ربنا بيعمل كل حاجة في الدنيا لسبب

ربنا قاصد يوصل للواحد رسالة معينة عشان ينورله بيها طريقه

يقوله بهمسة فى ودنه انت ماشي صح .. استمر، او انت ماشي غلط .. خلي بالك

ربنا حنين علينا قوي.. برغم كل التعب اللى بنشوفه قى حياتنا، بس هو بيحبنا وبيحمينا دايما

ربنا ماجابناش فى الدنيا وعلى الارض عشان نتدلع او نعترض

احنا هنا في امتحان.. امتحان انت اللي بتصيغ أسئلته وطريقة الاجابة عليها

امتحان بتاعك انت لوحدك.. ومش شبه امتحان اي واحد تاني فى الدنيا

ويوم ما بتسلم الورقة بتاعتك.. انت الوحيد اللى اتتحاسب عليها.. مش زى اى حد تانى فى الدنيا

ربنا خلق معانا كل الادوات الممكنة اللي تساعدنا نعدي الدنيا دي.. ماقالناش نستعمل الادوات دى ازاي

ساب كل واحد وتفكيره ودماغه، واحنا اللي بايدينا بنمسك الأداة.. يا بننفع بيها اللي حوالينا.. يا بنؤذيهم بيها

كل حاجة فى ايدينا.. والاختيار برضه فى ايدينا.. مهما كترت علامات الاستفهام حوالينا، لازم ماننساش الحاجة الاساسية فى حياتنا

"احنا هنا ليه"

مواصفات الفيلا اللي انا نفسي أعيش فيها

بما ان الأحلام مش بفلوس، والواحد دايما بيحاول يرسم أحلامه على ورق يمكن فى يوم تبقى حقيقة.. فكرت أتخيل شكل البيت اللي نفسي اعيش فيه يبقى عامل ازاي
يمكن...... :)

أولا: الجنينة:
- لازم تكون عنده جنينة كبييييييييرة مليانه شجر وورد، واعلق Hammok بين شجرتين
- برجولة فيها ركن عربي او اعمل الركن العربي في الطل ويبقى فيه فرع اضاءة خفيف شكله جميل ملفوف على جذوع الشجر
 - يبقى فيه sound system كامل تتعلق السماعات بتاعته بين الشجر عشان اسمع الشجر بيغني :D
- يكون فيه حمام سباحة شكله شبه الوردة ومركزه فيه نافوره من كذا طبقة وعلى قمتها تمثال ملائكي
- يكون فيه ممر ألعب فيه باتيناج براحتي مخترق الجنينة 
- يكون عندي ترومبولين كبير 

تانيا: البيت من جوه:

- أعمل استوديو جوا البيت على مساحة واسعة ووتكون تجهيزاته وامكانياته عالية.
- البيت مافيهوش عفش كتير.. مساحاته الواسعه اكتر وتكون الارضية كلها سيراميك
- فيه american kitchen.. اللي هو المطبخ مفتوح على الدنيا مش منزوي في الركن البعيد الهادي وتصميم المطبخ مياخدش مساحة ولازق جوا الحيطة.. وفيه ترابيزة سفرة صغنونة ب3 كراسي او 4 جوا المطبخ
- الحمام يكون واسع وابن ناس.. مكان للدوش بباب قزاز مخربش ، بانيو واسع الواحد يغطس فيه مع massage mechanism
- شاشة بلازما 100 بوصة "لو فيه حاجة كده" 3D.. او احدث نظام هوم سينما مع sound system مجسم مكان وجود الأنتريه
- يبقى فيه بيانو كلاسيك في الصالة.. في يوم من الأيام هاتعلم أعزف عليه :)
- مش عايزه اوضة سفرة.. مش عايزه نيش.. مش عايزة صالون، هو انتريه كبير كامل كفاية قوي
- عاوزه افتكاسة فى اوضة النوم تخلي العفش ياخد أقل مساحة ممكنة او يدخل جوا الحيطة.. دولاب سحري.. سرير سحري.. كده يعني
- ديكور الاوضة ألوانه فاتحة وهادية يغلب عليها اللون الابيض ويكون له بلكونة كبيرة تطل على الجنينة بكل مافيها.. واحط فى البلكونة ترابية وكرسيين

