الاثنين، 9 يناير، 2012

عفاريت



عفاريت الماضي بتطلعلي
تصورلي
طفلة قاعدة لوحدها
أصحابها.. بعيد عنها
الحزن مالي قلبها
لو كان الشعر فاتح والسمار انزاح عنها
الكل يتلف حولها
تكبر البنت
ويكبر عفريتها عنها
تقطع كل الطرق
كل السبل
عشان تلاقي حبها
عشان تلاقي من الصحاب
اللي هايخطب ودها
والطعن بكّى قلبها
جزء اتحرق.. جزء اتسرق
والباقي عشش فيه الخوف
من بكره جاي
قالت احط قدامه ساتر
زادوا السواتر
والجحر صار في حجم قصر
طلت على الدنيا الخبيثة
من شباك ورق
مع كل طلة ينزف الجرح القديم
حتى الحقيقي لما انوجد
وارتاح فؤادها من همها
سابها وبعد
نفس المصير.. فجاة ابتعد
وسط الركام.. يترك الامل الحزين
بيوم لقا
بعد الضريبة يصبح ساعات
قول كام دقيقة من عمر الزمن
وفات الزمن
والعقل الاخضر طاب واستوى
والقوة زادت في الكفوف.. جوه القلوب
راح عنها الف وميت ألم
سايبين ندوبهم ع الجدار
لوحة مرار
تبكي عليهم عنيها غصب
مش باختيار
لما النسيم يجري ع خدود الجميل
بالف صورة فاتت.. تمد إيدها
ومالهاش انها
غير تفتكر

3 حط دماغك:

وصف الاحساس يقول...

ادينا جينا وقرينا واستنينا
في اﻻخر ﻻ شفنا كاكاو وﻻ نخله وحتي مسعد
ايه الجمال ده كله وليه بس متداريه
شكله كده باين عليكي حوريه
عيشتها مش علي الشط ﻻ دي جوه الميه
وسمكه علي الرمل مرميه
وان اهو جايه وناويه البسك قضيه
افتتحنا يﻻ قولي انتي مين يا منسيه
اسمك وسنك كام وليه متدراريه
اوعي تقولي انك مش فاكره وﻻ تعملي فيها جنيه
ﻻ انا شايفاكي من بعيد باين عليكي انسيه
يلا بسرعه قولي حكايتك ايه وليه عن العيون مختفيه
جنسيتك ايه ومنين يا شبه انتي جايه

عجبتني مدونتك وشكرا لزيارتك مدونتي
جميل احساسك اوي بس ليه محدش بيشوفك
وانتي منين مصريه ولا سوريه ولا منين

P A S H A يقول...

روعة
:)
كتاباتك حلوة أوي على فكرة ، ربنا يكرمك ويوفقك إن شاء الله

خالص تحياتي

وينكى يقول...

وصف الاحساس
ههههههههههههههههه
لا بجد جامده الدخلة دي
مسعد انا موصياه على الكاكاو.. بجد ماشربتيهوش؟؟؟
لاااا دا كده هايبقى فيه كلام تاني
يعنى هو فى العادة لما بلاقي كومين حلو بيدخل دماغي بشكر صاحبه او صاحبته جدا
لكن لما يبقى الكومينت زجلية خطيرة زى دى!!!
انا مش عارفه ارد اكيد وانحنى احتراما للموهبة دى
انا موجودة دايما هنا.. في بيتي الصغنون ده.. بس الامتحانات مابتخليش الواحد يتنفس :)
معلش تعليق بسيط على جنسيتي
هو مش باين عليا اني لاوندية ولا اييييييه :):):)
نورتيني

باشا
شكرا جدا لزيارتك ورايك
امين يارب واتمنالك التوفيق انت كمان