الثلاثاء، 8 سبتمبر 2009

بكيت


بكيت وبابكى على صاحبى اللى ضاع منى

مات واندفن .. مع انه لسه جنبى

صورة زمان فى حلم كان

راح وانقضى.. وآدى اللى كان

تلمح عنيا هيكل أسير

للوهن والضعف وقولة زمان

آدى بلادنا وآدى شبابنا

وآدى حلم أصبح سراب

آدى حكاية أعز صديق

راح بعيد وساب الطريق

فين أفكارك؟؟... فين طموحاتك؟؟

فين حماسك وحلم زمان؟؟

طار واتبخر.. راح فى الوبا

وابنى حلمك على أوهام

اشجب.. هدد.. استنكر

عيش ياللا مع أموات

دا اللى ياما حاربته زمان

لما القضيه كانت فى البال

توّه.. ضيع

اصنع بطوله من الدخان

عيش يومك وانسى همومك

وقول ياللا.. يومين والسلام

3 حط دماغك:

حروف يقول...

فكرتيني بمطلع يومينهم ويجي غيرهم
او ايام وبنعيشها

فعلا بقت حاله في اغلب المجتمع
حالة ركود واستسلام وضعف واستكانة
كلماتك جميلة
دمتي بالف خير

محمد حمدي يقول...

سمعت عن جروب : هعيد وافرفش بدون تحرش؟
ده جروب على الفيس بوك لتوعية الشباب ومناقشتهم وتفهيمهم ان التحرش سلوك خاطىء , وإننا لازم نبطل التبريرات السخيفة لافعالنا زى ان التحرش عقاب للبنت اللى لبسها متبرج ... الخ

الجروب هدفه عمل توعية للشباب قبل عيد الفطر المبارك اللى اتحول لموسم تحرش من ألاف الشباب , اللى كتير منهم –ياللعجب- بيكونو بيصلو ويصومو لحد اخر يوم فى رمضان واول يوم فى العيد بيتحولو لكائنات متحرشه وبتضايق فى خلق الله

كمان الجروب مش بيشتغل على الانترنت وبس , احنا بنخاطب شيوخ الجوامع ينهوا الشباب عن التحرش ويفكروهم بقيم الدين وضرورة غض البصر.. الخ خلال خطبة الجمعة او خطب التراويح وصلاة الليل , وكمان بنكلم معدى برامج التوك شو والجرايد الرسمية والخاصة لعرض حملتنا والتركيز عليها

لو تقدر تشارك معانا ببوست فى البلوج بتاعك تحط فيه لينك الجروب واهدافه تبقا دى خدمه كبيره ممكن تساعد بيها شاب على الهدايه او تحمى بنت من التحرش

ايه رايك ؟

لينك الجروب

http://www.facebook.com/group.php?gid=158203229767

وينكى يقول...

حررررررروووووف
دمتى بكل خير وكل عام وانت بخير
ادينا بنحاول نفوق المسطولين ونصحي الميتين
ياترى هايحصل حاجه؟
يارب
محمد حمدي
كل سنه وانت طيب
الجروب حلو ويارب يبقى له تأثير ايجابى