ABC Test

كتير قوي من الناس سألوني: ياترى ايه هي مواصفات الزوج المناسب اللي انتي بتتمنيها؟

او: أي الرجال تحبين؟ .. أو: مين الراجل اللي ممكن يشد انتباهك؟

دا مش سؤال ممكن أعتبره خاص او شخصي.. قد ما بعتبره طريقة تفكير السواد الاعظم من الناس

بنشوف حوالينا علاقات كتير.. احيانا بتكون ناجحة جدا مع اننا جزمنا بفشلها من اول لحظة

واحيانا بنشد شعرنا ذهولا من التطورات المؤسفة اللي بتشهدها علاقة ما كنا شايفين انها ناجحة وتستحق دخول كتب التاريخ

دا غير العلاقات اللي ماشية بالقصور الذاتي.. يوم ورا يوم بيعدي والحياة بتمشي وخلاص

طب ازاي نعرف من البداية نحكم على العلاقة دي من قبل ما تبدأ اذا كانت هاتنجح ولا هتفشل؟

الموضوع صعب مش كده؟

عموما انا عندي طريقة.. هي مش ملكية خاصة، بس اكاد اجزم انها مفيدة جدا في الحياة واشكر الاشخاص اللي فتحوا عنيا عليها..

خليكو معايا..

ربنا لما خلق الانسان.. خلى جواه 3 قوى بتتحكم فيه
مفيش حاجة في حياة الانسان ده ممكن تخرج عن واحدة من القوى دي

A.      العقل

B.      الروح "العاطفة"

C.      الجسد "الغريزة"

فكر كده حواليك.. أي تصرف بيقدم عليه الانسان إما هو ناتج عن عملية عقلية او احساس عاطفي او غريزة من غرائز البقاء جواه.

كلام جميل.. حد هايسألني طب ايه علاقة ده بالارتباط؟

بتختلف مفاهيم الارتباط من شخص لاخر حسب طبيعة تفكيره واللي هو محتاجه

فيه انسان بيشوف واحدة حلوة وساعتها يدق القلب .. وبسسسس.. هي دي اخيرا لقيتها

فيه انسانة بتتعامل مع انسان وتحس انه طيب وحنين وبيخاف عليها وتبقى مش عايزة فى الدنيا غير انها تكون جنبه وتستمتع بالحنية دي

فيه اتنين مابنشوفش منهم غير نقاشات فكرية حامية الوطيس.. تحليلات نقدية ووجهات نظر.. وهوب مرة واحدة نلاقي الكوشة جمعتهم

بصوا شوية على الـ 3 نماذج دول.. حاسين بايه؟؟

تمام.. كل حالة لوحدها ما تنفعش تقوم بيت سليم.. كل حاجة على جنب كده هاتعمل علاقة ناقصة

محدش بيتجوز عشان الجمال بس ولا عشان الطيبة بس ولا عشان العقلية وطريقة التفكير بس

الجواز شراكة كاملة بين اتنين حياتهم قائمة على تفاصيل دقيقة كلها بتلعب في المساحة بين التلات زوايا دول

ومن هنا نشأ الـ ABC test

A.      العقل: مقصود بيه كل ما يتعلق بالتحليل المنطقى والتفكير المنظم وردود الافعال القائمة على التفكير

B.      العاطفة: مقصود بيها كل الافعال والاحاسيس النابعة من القلب مباشرة وردود الافعال العاطفية البحتة

C.      الغريزة: كل ماهو قائم على الغريزة ولا يتدخل به عقل او عاطفة

وكل نقطة منهم متمركزة في منطقة ما من جسم الانسان كما هو موضح في الشكل

عندنا هنا نقطتين ممكن يلخبطونا شوية

العاطفة والغريزة.. ازاي أقدر افرق بينهم؟

ممكن بني ادمة تشوف شخص ما ومن اول نظرة تتشد له وتحس انه هو ده حب حياتها.. وسهر ليل بقى وبتاع

