السبت، 31 يناير 2009

كلب وقط وعصفورة



العصفورة جوا قفصها بتزقزق.. والبيت دفيان
صاحبة البيت رايحه السوق.. وصت الكلب يحمى العصفورة من قطط الشارع
الكلب نفذ الأمر بحماس.. وفضل رايح جاي قدام الشباك
ومن بعيد
القط الجعان بيدور جوا صفيحة الزبالة على لقمة تسد جوعه
سمع صوت زقزقة العصفورة.. وبسرعة عمل الحسبة فى دماغه
قط جعان + عصفور تختوخ = قط شبعان
اتسحب لحد ما وصل للشباك.. وأول ما دخل منه داس على دماغ الكلب اللى نام
الكلب صحي بسرعة.. مسك القط.. وعلى برة اداله بالشلوت
القط فكر.. يدخل ازاى؟
راح سارق ودان من كلب الجيران .. لبس الودان قدام المراية ومثل انه بوبي صغنون
رن جرس البيت المنشود.. ولما طلعله الكلب قال: مياااااووو
كتم بقه.. ضحك وأخد باله ورجع للنص تاني: باو واو... باو واو
ودخل يهز ديله ويشمشم زي بقيت عشيرة الكلاب
والكلب الحارس فرح.. بصاحبه الجديد، وفرح أكتر لما القط اداله عضمة كبيرة
على الجنينة جررررري.. حفر حفرة وخبى الكنز
والقط في غيابه حاول يمسك العصفورة وياكلها
بس الكلب رجع بسرعة.. راح مطلع من جيبه عضمة تانية يلهيه بيها
الكلب يجري يخبي العضم.. والقط بيحاول فى غيابه ياكل العصفورة
وكل مره.. يديله عضمة عشان يلهيه
القط فى مرة قدر يبلع العصفورة.. بس الكلب شافها في عينيه.. محبوسة وبتخبط عشان يطلعها.. مد ايده وطلب العصفورة
القط فتح بقه ومد لسانه الملفوف لحد إيد الكلب ورماله العصفورة
الكلب ساب العصفورة تطير لحد القفص.. وبعدها التفت للقط
لما شاف في عينه الشر.. راح كالعادة مسكته بالعضمة
مد إيده تانى للعصفورة
بس العصفورة الذكية حطت مكانها كرة بولينج
لما القط بلعها.. وقع من فوق السلم وخرم الأرض
وودان الكلب العيرة من على دماغه طارت
الكلب الحارس جه جري .. ومد ايده من غير ما يشوف
مسك ودان الكلب وجري دفنها فى الرمل على انها عضمة
لكنه أخد باله من الملعوب
القط بيحاول بشراسة المرادي.. انه يوصل للعصفورة
أخد باله ان ودانه ودان قطط
جري وحط الممسحة على دماغه.. أل ايه لسه بيكمل الدور
لكن المرادي.. الكلب فقسه
قاله كالعادة: باو واو
الكلب الحارس حط ودان الكلب العيرة على دماغه وقاله: مياو واو
ومسكه تانى.. وعلى بره بالشلوت
القط قام وسط الجنينة.. نفض جسمه
بص ناحية البيت وطلعله لسانه
مد ايده وسط كل حفرة عملها الكلب وأخد منها العضمة
الكلب بيبص من الشباك.. عادى
لقى القط ماشي بشوال العضم
زعل.. اتربك.. لف حوالين نفسه
صفر للقط.. فتح القفص ومسك العصفورة
جري على القط اللى حضن شوال العضم عشان ماياخدوش
الكلب شاور: العضم مقابل العصفورة.. بيقايض عليها
القط وافق .. والاتنين رضيوا بالبدل.. وسلموا على بعض كفا بكف
والعصفورة بتتفرج.. وكانت ياحرام مخضوضة
لقت نفسها بتقرب من أنياب القط
العصفورة ساعتها طلعلها أسنان وعضت القط في مناخيره.. قرقشتها
القط حاول يمسك العصفورة
الكلب حاول يمسك للقط العصفورة
العصفورة طارت بعيييييييييييد... وشالت فى منقارها شوال العضم
الكلب والقط بصوا عليها.. وعنيهم مليانه حسرة
وماخدوش بالهم من كلب الجيران صاحب الودان اللى خبط على كتف الكلب وشاور على مكان ودانه
الكلب الحارس اتخض.. حط ودان الكلب العيرة على دماغ القط وشاور عليه
القط اتخض وعنيه طلعت لبره.. حط ودان الكلب العيرة على دماغ الحارس وشاور عليه
كل واحد فضل يشاور على التانى وهو بيرمى عليه ودان الكلب
صاحب الودان أخد ودانه وركبها تانى.. وهما لسه بيشاوروا على بعض
وأخد ودان كل واحد فيهم .. حطها على دماغ التانى
الاتنين بصوا للكاميرا زعلانين
وخلص فيلم الكارتون على كده

11 حط دماغك:

Asmaa Fathi يقول...

جميلة يا وينكى

واضح انك متأثره بالكرتون

هو انا ممكن اشوف بطاقتك

هههههههه

واضح انك مغالطه الحكومه فى كم سنه زياده

هههههههههههههه

تحياتى

micheal يقول...

هههههههههههههههه..ده أكيد توم وجيري
:)
بس مش عارف ليه يا وانكوك وأنال بقرأ القصة حاسس أن العبارة كلها فب العضمة..صح؟؟
:)
تحياتي

على باب الله يقول...

: )

طب ما كان أسهل لو حطيت الفيديو !

اعشق فى الليل ضوء القمر يقول...

جميل جدا
ياريت لو فيه كارتون لشخصيات
تونى لونز

Zika يقول...

هع هع هععععععععع
نياهاها
والله فكرتيني بايام توم وجيري
رغم اني مش فاهم بيت القصيد بس قريت البوست لحد اخره
هو ده اول تعليق ولا انا بيتهيالي

Zika يقول...

ده طلع خامس واحد ... اشتغالة الاشراف دي صعبه اوي هههههههه

د. محمد رضا يقول...

هههههههه

ايه التوبيك العسل ده

Unknown يقول...

انتى متاكدة ان الفيلم خلص؟؟؟؟
مفتكرش

يا مصر اكتب إليكي رسائلي يقول...

سلام عليكم
ربنا يطمئنا عليكي

mohra يقول...

تعرفى
ممكن تكتبى للاطفال
فكرى

وينكى يقول...

جنا
انا لسه باشوف الكارتون لحد دلوقتى ولو حد قومنى من عليه بتبقى ليلته سوده
مايكي .. حبي قبل الاخير باتنين
هو انتو ماعندكوش غير توم وجيري
طب طلعلى جيرى او هاتلى حتى سيرة فار هنا ولا هناك
الحكومه بتاعتنا مفهمانا ان مافيش كارتون فى الدنيا غير توم وجيري
انا احتج
انا عاوذه دونالد داك
ماليث دعوه:q
العضمة ..جايز
على باب الله
للأسف لو كنت لقيته كنت حطيته
لكنه موجود على شريط فيديو قدييييييييييييييم عندى ولسه محتاجه اعمله عملية قيصرية
اعشق فى الليل ضوء القمر
اكيد تقصد لونى تونز
هو الكارتون ده مش تبعه.. حتى مش من نفس الشركة
Merry Melodies
بس ياريت اشوفه تانى على التليفزيون المصري قبل ما اسلم نمر
زكازيكو
مش مهم ايه بيت القصيد
اكيد انت مش بتحلل وتنقد كل كارتون بتشوفه
بس دا مش معناه انى مش قاصده الموضوع ده تحديدا
والحدق يفهم
عاجبنى قوى موضوع الاشراف
بيزود عدد المعلقين وكل واحد فاكر نفسه انه اول واحد
شفت انا شريرة ازاى
:q
د. محمد رضا
ربنا يخليك ميرسيييييييي
انجى
الفيلم هايفضل شغال
المهم انتى هاتشوفى منه قد ايه
منورانى
يا مصر اكتب اليك رسائلي
ياااااااااااااااااااه
حمد لله ع السلامه
ربنا يطمنا عليك انت.. فينك من كتييييييييير
:)
مهرة
دا اصعب حاجه الواحد ممكن يعملها فى حياته
دى مسئولية قد مسئولية انك تنجبي اطفال
يالهوي.. مش عارفه هاكون قدها ولا لأ
دا اللى فكرت فيه
شكرا على الراي ده:)