الثلاثاء، 9 ديسمبر 2008

تهييسات



الفن مالوش جنسية
مايهمنيش ان اللى عمل الفيلم الرائع ده مصري ولا سعودى ولا تركي ولا سوري.. المهم الدماغ
الفن مالوش دين
مايهمنيش الممثل اللى بحبه ديانته ايه.. هو انا كنت هاتجوزه؟
ليه بنزعل قوى لما نشوف فيلم اجنبي طالع فيه واحد بشماغ او بيتقال عليه انه عربي
احنا عندنا حساسية جامده من اللى بيتقال علينا بره
يمكن احساسنا انهم مش عارفينا
طب احنا عملنا ايه عشان يعرفونا
لما يجيبوا رئيس لابس جلابية بيضا وعاوزين يغتالوه.. اخويا يقولى.. ايه اللى هما بيعملوا ده
دول بيشوهوا صورتنا
يعنى هما مطلعين نفسهم فرقة اغتيالات وقتالين قتله.. واحنا زعلانين عشان واحد لابس جلابية؟
فين الشفافية والصدق مع النفس
ليه بنلعبك الدنيا فى بعضها
طب ما اللى هما بيعرضوه بشكل او بآخر هما اللى بيواجهوه
العرب مش كلهم ملايكة.. زى ما فيهم المؤمن بقضيته زى ما فيهم الخاين العميل
الطبائع البشرية مش واحده
ياريت بس كل واحد يعالج البطحة اللى على دماغه قبل ما يفتح بقه
***
ايه لازمة التهليل اللى احنا بنعمله على كل حاجه
ليه لازم نصنف نفسنا لدرجة الخنقة
عربي واجنبي
مصري وماليزي
فلاح وصعيدي
اهلاوى وزملكاوي
مسلم ويهودي
محجبة ومش محجبة
مغاير ومثلي
ايه اللى هايحصل يعنى لو كان جارى بوذي؟
ايه مشكلتى فى الحياه اللى هاتموتنى يعنى لو انتيمتى لابسه صليب
ليه في فيلم حسن ومرقص عمر الشريف زعل لما عرف ان نجيب الريحاني مسيحى
ليه المآسي اللى بتحصل اساسا عشان حد غير دينة
انا مش باتكلم فى الحلال والحرام واللى داخل الجنه من النار.. دى حاجات بتاعت ربنا اولا وكلنا عارفين الصح م الغلط تانيا
اللى اقصده.. ليه احنا يا بنى ادمين يا قاصرين ياللى كلنا عيوب نحكم على غيرنا دايما.. ولازم كله يبقى زينا عشان نبقى مبسوطين ومرتاحين
للدرجادى احنا بنخاف من الاختلاف
للدرجادى احنا مقفلين ومتحجرين

****

سؤال ماقصدش بيه اى حاجه
من سنة 48 ولحد دلوقتى.. فيه اسرائيليين اتولدوا على أرض اسرائيل
لما العالم العربي يطالب بالحرب ولازم نخرجهم ودى ارض العرب
طب الصابرا هايروحوا فين؟
الناس فكرت فى الحرب عشان اتقال فى الكتب السماوية انها جايه وهاتكون نهاية الدنيا
طب انتوا مستعجلين عليها ليه
****
من اجمل الكلمات اللى سمعتها على مدار حياتى
( أنا ابن كوكب الأرض)
( عاوزين الناس تحترمكوا وانتوا مش عارفين تحترموا بعض.. جتكوا القرف) مسلسل مش فاكراه
بس كان بيتكلم عن اننا يا مصريين ليه بنشتكى من اللى بيتعمل فينا
مع اننا بنعمل بنفسنا فى بعض اضعاف اللى بيتعمل فينا

( ان الله يساعد الذين يساعدون أنفسهم)
( ابدأ بنفسك وسلم بقلبك)
( ان الله لا يغير ما بقوم حتى يغيروا ما بأنفسهم)

