الأحد، 16 مايو، 2010

غلاسه

مابحبش أركب المواصلات

الدنيا حر وزحمة موت.. الطريق بيبقى طويييييل وباقعد وقت كتير ما بقدرش اعمل فيه حاجه

دا غير اكتر حاجه بتضايقنى.. غلاسة الناس

باقعد في حالي في امان الله سرحانه وباتامل الاقى اللى عماله تبصلى قوى وتضحك

ابصلها باستغراب الاقيها بتحركلى حواجبها او واحده تانية بتلعب بنظارتها وتقعد تقلعها وتلبسها وعلى وشها تعبير سخيف موت

مابقدرش امسك نفسي واقعد اضحك عليه

لكن بابتدى اتخنق بقى من اللي تقوم وتقعد تلعبلي ف قفايا وتصوصو جنب ودني وتقعد تعملى حركات سخيفة جدا

ايه الناس الهبلة دى

احتج واعترض وابص لماما اللى قاعده جنبي.. ألاقيها مبسوطة وبتبتسم

والزنانة اللي جنبي تقعد تقول: دي الساعة بتاعتى ودى نظارتي ودى مفاتيحي

كمان طلعت حرامية

طب اعمل ايه فى سخافة الناس دى ياربي

اللى خوفنى بقى الراجل اللى جه مرة واحده وحط ايده على ظهرى ده

ابصله باستغراب قوى

الاقيه بيبتسملى برضه وراح باس خدى

يامامااااااااااااااااا... كمان عرقان وريحته معفنه

ماما لسه برضه بتبصله وبتبتسم

يانهار اسود ومنيل

ماما... انا بنتك حبيبتك والراجل ده بيتحرش بيا وانتى بتضحكى

طب اعمل ايه طيب

احاول ازق ايده.. اضربه... ابعده عنى

برضه بيضحك

الدنيا بتلف بيا.. مش قادره هاتخنق

ماما بتضحك

الناس حواليا بتبتسم وبتبصلى

مش قادره

عاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

( ما تعيطيش يا توته خلاص انا ماشي اهوه)

دى تلاقيها جعانه ولا حاجه

ماما بتغطيني بحته قماش كبيرة دارتنى انا وهي عشان تأكلني

عااااااااااااااااااااااااااااااااااااااااااااااااااااااااااااااااااا افهمي بقى

نيام نيام... مش جعانه يا ماما .. مش بالعافية

واااااااااااااااااااااااااااااااااااااااااااااااااااااااااااااااااااااااااء

أعض صدر أمي اعتراضا على ارضاعي بالإكراه لتقوم بصفعي على وجهي متألمة

أبكي ألما واعتراضا لتعود فتضمني من جديد لأنام وارتاح من هذه الهموم

مش قلتلكم باكره المواصلات

2 حط دماغك:

فوكش يقول...

ما أقدرش أنكر إنو في البداية افترضت النية السيئة في الموضوع, بس في آخر المقال الواحد بيكتشف إنو تفكيرو راح في حتة تانية...

على رأي معلق رياضي أعرفو: حلوة وملعوبة!

يا مراكبي يقول...

:-))))))

الله .. بوست جميل جدا جدا

ما حدش يفتكر أبدا ان ده شعور رضيع ناحية كل اللي حواليه أبدا

مفاجأة جامدة بجد

أحييكي