الثلاثاء، 18 أغسطس، 2009

حين تصبح البساطة أسلوب حياة



وحشتوني بجد يا ولاد
أنا شخصيا بقالى كتير ماعديتش من هنا
بس احلى حاجه فى الموضوع ان الحياه جميله ومتظبطه معايا
عايشه الحياة ببساطة
وبابتسم للمشاكل والصعاب واستمتع بيها
مقولتين اتعلمتهم فى كورس تنمية بشرية كنت واخداه من كام شهر.. وماقولكوش انا متفاعله بيهم ازاى
بقيت حاسه ان نفسيتى أهدى ومش قلقانه من حاجه
تحصلى مشكلة.. وماله.. انا احسن من غيري
بامشي فى الشارع وانا مبتسمه ومبسوطة .. بس عشان أدى شوية أمل وتفاؤل للناس ومايتخنقوش لما يشوفوا وش مكشر تانى غير اللى بيشوفوه حواليهم كل يوم
حتى أبسط التصرفات اللى ماحدش بيعملها لطفوليتها - زى النط من فوق بركة ميه - بقى ليها طعم تانى
احساس أقول عليه: عايشه حياتي ببساطة وتلقائية.. وبمزاجي
جميل ان الواحد يعمل اللى حاسس بيه ببساطه ومن غير ما يفكر فى رد فعل الناس اللى حواليه كتير
ببساطة لأنهم هايتمنوا انهم يكونوا مكانه بس التخشب اللى جواهم مانعهم
جميل انك تحس بالحب لكل الناس ، تعاملهم من القلب.. حتى اصحاب المصالح ما تبخلش عليهم بنورك
تعيش بروح طفل عنده خمس سنين.. وحكمة من بلغ الخمسين
اوعى تلاقى فرصة ممكن تفرح فيها وتفوتها
اى نعم الفرص بتيجي كتير.. بس ليه تضيع عليك لحظة سعادة حتى لو مش هاتدوم كتير؟

والله انا مابنصح ولا بقول كلما من الهوا
دا احساسي بجد
انا حتى كتبت وانا مش عارفه انا هاكتب ايه
انا سبت نفسي وخلاص
مين اول واحد هايبشرني انه هايعيش حياته ببساطة
ويبقى دا اسلوب حياته؟

5 حط دماغك:

mohra يقول...

وينكى مش انتى نشرت التدوينه دى قبل كده؟؟
يمكن فى المدونه القديمه
على العموم انا باعيش حياتى بنفس الطريقه و شايفاها احسن طريقه للحياه
كل سنه و انتى طيبه

micheal يقول...

أتمني ذلك إنما التنفيذ معلق لأسباب كتييير..صعب أضحك علي نفسي وفيه أمور أساسية مش موجودة
كل سنة وأنتي طيبة يا وانكوكا

يا مراكبي يقول...

أنا عايش كده على طول

عندي مسؤليات ومهمات تهد الجبال .. لو كل مشكلة وقفت عندها وزعلت .. يبقى هأموت وما فيش حاجة هتتحل

كل ما تحصل مشكلة ما با أستسلمش للزعل والصدمة .. أفكر في حلها الأول

Focus on the solution

Not focus on the problem

غير معرف يقول...

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49

وينكى يقول...

ايوه يامهرة انا فعلا نشرتها قبل كده قبل ما حد يهكر عليا ويدمر المدونة
بس احيانا البوستات القديمة بتفيد

مايكل
احنا اتفقنا ان حالتك ميئوس منها يابنى

يامراكبي
أحيي فيك طريقة تفكيرك:) ياريت الكل كده

غير معرف
للأسف مابعرفش اقرا روسي