السبت، 13 مارس 2010

فخورة بنفسي جداااا


ماشيه في حالي فى الشارع في امان الله.. كنت باشتري حاجات للبيت وكده
شويه واكتشفت ان فيه كائن عجيني لزج مالوش لازمه ماشي ورايا وعمال يلسن

كلام كتير قوي مادخلش في خانة يعاقب عليها القانون لسه
اللهم طولك يا روووووووح

الشارع كان فيه ناس قليلين وحسيته بعد شويه
وراح رجع تاني ودخل في مرحلة الكلام الذي يعاقب عليه القانون

طب اعمل ايه دلوقتي!!
راجعت بسرعه موقفي والمكان حواليا والشيلة الهباب اللي كنت شايلاها
ولقيتني باستعد وباتحفز
بادور حول محوري بسرعة وبأقصى قوتي هويت بدراع الممسحة اللي في ايدي على كتفه
لكم ان تتخيلوا رد فعله وهو مخضوض وبيتنطط وجري وهو عامل زى الفار المبلول

طبعا شيعته بشتيمتين من اللي قلوبكم تحبها - بالفاظ مايعاقبش عليها القانون ماتخافوش - كنوع من رسائل القوة عشان لو حد كان بيفكر يكرر الحركة تاني يعرف اني مش هاسكتله
وماقولكوش كنت ماشيه فى الشارع بمتنهى القوة والثقة ولا ملكة زماني

طبعا تلات ارباعكم هايتساءل إيه لازمة اني احكي موقف زي ده
ومنكم اللي هايقول ايه الهبلة اللي فاضحة نفسها دي او على أقل تقدير واحده عاوزه تعمل بروباجاندا وخلاص
وفيه كام واحده من صديقاتي المقربات هايفتكروا موقف مشابه حصل من سنة فاتت مع عيل كان راكب عجلة وحاول يفكر انه يغلس عليا ورزعته بكل قوتي على ظهرة ضربة محترمة وخليته هو واصحابه مايهوبوش ناحية قطة ماشيه فى الشارع ساعتها

دلوقتي انا باحكي الكلام ده ليه؟؟
لأني زي اي بنت مصرية.. اتعرضت لسخافات كتير في الشارع.. امي كانت بتقولي لو حد ضايقك حطي وشك فى الارض وماترديش عليه
لما عملت كده اكتشفت ان الغلاسة بتزيد.. وعرفت من مصادر ذكورية موثوق بها ان الشباب بيصنفوا البنت اللي بتسكت بطريقتين
إما انها خايفة ودى تبقى هدف سهل ما يتخافش منه
أو تبقى عايزه تتعاكس ومبسوطة وساكته.. ودي بالنسبالهم تبقى واحده لا مؤاخذه وحلال اللي يتعمل فيها لأنها عاوزاه

يا بنات.. أوعوا يتلعب بدماغكو
اوعوا تسمحوا لحد يعلق عليكوا ضعفه واخطاؤه ويحملكوا المسئولية
هاتسمعوا كتير كلمة: لبس البنت ومشيتها المحترمة وحجابها والكلام ده
وان كانت دى كلها حاجات ممكن تساعد على التحرش في الحالات الاوفر.. بس مادام انتى واثقه من نفسك ولابسه لبس يقبله الوسط المحيط ليكي ومش مستنكر ومابتعمليش حاجه لافتة للانظار
يبقى اوعي تسمحي لحد انه يلومك.. واوعى تحسي للحظة انك مكسورة الجناح
في علم النفس حاجه اسمها اسقاط.. يعنى الواحد ممكن يرتكب خطيئة ويكون وحش من جواه وعشان يبرا نفسه يشوف كل اللى حواليه مخطئين
انا وحش وكل اللى حواليا اوحش مني عشان كده انا هعاقبهم عشان ابقى كويس
منطق مريض من شخصيات مريضة

هممممممممممممم.. من فترة طويله وانا بحاول اعمل برنامج تدريبي خاص بالدفاع عن النفس بشكل احترافي نابع من تدريباتي وقراءاتي في مجالات علم النفس وشغلي فى مجال تنمية المجتمع
أعتقد انه جه الوقت المناسب اني أعمل الموضوع ده على المدونة هنا..

استنوا معايا الموضوع على شكل حلقات واتمنى انكم تتفاعلوا معايا والموضوع يكون مفيد لكم

6 حط دماغك:

micheal يقول...

يا وانكوكا..قبعة مرفوعة ليكي طبعا في موقف زي ده..قال تسكتي قال
أوعي انتي أو أي بنت تسكت..عارفة حتى لو الموضوع تطور أنه رد عليكي بعنف برضه يبقى يكفي أنك أدبتيه قدام الكل وعادة اللي بيعملوا كده بيبقوا جبناء جدا من جواهم
حلوة فكرة البرنامج..ربنا يوفقك
تحياتي

UncŁē Sam يقول...

ههههههههههه
هى دى بنت البلد المصريه بجد
تحيااتى ومودتى

UncŁē Sam يقول...

يارب تتقبلى مرورى لمدونتك الكريمه

يا مراكبي يقول...

برافوا عليكي بجد .. واللي انتي قلتيه عن نظرة الذكور للبنات ده صحيح .. وبالتالي تصرفك ده صحيح تماما .. الحرامي دايما بيكون جبان ومش شجاع ابدا .. والمتحرشين دول كده بالظبط

الجواز و سنينه يقول...

برافواااا
تسلم اديكى يا قمر
و ادى البنات و إلا فلا

وينكى يقول...

مايكل
بجد بردت ناري بعد الموقف ده
استنى الحلقات قريب ان شاء الله
قلب حزين
شكرا لمرورك واهلا بيك ضيف عزيز
يامراكبي
مبسوطة جدا برأي حضرتك واتمنى انى استفيد من خبرتك فى الحياة وموقعك وسط معسكر الأعداء :))
باهزر طبعا
الجواز وسنينه
تسلمى يا جميل
النرفزة بتعمل اكتر من كده صدقيني :)