تلك الحياة

تلك الحياة المملة

برتابتها

بسماجتها

وذلك الهدوء القاتل

يغلفها

تلك الحلقة المفرغة

فيها ندور

بها نجول

بلا مخرج

ذلك الطوق الذهبى اللعين

يقيدنا

يخنقنا

ولا مهرب

طفل

النهارده الجمعه.. مخنوقه ومحتاجه أخرج لأى مكان جديد

ايه رأيك فى مكان أخضر مفتوح؟؟

أكيد فكره تجنن.. ياللا بينا

.

ممكن تطلبلى عصير فراوله

اتنين فراوله لو سمحت

والنبى يابيه معايا ولد ما أكلش من يومين

ربنا يسهلك

عاوز آكل

عاوز آكل

امشى يا ولد من هنا ياللا

عاوز آكل

وكأنه ما يعرفش يقول غيرها فى الدنيا

اشربى العصير يا حبيبتى

طب أبوه عنده صحه .. ليه يخليه يدور معاه يشحت فى الشوارع؟؟

تحبى تاكلى أيس كريم؟؟

هو مش بيروح مدارس يا ترى؟؟

ياللا نقوم نمشى

***

باقفل شباكي وابطل بص للسما

عشان ما افتكر

حلمي القديم

لما الحلم كان له معنى

كنت بافوق م الحلم سعيدة

منا كنت باطير

ودلوقتي

أحلام متداخلة

مالهاش معنى

شكلها كوابيس

وَش مجنون بيدوي ف عقلي

وأرجع أفوق

بصداع رهيب

وقلب مقبوض

فقدت الحلم

من يوم ما حلمت إني باطير

لآخر مرة

جيت أطير

اتسلسلت

نفسي أتحرر

زهقت.. وبجد مش عارفه ليه

زهقت من شغلي اللطيف المريح عند الناس.. الممل الرتيب بالنسبالي

زهقت من الروتين والطريق المرسوم وعشان تبقي بنت شطورة لازم تعملي وماتعمليش

حتى لما أبوح بزهقي ده لأقرب الناس ليا... يرسمولي خطط بديلة عشان برضه امشي عليها

نفسي أكون نفسي بجد

أعمل اللى باحلم بيه وأكون مؤمنة بيه

مادام ما بعملش حاجه غلط ولا حرام.. ليه بقى بيعقدوني بحاجه اسمها شكلك قدام الناس

نفسي أكون حرة نفسي.. يكون ليا شغلي الخاص ومايبقاش ليا رئيس

لما أقول كده يتهموني بالخبال.. وتسيبي الوظيفة المضمونة؟؟

نفسي أتحرك وأروح وآجي وأسافر واتعلم حاجات جديدة وأشوف الدنيا واكتسب خبرات

لما اقول كده يتهموني بالعبط.. عاوزه تتمشوري وتتمرمطي بدل المكتب المكيف والناس اللى اتعودتي عليها

كمان يعني ايه تسافري لوحدك من غير راجل.. لما تتجوزي سافري معاه

يعني م الاخر أستنى عملية نقل الملكية

هو انا يعنى ما ينفعش أكون حرة نفسي لمجرد انى عاوزه اكون حرة

أنا انسانه مسئولة ومش محتاجه حد يملي عليا اعمل ايه وما اعملش ايه

زهقت من الشكل المثالي

زهقت من الأجندة اللى محطوطالى ولازم أنفذها

زهقت حتى من شكلي وصورتى قدام الناس

اتخنقت من كل حاجه

عاوزه أتحرر

عاوزه اكون نفسي

الحاجة الوحيدة اللي مانعاني من اني ارمي بكل حاجه ورا ظهري وامشي... هي الحب

أنا بحب الناس دي

مش عاوزه أخيب املهم فيا

يا الله.. المعادلة صعبة قوي

ما أقدرش أعيش يومي من غير ابتسامة أمي

ماقدرش أحس بسعادة وحد من اخواتي زعلان

ما أقدرش احس ان الدنيا جميله لو أبويا مش راضي عني

مش عاوزه أكسفهم

مش عاوزاهم يكرهوني ولا يحزنوا بسببي

دنا ممكن يحصلى حاجه لو حد فيهم جراله حاجه

ربنا يخليهم ليا

بس انا كمان تعبت

بجد المعادلة صعبة قوي قوي

أنا ولا هما

بحبهم حب ما يتوصفش.. بخاف عليهم وبافكر فيهم وهما أولوية حياتي

بس حاسه انى مابقيتش قادره أستحمل الدور ده

بحبهم وبرضه نفسي أحقق ذاتي

نفسي اعمل الحاجه اللى هاكون بيها راضيه عن نفسي

وأكرر.. الحاجات دى مش عيب ولا حرام

واي حد تانى هايبقى فخور بيا لو حققتها

بس ازاى اعملها دي

انا هابتدي اخطرف

مش عارفه أعمل ايه... بجد قلبي واجعني قوي

وماليش غير إني افضفض بكلمتين واخرج الأسى اللى جوايا من عنيا

أو اني اصرخ بأعلى صوتي وأقول

اااااااااااااااااااااااااااااااااااااااااه

حين تصبح البساطة أسلوب حياة

وحشتوني بجد يا ولاد

أنا شخصيا بقالى كتير ماعديتش من هنا

بس احلى حاجه فى الموضوع ان الحياه جميله ومتظبطه معايا

عايشه الحياة ببساطة

وبابتسم للمشاكل والصعاب واستمتع بيها

مقولتين اتعلمتهم فى كورس تنمية بشرية كنت واخداه من كام شهر.. وماقولكوش انا متفاعله بيهم ازاى

