احساس رائع لما تقابل حد عزيز عليك ما شفتوش من زمان
فرحة مش طبيعية بتحسها جوا قلبك لما تشوف نمرة غريبة ظهرت على موبايلك ولما ترد تلاقي وراها الصوت المميز لـ "ألووو" لشخص انت عارفه كويس من زمااااااان
حاجة كده... ماتتوصفش
احساس هو مزيج من الاطمئنان انك لسه على بال الناس اللي بتحبهم وبيحبوكوفرحة اللقا وسماع نبرة اللهفة في صوت حد بيقولك: انت فين يابني دنا دخت عليك كتير
حتى لو كانت مطعمة بأساليب تعبيرية عنيفة وكل واحد على قد شوقه بقى :D
الأصحاب نعمة كبيرة قوي.. الانسان اللي يقرر انه يعيش لوحده او يبعد عن كل اللى يعرفهم انسان مسكين بجد
لانه هايتحرم من نعم كبيرة قوي
خلونا نعترف.. الانسان حيوان اجتماعي.. مايقدرش يعيش لوحده ابدا
ممكن في حياة الواحد بيصادف انواع مختلفة من الاشخاص مش كلها بتعمر معاه
اما لان اللقا كان لأسباب معينة وحصل في ظروف معينة ولما انتهت الظروف دي انقطعت الروابط بين الشخص او الشخصيات دي
وممكن يكون اللقا عابر.. علاقة صداقة وفضفضة قامت بطول رحلة القطر او حتى الميكروباص وهاتنتهي مع كلمة " على جنب ياسطى"
يحصل اللقا في المدرسة او الجامعة ثم تتفرق بنا السبل وماحدش يعرف حاجة عن حد
ساعتها بنرجع نتقابل في حالة من اتنين
اما عن طريق الصدفة.. او نكون حريصين اننا نفضل على تواصل مع بعض
كل حاجة بتحصل ليها ظروفها
وماكدبش اللي قال "اللقا نصيب"
اكيد كل كلام الاغانى عن يوم اللقا مجاش من فراغ :)
بس اللقا اللي اقصده أعم واشمل حبتين تلاته
نتلاقى قريبا ان شاء الله يا كل اللي بحبهم وبيحبوني ;)
0 حط دماغك:
إرسال تعليق