الجمعة، 5 يونيو 2009

عته ماركة Only In Egypt

موضوع النهارده ممكن يكون غريب شويتين
يمكن وجه غرابته انه بقى منتشر أكتر من اللازم للدرجة اللى خلتنا نعتقد أنه امر مسلم بيه وبيحصل فى كل مكان
ماشيه فى امان الله فى الشارع.. محل جديد موجود وافتتاح على صوت هشام عباس وأسماء الله الحسنى.. وبعد ما ينتهي يبدأ بعرور بالتسأول عن ظن حبيبه إذا كان بيلعب بيه ولا لأ
مش هى دى النقطة اللى هاتكلم عليها دلوقتى وإن كانت جديرة بالتساؤل برضه.. بس خليها لوقت تانى
المهم.. محل شيك جدا..صاحبه شيخ بجلابية بيضا ودقن طويلة
المحل اسمه: ( البخاري ) ملابس محجبات.. ملابس أطفال.. لانجيري !!!!
على اليافطة مرسوم صورة واحده لابسة إسدال.. وجنبها طفل لابس أرنوب وشكله سكر خالص....
وجوا المحل في أبرز مكان.. متعلق فى كل حتة الجزء التالت.. اللانجيري
طب ازاي.. مين .. ليه
ايه ياجدعان اللى بيحصل ده
هو الخاج صاخب المخل نظامه ايه بالضبط؟؟
على ما اعتقد ان حد بيقدم لنفسه على انه مستشيخ يبقى لازم الصورة عنده تكون متكاملة
ازاي يحط ملابس محجبات جنب لانجيري!!!!!
طب ازاااااااااااااااااااااااى
دا بيخلينى أفكر بجد فى ظاهرة تعليق الحاجات دى - اللهم احفظنا - فى الشوارع فى أكتر الاماكن المكشوفة
وكل اللى بيبيعوها رجاله
الظاهرة اللى علق عليها احد أصدقائي اللى مش مصريين بقوله: دا نتيجة كبت جنسي فى مصر
دا ما بيحصلش فى اى دولة تانية
حسبي الله ونعم الوكيل.. فضحتونا قدام الاجانب
طب هو الراجل اللى بيبيع الحاجات دى عادى عنده كده يعنى؟؟
طب واللى رايح واللى جاي مافكرش فيهم
لو حسبها هايتأكد من ان الفئة الوحيدة اللى بتبص على - البضاعة - هى من الذكور فقط
الإناث بتودى وشها الناحية التانيه أصلا خجلا من المنظر المشين.. أو بتحمى نفسها من ان حد يتحمرش بيها على اساس انها بتبص على حاجه ياي يبقى هى عايزه كده
طب فين العقل ياللى بتشتكوا من لبس البنات وبتخلوه سبب وحجة عبيطة بتبرروا بيها التحمرش بيهم؟؟؟
يخرب بيت الاستعباط بجد
هو الموضوع ده مالوش حل؟؟؟؟
متهيألي الحاجات دى عورة.. ماينفعش انها تنكشف كده قدام اللي رايح واللي جاي وكل ذو خيال مريض.
انا مش رافضه بيع النوع ده من السلع.. أنا رافضة طريقة تسويقها
هاحترم جدا المحل اللى حاطط هدوم البني ادمين في الفتارين للبني ادمين
واللي عاوز لانجيري يخش يشوفه جوه
ولا إيه؟

6 حط دماغك:

عبد من عباد الله يقول...

و الله هى وجهة نظر برده ...

بس يا ترى ده كده يحنطبق على كل الملابس اللي هى تتلبس في البيت بس و لكن فيه ناس بتلبسها بره البيت ( البنطلونات الخفيفه ، الاسترتش ... حاجات زي كده انا مش خبير يعني )

اصلي سمعت قبل كده راجل بسأل احد الشيوخ بيقوله يا عم الشيخ انا شغال ترزي حريمي و سعات بفصل قمصان نوم او بنطلونات استرتش او حاجات خفيفه عموماً ، يا ترى ده غلط و لا لأ ؟؟

فكانت الاجابه انك انت مكلش دعوه بكيفيه الاستخدام ، انت بتعمل قميص النوم و الست لو لبسته في بيتها اوك لو هى طلعت بيه بقى البلكونه و كده خلاص هى اللي غلطانه انت ملكش دعوه .....

مش عارف هل انا فاهم قصدك او فكرتك صح ولا كلامي ملهوش علاقه بالموضوع خالص ؟

وينكى يقول...

عبد من عباد الله
انت اتكلمت على نقطة تانيه لا تقل اهمية عن الموضوع
بس ده متهيألي بالضبط زى المزارع اللى بيزرع فى ارضه عنب
هو مالوش دعوة اللى هايشتريه منه هياكله كده ولا هايعصره ويعمله خمر
انا مش معارضه ان الناس تتاجر فى اللانجيري
اكيد زوج هايحب يشوف مراته لابسه وعامله البدع
بس مش حلو خالص لما الحاجات اللى بتبقى فى اوض النوم تطلع للشارع
بالنسبة للهدوم التانيه فهى كده كده بتظهر قدام الناس فطبيعي انها تتعرض على العامة
كونك شايف انها المفروض تعامل معاملة الفئة التانيه فدا بقى...... :)
وجهة نظرك
اصلى زى مانت عارف بنت واللبس ده عادى بالنسبالى
حتى لو ماكنتش بالبسه
تحياتى وشكرا على التعليق

يا مراكبي يقول...

