجبك وتكونى مستمتعه بيها وربنا يوفقك

nohamy يقول...

بصي يا معلم

احسن حاجة فيكي

صوتك

علاقاتك الاجتماعية

انك بتعرفي تسمعي الناس

انك بتعرفي تساعدي الناس

علاقات عامة اكثر من هايلة

مفيش حاجة وحشة

بس فيه حاجات ممكن تسيبها
زي
الشغل الروتنيي
و الحاجات اللى بتضيع منك هدفك

لازم تختاري هدف واحد و يكون هو مصدر ربحك

بس

انك تتخلصي من مشاكلك العائلية
و تنفضي لها و تثبتى لهم انك الاحسن

أحمـــد علـــى يقول...

وينكى .. مش هكدب وأقول إنى عرفتك قوى .. وبالتالى مش هكتب أحلى 5 حاجات فيكى وأوحش حاجات مش موجودة فيكى
بس اللى عارفه ان شعورك ده اناعايشه .. واكيد غيرنا كتير .. ان يبقالك اهتمامات كتير قوى وحاجات بتعمليها عايزة تكملى فيها وحاجات عايزة تتعلميها عشان تعمليها ومش لاقية وقت لده ولا لدى
انا شايف ان ده طبيعى لكل حد عنده مواهب متعددة أو حتى مجرد اهتمام مش موهبة .. خصوصا مع اسلوب حياتنا فى مصر اللى بياخد اوقات كتيرة فى الانتظار فى مواصلة أو مصلحة ....
اللى هقدر أقوله ليكى حاجتين..
لازم تقسمى وقتك بين حاجات انت بتحبيها وبتعمليها .. دى هتاخد معظم وقتك
حددى وقت تمارسى فيه حاجات فرعية بتهتمى بيها .. بس وقت مقنن لغاية ما تعرفى الحاجة دى آخرها إيه معاكى ..لو عايزاها جدا هتضاف على الحاجات الدايمة وتاخد وقتها .. ولو مش عايزاها أو لقيتى انها هتتعارض مع حاجات تانية يبقى هتهمليها ومجرد انك أخدتى فكرة عنها
الكلمة الأخيرة .. طالما انت بتفكرى وتقييمى نفسك .. وطالما بتعملى نقد ذاتى لنفسك .. والاكتر انك اتجهتى للنقد الخارجى .. يبقى أكيد انت صح .. وهتوصلى
ربنا يوفقك

!!! عارفة ... مش عارف ليه يقول...

مع الاسف مش قادر اقول رأيي لاني لسه متعرف على مدونتك من شوية بس

مين عالم ... يمكن في القريب العاجل أقدر اكون رأي واكيد وقتها مش هخبيه عليكي


تحياتي
وليد

micheal يقول...

بص يا عم وانكوك
أكتر خمس مميزات
1-جدعة مووت ..يعني لازم تحسسي الواحد أنه عنده ضهر يتسند عليه ويفضفض ويحكي معاه
2-روح الفكاهة في العديد من الأوقات
3-مثقفة
4-دماغك نظيفة
5-خبرتك كبيرة في الحياة

خمس عيوب
1-عاوزة تملي الناحية العاطفية اللي عندك بأي طريقة وده ممكن يوقعك في مشاكل تكلكع الدنيا
2-أوقات بتبقي حساسة بزيادة
3-تنظيم الوقت..يعني مازلت مقتنه أنك لو ركزتي في الشغل جامد بالذات في ساعاته الأولي ممكن تخلصيه بدري عن كده وتستفيدي بالوقت ده في الراحة أو الفسحة أو المرواح للنادي وممارسة الرياضة(وده أفضل الحلول من وجهة نظري) عشان الطاقة اللي عندك تطلع بشكل إيجابي
لما أشوفك برضه لينا كلام
تحياتي يا حبي

غير معرف يقول...

شكراً يا مسعد مش بشرب كاكاو هههههه

ازيك يا وينكي بقالي كتير مشفتكيش و نفسي اكلمك و الله بس غصب عني
عامة انا قريت موضوعك و ربنا يرسيكي علي بر ان شاء الله

و لو سمحتي اشارك برأيي يعني

اولا : المميزات :
1- انتي بجد صاحب صاحبه ( ياما وقفتي جنبي في حاجات كتير و مهما حصل مقدرش انسي دة ابداً ).
2- فيكي حيوية تقدري تنقليها للي حواليكي .
3- ما شاء الله عقلك جامد و كتير لجأتلك كأخت كبيرة في مشاكل عندي .
4- عندك ما شاء الله مهارات قيادة كويسة .
5- و الاخيرة دي عاجباني جداً بصراحة انك بتضحكي علطول ما شاء الله يعني .


