الأربعاء، 18 أغسطس، 2010

كلام من القلب

(الكلام ده كتبته في أغسطس 2007... يمكن حاجات كتير قوي اتغيرت ويمكن لسه زي مانا.. المهم حبيت استرجع افكاري من تاني هنا)

- انتي سمعتي ألبوم أنغام الجديد؟

  • اه ...لسه سامعاه النهارده الصبح

- وايه رأيك فيه؟؟

  • جميل قوي..الكلمات تحفه وان كنت حاسه ان اللحن والتوزيع قديم

- ماهى دى العبقريه

  • اكيد طبعا ..رجعتنى لجيل التمانينات فى بعض الأغانى

- وشفتى كلمات الاغانى قويه ازاى... عاجبانى قوى أغنيه باغير

  • مش هاخبى عليك...الأغنيه عاجبانى جدا ولمستنى جدا...بغباء يعنى

وبصوت منخفض: يارب ارزقنى بواحد أغير عليه كده

- انتى بتقولى حاجه؟

  • لا أبدا

- نظرة بنص عين بمعنى: على بابا!!

  • قلت بعدها : باقول نفسي ربنا يرزقنى بواحد أغير عليه كده

- نظرة عين بمعنى: كل البنات مسروعه على الجواز ليه؟؟؟


وانا مروحه دار الحوار ده فى دماغى
ماحستش انى عاوزه أنظم قصيده ولا انى أكتب قصه..... حاسه انى عاوزه أفضفض واتكلم زى ما الأفكار بتدور فى دماغى بالضبط

أنا عشت عمرى كله أعاند فى نفسي وأقول أنا كده كويسه وقشطه وتمام
أنا مش عايزه أتجوز...أنا عايزه أبقى حرة نفسي


الجواز نكد أزلى وتقييد للحريه وواحد يتحكم فيا زى ماهو عايز
جواز يعنى تحمل مسئوليه أنا مش قدها...هو أنا أعرف أعمل حاجه لنفسي عشان أبقى مسئوله عن عيله؟؟


ولا لما الأطفال ييجوا بقى...دى بلوى تانيه مش عارفه حلها ايه
أطفال يعنى كائنات بتتشكل ولازم أشكلهم صح
لازم أكون مسئوله عن كل كبيره وصغيره جواهم

لااااااااا...دى مسئوليه جباره أنا عمرى ماهاقدر عليها ولا هابقى قدها فى يوم
وسط زميلاتى البنات ..فى الكليه ..الجارات... معارف أى نشاط
لقيت البنات بتفكر نفس تفكيرى... اللى تقول


مالناش فى الانحراف ده
دا مش وقته خالص
لسه قدامى مشوار طويييييييييل ولازم أمشيه
بلا جواز بلا هم

وكلام من ده كتييييير
وانا متأكده مليون فى الميه ان الكلام ده من ورا قلوبهم
بس عاوزين الصراحه...وكلام من القلب واعتراف بقى
أنا عايزه اتجوز...أنا عايزه أرتبط

عايزه يكون ليا انسان ملكى لوحدى ولو حتى لـ7 ساعات فى اليوم وأكون أنا ملكه
حد يكمل معايا طريقى .. نتسند على بعض

نفكر مع بعض.. نحلم مع بعض...نحزن مع بعض ....ونتمنى مستقبل أحلى مع بعض


أفظع حاجه فى الدنيا هو الاحساس بالوحده ...يوم لما الواحد يحس انه راجع بيته بالليل وشايف كل البيوت اتقفلت وكل واحد قاعد وسط عيله دافيه وهو راجع لبيت فاضى بارد كئيب


أنا مابقيتش خايفه من الكلمه "أنا مسروعه على الجواز" بس مش لأى سبب
ولا أى انسان

عاوزه العاقل المجنون اللى يفهم مخى ماشي ازاى
نتخانق ونزعق ونرمى بعض بالمخدات وبعد كده نتصالح لأننا عارفين ان كل واحد فينا مالوش غير حضن التانى
عاوزه المرح المنطلق وابن البلد الشهم الجدع... متفتح العقل وفى نفس الوقت محافظ على قيمه ومبادئه

عاوزه المتدين اللى عارف ربنا وعارف ازاى يصونى من غير مايربى لحيه ولا يمشي بقال الله وقال الرسول اللى بيخبى وراهم جهل شنيع بأبسط واجباته وحقوقه