بقيت حاسه ان نفسيتى أهدى ومش قلقانه من حاجه

تحصلى مشكلة.. وماله.. انا احسن من غيري

بامشي فى الشارع وانا مبتسمه ومبسوطة .. بس عشان أدى شوية أمل وتفاؤل للناس ومايتخنقوش لما يشوفوا وش مكشر تانى غير اللى بيشوفوه حواليهم كل يوم

حتى أبسط التصرفات اللى ماحدش بيعملها لطفوليتها - زى النط من فوق بركة ميه - بقى ليها طعم تانى

احساس أقول عليه: عايشه حياتي ببساطة وتلقائية.. وبمزاجي

جميل ان الواحد يعمل اللى حاسس بيه ببساطه ومن غير ما يفكر فى رد فعل الناس اللى حواليه كتير

ببساطة لأنهم هايتمنوا انهم يكونوا مكانه بس التخشب اللى جواهم مانعهم

جميل انك تحس بالحب لكل الناس ، تعاملهم من القلب.. حتى اصحاب المصالح ما تبخلش عليهم بنورك

تعيش بروح طفل عنده خمس سنين.. وحكمة من بلغ الخمسين

اوعى تلاقى فرصة ممكن تفرح فيها وتفوتها

اى نعم الفرص بتيجي كتير.. بس ليه تضيع عليك لحظة سعادة حتى لو مش هاتدوم كتير؟

والله انا مابنصح ولا بقول كلما من الهوا

دا احساسي بجد

انا حتى كتبت وانا مش عارفه انا هاكتب ايه

انا سبت نفسي وخلاص

مين اول واحد هايبشرني انه هايعيش حياته ببساطة

ويبقى دا اسلوب حياته؟

رمادي اللون

أنا مش ملاك

أنا م البشر

ليا أخطاء

عندى الذنوب

من كبرها

أقول عنها

لا تغتفر

------

أنا مش شيطان

أنا انسان

جوايا قلب

رمادى اللون

فيه م القسوه

قد الحنان

------

أنا مش إله

أنا مش نبى

ولا عمره ينفع

غيرى ف يوم

بيا يقتدى

------

أنا الانسان

ساعات بحالات

وساعات بحاجات

جوايا اتنين

بينهم صراع

والطريق

له سكتين

آدى الشمال

وآدى اليمين

لكن أنا خدت الطريق

بين سكتين

بين مفرقين

واتمرجحت على الحبلين

------

فيه اللى شاف

فيه اللى حس

فيه اللى راح

عنى وبعد

فيه اللى قال

دا كلام جديد

لكننا

طول عمرنا

هانفضل بشر

وكل البشر

رمادى اللون

***

حالة اكتئاب صيفي

أزاح سماعته الطبية عن أذنيه

جلس على مكتبه الأنيق , وكتب تشخيصه بخط واضح على غير عادة اقرانه

حالة اكتئاب صيفي حاد

------------------

اللى يعرفنى كويس هايعرف قد ايه انا باعشق الشتا وباموت فى دباديبه

باتغنى بيه فى كل مناسبه وباعلن عن حبي وولائي لكل امطاره وبرودة هواه وانتعاشه اللامحدود اللى بيخترق روحى

***

لابد من مداومة شرب العصائر الطبيعية واكل الفواكه بكثرة لكي تحتفظي بمعدل عال من الماء فى جسدك

-----------

يدخل فصل الصيف وتبتدى المشاكل

أمشي فى الشارع جوا فرن مقفول

الشمس بترمينى بسهام محرقه من أشعتها اللى ما بترحمش

فين شمسي الشتوية الودود؟؟

الهوا خانق وكأنه عدى على ألف صدر غيري

اعصابي بتغلى مع دماغي .. ومع الزحام وضغط الشغل

النتايج بتبقى منيله بنيله

***

احتفظي بجسدك رطبا قدر الامكان

داومي على أخذ دوش بارد يوميا لكي تشعري انك أفضل

ويستحسن ان تطلبي أجازتك السنوية سريعا لتقضيها بأحد المصائف الهادئة

ستكون فرصة رائعة للاستجمام ولهدوء أعصابك

----------

باكره الحر.. وباكره الصيف

امبارح جتلي حاله هبوط عجيبه

مش قادره اتنفس.. كنت بانهج وكاني واحده وزنها 120 كيلوجرام طلعت للتو عشر ادوار على رجليها

