أنا زعلانة مني
أنا زعلانه عليا
أنا بحبني قوي
وعايزه استقوى بيا
مش عايزه اقول في يوم
الدنيا لطشت فيا
أو انا عايشه طول عمري منسية
دا الاحسن اني اقول
قهرت الصعب بإيديا
كل حاجه حبيتها ف يوم
وقضيت عمري اتمناها ليا
لقيتها بتجري بتتسحب بتتسرسب من بين ايديا
وكل حاجه هربت منها رفضتها كرهتها
كنت بارفسها برجليا
لقيتها تاني يوم أملي الوحيد وفيها عيشتي الهنية
بتعدي عليا اوقات باكره الغباء فيا
او ايام صعبة كئيبة بتكسر فيا
ولقيتني بقيت بحب اعيش جوا الحزن
أشوف اهاتي مسلية
بس ارجع وافوق م الهم
واقول الدور ده مش ليا
نفسي أرجع زي ما كنت
الفرحة والضحكة عنوان ليا
امتى بس انا هافهم نفسي
واعرف انا انهي شخصية
*** أنا عاوزه أرجع تاني بقااااااااااااااااااااا***
2 حط دماغك:
ماشاء الله ياوينكي
حتى موهبة الشعر كمان عندك
في الفترة الأخيرة بتكتبي شعر عامي حلو قوي
ويمناسبة البوست اللي فات وتقييمك فأنتي كده مليانة حاجات حلوة كتير
وبخصوص محتوى هذا البوست الذي نحن بصدده وحالة القصيدة أو الحالة اللي كتبتي فيها القصيدة فهي حالة تعبيرية وجلسة وحديث مع الذات ومحاولة رؤية ملامحها بدقة عشان تعرفي انتي شخصيتك ايه بالضبط.. جميلة
عاوز أقول من الأخر انتي انسانة جميلة وأنا متأكد إن ان شاء الله مملكتك في الحياة الزوجية ( بيتك ) سيكون شيئ رائع يحمل كل الصفات الحلوة اللي فيكي
تحياتي
حسن أرابيسك
ايه الكلام الجامد قوي ده!!!
بجد رايك يرفعنى فى السما يا ارابيسك
انا فعلا جت عليا فترة كنت باعيد تقييم حياتى فى حاجات كتيرة قوي
واتمنى ان المرحلة دى تكون عدت بقى عشان انقل على الخطوة الجاية وهى انى اعيش حياتى صح :)
إرسال تعليق