ساعتها بكل ثقة هاقولها.. ان قرارها ده نابع من غريزة مطلقة وليس عاطفة.. العاطفة محتاجة تفاعل اكتر من كده وقرب وحوار عشان تقدر الروح تحس بمدى جمال الروح اللي قصادها

الغريزة أبسط من كده بكتير واكثر مباشرة والأسرع في التأثير... يمكن عشان كده بنقول دايما ان الحيوانات بتمشيها غرائزها

ودا بيبان فى التصرفات اللي بتعملها الحيوانات بشكل جماعي زي هجرة الاسماك وتحديد اتجاه البحر بالنسبة للسلاحف او بناء العناكب لشباكها فى اتجاه الجنوب وانفراد انثى الأسد بالصيد و..و..

معتقدش ان فيه حيوان قبل كده وقف مع نفسه وقفة وفكر.. هو انا بعمل كده ليه؟؟.. ولا هو بيحب طريقة حياته دى ولا لأ J

طيب.. نرجع لمرجوعنا تاني

مامدى التوازن او التكافؤ بين شخصين عقليا وعاطفيا وغريزيا

الاختبار ده المفروض الشخصين اللي بيفكروا فى الارتباط يعملوه مع بعض.. بس محدش يغش من التاني J

كل واحد يجيب ورقة وقلم

ويرسم الشكل اللي فوق ده وحط نقاط القوى التلاته على الرسم زي ماهو موضح

دلوقتي بقى كل واحد يسأل نفسه سؤال:

A.      الشخص ده.. متوافق معايا عقليا وفكريا قد ايه؟

طريقة التفكير والتحليل والنقاش.. هانحل مشاكلنا مع بعض ازاي.. مدى القدرة على استبصار الصواب والتصرف الصحيح في المواقف المختلفة.. وكل حاجة ممكن يكون العقل هو المتحكم الاول فيها

مش هانتكلم عن المثالية هنا.. هانتكلم عن التوافق بشكل اساسي

وحط درجة من 1 – 5 بحسب مدى التوافق العقلي ما بينك وبين الطرف الاخر

كل واحد فيكم عمل التقييم.. جميل جدا.. نتنقل على السؤال التاني

B.      الشخص ده.. متوافق معايا عاطفيا قد ايه؟

بمعنى.. حنيته وخوفه عليا.. بشاشته ورغبته فى اسعادى.. احساسه بالاخرين.. هايحب الاطفال زي منا بحبهم ولا لأ.. هايتسبب في انه يخليني اشعر بالحزن ولا لأ.. وكل ماهو له علاقة من قريب او بعيد بالعاطفة

خلي بالك.. ممكن تكون صفات الانسان عاطفيا مثالية جدا من وجهة نظر جميع الناس بس بالنسبالك انت حاسس انها اوفر

يعنى درجات بالسالب J

حط درجة التوافق مابينكو برضه من 1 – 5

وانقل على السؤال التالى

     C.    الشخص ده .. متوافق معايا غريزيا قد ايه؟

السؤال ده احيانا بتكون الاجابة عليه صعبة، خصوصا في مجتمع شرقي لا يتيح الفرصة للكشف عن الحياة الغريزية لشخص ما قبل الزواج.. عشان كده بيكون قائم بشكل اساسي على الاعتقاد

هل الشخص ده عاجبني من ناحية الشكل والمظهر؟.. هل الشخص ده هايحققلي الاشباع اللي بتمناه؟.. هل الست دي هاتملك قلبي ومعدتي؟.. هل الراجل ده كريم ومش هايخليني محتاجه لحاجة ولا بخيل وجلدة؟.. عدد الاطفال.. الشكل الاجتماعي.. وكل مايتمنى الشخص الوصول إليه غريزيا

حط كمان درجة من 1 – 5 وشوف النتيجة

دلوقتى عندنا 6 درجات لـ 6 تقييمات مختلفة

3 منها هو تقييم الرجل للمرأة والـ 3 التانيين هو تقييم المرأة للرجل

الدرجات دي لاتنفصل.. هانجمعهم كلهم على بعض ونشوف النتيجة النهائية كام من 30

وهانجيب النسبة المئوية ليهم.. حد عارف ازاى يحسب النسبة المئوية ولا اجيبلكوا حد من اعدادي يحسبها؟

تمام جدا

بقت عندنا فى الاخر نتيجة حلوة.. نسبة مئوية محتملة لعلاقة لسه فى بدايتها

النسبة دي مش بتحكم على العلاقة القائمة بالنجاح او الفشل.. يعنى ماحدش يقول انا جبت 60% يعنى احتمالات النجاح مش كبيرة وخلاص نفضها سيرة

الفكرة هي.. مدى التوافق بين الاتنين 60%.. فيه حاجات ممكن تكون اخدت الدرجة الكاملة عند طرف ما فى المقابل تكون اخدت درجة ضعيفة عند الطرف الاخر.. ساعتها ممكن الاتنين يساعدوا بعض من الناحية اللى هما الاتنين اخدوا درجة عاليه فيها

يعنى ايه الكلام ده

لو واحد من الاتنين شاف ان درجة شريكه العاطفية 1، وشريكه شاف ان درجته العاطفية 5, والاتنين درجاتهم العقلية والغريزية 5، ممكن ساعتها يتم تقويم القصور الموجود من الناحية العاطفية بمساعدة النواحى الاخرى.. دا يتطلب ذكاء وتمرين .. وصبر

وممكن اتنين تكون النسبة المئوية للتوافق مابينهم 90%.. بس الـ 10% ممكن تيجي في حتة قاتلة تماما بحيث مفيش اى حاجة ممكن تصلحها

بس اللي انا متاكدة منه.. ان النسبة دي لو قلت عن الـ 40%.. يبقى دي مش علاقة اصلا ولايمكن انها تتم او حتى تبدأ.. لان نقاط التقابل بين الشخصين لا تكفي لاقامة حياة كاملة.

بتسألوني دلوقتى عن الشخص المناسب ليا من وجهة نظري؟؟

هو الشخص اللي هاجيب معاه في الـ" ABC test" 100%

انا مش مثالية ومش كاملة.. بس انا بدور على الانسان اللي يتوافق معايا فكريا وعاطفيا وغريزيا بشكل يرضينا احنا الاتنين

والتوافق مش معناه اننا لازم نكون شبه بعض.. بس برغم اختلافاتنا لازم نكون بنلعب في حيز التعايش والتكيف مع بعض

متهيألي صعبة.. بس مش مستحيلة

مادام انا موجودة.. يبقى اكيد هو موجود :D

لو ده جنان ♥

طفل صغير طالع يبيع نعناع فى المترو
وشه مترب وايديه مش نضيفة خالص.. باين عليه هم واحد عنده 40 سنة
كان معايا wipes في شنطتي.. طلعت واحدة ومسحتله وشه وايديه بيها.. هو كان مستسلم تماما ليا وكأني أمه وبتنضفه.. كنت حاسه انه مبسوط
لما خلصت اديتله واحد تاني وقلتله اوعى تسيب نفسك كده.. المية فى كل حتة ببلاش
اغسل وشك وايديك عشان تبقى نضيف وجميل
ساعتها ابتسم من سكات ونزل المحطة.. والستات كانت بتبص عليا على اني اعجوبة من اعاجيب الكون

ولد تاني فى نفس سن الاولاني عملت معاه كده.. بس كان مبسوط وبيضحك وقالي شكرا يا طنط واداني علبة نعناع هدية.. بس انا اديته ضعف تمنها وكان معايا صابونة صغنونة مغلفة بالصدفة قلتله دي عشانك واستعملها كل يوم وطبطبت على ظهره
كان ماشي وكل شوية بيتلفت عشان يبص عليا وانا بعمله باي باي :D

طفل تالت وقفني في الشارع بابتسامة حلوة

أبله.. أبله عاوز جنيه

لما بلاقى طفل هجم عليا كده بهجم عليه انا كمان واقوله انا عاوزه نص جنية.. واقلده زى ماهو بيعمل بالضبط

فيه اللي بيتخض ويجري وفيه البرئ اللي بيقولي مش معايا

وفيه اللي هز قلبي قوي لما طلع جنيه من جيبه بكل براءة عشان يديهولي :D

ساعتها اديتله 2 جنيه وانا فرحانة بيه

طلب مني طلب صغنون على قده: شيليني

شلته من تحت باطه وظهره ليا وقعدت أطوحه وألف بيه

وكل ما أوقف يقولي تاني تاني :D

أروح واخداه كمان لفة.. لحد ما تعبت رحت سايباه وجريت 

قد ايه الفرحة فى عيون الاطفال حلوة
قد ايه الاطفال دول محرومين من اقل حقوقهم وهى ان حد يبصلهم باحترام او يبتسم حتى فى وشهم

حتى لو مش هاتشترى حاجة منهم.. عشان خاطري بلاش تكشر فى وشهم
بلاش تتجاهلهم وتعمل نفسك انك مش شايفهم
بص فى عينيهم وابتسم حتى لو مش هاتشتري حاجة
دا اهم عندهم فى الدنيا من اى حاجة تانيه ♥ ♥ ♥

افرح :)

حاول تفرح
صدقني مش صعبة خالص انك تفرح
ابتسم
بص فى المراية وابتسم
شكلك جميل.. جسمك متناسق
ربنا خلقك مافيكش غلطة
افرح
امشي فى الشارع وابتسم
لكل الناس ابتسم
بص للمعة العيون من حواليك وانت بتبتسم
هتلاقي الدنيا اختلفت
مش هاقولك افرح لانك احسن من غيرك
كلنا فى الهوا سوا
هاقولك افرح عشان انت تستحق انك تفرح
حرام تضيع دقايق من عمرك المحدود فى حزن
اللحظة اللى بتروح ما بترجعش
يبقى ليه تفرط فى سعادة خبطت على بابك لمجرد ان مالكش مزاج تقوم تفتحلها!

غني

من جوا قلبك غني

حس كل كلمة وكل نغمة وكل لحن كأنك انت اللى خلقته

صوتك وحش؟؟.. مش مهم

الغنا حالة فردية هاتسعدك

المهم وانت بتغني.. ابتسم

عيش حياتك
وكل يوم فيها كأنه احلى واهم واخر يوم
محدش عارف عداد عمره هايوقف امتى
ولو وقف فى لحظة اكيد هاتتمنى لو كنت عملت حاجات كتير قوي
ناس تكلمها
ناس تصالحها
ناس تصارحها بمشاعرك ناحيتها
ناس نفسك ترسم البسمة على وشوشها
عشان كده 
افرح
ابتسم
وعيش حياتك من قلبك

ربنا بيعمل كل حاجة في الدنيا لسبب

ربنا قاصد يوصل للواحد رسالة معينة عشان ينورله بيها طريقه

يقوله بهمسة فى ودنه انت ماشي صح .. استمر، او انت ماشي غلط .. خلي بالك

ربنا حنين علينا قوي.. برغم كل التعب اللى بنشوفه قى حياتنا، بس هو بيحبنا وبيحمينا دايما

ربنا ماجابناش فى الدنيا وعلى الارض عشان نتدلع او نعترض

احنا هنا في امتحان.. امتحان انت اللي بتصيغ أسئلته وطريقة الاجابة عليها

امتحان بتاعك انت لوحدك.. ومش شبه امتحان اي واحد تاني فى الدنيا

ويوم ما بتسلم الورقة بتاعتك.. انت الوحيد اللى اتتحاسب عليها.. مش زى اى حد تانى فى الدنيا

ربنا خلق معانا كل الادوات الممكنة اللي تساعدنا نعدي الدنيا دي.. ماقالناش نستعمل الادوات دى ازاي

