الاثنين، 15 أكتوبر، 2012

كل عيد وانتو طيبين :(


-          تحبي تحضري الحفلة دي؟
= أكيد طبعا.. مستنياها من زمان قوي
-          طيب انا معايا تذاكر زيادة.. المعاد هايكون اول يوم العيد
= ...............
-          ايه مالك؟
= معلش اسمحلي اعتذر عن الدعوة دي.. مش هاقدر اخرج في العيد
-          ليه بقى ان شاء الله؟
= خوفا من التحرش طبعا
-          ههههههههههههههههههههههههههههههههههههههههههههههههههههههههههههههههههههههههههه
= ايه اللى يضحك فى كلامي؟؟؟
-          انتي ايه اللي خلاكي تقولي كده؟
= عشان هو ده الواقع للأسف دلوقتي.. العيد عندنا تحول لمصدر خوف ورعب وكآبة.. الواحده بتقضيه فى بيتها وهي حاطه ايدها على قلبها وبتدعي ربنا يعدي الأيام دي على خير
-          بس دا عيد يعنى وحقك تخرجي
= واللي هايشوفني في الشارع بتعرض للتحرش هايقول اني بنت قليلة الأدب وانا اللي عايزه اتعاكس وأتساهل اللي يجرالي مادام رضيت أنزل الشارع وانا عارفه انه مليان متحرشين
انا بتكلم عن واقع مجرد من كل الشعارات.. واقع بيحمل البنت فوق طاقتها وبيغفر للولد أبشع الذنوب.. واقع ما يعرفش يعني ايه كلمة الأمان والاحترام وثقافة الفرحة عنده تحولت لعنف وإجرام.
انا واحده عادية جدا فيه زيي مليون بنت.. حتى لو اهاليهم ما منعوهمش من النزول فى العيد – ودا غالبا اللي بيحصل – هما من نفسهم بطبيعتهم المسالمة مش هايفكروا يخرجوا ويحطوا نفسهم في موقف بايخ ماحدش هايسندهم فيه.. لا أهل ولا شارع ولا بوليس ولا حكومة ولا حتى كلب ماشي في الشارع.
لحد ما الموازين تبقى تتعدل بقى وتبطلوا نغمة " البنت هي السبب " هافضل قاعده في بيتي بكرامتي
وايه يعني عيد .. مابقتش فارقه كتير.. منا بقالي فوق العشر سنين ماخرجتش من بيتنا في الأعياد
بس ياريت وانت بتقرا كلامي ما تضحكش وماتتريقش عليا.. عشان ساعتها هاصدق انك مش عايش في البلد دي ومش دريان باللي فيها.

وكل عيد وانت طيب

4 حط دماغك:

ذو النون المصري يقول...

كل عام انتم بخيسر
و مصر كلها بخير
و الدنيا كلها بخير
باشعر بغضب عارم كلما رايت صور التحرش هذه
و غضبي يشتد اكثر انها ايام عيد
كان العيد خلق للمعاصي
رغم ان الاعياد تعقب طاعات هي من اجل و اعظم الطاعات
صيام و حج
فيه حاجة غلط و للاسف كلنا عارفين لكن لا احد يعرف العلاج

وينكى يقول...

ذو النون المصري
كل سنة وحضرتك طيب ودائما الى الله اقرب
هى مشكلة بتتفاقم يوم بعد يوم عشان ماحدش حاول يفكر فى حل ليها بجد
الكل بيستنكر ويشجب ويدين ويرمي التهم والمعاذير وخلاص
لكن حد يحل؟؟... اسفين مش شغلتنا
ربوا اولادكو الاول

هيييييييييه.. دى صرخة اتمنى توصل فى يوم من الايام للي يحس بيها :)

يا مراكبي يقول...

موضوع مؤسف

بقى اللي هتنزل تتفسح في العيد هيظنوا فيها كده؟ انها نازلة عشان عايزة تتعاكس ويتحرشوا بيها ؟

:-(

وينكى يقول...

يامراكبي

دا اللي بيحصل للاسف ودا الواقع للاسف
ودا اللي بنواجهه كبنات في كل يوم بننزل فيه الشوارع مش فى الاعياد وبس
برضه للاسف