فراشه جميله
نظرها ضعيف
طارت كتير
تعبت مشاوير
كتر التدوير
ويوم ما تلاقى
بقعة نور
تطير بشوق
ترفرف فوق
ولما تقرب
تلاقيها نار
وآه م النار
حرقت جناح
ووراه جناح
وقعت بسرعه
ع الأرض البراح
------
فراشه نونو
لسه جديده
فى دنيا قاسيه
عليها لاموا
عليها قاموا
مين ما يفرق
بين نار ونور؟؟
ونسيوا انها
يا دوب نونو
علمتها الدنيا
حاجتين اتنين
هزى جناحك
ولاقى النور
------
فراشه غلبانه
بجراح مليانه
ع الأرض تزحف
وسط العيون
فيها الشماته
يعدى قط
يقول غدايا
تعدى رجل
ممكن تدوس
يمر طير
يحلم يشيل
جسم الفراشه
م الأرض شيل
عنده الولاد
فى البيت بالجوع
وجسم الفراشه
من غير جناح
أصبح متاح
------
لكن الفراشه
تحمى البقيه
من الأشلاء
بين الشجر
تحت الورق
لسه الأمل
جواها موجود
أروح للنور
ولو زاحفه
ممكن ألاقى
النور بجد
مايكونش نار
أو يكون
ساعتها بس
أقول وصلت
تفنى حياتها
لهدف وحيد
أروح للنور
وبعده الحياه
مالهاش لزوم
***
5 حط دماغك:
كلمات جميلة .. وكلها أمل بجد
مهما حصل ومهما كانت الأمور سيئة .. برضه فيه أمل .. حتى لو من غير جناحات
الله عليكى يا مروه كلام جميل زى صاحبته
ويبقى الامل ما دامت الحياه
نور بجد
بس فراشه !
يامراكبي
الامل هو سر الحياة
من غيرها ماكانش حد استمر :)
دارك بلو
شكرا لرايك.. انا وينكي على فكرة :)
محمد حمدي
نور أصلي من بتاع بلده مش تايواني
:q فاهم قصدى طبعا
زيكا
هي فراشة!
إرسال تعليق