(وعلمت أن رزقي لن يأخذه غيري.. فاطمأن بالي)
*****
ليه الواحد بيسافر بره وتبقى فرصه العمر لو راح غسل صحون فى اى كافيه حقير
طب ما تغسلها فى بلدك احسنلك وهتاخد ضعف اللى بتاخده بره
ليه بتهرب فلوسك على سويسرا او اى دولة اجنبيه مع انك لو استثمرت جوا مصر هاتكسب اكتر
ليه ننبسط قوى من التليفزيون اليابانى والفيلم الامريكي والباليه الروسي واى حاجه تجنس بجنسية اخرى
ج: عشان عقدة الخواجة هى اللى بتحكمنا
*****
جتكوا القرف مليتوا البلد

واللى اقصدهم عارفين نفسهم.. كله يحسس على البطحة
*****
العيال اللى عملوا اغنيه يشتموا بيها مصر
اتبعوا نفس الاسلوب بتاع اللى رسموا كاريكاتيرات مسيئة للاسلام
اتبعوا نفس الاسلوب بتاع اللى عملوا منتديات اللى اتقال فيها الشجر مكتوب عليه الله وجلد السمك مش عارف ايه وجهاز رسم القلب اللى ذبذباته بتكتب الشهادة
اتبعوا نفس الاسلوب بتاع الناس اللى وقفت فى صف شريف جبريل اللى تحرش بنهى رشدي لما اتقال انها اسرائيلية

انتوا بقى طلعوا القاسم المشترك ما بينهم
عاوزين مساعدة.... كل واحد يبص فى مراية
عقول فى ودان... ولسان مطلوق
مع اى كلام .. جعجع ما تشوف
والايد الخفية لقت الحل
أحسن من مترين أحبال

****
انا مع الناس اللى بتجيب غسالات بالمجفف على فكرة.. هاننشر غسيلنا جوا البيت كمان؟

5 حط دماغك:

micheal يقول...

أولا أنا جاي اعترض..بقي ده تهييسات..أمال العقل والحكم يبقي ايه
:)
ثانيا..أطالب فورا بإستنساخ وينكي وانكوكا عشان نخلص من الجماعة اللي ملوا البلد بسمومهم وتخلفهم وجهلهم
ثالثا...بتخليني اقرأ وأتحسر ع الواقع
بس بجد تسلم ايديك وانكوكا

غير معرف يقول...

البوست ده جميل بجد
عجبتنى اوى ايه الى حيحصل لو جارى بوذى
نادرا مبقى حددلوقتى معندوش مشكله فى الاختلاف احييك

وينكى يقول...

مايكو
شكرا شكرا
حسستنى انى خطيبة مفوهه بجد
هو بس تأثير السوجارة اللى ضربتها باين
:q
وعلى ايه؟ احنا اللى بننسطل من غير ملافيف
D;
انا / انت
دا اللى اسمه التفكيرمن وجهة نظر الاخر
ليه لازم اى حد مختلف عنى يبقى غلط
مش ممكن اكون انا اللى غلط؟

رجل من غمار الموالى يقول...

الظاهر يا ست الكل
السيجارة كانت ..مغمسة حبتين.
التهييس زاد شوية
وخبطتى فى كل حاجة
المواضيع كلها دخلت فى بعض
..
هو يعنى إما نكون متطرفين شرقاً أو غرباً
ألا يجوز أن نتوسط
....
لازم يكون لنا وجهة نظر وموقف ..لازم نحب نفسنا شوية
لازم نعرف احنا مين
احنا مسلمين وعرب ومصريين وأفارقة
..
لنا أصدقاء بيحبونا ولنا اعداء بيكرهونا
لنا ناس فاهمه قضايانا ولنا ناس عاوزينا نتمحى من على الوجود
.........
لنا ناس بيعادونا لمجرد كوننا كده
لمجرد تواجدنا أصلاً فى الحياة
.........
نحن غير كاملين وزى ما انتى قلتى بعضنا بيفكر بنفس الأسلوب المنحط
..........
لكن هذا لا ينفى أن نتمسك بشخصياتنا
بلاش الكلام المثالى الزيادة عن اللزوم ده
...........
تحياتى

وينكى يقول...

رجل من غمار الموالي
فين المثالية دى بس يا فندم
دا اقل واجب
جرعة التهييس زادت حبتين
الظاهر مايكل بيه بهت عليا ونقلى عدوى غدد الحشيش الطبيعي
معلش يا مايكو .. تشريدة بتشريدة
:q