الأحد، 19 أبريل، 2009

على نفس المستوى









بصوا كويس على الصوره دى

دققوا...وقولولي ملاحظين ايه؟

ماحدش أخد باله

طب نسهلها شويه.... بصوا كويس على المدارات اللى الكواكب بتدور فيها حوالين الشمس

طبعا مافيش حاجه بالمنظر ده مرسومه حقيقى حوالين الشمس...بس الخطوط دى بتبين شكل المدار اللى الكواكب بتدور فيها

ها... حد أخد باله؟

عفارم عيلكوا...ايوه كده فرحوا قلبى

مدارات كل الكواكب تقريبا على مستوى واحد...وليها نفس الميل

طبعا احنا لو اخدنا ميل مدار الأرض حوالين الشمس بيساوى صفر...هانلاقى ان ميل مدارات بقية الكواكب تقريبا بيساوى صفر

طب دا ليه؟؟

تعالوا نرجع شويه بالزمن... شويه صغيرين خالص

يادوب خمس مليارات من السنين ..اللى هو تقريبا عمر تكون المجموعه الشمسيه...دا معناه ان المجموعه دى لسه فى عز شبابها

المهم


المجموعه دى اتكونت ازاى ومن ايه؟؟

احنا قلنا فى موضوع سابق عن تكون النجوم انها بتتكون فى رحم سديم كونى

Nebula

حاجه كده اشبه بسحابه كونيه... مليانه بمواد وعناصر متخلفه عن انفجار نجم قديم

طبعا مش هاقدر اوصف حجم السحابه دى قد ايه..لكن كفايه انى اقول ان المجموعه الشمسيه دى كلها بكل مافيها من شمس وكواكب وأقمار وكويكبات ومذنبات .. تكونت من جزء منها

حاجه كده على جنب عنى

المهم... زى أى حاجه فى الدنيا ربنا خلقها.. السحابه دى بتدور حوالين محورها فى اتجاه واحد ما بتغيروش



وبمنتهى البساطه... الكواكب اللى فى المجموعه الشمسيه بتدور فى نفس اتجاه دوران السحابه الكونيه الأصلى

سامعه واحد من بعيد بيقول ان كلامى ده غلط

ليه بس كده يابنى؟؟؟

راح جابلى الصوره دى وقالى:




بصى كويس



هاتلاقى ان الكواكب كلها بتدور بنفس درجة الميل حوالين الشمس ...ماعدا بلوتو


يبقى دا معناه حاجه من اتنين


اما ان بلوتو متكون من سديم تانى...ودا شيء مستحيل



واما ان تكون القاعده بتاعت الدوران دى كلها غلط..وكل كوكب فى المجموعه ماشي على مزاجه


همممممممم


بص يابنى... بلوتو دا استثناء من القاعده


لأنه بعيييييييد جدا عن مركز دورانه ( اللى هو الشمس) وبسبب ان جاذبية الشمس مش قادره تحكمه زى اخواته


الواد ياعينى فلت عياره ومشي مع نفسه



والله ليهم حق انهم يطردوه من البيـ... قصدى يستبعدوه ككوكب من المجموعه الشمسيه


دا موضوع طويل فكرونى انى ابقى احكيلكم عليه فى بوست تانى


المهم.. بلوتو والأجرام السماويه اللى اكتشفوها على مسافه ابعد منه...واللى هى برضه مش كواكب


كلها بتسلك نفس السلوك..وزاوية ميل مستوى دورانها عن مستوى الميل القياسي( اللى هو مستوى ميل الأرض) أكبر من الصفر


المذنبات برضه..كأعضاء من عائلة المجموعه الشمسيه ليها سلوك مختلف ومستويات ميل مختلفه



ماتنسوش ان تركيب المذنب وشكله والدوره بتاعته وسرعته كلها عوامل بتأثر تأثير كبير على المدار بتاعه


خلاص ...انا قلت الكلمتين اللى عندى على الموضوع ده؟؟


حد عنده إضافه أو تعليق؟؟


5 حط دماغك:

bos bos يقول...

عندى ليكى هدية فى اخر موضوع فى مدونتى روحى خديها

NIDAAL .R يقول...

ويــــــــــــــنكيييييييي

انا بهرش في راسي نفسي أفهم حاجة مهمة اوى .. الى هى
زاوية ميل مستوى دورانها عن مستوى الميل القياسي( اللى هو مستوى ميل الأرض) أكبر من الصفر.

بس تعرفي عند ارتفاع الأرض عن محورها الرأسي بتتسبب فى زيادة سرعة الكواكب المجاورة مما يؤثر علي زاوية الميل لخاصة بهم فتسبب أنعواج جزئي غير مكتمل لجزيئات بداخل تلك الكواكب لتتسبب فى نمو فطريات حلزونية تنتج غاز الأيمونيتروجين .. وإلي هيكون بديل للأكسجين بعد ما يخلص وتنف الكمية المعروضة .. ولك للمنافسة القوية بينه وبين ثقب الأوزون.

وينتج عن ما سبق إصطدام الكواكب المزاحة (بفعل أرتفاع الأرض عن محورها الرأسي) بكوكب الأرض

ببساطة .. علشان فى خلال خمس مليار سنة .. كان لازم الكوكب يغير زيت الفرامل .. بس الدنيا أجازة بقى .

صباح الفل يا وينكى
ههههههههههههههه
آسف طولت عليكى بس بجد معلومات كويسة بس لو نفهمها!!

:D :D

micheal يقول...

مرحبا بعودة وينكي الفلكية
طبعا أنا ماليش خالص في الحوارات دي
:)
تحياتي

مواطن مصري يقول...

زمان كان فية كوكب بلوتو امتا الان كوكب بلوتو بيسيححححح

او بمعنى اخر مش هيبقى فية بلوتو على ما سمعت


المهم السؤال الان هل نحن وحدنا في هذا الفضاء؟؟؟؟؟


موسيقى x file في الخلفية
:))))

وينكى يقول...

بسبس
معلش اتأخرت عليكي
حاضر هاروح
نضااااااااااااااال
حط انت صباعك بس على السؤال وانا اقول على طول
:)))
مش فاهمه يابنى ايه اللى مش مفهوم فى الليله دى
تخيل نفسك ماسك كورمربوطين فى حبال وبتطوحهم مع بعض
كلهم هايلفوا فى اتجاه واحد
تخيل انك مسكت كورة بايدك التانيه وبتلفها من فوقيهم بحبل تانى
بغض النظر عن الحركة البهلوانية اللى هاتحصل والفازات اللى هاتكسر بس الموضوع شبه حاجه زى كده
انت نضال واحد والكور اللى مع بعضها بتدور فى اتجاه واحد
الكورة اللى بعيدة شويه مش هاتبقى زيهم وهاتختلف
وصلت؟؟
مايكيييييييييي
خليك فى حواراتك التانيه وانترفيوهاتك
طب على الاقل حاول تفهم عشان مايقولوش عليك مصاحب وينكى اونطه
:P صباح الفل يا شقيق
مواطن مصري
احنا مش لوحندنا فى الفضاء واعتقد ان الموضوع ده مافيش فيلم ماتكلمش عنه
راجع سلسلة ملف المستقبل وانت تعرف ان الفضاء انزحم اكتر من اللازم وكل الكائنات عينها على كوكبنا الملوث الفقير
طمع بقى
:)