عاوزه اللى يستحق انى اديله كل طاقة الحنان اللى جوايا وعشت مخزناها عشانه هو بس
الأب الحنون اللى بيتحول فى لحظه لطفل صغير لما يحتاج لمامته جنبه
حد يفكر فى الحاجات اللى أنا مافكرتش فيها ويضيفلى واضيفله
يدينى من خبراته وياخد من خبراتى
واحد يفخر لما يمشى وسط الناس واحنا ماسكين ايدين بعض ويعرفنى للناس ويقول حبيبتى قبل مراتى


واحد لو مهما حصل... مايطلعش كلمه او يسمح للفته انها تطلع بره البيت ويبقى متأكد انى مستحيل أعمل كده
يعرفنى على أصحابه ويعرف أصحابى ونبقى اجتماعيين جدا
كل يوم بالنسبالنا لازم ييجى بحاجه جديده
مايسمحش لأهله او أهلى انهم يتدخلوا فى حياتنا ويملوا دماغنا وكلام من نوع الست العاقله تنتف ريش جوزها أو ادبحلها القطه والكلام الفارغ الأهبل العقيم ده
ولا الزن على الودان ومش ناويين تفرحونا بحتة عيل كده

ولو جه العيل يقولولك انتوا سايبينه كده ليه..مش تلحقوا تخاووه
وانتوا مالكوا يا باردين يارخمين


مين سمحلكوا انكوا تجرحوا حياتنا وتتدخلوا فيها بالطريقه البشعه المهينه دى؟؟؟؟؟
ولو تأخر الحمل شويه تبتدى الوصفات الخزعبليه والتشكيك وروحوا للدكاتره وروحوا اعملوا زار


ولا روح اتجوز واحده تجيبلك الولد
طب أنا واحده مش عاوزه تخلف أول ماتتجوز على طول...حد شريكى؟؟؟
شريكى ساعتها هابقى متفقه معاه على كده...مش فيه طفل كبير لازم يتربى الأول؟؟؟
وانا مش لازم بابا يعودنى عليه الأول ويحسسنى انى مافيش على الحجر غيرى ولا ايه؟؟؟
أنا عاوزه ارتبط عشان أعيش حياتى مش عشان أتدبس واتحول لمكنه لزيادة الجنس البشرى فى المجتمع


أنا عارفه انى خايفه وباستهبل على نفسى وباسوف وباتحجج بحجج عبيطة وباطفش اللى يتقدملى لأسباب فارغه وهايفه جدا
مع انى عارفه ومتأكده انى خايفه من الفكره على قد احتياجى ليها
يمكن لأنى شايفه كل قصص الحب حواليا فشلت أو جفت بسبب عوامل الزمن
يمكن عشان مابقيتش شايفه حواليا نموذج كويس للانسان اللى فى خيالى وسط الظروف الصعبه الطاحنه وحالة الجفاف العاطفى اللى بيمر بيها كل الشباب

خايفه ان حظى يبقى وحش وأظلم أو أتظلم
خايفه وخلاص...مش لازم أبرر خوفى ده او اشرح أسبابه...المهم انه موجود
لكن وسط غابة الخوف دى ... فيه زهرة امل واحده... أنا مؤمنه انى فى الدنيا دى فيه انسان واحد بس مناسب ليا
نصى التانى اللى اتقسمت عنه وتهنا فى أطراف الأرض وبندور على بعض زى مابتقول الأساطير


ممكن أكون مغرقه فى رومانسيه بلهاء... بس أنا كده ودى أحلامى أنا
ومتأكده انو فيه واحد دلوقتى بيفكر نفس تفكيرى وبيحلم نفس أحلامى
ولما نلاقى بعض هانقول لبعض... ياااااااه ..انت كنت بتفكر فى الفكره دى فى نفس اللحظه اللى انا كنت بافكر فيها
وانا داخله من باب البيت طليت على القمر وقلت
انت لو موجود حواليا بجد ...أرجوك تعالى وماتخافش
مش مهم ظروفك ايه.. مش مهم انت فين
مش مهم أى حاجه... عرفنى بس انك موجود... وانك حاسس بيا
امنحنى الفرصه انك تكون جنبى...واسمحلى انى أكون جنبك
وأوعدك المرادى انى مش هخاف ومش هاعمل حساب لأى حاجه مهما كانت
هاتخلى عن كل التمثيليات اللى كنت باعملها على نفسي قبل ماباعملها على أى حد تانى
هانزع قناع القسوه واللامبالاه من جوايا قبل ما أشيلهم من على وشي
والمرادى بجد هاوعدك
انى هاغير عليك


7 حط دماغك:

spacegirl يقول...