بصوا.. م الاخر شكلي هاخد جناح في أي اوتيل 7 نجوم أعيش فيه واخلص :P

بس يارب يكون عندهم ترمبولين 

أمنية

عارفين انا نفسي ف ايه؟

نفسي دلوقتي حالا أكون في المكان اللي فيه الشلال ده
اترمي في حضن البحيرة وأعوم بكل قوتي
أحس ببرودة المية على جسمي وطعمها العذب على لساني
ارفع راسي كل شوية.. أمد رئتي بالهوا وامد نظري بالصورة
ابتسم للدنيا واغوص في حضن المية تاني.. لحد ما يهدني التعب
واطلع بعدها اقعد فوق صخرة من الصخور
واسرح في ملكوت الله :)

يارب حققلي امنيتي دي
يااااااااااااااااارب

صندوق الذكريات

لدي خصلتين؛ لم استطع على مدى عمري الطويل الفكاك منهما
أولا: لازلت تلك الطفلة الفوضوية التي تلقي باشيائها أينما وكيفما اتفق.. فلا تستغربوا ارجوكم ان وجدتم جواربي بين صفحات كتبي الدراسية، أو فرشاة شعري تحت سريري "هذه حقيقة للأسف"
ثانيا: أنا لا أرمي شيئا أبدا... لذا من الطبيعي ان تجد كميات مهولة من أكوام الاوراق المتكدسة فى كل مكان وأغطية المشروبات الغازية مع قليل من زجاجات العطور الفارغة، و....
تسالونني لماذا احتفظ بكل هذه القمامة داخل حجرتي
حسنا.. كل شيء تقع عليه يدي له ذكرى حميمة في نفسي
تنشأ بيني وبين اشيائي علاقات وطيدة لا تنتهي بعد استخدامي لها.. بل أستبقيها علي أستطيع إعادة تدويرها واستخدامها بشكل آخر..

أحيانا.. أجد لهذه الفوضى فائدة.. فحين أضطر للبحث عن بعض أوراقي الهامة، أجبر نفسي على الابحار في كومة ذكرياتي تلك.
هذه الصورة التقطها منذ سنوات حين كنت في المدرسة، هذه الطوابع التذكارية اخذتها من صديقة لي .. تبخرت صداقتنا مع مرور الزمن ولم تتبقى إلا الذكرى

أبحث وابحث.. أجد كل شيء كنت ابحث عنه في يوم من الايام ولم اجده حين كنت احتاجه.. وبالمقابل أجد ما أنا بحاجته الآن وقد كنت فيه من الزاهدين
تبا للاعيبك أيتها الحياة
تستوقفني بعض التفاصيل الصغيرة.. التي لابد أن أقف أمامها حائرة
أمام جزء من ذكرياتي قد ضل
هذه زهرة مجففة داخل كتابي... لا أذكر لماذا وضعتها ومن اين اتتني.. ومن كان صاحبها أو كانت
شعرت بقبضة باردة تعتصر صدري... هذا تذكار جاءني في يوم من الايام يحمل مشاعر صادقة... لماذا طواها النسيان لهذا الحد؟؟
أستمر في الابحار عبر عوالم ذكرياتي.. لتزداد علامات الاستفهام سطوعا
تذكارات لصداقات فقدت صلاحيتها.. ممن كانوا أصدقاء بالامس.. فقلبتهم الايام على النقيض
قصاصات ورقية تحمل كلمات الثناء والتشجيع، ولا أذكر ممن كانت ولم كتبت؟
أشعر بدمعة اسى تترقرق بين ضلوعي.. كم انت قاسية ايتها الحياة
ثم تستوقفني فكرة؟
هل لي أن احمل الحياة كل المسئولية؟؟.. هل دقات الثواني والدقائق والسنوات، هي من سرقت مني سنوات عمري وصداقات الطفولة، بل وبراءة قلبي
أتطلع في المرآة لأطالع وجه المرأة التي حلت ضيفة بداخلي
لم أتغير.. لأ أشعر بأني أتغير.
نفس ملامحي مذ كنت طفلة
لم تكسبني الأيام إلا بسطة في الطول، ونحولا في الجسد.. وحمقا فوق حمق
إذن ماذا حدث؟
لشد ما تغيرت الأيام..
لا أعرف ماذا دهاني.. لكني كففت عما كنت احاوله
اكتفيت من الابحار عبر تاريخي الطويل.. رحلة مرهقة مثيرة للشجون
أود الانسحاب قبل أن يحترق أسطولي.. فأجد نفسي وحيدة على جزيرة قاحلة.. ذرات رمالها صاغتها الذكريات

