الاثنين، 13 أكتوبر، 2014

نصيحة #2

Create goals and make a plan

ماتعيّش في الدنيا هبلوللي كده وخلاص
رتب حياتك... حط أهداف واضحة وصريحة قدامك، وحاول انك تختار أفضل الطرق عشان تحققها

قبل ما أدخل الجامعة أنا كنت مشتتة جدا.. مش عارفه أنا هاروح فين وآجي منين
مش عارفه هادخل كلية ايه وراميه الحمل على المجموع
كتير قوي بيعملوا كده.. والنتيجة انهم بيقضوا حياتهم كلها بيعملوا حاجات مش مقتنعين بيها
عايشين وخلاص
يمكن لو كنت قضيت شوية وقت مع نفسي عشان أتكلم معاها واكتشفها، أعرف هي بتحب ايه وشاطره ف ايه ومياله لانهي اتجاه
يمكن لو بصيت جوا مراية نفسي وعرفت أكتر عن شخصيتي كان الوضع فرق كتير

كلنا بنتوه في الدنيا.. ومش دايما بنعرف احنا عاوزين ايه
وأحيانا بنبقى حاطين حاجة قدام عنينا ونلاقي ظروف الحياة بعدتنا عنها
وأولوياتنا في الحياة اختلفت
بس لو الواحد عنده هدف حقيقي هايعرف ازاي يوصله

اقعد مع نفسك شوية كده واكتشفها
مش بس على المستوى العملي او الدراسي
دا على كل مستويات حياتك
لازم تبقى عندنا خطة.. ولازم الخطة يكون ليها بدائل كمان
المهم ان كل الطرق توصل في النهاية لهدف انت عايش عشان تحققه

واللي يقول طب لو أنا حققته اعمل ايه بعد كده؟
هاقوله ببساطة

"حط أهداف تانية...خططلها عشان تنفذها وعيش عشانها، لحد ما مدة إقامتك في الدنيا تنتهي"


2 حط دماغك:

حسن ارابيسك يقول...

اذيك ياوينكي
وحشاني واللهي
والكلام اللي انتي كتباه ده كلام جميل ومحترم وصحي جداً وحقيقي وعلمي لكن للأسف الكلام ده ياريت بس على مستوى الأفراد بيحصل ده للأسف بيحصل على مستوى الدول وحكوماتها.
تحياتي
حسن أرابيسك

وينكى يقول...

ارابيسك باشا
نورتني

لما يبقى سلوك الانسان دايما الفوضوية والتوهان معتقدش هاتكون حكومته عكس كده
مجلس الشعب اللى الناس بتنتخبه هو المفروض اللي بيحط القوانين اللي بتنظم حياة الناس
بس للاسف واضح ان هنا مفيش حد عارف دوره
ماشيين ببركة دعا الوالدين

هيييييييييييييح
احنا نستورد حكومة من اى دولة متقدمة تصلح البلد بقى بس الخوف لحسن احنا نفسدها :P