ثانياً : العيوب :
1- ساعات بتطلع في دماغك افكار مجنونة كدة لازم تخف شوية .

معرفش بصراحة مش شايف عيوب جوهرية تانية


ثالثاً : الخمس طرق :
1- انا شايف ان انتي تنفعي اوي في شغل العلاقات العامة و التعامل مع الناس .
2- شايف برضه انك تنتبهي شوية بقي لمضوع الارتباط لانه طريق مهم .
3- ممكن تمشي برضه في البحث العلمي بس بره مصر مش هنا لان هنا مفيش هنا علم اساساً .

ربنا يكرمك ان شاء الله و يوفقك
و بأذن الله حكلمك قريب

عبد من عباد الله يقول...

ممممممم شئ جميل

بس مبدأياً انا شايف ان الاسئله فيها خلل بسيط

اولاً ان معظم اللي بيدخلوا المدونه بتاعتك طبيعي انك عجباهم و بيحبوا يقروا ليكي ، يعني عندهم اشاره إيجابه تجاهك ..

ما ينفعش مره واحده يقولوك خمس مميزاه و في نفس الوقت خمس عيب مش طايقك بسببهم !!! صعبه شويه

ببساطه لاننا اساساً متعودين على اننا اللي بنتخنق منه و بنتخلف معه جامد صعب اننا نقول عليه حاجه حلوه و العكس برده صحيح لو بنحب حد صعب اقول عليه اي حاجه وحشه اياً كانت ..

لكن انا عن نفسي شايفك على الاقل محترمه ، يعني ايه ؟ اه للأسف الاحترام ده دلوقتي بقى قليل شويه و اكيد انتي شوفتي مدونات المدونين فيها عاملين ازاي ، قله الاحترام و الادب ملهاش علاقه بالفكر و السن ، فيه مدونين سنهم كبير و يمكن عقلهم كمان مش صغير بس للأسف تبعي حظبطك مختلف معايا حبهدلك ... و الحمد لله الواحد قابل من الناس دي كتير .

طريقه كتابتك شويه مش بتاخد اتجاه لأخره يعني يا شمال يا يمين لأ بحسن بشئ من الوسطيه في كلامك ( على حسب اللي قريته طبعاً ) ... اما عن العيوب فانا مش حخترع عيوب ، اولاً انا معرفكيش شخصياً ولا حتى على النت اوي ، ثانياً انا لا انكر اني مش متباعك علطول في كل كلمه بتقوليها ..

اما عن الطرق فمن وجهة نظري المتواضعه من الخطأ ان حد اياً كان مين يحط طريق لحد تاني اياً كان مين برده ، بمعنى ادق انا ممكن اقولك ايه رأيك في الاهداف دي تحبي تحققيها ؟ ايه رأيك في الادوات دي ممكن توصلك لو استخدمتيها ؟؟ و في الاول و في الاخر ممكن نتفق على هدف و رؤيه معينه لكن انتي ممكن تحققي نفس الهدف ده بطريق و انا بطريق تاني خالص و مفيش واحد صح و واحد غلط لأ ، فيه ان الطريق ده مناسب ليكي و الطريق ده مناسب ليا ...

انا عن نفسي هدفي و اللي اهديه ليكي يمكن يعجبك ، اني اكون سعيد ، السعاده هى الهدف الاسمى بالنسبه ليا ، ازاي تتحق دي بقى بأي طريقه إذا كانت حتحقق ليا السعاده اوك ، بس لو لقيت نفسي بعمل حاجه و الناس كلها بتقول عليها كويسه و جميله بس انا مش حاسس بسعاده يبقى اسبها فوراً لان مفيش حاجه تستها اعملها و اتعب فيها وانا مش سعيد ، لو الناس كلها شايفه اني المفروض اكون دكتور و اكون مشهور و عندي فلوس علشان اكون سعيد ، و انا شايف اني لو بقيت بعمل حاجه بحبها زي الرسم و لا المكواه و لا التدوين و لا التدريس ولا اي حاجه انا حاسس فيها بالسعاده يبقى امشي فيها هى لاني حكون فيها حاجه كويسه و ده حينفعني اولاً و حينفع بلدي ثانياً ...

