الأربعاء، 24 مارس 2010

نفسي ف وطن


نفسي ف وطن

أحس فيه بالأمان

ماحسش فيه بالخوف من بكرة

واقول ياترى.. هاعيش بكام

نفسي ف وطن

أمين عليا

أمشي ف شوارعه عزيزة

مرفوعة الراس

من غير ما كلمة تجرحني

أخويا يسرقني

أو عين تشوفني دايما خطية

نفسي ف وطن

كل الحبايب فيه يتجمعوا

من غير نفاق من غير مصالح

او حسابات

نفسي ف وطن

ما اتذلش فيه عشان أعيش

مامشيش فيه جنب الحيط

ولا أخاف من بدلة ميري ف يوم

وتكون سندي

اكسب بعرقي اللي يكفيني

من غير رشاوي ولا محسوبية

نفسي ف وطن

ماخافش فيه ع اللي بعدي

أعرف فيه أحب واعيش

من غير فتاوى .. من غير فساد

من غير حيتان.. تبلع سمك

من غير ما خاف كلام الناس

أكسر جمودي واعيش بره الدايرة

اكون أنا زي مانا

يوم ما اقول بحبك يا وطني

ماسمعش كلام يقول اوهام

نفسي ف وطن

يكون أمي .. يكون املي

يكون حلمي ببكرة الجميل

نفسي ف وطن

يكون بجد

ليا وطن

5 حط دماغك:

micheal يقول...

حلوة الكلمات بس يعني إيه وطن؟

كيكى عوووووو يقول...

دة فى الاحلام ياعزيزتى
******************
انا تعبت اوى لحد ماوصلتلك حضرتك
عايزة اقولك كنتى منورة فى تى فى ياجميل شوفتك وعرفتك لوحدى فى الحفل الكاثوليكى لعيد الام
كانت حلوة اوى اغنيتك بتاعت ايام الاسبوع دى
والزغروطة الاخيررررررررررررة
تحفة وكان افيه جميل
وكنتى زى القمرة
ياواد ياخطر انت
مبرووووووووووووك
عووووووووووووو

حسن ارابيسك يقول...

الرقيقة والعزيزة/ وينكي
أولاً أذيك وعاملة ايه
ثانياً الحمد لله عودتك للكتابة بتلك المواضيع الهامة والتي على درجة كبيرة من الأهمية والتي لايمكن غض الطرف عنها
لذلك أشيد بتدويناتك السابقة
حاجات تخنق
لست أدري
فخورة بنفسي

واليوم تدوينتك
نفسي في وطن
قرأتها سطر سطر وحرف حرف، لأجدني في النهاية وبشكل تلقائي أقول وأردد ..أمين
وعلى فكرة دي أبسط حقوق للمواطن على وطنه
أبسط الأشياء ونرى ذلك في أوطان كثيرة لم تغفل حق المواطن عليها
ولكن بالفعل هنا البسيط تحول لشئ معقد وصعب
والسهل تحول لإستحالة
فهل نحن نحيا فوق جثة مهترئه لوطن مريض
أم نحن مرضى نعيش فوق جسد ننخر فيه كالسوس بأمراضنا
وينكي العزيزة
الحقيقة مقالك رغم كل بساطته إلا أن مكنونه كالجبال التي يصعب أن تتحرك من مكانها
وينكي العزيزة
تحياتي
حسن أرابيسك

فوكش يقول...

نحن أشباح
والأشباح ليس لها وطن

في القديم عاش أجدادنا في أوطان وعاشت فيهم
ماتت الأوطان حقا, لكنها بقيت تعيش في من تبقى من أجدادنا
الآن مات أجدادنا, وبقينا نحن...

ما لنا وطن نعيش فيه ولا وطن يعيش فينا, اللعنة! إننا حقا أشباح!

وينكى يقول...

مايكل
فكرتني باغنية محمد فؤاد.. يعنى ايه كلمة وطن :)
كيكي حبيبتى
واحشانى جدااااااااااااااا
معلش يابنتى كل شويه يتهكر عليا واقعد اعزل بين المدونات
مبسوطة جداااااااااا انى لقيتك من تانى
شفتيني وانا باغني؟؟.. اجنن مش كده :q
حسن ارابيسك
ماتتصورش مقدار سعادتى بتعليقك ده وباهتمامك بقراءة الموضوعات اللى كتبت فيها
بس انا باحلم بأمل يكون موجود
خايفه ييجى عليا الوقت اللى الاقيني بادور فيه على وطن تانى
فوكش
احنا اشباح دلوقتى
عملنا ايه عشان نبقى بنى ادمين او المفروض نعمل ايه؟؟
انا حاسه بالوجع بجد من كل ده ونفسي نفوووووووق