الجمعة، 3 أغسطس 2012

أي طق حنك


فيه ناس بجد الذل مكيفهم!!

الكلمة دي جت على بالي قوي بعد ما جمعتني الصدفة بواحدة من الناس العادية جدا في الشارع اللي شايفين ان الشرطة مظلومة والجيش هو حامينا ومبارك اكتر راجل محترم في الدنيا عشان تنحى وماعملش زي بشار..
الحكاية ابتدت لما شفت مسلسل من مسلسلات رمضان الهبلة فيه منظر لطبيبات في مستشفى ميداني ودخل عليهم بلطجية سحلوهم في الشارع..
انا استغبيت الموضوع قوي لأنه معروف جدا مين اللي كان بيسحل البنات في الشارع بس قدرت ان الرقابة مش هتسمح بالحقيقة من ناحية ومنافقين الإعلام بيعملوا عمليات تجميل للنظام من ناحية تانية
المهم لقيت اللي طالعه زي الخابور وماسكه نفس الاسطوانة المشروخة بتاعت: " هما لو متربيين بصحيح ماكانوش نزلوا من أساسه.. واحنا الستات المحترمة نتابع في التلفزيون وندعي والرجالة هي اللي تنزل تجيبلنا حقنا.. والبت أم عباية بكباسين...إلخ
والناس اللي بتقول ان الشرطة هي اللي كانت بتضرب النار على المتظاهرين.. نسيوا ليه ان فيه رصاص كان بينضرب من البلكونات والشبابيك ومولوتوف بيترمي
وطبعا الأسطوانات الهبلة بتاعت كلهم متدربين على الانقلاب بره مصر ومش عارفه مين كان في بريطانيا ورجع قبل الثورة بيوم واحد ومين استضافوه في التلفزيون واعترف على نفسه انه فعلا أخد فلوس عشان يعمل الثورة
والرجالة والستات اللي مقضيينها دعارة فى التحرير ... يوووووووووووووه
حسيت اني بتفرج على التلفزيون الحكومي .. كل شريط الأخبار بتاع سنة ونص انطرش في وشي في تلت ساعة

أنا مش من النوع اللي بيتحاور في حاجة إلا لما يبقى معاه كل المعلومات اللازمة..وبما اني كنت من اكتر الناس اللي بتهرب من الاخبار في الفترة دي وكل معلوماتي مستقاه من أقوال الآخرين او من النت فعادة مش بتكلم وبفضل اسمع.. ومؤمنة جدا ان من قال لا أعلم فقد أفتى.. خصوصا ان مصر بقى فيها مفتيين بعدد شعر راسي

بس على رواقة كده احب أفند الكلام والحالة مع نفسي

أولا: أي طرف بيدافع عن معتقده بقى عصبي جدا.. وعشان يثبت انه صح لازم يثبت للطرف التاني انه غلط وحمار وما بيفهمش ولازم يروح يتوب ويستغفر ويبدي الندم... اللي كانت بتكلمني كنت حاسه بجد بنظرة الكره في عينيها ليا من غير سبب
وكأن اللي مش معايا يبقى عدوي
ودي نغمة شفتها في كل اللي بيتكلموا في السياسة اليومين دول للأسف

ثانيا: فيه ناس مؤمنة جدا ان العسكر هما الامن والحماية والسلام.. ولو مش عاجبينا يبقى " خلوا مرسي يشيل كل الداخلية والشرطة من أصغر عسكري لأكبر لواء ويعين شباب سيكي ميكي من اللي بيسقطوا بنطلوناتهم"
معلش انا أيام اللجان الشعبية اللي بيسقطوا بنطلوناتهم هما اللي كانوا بيحموني أنا وأهلي وقت ما العساكر واللواءات كانوا نايمين في بيوتهم وبياخدوا من فلوس الضرايب اللي بدفعها... والشباب السيكي ميكي كان واقف في الشوارع بينظم المرور من غير ماياخد مليم بعكس بتوع المرور اللي حتى لما كانوا موجودين كان لازم يقفلوا الالف جنيه رشاوي من السواقين.. والعيال اللي مش عاجبينها كانوا بيركبوا موتوسيكلاتهم ويدخلوا وسط الضرب عشان يشيلوا المصابين ويجروا بيهم على اقرب عربية إسعاف أو مستشفى ميداني، بيعملوا سلاسل بشرية باجسادهم عشان الضرب ما يقربش من حته بيتعالج فيها مصابين.
أقول ايه ولا ايه بس...

