الخميس، 4 أبريل، 2013

لو ده جنان ♥


طفل صغير طالع يبيع نعناع فى المترو
وشه مترب وايديه مش نضيفة خالص.. باين عليه هم واحد عنده 40 سنة
كان معايا wipes في شنطتي.. طلعت واحدة ومسحتله وشه وايديه بيها.. هو كان مستسلم تماما ليا وكأني أمه وبتنضفه.. كنت حاسه انه مبسوط
لما خلصت اديتله واحد تاني وقلتله اوعى تسيب نفسك كده.. المية فى كل حتة ببلاش
اغسل وشك وايديك عشان تبقى نضيف وجميل
ساعتها ابتسم من سكات ونزل المحطة.. والستات كانت بتبص عليا على اني اعجوبة من اعاجيب الكون

ولد تاني فى نفس سن الاولاني عملت معاه كده.. بس كان مبسوط وبيضحك وقالي شكرا يا طنط واداني علبة نعناع هدية.. بس انا اديته ضعف تمنها وكان معايا صابونة صغنونة مغلفة بالصدفة قلتله دي عشانك واستعملها كل يوم وطبطبت على ظهره
كان ماشي وكل شوية بيتلفت عشان يبص عليا وانا بعمله باي باي :D

طفل تالت وقفني في الشارع بابتسامة حلوة
أبله.. أبله عاوز جنيه
لما بلاقى طفل هجم عليا كده بهجم عليه انا كمان واقوله انا عاوزه نص جنية.. واقلده زى ماهو بيعمل بالضبط
فيه اللي بيتخض ويجري وفيه البرئ اللي بيقولي مش معايا
وفيه اللي هز قلبي قوي لما طلع جنيه من جيبه بكل براءة عشان يديهولي :D
ساعتها اديتله 2 جنيه وانا فرحانة بيه
طلب مني طلب صغنون على قده: شيليني
شلته من تحت باطه وظهره ليا وقعدت أطوحه وألف بيه
وكل ما أوقف يقولي تاني تاني :D
أروح واخداه كمان لفة.. لحد ما تعبت رحت سايباه وجريت 
قد ايه الفرحة فى عيون الاطفال حلوة
قد ايه الاطفال دول محرومين من اقل حقوقهم وهى ان حد يبصلهم باحترام او يبتسم حتى فى وشهم

حتى لو مش هاتشترى حاجة منهم.. عشان خاطري بلاش تكشر فى وشهم
بلاش تتجاهلهم وتعمل نفسك انك مش شايفهم
بص فى عينيهم وابتسم حتى لو مش هاتشتري حاجة
دا اهم عندهم فى الدنيا من اى حاجة تانيه ♥ ♥ ♥

7 حط دماغك:

غير معرف يقول...

أنت انسانة رائعة

P A S H A يقول...

الله
:)

وينكى يقول...

غير معرف
ربنا يخليك ميرسي خالص دامن ذوقك

باشا
منورني ونورك عوضنى عن انقطاع الكهربا بتاع النهاردة :D

Wohnungsräumung wien يقول...

تسلم ايديك على الموضوع الممتاز
Wohnungsräumung
Wohnungsräumung
Wohnungsräumung wien
Wohnungsräumung wien
Wohnungsräumung wein

يا مراكبي يقول...

صح كده

خليكي إيجابية

اعملي الصح مهما كان

وينكى يقول...

يامراكبي

:))))))
اعمل الصح
اعمل الصح يا حزلقوم :P

ريوبى يقول...

موضوع ممتاز
ryobi