الملم اشيائي المبعثرة.. لازال هناك الكثير مما لم اسبر غوره بعد
لكن في هذا الكفاية
فالاكرر التجربة مرة أخرى لاحقا... حين أعزز من قواتي
واتسلح بجبال الصبر الثلجية
علها تقاوم احتراق الحنين بداخله
.
.
صندوق الذكريات

حق مكتسب

البوست ده ممكن يكون فيمينست شوية... بس أنا كانثى حابة أتكلم براحتي المرادي

من كام يوم اتكلمت مع صديق من احدى الدول العربية عن عادات وتقاليد بلدينا... واستغرب جدا لما عرف ان الراجل في مصر لما بيتقدم لواحدة الحاجات اللي بيجيبوها في شقتهم بتتقسم بينهم بالنص.. استغرب اصلا من فكرة ان الست المفروض انها تجيب حاجة أصلا.. وقالي:

وهي ذنبها إيه؟؟ المفروض الراجل هو اللي يعمل كل حاجة

دا خلاني اسرح في شوية أفكار كده.. حبيت أشرككم معايا فيها:

لما ييجي راجل يتقدم لواحدة ست... العائلتين غالبا بيتخانقوا على مين يجيب ايه..

تصوروا بقى ان شرعا المفروض الست ما تدفعش تمن عود قصب داخل بيتها

ولا حتى تيجي بشنطة هدومها.. لأن الراجل اللي جاي ياخدها من بيت اهلها وهي مكرمة فيه لازم يكرمها

اتغير الكلام ده بتغير المجتمع في ظل الازمات الاقتصادية وبقى الراجل لما ييجي يتجوز بيدور على الموظفة اللي ممكن يحط مرتبه على مرتبها عشان يعيشوا حياتهم، والبنات لما لقت ان الشغل شرط أساسي للجواز نزلوا يشتغلوا

كون ان البنت بقت بتشارك فى تكاليف الحياة فدا تفضل منها وتفهم للظروف الاقتصادية المهببة اللي بقينا فيها

بس بالنسبة للراجل... بقى حق مكتسب

تعرفوا يابنات.. ان ربنا ما كلفناش صراحة ان تكون وظيفتنا في الحياة اننا نقوم بشغل البيت؟

يعني الراجل اللي يتجوز واحدة على اساس انها تغسل وتطبخ وتكنس وفاكر ان دي وظيفتها غلطان تماما

بالعكس بقى.. الراجل ملزم انه يجيب للست اللي هايتجوزها خدامة.. لانه ما اخدهاش من بيت اهلها عشان يبهدلها ويتعبها

بس اللي بيحصل في مصر دلوقتي هو ان الراجل اتعود على ان الست هي اللي تعمل وتسوي وياويلها لو قصرت في الحاجة دي

ونسى ان ده في الأساس تفضل منها عليه..

