الخميس، 29 ديسمبر، 2011

اول واخر

زمان قالوها في الامثال
ياما دقت ع الراس طبول
وانتو لا أول ولا اخر ناس
تجرحني.. تظلمني
وتسيل دمعي على خدي
لانتو اول ولا اخر ناس
تزيف.. تدلس
ترمي الضحكة قدام الوش
وتغيب خناجرها ورا ظهري
ماقدرش ألومكم او اعاتب
الذنب ذنبي اني مافهمتش
ولا اتعلمت
ان الوشوش واحدة كما القلوب
والعبيط اللي ينجرح ولا يتوب
خليني كده
اعاني هموم الطيبة ف قلبي
واشتكي وجعي للمخدة
بكرة الايام تلف تلف
والزمن يشيل الذكرى
حتى لو ندوبه ملتني
وفضلت فاكرة
مش لازم انسى
اني رجعت تاني اقول
انا استاهل اني اتغشيت
ولا انتو اول ولا اخر ناس
أقول ماخلاص
بقوا خبر كان

3 حط دماغك:

عاليا حليم يقول...

أي والله الذنب ذنبي إني مفهمتش ولا إتعلمت .. بس هنتعلم إن شاء الله كفاية كده باه ولا إيه يا عزيزتي ؟؟

حسن ارابيسك يقول...

عجبي
كل سنة وانتي طيبة بمناسبة العام الجديد ومتألقة في كل نشاطاتك الفنية الجميلة
تحياتي
حسن أرابيسك

وينكى يقول...

عاليا
كل سنة وانتي طيبة
واحشاني وواحشنى مرورك

حسن ارابيسك
كل سنة وانت طيب ويارب تكون سنة جديدة سعيدة عليك وعلى كل مصر :)