الأحد، 6 مايو، 2012

امتى هاتقوم في مصر ثورة

تساؤل غريب مش كده؟؟
بقالنا اكتر من سنة والدنيا مقلوبة والناس بتقول ثورة وناس بتموت ومش عارف ايه
أنا بتكلم على ثورة من نواع تاني أعتقد انها هاتكون هي الثورة الحقيقية لمصر


هاصدق ان فيه ثورة في مصر لما أشوف كل موظف حكومة بيتقي الله وبيساعد الناس ويعمل شغله على أكمل وجه من غير ما يقول: بشتغل على قد فلوسهم

هاصدق ان فيه ثورة لما أشوف كل مصري بطل يرمي زبالته في الشارع ويحترم فكرة ان عامل النظافة دا بشر زيه زي أي بشري تاني ويحس ان الشارع ملكه وان مافيش فرق بين انه يرمي الزبالة في الشارع أو انه يرميها في صالة بيته

هاصدق ان فيه ثورة لو الناس بطلت تقول كام كلمة مالهاش لازمة ( هي كده - الظروف - هانعمل ايه يعني - أصلهم هما اللي عاوزين كده - انتو فاكرين ان فلان ده كويس؟؟.. دا ابن  تييييت...تستاهل عشان لابسه كده.. ) وكل كلمة تخوين أو تقليل أو عنصرية أو أي كلمة تدي احساس سلبي لأي بشري في الدنيا

هاصدق ان فيه ثورة في مصر لو بطلنا نبص لأي جنسية تانيه على انها احسن من مصر وأي حد تاني يتعامل في مصر أحسن من المصريين.. لما احس ان المصري بكرامته في كل دول العالم

هاصدق ان فيه ثورة لما نحترم مواردنا ونحافظ عليها.. حتى على مستوى الأكل اللي بنعمله أزيد من حاجتنا ونرميه واحنا عارفين ان فيه مصريين زينا ماعندهمش العيش الحاف يتعشوا بيه

هاصدق ان فيه ثورة لما الواحد يبطل يفتي ويعمل نفسه أبو العريف وتحس انه محلل سياسي ودكتور ومحامي وناقد فني وكابتن فريق منتخب مصر السابق... ولما يشوف حد بيعترف انه مش عارف يتريق عليه.. يعني انت كنت مولود عارف النظرية النسبية ياخي!!


هاصدق ان فيه ثورة لما كل واحد يشتغل على عيوبه ويبعد عن تتبع عيوب غيره ويفضل ينكش وراه.. بطلوا عقد نفسية بقى


حاجات كتيرة قوي انا شايفه انها هى دى الثورة الحقيقية.. وبجد لو حصل كده الثورة السياسية على نظام الحكم المصري هاتكون ناجحة


أنا بحب مصر بجد... ونفسي أشوف كل الناس بتحبها بعيدا عن الشعارات والأعلام وماتشات الكورة والخناقات الدولية على برامج الشات المختلفة
بحبها قوي ونفسي أشوفها أحسن دولة في العالم ونفسي أعمل عشانها أي حاجة
مش هاقول نظام ولا فلوس ولا روتين ولا مين بيوقف قصادي

" هحاول أعمل أي حاجة واتقدم بنفسي واتحدى كل المعوقات اللي في طريقي... لحد ما أحس ان مابقاش فيه فايدة.. ساعتها هاهرب وأروح لأي بلد تانية الحياة فيها سهلة.. وأعلن هزيمتي قدام نفسي وأقول سلمت الراية لشخص تاني ممكن يكون عنده حب وصبر عشان البلد أكتر مني... يارب ما اوصلش للمرحلة دي"

2 حط دماغك:

Hannoda يقول...

اللي بتحكي عليه ده بيتولد من قبل الثورة.. ومافيش مولود ع الارض بيتولد من غير جينات وخلايا وتزاوج الا المسيح عليه السلام.. من قبل الثورة واحنا بنشوف الصحوة بتنبت بين الشباب فكل حتة فمصر.. وبيتناقلوها بينهم.. المبادئ اللي بتحكي عنها كنا بنقرا عنها في الكتب بس في سير لشخصيات مصرية مختلفة.. او نتفرج عليها فبرنامج مستضيف واحد او واحدة من ابطال الوطن المتوارين خلف الستاير من دكاترة و نشطاء و علماء و باحثين.. بس بعيد عن كل ده بذور المبادئ كانت مبدورة على الارض بدون فايدة.. وابتدت تتجمع و تتهذب و تتسقى و تنبت.. أنا كل ما بيأس بجري اتابع نشاط الشباب فكل مكان فمصر و احس ان مصر تحت قشرتها بتتكون تربة خصبة أخصب حتى من تربة زمان اللي بنبكي عليه..

وينكى يقول...

ياريت بجد يا هنودة
عندى أمل فى بكرة وفى الشباب وف كل واحد ابتدى بنفسه عشان يرفع اسم مصر
بس الموضوع شكله هايطول قويييييييييييييي
وهنعدى بمراحل مختلفه هاتعمل حالة فلترة كاملة للشارع المصري
لازم ننزل قوي قوي قوي عشان نبتدى نطلع
واحنا لسه بننزل :(