خدي عندك بقى المفاجأة دي

في كل دول الخليج بدأو يعرضوا اللانجيري في الفتارين برضه عادي كده .. يعني مش في مصر بس

الموضوع بيتسرسب واحدة واحدة .. زيه زي أي حاجة في الدنيا دلوقت .. بيسربوها للمجتمع على جرعات

الفيديو كليب بدأ من غير بنات .. وبعد كده بنات لابسين محترم .. بعد كده بنات مش لابسين خالص .. وهكذا

عبد من عباد الله يقول...

لأ بجد صحيح عندك حق .... انا ما انكرش انها يمكن تكون فيها شئ مش لطيف او انها غيره مقبوله اوي انها تتعرض يعني على الملأ كده خصوصاً لو كانت على مانيكان ....

بس برده خليني افكر معاكي في فكر الراجل صاحب المحل اللي بيبيع الحاجات دي ، حيقولك طيب و انا اعرضهم ازاي يعني ؟؟ و لا اخليهم عندي جوه و من المفروض ان المشتري يبقى عارف اني انا عندي الحاجات دي لوحده !!! و ثانياً المستهلك مش بيحب يدخل و يسأل و يتعب نفسه هو بيحب يشوف الحاجه معروضه و يا عجبته يدخل يسأل عليها و يشتريها يا اما لأ ، اما اني انا اعرض الملابس العاديه و الحاجات دي احطها عندي جوه و اكتب مثلاً ( هنا يوجد لانجيري و حاجات من دي .. ) فده مش معقول يعني ، ده الواحد المفروض انه بيوفر للزبون كل حاجه علشان اريحه و يشتري ( و لا انا مش من حقي اني انا اسوق للبضاعه يا مزمازيل ) ....... فكري معايا ممكن اقوله ايه مثلاً ؟؟

رجل من غمار الموالى يقول...

السلام عليكم
أوافقكم القول بصفةعامة
....ز
لكن نقطة أن الشيخ اللى بجلابية ....يقدم نفسه بصورة رجل متدين فمن الضرورى الا يخلط التدين بأى شئ أخر
أعتقد أن هذا مثالى زيادة عن اللزوم
هذا يدفعنا لموضوع أخر
ها مثلاً لمجرد أنى ملتحى .. لا أدخل سينما
ولا أسمع أغانى
بإفتراض أن أعتقد أن سماع الأغانى حرام ومشاهدة الكليبات حرام وغير ذلك
....
الشخص الملتحى ... قد يكون راغب فى التدين
ولكنه فى الأول والأخر شخص عادى
مثل باقى الناس
ليس ملاك
...
المفترض أن اللحية والنقاب كما فى عقيدة الأخوة السلفيين شعار المسلم
بغض النظر عن كونه متدين أو لا
فليست كل منقبة السيدة أسماء بنت أبى بكر
ولا كل ملتحى أبو عبيدة بن الجراح

أرجو أن تكون وصلت النقطة

وينكى يقول...

يامراكبي
ههههههههه
متهيألى ان اللى بيبيع اللانجيري فى الشارع هناك برضه مصريين
بجد الموضوع شكله مش حضارى ومقزز جداااااا
مش هاتكلم من الناحية الدينية
بس بجد مش احلى حاجه فى الدنيا ان الواحد يمشي فى الشارع يلاقى قميص نوم فى وشه

عبد من عباد الله
فى مرة وانا مروحه بيتي لقيت محل جديد فتح قريب منى
دخلت جوه اتفرج
الحاجات كانت شيك وجميله
البياع اللى واقف على المحل راجل
بس لقيت جوا فيه بياعه
ست كبيرة وشكلها طيب
قالتلى لو انتى عروسة جديدة عندى حاجات كويسه ليكي
كان لانجيري واخد ركن متداري فى المحل
بمعنى انه مش بيطل على الشارع لكن فى نفس الوقت معروض بطريقة كويسه
انا احترمت المكان واحترمت الموجودين فيه بجد
لما الموضوع ده يتعمم الكل هايعرف يلاقى طلبه فين
ياترى وصلت؟
رجل من غمار الموالي
بص انا ماعنديش اى اعتراض على شكل البياع ولا اسلوبه
لكن بجد التناقض اللى هو عامله ده ماينفعش
ماينفعش يحط اسدال وجنبه لانجيري
لأن اى واحد عبيط معدى هايربط بين الاتنين ويقول: تلاقى اللى بيلبسوا اسدالات بيلبسوا الحاجات دى برضه
والخيال يبتدى يشتغل والنتيجة الكل عارفها
وكلنا بنشتكى ان المحجبات من اكتر الفئات اللى بتتعرض للتحرش
كان ده هايبقى نفس كلامى لو كان البياع لابس تيشيرت وكاب والمحل اسمه سيكومونوص