بس هو بقى حق مكتسب

ولو هايتكلم بـ قال الله وقال الرسول، احب اقوله ان كل الصحابة كانوا عارفين المعلومة دي، والرسول عليه الصلاة والسلام كان خادم نفسه, وكان عنده خادم فى البيت كمان..

بقى دلوقتى سبع الليالي يدخل بيته يقعد يجعر ويزعق ويقول فين الاكل.. ايه القرف ده.. الواحد اتجوز عشان يرتاح ولا عشان يقعد فى الخرابة دي.. وتبقى مراته واقفه بهدوم الشغل قدام البوتاجاز وابنها مفلوق من العياط على دراعها.. شغاله خمسة سيستم لوحدها وياريت عاجب

عشان بسلامته فاكر ان الراجل اللي يدخل المطبخ او يساعد مراته مايبقاش راجل... حلاوتك

هما ليه الرجالة بالانانية دي؟

ليه هما غير متحملين المسئولية للدرجادي

حاجة كمان

بصوا دلوقتى على حالات الطلاق الشنيعة الموجودة في مصر

انا لو هاتكلم على اللي بشوفه حواليا والقصص اللي اعرفها بشكل شخصي ممكن املا مجلدات.. مش هاتكلم على قصص قد ما هتكلم على نهاية بقت عادية من كتر ما اتكررت

راجل اتجوز واحدة.. ايا كان السبب اللي ما اتفقوش عليه واتطلقوا.. اللي بيحصل بعد كده ان الراجل بيرمي ابنه او بنته لطليقته وما بيصرفش عليهم ولا بيعبرهم ولا كأنه خلفهم اصلا

ويرجع بيت اهله حلو وجميل معزز مكرم يدور على "ست ستها" .." اصل هي مالهاش في النعمة".. على اساس انه ملاك منزل م السما

اللطيف ان اللي بتعمل كده في الراجل وتنمرده وتقويه هي كمان ست.. بس دخلت مصنع القهر بدري بدري وماعادش ينفع غير انها تقهر غيرها.. مع انها بتتجنن جدا لو حد جه وقهر بنتها.. وعجبي

نيجي للست اللي اتطلقت دي.. مطلوب منها تشيل همها وهم عيالها، تقعد بيهم في بيت اهلها.. غالبا غير مرغوب فيهم.. تدور على شغل تعيل بيه نفسها واطفالها.. ملامة على انها بتسيبهم لوحدهم.. ملامة على طلاقها.. ملامة على جوازها لو اتجوزت تاني.. ملامة على انها قاعدة من غير جواز لو عايزه تربي عيالها..م الآخر.. ملامة على انها انثى في مجتمع لا يحترم الإناث

اه المجتمع لا يحترم الإناث.. ولو قلتولي ارجعي لكل اللي انتي قلتيه من شوية عن الدلع اللي الستات بتتدلعه احب اقولكم.. وهو مين بينفذ الكلام ده دلوقتي؟؟؟

ولو قلتولي الستات واخدين حقهم وزيادة في المجتمع.. مش كفاية ليهم عربيات مترو لوحدهم.. مش كفاية ماعندهمش جيش؟ 

ساعتها بجد انا هاعمل بالآية الكريمة: "وإذا خاطبهم الجاهلون قالوا سلاما"

ببساطة هاقولك لو دي الحاجات اللي مضايقاك وحارقاك قوي سيبها للست ياخويا.. بس بالمقابل شيل الطين اللي هي شايلاه كل يوم وف كل مكان وف كل لحظة

احنا في مجتمع ذكوري ابن كلب.. بيظهر في كل حاجة حوالينا.. من اول الاطفال الصغيرين اللي "لا انا ما بلعبش مع بنات"، "ازاي تخلي بنت تجيب درجات اعلى منك في المدرسة".. لحد  "النساء فتنة فاجتنبوهن" و "تلاقيها ست اللي سايقة العربية".. وخد عندك بقى.. تمييز في البيت.. تمييز في الشغل.. تمييز في الشارع... تمييز حتى في السلوك والأخلاقيات.. حتى الصح والغلط ياجدع.. بقى فيه منه غلط رجالي يغتفر وغلط حريمي تستحق عليه الاعدام.

