الأربعاء، 27 مايو 2009

أنا أدون لأغير


كل واحد يسأل نفسه سؤال صغنون جدا

أنا بادون ليه؟

ايه اللى يخليك في عز برد طوبة تقوم من تحت اللحاف وتجري على جهاز الكمبيوتر بتاعك حافي القدمين

تتخبط مرة فى رجل السرير ومرة تانية تتشنكل فى الكرسي

بس عشان تفرغ فكرة طقت فى دماغك وخفت عليها لحسن تضيع منك

ايه السبب الملح اللى جواك اللى مخليك تقضي اكتر من نصف يومك تقرا وتكتب وتتابع

هل هو وقت فراغ وبتقضيه؟

هل بتعتبرها وسيلة جديدة تتعرف بيها على صداقات جديدة؟

بتبرز مواهبك المدفونة واراءك الخاصة وكل حاجه فى بالك ماقدرتش تحققها على ارض الواقع

تعددت الأسباب والتدوين واحد


عن نفسي.. انا بادون تقريبا لكل الاسباب اللى فاتت

على الاقل احس انى باعمل حاجه في دنيا مش قادره اغير فيها حاجه

احساس جميل لما تعرف ان فيه انسان فى يوم كان مكتئب وكلمة منك تسببت فى انه يبتسم

احساس جميل لما تساعد انسان احتاج لمساعدتك عن طريق اجابة سؤال او مشاركة افكار او حتى كلمة بتطبطب بيها عليه

او حتى مجرد انك تحسسه انه انسان وانك مهتم


م الآخر.. انا بادون عشان أغير

وعلى مدونتي باحط اللوجو بتاع جروب الفيس بوك



لأني بارفض

أكون مجرد راس.. وسط القطيع


شكرا صديقي العزيز: لورد.. غير محدد على الدعوة وعلى الفكرة


ياريت تدخلوا عنده تقروا الموضوع

:)

5 حط دماغك:

مجرد مدونة يقول...

ربنا يكرمك .. جزاك الله خيرا على التذكير باستحضار النية الصالحة لعل تدويناتنا تكون خالصة لوجه الله تعالى ..

micheal يقول...

مش كنتي تقولي من بدري
جالي اينفين الجروب وكانسلت
:)))

Unknown يقول...

المهم الهدف

لأن عمل من غير هدف
زي بني أدم من غير رأس


تقبلي مروري وتحياتي

ويقى التواصل

عبد من عباد الله يقول...

انا بدون علشان اعرض افكاري و اتناقش مع باقي الافكار و الثقافات و افكاري ربما تنفع حد و ربما انا اتعلم مع افكار حد تاني ، و بدعي الا اقع في افكار اقولها تضر حد و يمكن انا ما اعرفهوش ...

و حاجه تاني كمان ، بحاول اعمل بحديث الرسول و الذي فيما معناه ان المؤمن الذي يخالط الناس و يصبر على اذاهم افضل من المؤمن الذي لا يخالط الناس و لا يؤذونه ..... وكلها في سعي إلى الافضل دائماً و الله الموفق .

وينكى يقول...

مجرد مدونة
ربنا يصلح نياتنا فى كل عمل بنقوم بيه.. امين
مايكل
دور عليه عندى على الفيس بوك اكاونت بتاعى
معتز شاهين
احيانا الهدف بيبقى قدام عنينا وسهل جدا بس احنا اللى مش مفتحين عنينا كويس
شكرا لمرورك
عبد من عباد الله
عجبنى جدا وجهة النظر فى مخالطة الناس والتعلم منهم
ربنا يساعدنا فى اهدافنا النبيلة
:)