عجبنى كلامك أوى لأنه تقريباً نفس كلامى ..... بس أنا مش رافضه عشان المسئوليه ....أنا رافضه عشان مفيش واحد بالمواصفات اللى انتى قلتيها -واللى هى نفس المواصفات اللى انا عايزاها- .....ولو اتوجد الشخص دا هوافق عليه فى ثانيه ولو ما اتوجدش هاكون انا عيلتى الخاصه بإنى اتبنى بنوته صغننه نعيش سوا ونكبر سوا وتبقى عيلتى وكل دنيتى

GURU يقول...

دعيني احييكي وبشدة, أعجبني أسلوبك وهذه هي المرة الأولي التي أشاهد فيها مدونتك
بالتوفيق

يا مراكبي يقول...

كلام عقلاني جدا مع انه من 3 سنين بسم الله ما شاء الله

ربنا يكملك بعقلك ويهديكي للصالح ان شاء الله

حسن ارابيسك يقول...

وينكي
معندكيش فكرة فرحان قد ايه ان التعليق قبل الكتابة فيه داخل مستطيل التعليق لانه كان رجع تاني وعصلج معايا فاكره لما قلتلك على المشكلة دي قبل كده
المهم كل سنة وانتي طيبة
لكن واللهي ياوينكي التدوينة دي جميلة جداً التدوينة دي بتحضن جواها قصيدة رومانسية انسانية عالية قوي
كم الحاجات اللي اشرتي اليها في شريك الحياة كانت بتتقال بطريقة غير طبيعية مش مجرد مواصفات او ملامح
لا دي كانت بتتقال رومانسية شديدة جدا لحال الانسان واحتياجه الحقيقي والفعلي في تلك الحياة بشريك العمر الجميل الودود الصبور الحليم اللين الوفي الحنون مع شركه في درب الحياة الصعب
ياااه وانتي بتقولي راجع بالليل وشايف كل البيوت اتقفلت وكل واحد قاعد وسط عيلة دافية وهو راجع لبيت فاضي بارد كئيب
انتي ياوينكي كنتي وقتها بتكتبي بمشاعرك قصيدة انسانية عاليه قوي
لا املك من امري الان الا ان احييكي من قلبي وعقلي على ابداعك الذي بلا شك لم يخلق من فراغ ولكن من نفس جميلة هادئة رومانسية تحب الحياة كما ينبغي لها ان تكون
تحياتي
حسن أرابيسكِ

رجل من غمار الموالى يقول...

السلام عليكم _ عيدكم سعيد _ أقول لكي بصراحة _ أنتي لا تطلبين رجلا أنتي تطلبين عبدا مطيعا قادر علي التمثيل _ دول كتير _ ما تخافيش _ هتلاقي

رحــــيـل يقول...

هايجى مش تقلقى :) المهم تفضلى مصدقة
انا كمان كنت بحلم نفس احلامك وعندى نفس مخاوفك وليا نفس الافكار تجاه فكرةا لجواز
وتوهت واتلخبطت واتعقدت وقولت خلاص بقى انا افكنى من الرجاله وسنينها لحد ما ربنا بعته ليا زى ما حلمت واكتر رغم اننا كنا قريبين من بعض سنة ونص قبلها وماكناش شايفين ده فى بعض :) بس لما ان الاوان بنعيش احلى حدوتة نعوض بيها كل اللى فات وكل عدى علينا فى البعد
المهم نفضل مصدقين ومأمنين بوجود نصنا التانى اللى تاه عننا فى بداية الوجود

وينكى يقول...

space girl
ربنا يبعتلك اللي بتحلمى بيه
بس اوعى تتنازلي عن المعيار اللي انتى حاطاهوله
هو موجود وهاييجي في وقته المناسب بالضبط

GURU
ليا الشرف انك تزور/تزوري مدونتى
واتمنى انها تعجبك دايما واشوفك على طول

يامراكبي
الواحد بتجيله شطحات عقلانية كده فى اوقات بيرجع بعد كده يقول معقول انا كتبت الكلام ده زمان؟:)))
شكرا لرأيك

حسن ارابيسك
الفنان الذي أحب فنه
رأيك وسام على صدري وشهادة ليا اني ييجي مني :))
ومبروك ان مشكلة المدونة اتحلت
ياريت ما نتحرمش من زياراتك

رجل من غمار الموالي
انا طلبي بسيط جدا.. انه يكون راجل بجد
والصفات دى تعلى من رجولته ولا تنتقص منها
انا مارضاش اكون زوجة عبد مطيع لنى مش ناويه اكون راجل البيت

رحيل
ربنا يبارك حبكم ويديمه عليكم ويخليه أقوى من اى واقع او ظروف
بجد فرحتيني :)