جربوا كده يارجالة تعيشوا يوم واحد باحساس الاضطهاد ده.. وقولولي رأيكوا بعد كده هايبقى ايه؟

الانثى وظيفتها الحيوية في المجتمع انها تكون سكن ومودة ورحمة.. زي ما زوجها لازم يكون سكن ومودة ورحمة ليها

الانثى اهم وظيفة ليها في الدنيا انها تربي اطفالها صح.. والتربية مش بالاكل واللبس.. دي بالعقل والفكر وحسن التصرف والجلد والصبر عند الشدة

الانثى لو حبت انها تشتغل بره بيتها فهي حرة.. عندها من المؤهلات العقلية والجسدية والنفسية اللي يخليها قادرة على اداء المهام دي.. حبت انها تقعد في بيتها براحتها وبإرادتها واختيارها.. ماحدش يمنعها منه أو يجبرها عليه.

كل اللي انا قلته فوق ده من حقوق الانثى 100% اللي كفلها ربنا ليها.. بس قولولي كام أنثى تعرف ان هي دي حقوقها؟؟؟

المجتمعات كل يوم تسرق منها حته من حقوقها وتضيف عليها بدالها حتة واجب زيادة

لحد ما الحقوق ضاعت.. وتنفيذ الواجبات بقى حق مكتسب

مفيش كلمة شكر.. مفيش امتنان

مفيش حتى تقدير لأي تضحية هي بتعملها في حياتها

بتسيب احلامها ورا ظهرها عشان اولادها يتعلموا انهم يحلموا

تفضل تضحي وتضحي.. ومن كتر التضحية ماحدش ياخد باله

لأنه بيتحول بعد كده لحق مكتسب

تبا لك ايها العالم الذكوري السلطوي الظالم

اللي بتاخد حقوق غيرك.. عشان تبقى بالنسبالك

حق مكتسب

بوووووووو

في يوم وأنا صغيرة.. كنت في ابتدائي تقريبا

ماما كانت بتصحيني كل يوم الصبح عشان أروح المدرسة.. أعتقد اني كنت بعذبها وهي بتصحيني

في يوم صحيت قبل معادي بحوالي خمس دقايق لوحدي

كنت سامعه صوتها وهي بتصحي اخواتي في الأوضة التانية.. وجتلي ساعتها فكرة :)

أنا هاعمل نفسي نايمة وأول ما تيجي تصحيني هافاجئها باني صحيت لوحدي

غمضت عيني وقعدت أتخيل أول ما تيجي تصحيني أقوم خاضّاها مرة واحدة وأشوف وشها وهو بيضحك من الموقف

لما جت تصحيني .. كنت مدياها ظهري.. اتقلبت بالراحة بحيث يبقى وشي قصادها

سمعتها بتقول بصوت واطي.. بسم الله الرحمن الرحيم

لسه بتنادي عليا وبتهزني من كتفي رحت قايمة مرة واحدة وقلت: بوووووووو

وقعدت أضحك

بس هى ماضحكتش

اتخضت واتنفضت ومرة واحده فضلت تزعقلي

قعدت تزعق تزعق تزعق.. مش فاكرة كل اللي قالته ايه

بس فاكرة اني كنت متنحة قوي.. مصدومة وبعيط وهي بتقولى.. وأنا اللي خفت لحسن أكون خضيتك وانتي نايمة تعملى فيا كده

قعدت أعيط كتير لحد ما ركبت باص المدرسة

كان نفسي أقولها اني بهزر معاكي

كنت عاوزه أبتدي يومي بضحكة مرسومة على وشك.. بس انتي قلبتيها بدموع

ماكانش قصدي أزعلك.. أنا مش عارفه انتي زعلتي ليه أصلا

كنت ساعتها طفلة.. لو اتشقلبت من فوق السلم كنت هاعتبرها لعبة وأضحك

ماكنتش أعرف رد فعل الكبار بالهم اللي شايلينه على أكتافهم والتنشنة اللي هما فيها

مش عارفه ليه الموقف ده جه على بالي دلوقتى.. أكيد هى نسيته تماما ومعتقدش ان هايبقى له طعم اني اعتذرلها عنه

هي ماسمعتنيش ساعتها من وسط دموعي وأنا بقولها والله العظيم مش قصدي

وهي بتزعقلي أكتر.. وتقولي مش قصدك ايه!

