الجمعة، 19 نوفمبر، 2010

الدرس انتهى - صلاح جاهين


الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال

ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..

ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …

ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس

5 حط دماغك:

رجل من غمار الموالى يقول...

إيه الكأبة دى ع المسا
ربنا يرحمنا جميعا برحمته

يا مراكبي يقول...

:-((((

حسن ارابيسك يقول...

وينكي
أذيك وحشاني واللهي كل أعمالك الجميلة المكتوب منها والمرئي
الحقيقة لايوجد ما يقال بعد تدوينتك الرائعة التي تضم قصيدة أبياتها سهام من نار
ولكن أين العقول والقلوب والصدور والأجسام التي أصبحت في ملوك وحكام ورؤساء أمتنا التي تشعر بها وتتحرك
وينكي
أشكر سؤالك الجميل عني
أيه أخر اخبارك الفنية من خلال فرقتك الجميلة
دمتي بكل خير
تحياتي
حسن أرابيسك

وينكى يقول...

لازم نفضل فاكرين
وإلا مانستحقش نكون اللي احنا فاكرينه عن نفسنا

وينكى يقول...

حسن ارابيسك
انا بخير وشكرا لسؤالك
هذه القصيدة كانت صرخة حق اطلقها شاعر
فريد من نوعه لعلها تسمع الموتى الاحياء
اتمنى ان تجد لها صدى في عقل وقلب اى شخص
وهكذا تحيا القضية