الأربعاء، 15 يوليو 2009

أنا مصري


أكيد كتير منكو عارف اني باغني في فرقة اسمها انا مصري
أي نعم ماحدش بيعبرني وبييجي من اللي أعرفهم إلا من رحم ربي بس الفرقة شغاله وبتنتقل من نجاح لنجاح أكبر
والدليل على كده اننا الفرقه الوحيدة اللى الفلايرز بتاعتهم
بتخلص بسرعه فى اى مكان
شايفين ان ده مش دليل؟؟
طب احنا الفرقه الوحيدة اللى فى أقل من سنتين لفت القاهرة حتة حتة وطلعت لمحافظات تانية بالطلب وغنت على مسارح مش أي حد يقدر يوصلها زي مسرح قبة جامعة القاهرة" أيوه بتاع أم كلثوم ده"
وقريب جداااااااا.. هانغني على واحد من أكبر تلات مسارح في مصر
والشاطر يعرف;)
والدليل الأكبر على كده كمان ان قنوات ليها وزنها زى أون تي في و أو تي في والحياة والنيل الثقافية وروسيا اليوم ودريم بيتسابقوا انهم يعملوا لقاءات معانا.

الاحساس بطعم اللى انت بتعمله وصداه عند الناس جميييييل قوي
احساس رائع لما ناس ماتعرفهمش يقفوا ويسلموا عليك وانت ماشي فى الشارع.. أو ان اصحاب ماكلموكش من زماااااااااااان قوي يدعبسوا لحد ما يلاقوا نمرتك تانى ويكلموك بس عشان يقولولك " احنا شفناكي فى التليفزيوووووووووون.. كنتى هايلة"
حاجة ترفع المعنويات مش كده؟ :)

بقالى اكتر من شهر ناس عماله بتتصل بيا وتقولي.. انتى بتطلعى على اون تي في بصفة مستمرة كل يوم وبيجيبوا الأغاني بتاعتكو
طبعا انا اخر من يعلم ساعتها والناس كلها شافت الفيديو وانا لسه:( لا أراكم الله مكروها في ريسيفر لديكم.. ولا حرمكم من تعدد قنواته اللي مابقاش موجود عندى

المهم.. أخيرا لقيت فيديو لأغنية " أيام ربنا" دويتو ليا مع الرائع جدا " إيهاب عبده" من تصوير قناة ON TV

اتفرجوا وقولوا رأيكو
والأهم استمتعوا :)

وماتنسوش حفلتنا الجاية في ساقية الصاوي يوم الثلاثاء 21 يوليو الساعه 8 مساءا في قاعة الحكمة
وعشان تعملوا حسابكوا.. التذكرة بـ 15 جندي وللاعضاء بـ 10 بس
يابلاش :)





11 حط دماغك:

إيمان قنديل يقول...

حلوه قوي الأغنيه ربنا يكرمكوا ومن نجاح الى نجاح

mohra يقول...

انا اول مره اعرف
ربنا يوفقكم و الف مبروك النجاح و عقبال الاكتر

عبد من عباد الله يقول...

ايه ده

:( :( :(

مش عارف اسمع الاغنيه !

الاغنيه اللي انت حطاها خلفيه مش عارف اوقفها

:(

micheal يقول...

معاكوا بقلبي

يا مراكبي يقول...

أنا اتفرجت على الأغنية دي في التليفزيون قبل كده بس كان بمصاحبة العود

المرة دي الأغنية ليها طعم تاني

بجد مبروك ودمتي متألقة دايما

وينكى يقول...

غرام
ربنا يخليكي ميرسي جداااا
ان شاء الله الحفله الجايه تكونى معانا
مهرة
اديكي عرفتى ياستى عشان ماتقوليش طنط وينكى حارماكي من حاجه
:P
عبد من عباد الله
الاغنية بتاعت عدوية تحت خااااالص على الشمال
لو مش عارف توقفها خالص ممكن تدخل على موقع اليوتيوب نفسه من لينك الفيديو وتقفل المدونة
مايكل
ماشي يا معلم :)
يامراكبييييي
ميرسي جدا جدا بجد
والف مبروك على ديوانك
ربنا يسهل واقدر اجى ان شاء الله حفل التوقيع
ومقدما خد دى من عندى
لولولولولولييييي

Unknown يقول...

حلو كتيييييييييير:)

وما شالله صوتك حلو:) والأغنيه كمان حلوه:)

LORD.M.M يقول...

تحياتي

اغنية جميلة و راقية اتمنى كل النجاح لك وينكي .

اما على الاستفتاء في القمال قبل السابق

فلا اعتقد انا احد سيعيطك اجابة شافية او صحيحة ..رددي ورائي قول سقراط :
اعرف نفسك .

تحياتي .

بوبو يقول...

ما شاء الله يا مروة جميلة وصوتك حلو اوي.. اخيرا سمعت صوتك بتغني.. فاكرة لما انتهزتي فرصة عدم وجودي وغنيتي؟ وليد ساعتها قالي ان صوتك حلو بس بصراحة مصدقتش غير لما سمعت.. مبروك يا جميل.. وحشتيني على فكرة

وينكى يقول...

مياسي
مبسوطه قوى انها عجبتك :))
طب الزغروطة اخبارها ايه :q

لورد
بجد زياراتك بتسعدني
شكرا على رايك
ونفسي تحصل معجزة واشوفك فى مصر بتحضر واحده من الحفلات دى
وبالنسبة للمقال السابق
انا مؤمنه ان الانسان ما بيقدرش يشوف كل حاجه عن نفسه بشكل صحيح واللى بره بيشوفوا حاجات هو مش واخد باله منها
عشان كده عملت الاستفتاء ده
بجد افادنى كتير :) شكرا ليك
بوبو.. أم عمر ;)
واحشانيييييييييييييي قوى قوى قوى
والله مش انتهزت فرصه انك قمتى ولا حاجه
هى جت كده.. شوفي وليد بقى هو اللى سربك :q
انا باهدي النفوس ههههههه
بجد واحشانى قوى قوى قوى
أخبار عمر ايه؟

gloardese يقول...

هايله يا مروه وربنا يوفقك ودايما من نجاح لنجاح