كنت عاوزه أقولها مش قصدي غير اني أهزر.. سامحيني

انتي بتزعقيلي ليه على نيتي الصافية

ماكنتش أعرف ساعتها ان الطريق للجحيم مفروش بالنوايا الطيبة :)

وان حركة زي دي ممكن تجيب سكتة قلبية لا قدر الله

وكبرت.. وبقت بتزعقلي دلوقتى على حاجات تانيه أهم وأكبر

حاجات على الأقل ببقى فاهمه ايه هي أسبابها :)

هييييييييييييييييييييه.. دنيا

ربنا يتولانا جميعا برحمته

كل لحظة وانتو طيبين

شئ صعب

شيء صعب لما تحبي واحد قوي

وتكتمي في قلبك عشان عارفه انه مش حاسس بيكي

عارفه انك لو حبيتي حتى تلمحيله او تصارحيه بمشاعرك.. ممكن تنتهي حتى علاقة الصداقة اللي بينكو

خجلك الطبيعي كأنثى أصلا هايمنعك من انك تفتحي بقك.. بس بتتمني لو حصلت المعجزة وحس بيكي

أو حتى عِندك الطبيعي اللي بيحتم عليكي تتقلي.. تربيتك اللي بتجبرك انك تستنى الراجل هو اللي ياخد الخطوة الأولى ناحيتك

المهم ان النتيجة واحدة

وتفضلي تقولي جوا نفسك.. اهو كفاية انى اكون بقربه.. كفاية انى بشوفه وبحس بيه

كفاية انه بيحكيلي وبسمع صوته

وتفضلي تحرقي فى نفسك وتتعذبي وانت شايفاه ولا على باله

بالعكس ممكن يكون بيتعمد أحيانا انه يجرحك بدافع العشم او عارف انك مش هاتزعلي او انت بنت كوول والهزار التقيل بيعجبك

او جايز هو عارف بحقيقة مشاعرك وبيستهبل .. ورفضا لمشاعرك دى او محاولة لانكارها بيبتدي يعاملك بخشونة

ساعتها بتلتمسيله العذر.. لو بتحبيه بجد

أو بتكرهي تجاهله ليكي وبتبعدي عنه.. ويبقى هو كده وصل لهدفه وريح باله

بتقولي ف عقل بالك: دا دليل على انه راجل محترم.. لو كان وحش كان استغل مشاعرك ولعب بيكي واتسلى شوية ورماكي

وتبتدي الشيزوفرانيا الانثوية بقى

هو ما بيعبرنيش عشان انا مش مصلحة بالنسباله.. لو كنت مهمة ولا واسطة كويسة كان جري ورايا واهتم بيا

دا بتاع مصالح وبس

طب وانتي اصلا عاوزه واحد بتاع مصالح يقرب منك ليه يا هبلة.. انتى ناقصة استغلال ووجع قلب؟؟

مش عارفه بقى.. 