ثالثا: ما أنكرش ابدا ان مبارك اخد قرار صحيح لما تنحى.. بغض النظر عما إذا كان ده فعلا قراره ولا أجبر عليه.. انا واثقه ان فيه قيادات ذكية في مصر وأنا مش من النوع اللي لما بيتضايق من حد أقول عمري ما شفت منه حاجة حلوة
الجيش عارف كويس قوي انه لو ضرب جوا مصر هياخد على قفاه من بره مصر
العدو من حوالينا ومصر اكبر دولة مستهدفة ومتراقبين بحر وبر وجو.. يعنى حتى لو مبارك فكر انه يبقى زي بشار الجيش هايقوله ماحدش فاضيلك وماحدش هيسمع كلامه
كمان هو فعلا عمل كده.. بس بالداخلية مش بالجيش.. يعني عرق الندالة وارد قدامنا اهوه.. فين حلاوة وجمال المتنحي دلوقتي ياللي بتدافعوا عنه؟؟

رابعا: الناس مش لاقيه تاكل ومش لاقيه كهربا ولا ميه ولا مرتبات وكل اللي فالحين فيه انهم ينظروا ويشتموا وخلاص.. بلا وكسة بجد

خامسا: أنا مش مع النظام القديم ولا مع النظام الجديد
وشايفه ان الدنيا لسه مليانه صفقات والثورة لسه ماقامتش اصلا.. بس أنا بحب احتفظ برأيي لنفسي لأني بمنتهى البساطة ماعنديش دراية سياسية كبيرة وكل اللي يهمني الجانب الاجتماعي والانساني وبس
ومش مطالبة باي شكل اني افهم في السياسة ولا افتي فيها ولا حتى أدي ودني لحد
ودا قمة العقل بالنسبالي.. ودوروا على أي دولة تانيه في العالم هتلاقوا 99% من الشعب مالوش فيها
يادوب اللي بيروح ينتخب بيروح وخلاص على كده وسايبين السياسة للي بيفهمها وهما بيتلخموا في أكل عيشهم

سادسا: انتي لو شايفه ان البنت المحترمة المتربية المفروض تقعد في بيتها نبات زينة حلو جميل وكفايه عليها الدعا دي حاجة تخصك ودا رايك الشخصي.. بس ياريت ماتفرضيهوش على حد عشان مش كل الناس انتي
ولما ييجي حد بعد كده يسرق حقوقك ويؤذيكي وتقوليله البنت ما تتمسش وكرامتها رقم واحد  تبقي تلومي نفسك زي ما بتلومي غيرك.. بس لوميهاعشان انتي أول واحدة فرطتي في حقك كإنسانة حرة المفروض تكون سيدة قرارها مش مواطن درجة تانيه
 - انا مش بتكلم على نزول المظاهرات من عدمة.. انا بتكلم على البقبقة والفتي اللي مالوش لازمة واللوم اللي مالوش قواعد.. كل احترامي لأي شخص آمن بحاجة معينة ونفذها..أنا نفسي ما نزلتش مظاهرات ولا نزلت اكنس الشوارع، لأني كنت مؤمنة ان بيتي واهلي واخواتي محتاجين وجودي جنبهم.. بس ماكنتش بشتم في اللي نزلوا ولا بقول عليهم بلطجية وربنا يحرقهم هيودوا البلد في داهية.

نصيحة في ودن كل نطاط حيط: خليك في حالك وسيبني اشوف شغلي
ماتتهمنيش اني مش عارفه حاجة عشان ما اتهمكش بالجهل والعبط
كل واحد حر في حياته وفي الطريقة اللي بيمشي بيها في الدنيا.. ماتحاولش انك تفرض رايك عليا لمجرد انك تحس بالرضى عن نفسك وتصدق انك صح
عشان بجد أنا باشفق عليك من العبط اللي انت فيه


وبس كفايه كده .. خلصت كلام

0 حط دماغك: