الثلاثاء، 14 أبريل، 2009

وانا صغيرة




وانا صغيره.. كنت باتعمد أجرى وأضحك كتير.. عشان عارفه انى ف يوم هاحتاج للذكرى دى
***
وانا صغيره.. كنت دايما بامشى على الناحيه اليمين من الرصيف أو جنب الشجر.. يمكن ربنا يكلمنى زى موسى
***
وانا صغيره.. كنت باخاف أبص فى المرايه.. لحسن أشوف وش حد تانى غيرى
***
وانا صغيره.. كنت باكل بإيدى الشمال.. عشان الشيطان كان بيصعب عليا
***
وانا صغيره.. كنت بازعّق للى بيزعقلى.. وباشتم اللى يشتمنى.. وباخاصم اللى بيخاصمنى
***
وانا صغيره.. كنت باعمل سيوف خشب.. ومعامل تجارب.. وبيوت من الطين
***
وانا صغيره.. كنت باستنى تحت المطر.. وباتفرج على النجوم.. وبابص لقرص الشمس .. عشان أشوف هالات ملونه حوالين الدنيا
***
وانا صغيره.. كنت باحلم انى أطير..أشوف العالم من فوق..وأزور اللى بحبهم.. وأسمع اللى بيكرهونى بيقولوا عليا إيه
***
وانا صغيره.. كنت باقول للأعور فى وشه انت أعور
***
وانا صغيره.. كنت بامشى فوق أنبوبة البوتاجاز.. وباتشعبط فوق المواسير.. وبانطّ من البلكونه بفرع نخله.. وباتشقلب فوق السور
***
وانا صغيره.. كانت الشيكولاته والزيتون الأسمر والتفاح الأمريكانى هما غذائى المفضل
***
وانا صغيره.. كنت باحضّر دروسى وباحل والواجب .. وما بافوتش مسابقه ثقافيه أو غير ثقافيه إلا وأشترك فيها.. وما باسيبش نشاط إلأا وأعمله
***
وانا صغيره.. كنت باحلم انى ما أكبرش أبدا
***
وانا صغيره.. كنت باحب أروح المستشفى وآخد الأدويه.. وياريت لو كانت حقن
***
وانا صغيره..كنت حافظه جزئين أو تلاته من القرآن.. غير الأحاديث والأدعيه
***
وانا صغيره.. كنت باحب أتفرج على الإعلانات.. وباكره المسلسلات ونشرات الأخبار
***
وانا صغيره.. كنت مربربه ودبدوبه وباكل 7 طقات فى اليوم
***
وانا صغيره.. كنت باتمنى لو حطيت روج وفكيت ضفايري ولعبت كوره فى الشارع مع الأطفال
***
وانا صغيره.. كنت باتمنى لو لقيت صديقه تشبهنى وتكون نسخه منى 100% عشان تفهمنى
***
وانا صغيره..كنت باعمل كل حاجه .. ماقدرش أعملها وانا كبيره

 

6 حط دماغك:

مواطن مصري يقول...

قول لزمان ارجع يا زمان

يا مراكبي يقول...

خدي عندك المفاجأة دي: وإنتي كبيرة بقيتي تعملي حاجات ما كانش ينفع تعمليها وإنتي صغيرة

اسماء عوني يقول...

وينكي انتي فيكي حاجات كتير مني
حوار الشيطان ده كنت باعمله
وكمان وانا صغيره كنت باخاف أبص فى المرايه لحسن أشوف وش حد تانى غيرى
مش هادولا صورك يا وينكي
شكلك عسول وانتي صغيره
:)

micheal يقول...

هههههههههه..هاتي من الاخر..وقولي وانا صغيرة كنت زينا
:)
ايه يا وانكوك ده
بس والله عسولة صغيرة وأنتي كبيرة ومفجوعة برضه
:)

mohra يقول...

و انا صغيره كنت افضل الف لغايه ما ادوخ!!!!!!!

وينكى يقول...

مواطن مصري
الزمن مش هايرجع
بس بايدنا نعيش الحاضر على كيفنا
يامراكبي
ياسلاااااااااام.. تصدق مفاجأة بجد؟؟
اكيد طبعا وانا صغيره ماكانش ينفع أغسل الاطباق لحسن اكسرهم
:P
منورنى دايما
اسماء عونى
يابنتى عرق العفرته بيتعرف على قرايبه على طول
دول صورى زمان.. العفرته بتتنطط منى زى مانتى شايفه
:)
مايكل
ماكنتش مفجوعه ولا حاجه
جبت منين الفكره دى
هو يعنى عشان بابا كان بيهزأنى عشان ابطل اكل؟؟
تقدر تثبت انك كنت عسل كده زيي وانت صغير؟؟ مافتكرش طبعا
:P
مهرة
ههههههههههههه
كنت باعملها احيانا
بس عشان أقلد حركة الارض وهى بتلف حوالين نفسها
واكتشفت ساعتهاانا واخويا ان فيه فرق بين اللى يلف مع اتجاه عقارب الساعه ونفسها
عباقره من صغرنا
:)