ويستمر الحوار المطول مع النفس اللي بيبقى سببه الأساسي وقت الفراغ الطويل اللي بتعاني منه

احساس غير محدد بالملل والوحدة فابتحاولي تركبي مشاعرك على اي حاجة واي حد حواليكي

لا دا مش تركيب مشاعر.. أعرفه بقالي سنين كتيرة قوي ومهما الدنيا فرقت مابينا لسه محتفظة بنفس الاحساس ناحيته

ياهبلة انتي نفسك تحبي وبس.. عاوزه اي مشاعر من اى حد وخلاص.. عاوزه تحسي انك وحيدة

لو كنت فعلا عاوزه اي حاجة وخلاص كنت بصيت لغيره.. واللي يتمنوا الرضى كتير.. اشمعنى ده؟

تفضلي تحرقي ف نفسك أكتر وأكتر

وتلفي وتدوري حوالين نفسك

وتحاولي تبرري وتدوري على إجابات لاسئلة وهمية ماطرحهاش حد

بس اسمحيلي أنا اللي اسالك المرادي

انتي عايزه ايه بالضبط؟

انا عارفه وانتي عارفه ان مالهاش نهاية

عارفه كويس السيناريو كله.. بتحاولي تقنعي نفسك بالوهم ليه؟

ايه الفرق بين اللي انتي عاوزاه واللي انتي محتاجاه.. ياترى فاهمه قصدي؟؟

انا مهما اتكلمت مش هاتسمعيني مادام عقلك مقفول وقلبك هو اللي بيتحكم فيكي.. مع ان اللي بيتكلم ده عقلك وبيحتل مكان كبير جواكي وانتى مش غبية وعارفه اني صح

بس انتي عاوزه تعيشي الاحساس مش اكتر.. عيشي من حقك ماحدش هايمنعك

بس ايه لازمتها بقى؟

مجرد ضياع وقت؟

دا مجرد تمسك بالأمل

يابنتي أمل مين وعمر مين.. أمل في حاجة انتى عارفه كويس انها لوقربت منك هتؤذيكي.. وانتي مش ناقصة اصلا

مش عارفه بقى.. يظهر ان معاك حق

محتاجه انك تفوقني وتشدني كل ما تلاقيني قربت أسقط :)

طب خلي بالك بقى عشان أحيانا بقعد أهاتي وانتي ولا هنا

خلاص ياعم حقك عليا :) 

هاسمع كلامك وأمري لله

.

..

...

....

.....

......

.......

بحبه يانااااااااااااااااااااس بحبه بقى

@#$%^^^&^&^*)^@#@@%%^$^#

شوية فشافيش

أغنية القرن الجاى واللى بعده

حاجه هاتكسر الدنيا

وانا اللى كنت فاكره ان أيام الامتحانات بتطلع بلاوى

طلعت الرقده فى السرير بتعمل كوارث

***

من فضلك ماتلومنيش

سيبنى خلينى أعيش

عِندك ده زيه مافيش

نرجع تانى..لأ مايجيش

ابعد وبلاش تشويش

وبطل حركات تهويش

حبى عشش تعشيش

فى قلبك ودا مايخبيش

بس أنا بقى عايزه أعيش

قصه من غير طرابيش

وتحكم ولا تفنيش

حد يحبنى بشويش

جواك ادور مالاقيش

غير فاصل م التهميش

وتقابل بالتطنيش

ياللا اتزحلق بشويش

وانسى وخد قرش حشيش

مابتعلمش

طبعا ما اقصدش بيها أغنية أنغام :)
ولا اقصد بيها فشل دراسي لا سمح الله - بعمل ماجستير قد الدنيا - 
بس فعلا الواحد عايش فى الدنيا ما بيتعلمش

كام مرة عدى عليك موقف قلت مش هاكرر اللي عملته ده تاني.. وبيعدى عليك الموقف تاني وبتكرر نفس الغلطة؟؟
وكأن فيه قوة أكبر منك بتجبرك انك تكرر نفس اخطاءك من تاني
وما بتتعلمش
عارف ما بتتعلمش ليه؟
عشان دايما عندك امل ان المرة الجاية هاتكون احسن.. لا مهو مستحيل النتايج تتكرر تاني
وبتنسى ان الخطوات لما تمشيها هي هي غصب عنك لازم التنايج برضه تكون هي هي
غيرت ايه فى نفسك لما اتعرضت لموقف مؤلم؟
بتقول هاعمل وهاسوي.. بتشد قوي على نفسك وتاخد الدنيا على صدرك
وبعد كده بتزهق.. ولا حاجة
بترجع تانى ويمكن أوحش من الاول
وما بتتعلمش