و الحاجه الاخيره ، اتمنى انك ما تحسيش ابداً في اي لحظه انك صغيره ، انك ضعيفه ، انك مش حتقدري تعملي حاجه ، اياكي ان تستصغري نفسك ، انتي بنت ، انت بإذن الله زوجه ، انتي بأمر الله ام ، و بعلم الله جده ، قادره تكوني و قادره تطلعي اطفال ينيرورا للبلد دي و للبشريه كلها الظلام اللي هى فيه ، يمكن ساعتها محدش يعرف اسمك بس حنعرف ولادك و حنفضل نقول يسلام على الام اللي ربت .......... و ده طبعاً مش حيجي بالاغاني و اللبس و الخروجات و الوقت اللي بيعدي من غير اي استفاده للعقل اللي من المفترض انه هو اللي حيكون المربي ....

و طبعاً لازم نقول النصيحه الشهيره :

الوقت كالخروف ، إن لم تربطه .... نطحك

Unknown يقول...

- أقوى خمس مميزات شايفهم فيها؟
متصالحة مع نفسك
متفاءلة
طموحة
إجتماعية
بتحبى الناس


- أوحش خمس عيوب مش طايقنى بسببهم؟
هو مش لدرجة إنى مش طايقاكى يعنى :)
أحياناً ما بتبقيش مرتبة فى أفكارك و خططك و بتسبيها بالبركة و ده يمكن حلو فى حاجات بس وحش فى حاجات تانية

بتحبى دايماً تجمعى بين كذا شخص فى عمل جماعى واحد.. ده جميل بس من غير ما تحطى إفتراض إن ممكن ما بيجمعهومش عامل الحب او الميول المشتركة مثلاً او مش عاوزين يجمعوا مع بعض و كل واحد فيهم ليه ناس تانية بيرتاح معاهم

ووارد طبعاً أخطأ فى ملاحظاتى دى


- خمس طرق شايفنى المفروض امشي فيهم وابني مستقبلي على أساسهم ؟

دول بقى لما اعرفهم انا لنفسى هبقى اقولك عليهم :)))))

يا مراكبي يقول...

فكرة جميلة بجد

بس الاجابة هتتطلب ان اللي يعلق يكون قريب منك جدا عشان تحصلي على نتيجة موضوعية

بس بجد بأحييكي

احمد الجيزاوى يقول...

طيب انا معرفكيش كويس بس الموضوع وفكته فى حد ذاته حلوة
ودل على انسانه بتحب تراجع نفسه دائما
فتحياتى
احمد الجيزاوى

اعشق فى الليل ضوء القمر يقول...

انا متعاملتش معاكى قبل كده وجه لوجه

بس كنت بقرأ ليكى من فتره لفتره

نصيحتى ليكى
أنت الوحيده القادره على تقييم نفسك
ولول إتبعتى ما يريد الناس لحملتى الحمار على ظهرك كما فعل جحا

أنت طالبه ثلاثه نقاط
أنا هعطى ليكى حاجه واحده
شوفى إنت خلقتى ليه وممكن تعملى إيه لنفسك و للبشريه ز أهلك
وإعمليه طالما فى شئ غير المعصيه

قوس قزح يقول...

افضل اتكلم معاكى وجهاً لوجه :)

غير معرف يقول...

افضل اتكلم معاكى وجهاً لوجه :)

ماجى توفيق

اسماء عوني يقول...

انا مش هاعرف اجاوب
بس انا اعرف مميزاتك
انتي طيبه اوي
وحنينه اوي بحس انك امي ماعرفش ليه هههه
صوتك حلو
ذكيه
بسسسسسسسسسسسس كده ده اللي عندي :D:D

Dr.Mohammed Gohary يقول...

للأسف يا وينكي
أنا متعاملتش معاكي لدرجة اني أقول مزايا وعيوب
بس أنا شايف كمميزات
أعتقد
انك:
-جريئة
-مجتهدة
-طموحة
-صوتك روووووووووووعة
- بتحبي الصداقة وكدا

عيوب
لسه معرفهاش
ههههههههههههههههه

خمس طرق تبني بيهم مستقبلك:
بصي هو المستقبل بيد الله سبحانه وتعالى
ومحدش يقدر يتحكم فيه
بس ممكن أقولك:
-الاستعانة بالله والمحافظة على الفروض
-اكرام الوالدين وحسن معاملتهم
-الصدقة شيء مهم جدا علشان ربنا يوفقك( دايما لما تحسي انك في ضيق .. شوفي حد محتاج وحاولي تساعديه .. هتلاقي ربنا بيفك كربك وبيساعدك .. دا غير الأجر فـ الآخرة اللي هو طبعا أعظم من كل كنوز الدنيا وهو الستر في الآخرة).
-حب الناس وأخذ المشورة.
-الإجتهاد في المجال الذي تحبيه والسعي الدائم لإثبات الذات فيه.

دا رأيي المتواضع
وأتمنى يعجبك أو يفيدك ولو حتى بقدر ضئيل

تحياتي