دماغي بتغلي.. مش قادره أفكر.. مش قادره اتنفس

كنت زبونه جوا البوفيه لفتره كبيره

تلج.. بيبسي

اى حاجه مالحه عشان ترفع الضغط

الغريب انى فى الحر عادة ما ضغطي بيترفع لدرجة تسببلي نزيف انفي

***

ساوصي لك براحة تامة علها تساعدك

قالها وهو يذيل تقريره الطبي بتوقيعه

ويرفقه باوراق التحقيق الإداري الذي تمت إحالتي إليه لتشاجري مع احد موظفي المكتب

مما أدى لبعض الإصابات الطفيفة التي تستلزم علاجا يقترب من الواحد والعشرين يوما

-----------

شفتوا الحر بيعمل فيا إيه؟؟

أنا مصري

أكيد كتير منكو عارف اني باغني في فرقة اسمها انا مصري
أي نعم ماحدش بيعبرني وبييجي من اللي أعرفهم إلا من رحم ربي بس الفرقة شغاله وبتنتقل من نجاح لنجاح أكبر

والدليل على كده اننا الفرقه الوحيدة اللى الفلايرز بتاعتهم

بتخلص بسرعه فى اى مكان

شايفين ان ده مش دليل؟؟

طب احنا الفرقه الوحيدة اللى فى أقل من سنتين لفت القاهرة حتة حتة وطلعت لمحافظات تانية بالطلب وغنت على مسارح مش أي حد يقدر يوصلها زي مسرح قبة جامعة القاهرة" أيوه بتاع أم كلثوم ده"

وقريب جداااااااا.. هانغني على واحد من أكبر تلات مسارح في مصر

والشاطر يعرف;)
والدليل الأكبر على كده كمان ان قنوات ليها وزنها زى أون تي في و أو تي في والحياة والنيل الثقافية وروسيا اليوم ودريم بيتسابقوا انهم يعملوا لقاءات معانا.

الاحساس بطعم اللى انت بتعمله وصداه عند الناس جميييييل قوي
احساس رائع لما ناس ماتعرفهمش يقفوا ويسلموا عليك وانت ماشي فى الشارع.. أو ان اصحاب ماكلموكش من زماااااااااااان قوي يدعبسوا لحد ما يلاقوا نمرتك تانى ويكلموك بس عشان يقولولك " احنا شفناكي فى التليفزيوووووووووون.. كنتى هايلة"
حاجة ترفع المعنويات مش كده؟ :)

بقالى اكتر من شهر ناس عماله بتتصل بيا وتقولي.. انتى بتطلعى على اون تي في بصفة مستمرة كل يوم وبيجيبوا الأغاني بتاعتكو
طبعا انا اخر من يعلم ساعتها والناس كلها شافت الفيديو وانا لسه:( لا أراكم الله مكروها في ريسيفر لديكم.. ولا حرمكم من تعدد قنواته اللي مابقاش موجود عندى

المهم.. أخيرا لقيت فيديو لأغنية " أيام ربنا" دويتو ليا مع الرائع جدا " إيهاب عبده" من تصوير قناة ON TV

اتفرجوا وقولوا رأيكو
والأهم استمتعوا :)

وماتنسوش حفلتنا الجاية في ساقية الصاوي يوم الثلاثاء 21 يوليو الساعه 8 مساءا في قاعة الحكمة

وعشان تعملوا حسابكوا.. التذكرة بـ 15 جندي وللاعضاء بـ 10 بس

يابلاش :)

حالة

بعض الناس يتزوجون كي يكون هناك هدف يعودون من اجله لمنازلهم كل ليلة

هدف دافئ.. حميم.. واحساس بلم الشمل والمعنى الحقيقى للأسرة

تدور بخلدى تلك الكلمات فى طريق عودتي لمنزلى بعد يوم عمل شاق

أسير وحدى وسط الزحام.. أناس لا أعرفهم ولا يعرفونى

جو شتوي رائع مطير كما احبه ..جو مثالي لنزهة مع شخص قريب مني

أبحث فى ذهني عمن يصلح لاقتناص تلك الفرصة ... فلا أجد

كلهم تشغلهم حياتهم.. وكلهن لن يستطعن الخروج فى مثل هذا الجو... أو هذا الوقت

ينقلب احساسي بالنشوة إلى شجن غامض.. أفتقد شيئا ما لا أدرى كنهه.. أضم سترتي إلى صدرى..علها تحميني من برودة تسللت إلى داخلى... وآلمت مشاعرى

ذلك الأجوف الوحيد يحتاج لمن يشاركه دقاته كما أحتاج الآن إلى رفيق لنزهتى

أتنهد... أجد السير نحو منزلى .. ... معركتى الآن خاسرة

الآن فقط.. وجدت سببا آخر.. يتزوج من اجله الناس

علي الألفي.. تاني

إعلان الحفلة أهوه

مستنيين ايه.. يلا تعالو :)