محظوظ قوي البنى ادم اللي مش بس بيتعلم من اخطاؤه.. دا كمان بيتعلم من أخطاء غيره.. وبيريح نفسه من آلام كتير قوي
بس برضه.. وكأي طبع انساني
هايجيله غلط يقع فيه.. وهايكرره
وساعتها هايقول
مابتعلمش :)

Comfort Zone

أنا: عارف مصطلح الـ comfort zone

هو: يعني من مفهوم الكلمة

أنا: دى فى علم النفس بتطلق على اى حاجة معتاده بالنسبة للانسان

الواحد لما يبقى ليه كرسي مفضل فى البيت

او بيحب نوع معين من المزيكا

او اتعود على نمط حياة معين

بيبقى فى الcomfort zone دى

ودى احيانا مش بتبقى حاجة حلوة

لانها بتخلى الانسان فى المكان اللى هو مرتاح فيه وبتقاوم تغير الحالة دى

انا بقالى فترة كنت فى comfort zone بسبب انى مابعملش حاجة معينة فى الحياة وبطلت اذاكر

عقلي دلوقتى بيقاومنى عشان يرجع ليها تانى

عشان كده تركيزي ضعيف ومشتتة وبضيع وقت

يعنى فعليا انا فى معركة مع نفسي

بالضبط زى السلفيين

عايشين فى comfort zone باراءهم وافكارهم

هو: همممممم

أنا: اى حد يحاول يلعبلهم فى دماغهم ويهز سلامهم النفسي على طول يقاوموه بالتكفير

:)

هو: اهاااا

كلام منطقي

أنا:  كل بنى ادم كده

ليه كل واحد بيتمسك برايه فى اى نقاش

عشان ما يتعرضش لعذاب انه يتغير ومقاومة عقله للتغير ده

هو: طيب وايه سرعة الافلات للخروج منها؟

:-D

أنا: سرعة الافلات فى قوة الارادة والاحتكام للعقل

هو: وتحتاج طاقة قد ايه؟

أنا: كل واحد وطاقته

هو: اكييييييييد

أنا: ببساطة هو ده اللى الرسول عليه الصلاة والسلام قال عليه

اكبر الجهاد جهاد النفس

فيما معنى الحديث

هو: طيب أنا هاروح اجاهد نفسي بالنوم .. وانتي جاهدي نفسك بالمذاكرة

:-D

أنا:  :)

تصبح على خير

هو: وانتي من أهل الخير

:-D

The comfort zone  

هي الدايرة المقفولة اللي عمالين نلف فيها من ساعة ما اتولدنا

هى كلمة " عيش عيشة أهلك" و "اللي نعرفه أحسن من اللي ما نعرفهوش"

هي انك ماتحاولش انك تدور على اى حاجة مختلفة عنك لدرجة انك ما تقدرش بعد كده تصدق ان فيه حاجات كتير مختلفة عنك

وان الدنيا فيها حاجات اكتر انت لسه ماجربتهاش وماتعرفهاش ولا سمعت عنها

هى انك تحاوط نفسك بسور عشان تحمى نفسك من كل حاجة وانت فاكر انك بكده كويس وجميل وعيشتك احسن عيشة

انك تعيش جوا فقاعة معقمة جدا طول حياتك .. بعيدا عن الأمراض والأوبئة

وساعتها تنسى ان جهاز المناعة بتاعك بيقوى من معلوماته المختزنة عن الفيروسات اللى اتعرضلها قبل كده

وان الأمصال أصلها فيروسات ضعيفة او ميتة

هاتعمل ايه ساعتها لما حد يفرقع الكورة دى من حواليك.. وتجرب لأول مرة انك تعيش فى العالم الحقيقي؟

بجد ما أحبش أتخيل