زهقت.. وبجد مش عارفه ليه
زهقت من شغلي اللطيف المريح عند الناس.. الممل الرتيب بالنسبالي
زهقت من الروتين والطريق المرسوم وعشان تبقي بنت شطورة لازم تعملي وماتعمليش
حتى لما أبوح بزهقي ده لأقرب الناس ليا... يرسمولي خطط بديلة عشان برضه امشي عليها
نفسي أكون نفسي بجد
أعمل اللى باحلم بيه وأكون مؤمنة بيه
مادام ما بعملش حاجه غلط ولا حرام.. ليه بقى بيعقدوني بحاجه اسمها شكلك قدام الناس
نفسي أكون حرة نفسي.. يكون ليا شغلي الخاص ومايبقاش ليا رئيس
لما أقول كده يتهموني بالخبال.. وتسيبي الوظيفة المضمونة؟؟
نفسي أتحرك وأروح وآجي وأسافر واتعلم حاجات جديدة وأشوف الدنيا واكتسب خبرات
لما اقول كده يتهموني بالعبط.. عاوزه تتمشوري وتتمرمطي بدل المكتب المكيف والناس اللى اتعودتي عليها
كمان يعني ايه تسافري لوحدك من غير راجل.. لما تتجوزي سافري معاه
يعني م الاخر أستنى عملية نقل الملكية
هو انا يعنى ما ينفعش أكون حرة نفسي لمجرد انى عاوزه اكون حرة
أنا انسانه مسئولة ومش محتاجه حد يملي عليا اعمل ايه وما اعملش ايه
زهقت من الشكل المثالي
زهقت من الأجندة اللى محطوطالى ولازم أنفذها
زهقت حتى من شكلي وصورتى قدام الناس
اتخنقت من كل حاجه
عاوزه أتحرر
عاوزه اكون نفسي
الحاجة الوحيدة اللي مانعاني من اني ارمي بكل حاجه ورا ظهري وامشي... هي الحب
أنا بحب الناس دي
مش عاوزه أخيب املهم فيا
يا الله.. المعادلة صعبة قوي
ما أقدرش أعيش يومي من غير ابتسامة أمي
ماقدرش أحس بسعادة وحد من اخواتي زعلان
ما أقدرش احس ان الدنيا جميله لو أبويا مش راضي عني
مش عاوزه أكسفهم
مش عاوزاهم يكرهوني ولا يحزنوا بسببي
دنا ممكن يحصلى حاجه لو حد فيهم جراله حاجه
ربنا يخليهم ليا
بس انا كمان تعبت
بجد المعادلة صعبة قوي قوي
أنا ولا هما
بحبهم حب ما يتوصفش.. بخاف عليهم وبافكر فيهم وهما أولوية حياتي
بس حاسه انى مابقيتش قادره أستحمل الدور ده
بحبهم وبرضه نفسي أحقق ذاتي
نفسي اعمل الحاجه اللى هاكون بيها راضيه عن نفسي
وأكرر.. الحاجات دى مش عيب ولا حرام
واي حد تانى هايبقى فخور بيا لو حققتها
بس ازاى اعملها دي
انا هابتدي اخطرف
مش عارفه أعمل ايه... بجد قلبي واجعني قوي
وماليش غير إني افضفض بكلمتين واخرج الأسى اللى جوايا من عنيا
أو اني اصرخ بأعلى صوتي وأقول
اااااااااااااااااااااااااااااااااااااااااه
3 حط دماغك:
حاجة صغنونة لكن جميلة
لكن للأسف في المجتمعات الذكورية مافيش حرية لكن في انتقال من ذكر مهيمن الي أخر مهيمن هكذا الحال من المحال الحرية
لكن حولي تنجحي في شغللك وتعملي شخصية
وتدوري علي الحب يمكن تلاقي فيه الحرية
شكرا طارق لكلامك المشجع ده
الانسان عايش عشان يتقدم فى طريقه نحو تحقيق حلمه
بس احيانا بتمر فيه فترات بيحس فيها بعبثية كل اللى بيعمله واللى عايش فيه
الانسان انسان عشان لحظات القوة والضعف اللى بيمر بيها
زى الموجة بتطلع وتنزل
وادينا عايشين فوق البندول
:)
طبعا دي مشكلة مجتمع ومش هتتحل في يوم وليلة .. ومقاومة التيار صعبة جدا .. لكن مش مسحيلة
خروجك من قضبان القطار المرسومة لازم يتم تريجيا وبهدوء ومن غير دوشة .. إبدأي حاجة حاجة .. أي تغيير منك بره الخطوط المرسومة كده كده هيقابل بمقاومة شديدة
لكن بجد .. تحية جامدة على كل الطموحات اللي قلتيها .. بجد حاجة مشرفة وتيتحق شرف المحاولة والمقاومة
إرسال تعليق