ساب كل واحد وتفكيره ودماغه، واحنا اللي بايدينا بنمسك الأداة.. يا بننفع بيها اللي حوالينا.. يا بنؤذيهم بيها

كل حاجة فى ايدينا.. والاختيار برضه فى ايدينا.. مهما كترت علامات الاستفهام حوالينا، لازم ماننساش الحاجة الاساسية فى حياتنا

"احنا هنا ليه"

مواصفات الفيلا اللي انا نفسي أعيش فيها

بما ان الأحلام مش بفلوس، والواحد دايما بيحاول يرسم أحلامه على ورق يمكن فى يوم تبقى حقيقة.. فكرت أتخيل شكل البيت اللي نفسي اعيش فيه يبقى عامل ازاي
يمكن...... :)

أولا: الجنينة:
- لازم تكون عنده جنينة كبييييييييرة مليانه شجر وورد، واعلق Hammok بين شجرتين
- برجولة فيها ركن عربي او اعمل الركن العربي في الطل ويبقى فيه فرع اضاءة خفيف شكله جميل ملفوف على جذوع الشجر
 - يبقى فيه sound system كامل تتعلق السماعات بتاعته بين الشجر عشان اسمع الشجر بيغني :D
- يكون فيه حمام سباحة شكله شبه الوردة ومركزه فيه نافوره من كذا طبقة وعلى قمتها تمثال ملائكي
- يكون فيه ممر ألعب فيه باتيناج براحتي مخترق الجنينة 
- يكون عندي ترومبولين كبير 

تانيا: البيت من جوه:

- أعمل استوديو جوا البيت على مساحة واسعة ووتكون تجهيزاته وامكانياته عالية.
- البيت مافيهوش عفش كتير.. مساحاته الواسعه اكتر وتكون الارضية كلها سيراميك
- فيه american kitchen.. اللي هو المطبخ مفتوح على الدنيا مش منزوي في الركن البعيد الهادي وتصميم المطبخ مياخدش مساحة ولازق جوا الحيطة.. وفيه ترابيزة سفرة صغنونة ب3 كراسي او 4 جوا المطبخ
- الحمام يكون واسع وابن ناس.. مكان للدوش بباب قزاز مخربش ، بانيو واسع الواحد يغطس فيه مع massage mechanism
- شاشة بلازما 100 بوصة "لو فيه حاجة كده" 3D.. او احدث نظام هوم سينما مع sound system مجسم مكان وجود الأنتريه
- يبقى فيه بيانو كلاسيك في الصالة.. في يوم من الأيام هاتعلم أعزف عليه :)
- مش عايزه اوضة سفرة.. مش عايزه نيش.. مش عايزة صالون، هو انتريه كبير كامل كفاية قوي
- عاوزه افتكاسة فى اوضة النوم تخلي العفش ياخد أقل مساحة ممكنة او يدخل جوا الحيطة.. دولاب سحري.. سرير سحري.. كده يعني
- ديكور الاوضة ألوانه فاتحة وهادية يغلب عليها اللون الابيض ويكون له بلكونة كبيرة تطل على الجنينة بكل مافيها.. واحط فى البلكونة ترابية وكرسيين

بصوا.. م الاخر شكلي هاخد جناح في أي اوتيل 7 نجوم أعيش فيه واخلص :P

بس يارب يكون عندهم ترمبولين 

أمنية

عارفين انا نفسي ف ايه؟

نفسي دلوقتي حالا أكون في المكان اللي فيه الشلال ده
اترمي في حضن البحيرة وأعوم بكل قوتي
أحس ببرودة المية على جسمي وطعمها العذب على لساني
ارفع راسي كل شوية.. أمد رئتي بالهوا وامد نظري بالصورة
ابتسم للدنيا واغوص في حضن المية تاني.. لحد ما يهدني التعب
واطلع بعدها اقعد فوق صخرة من الصخور
واسرح في ملكوت الله :)

يارب حققلي امنيتي دي
يااااااااااااااااارب

صندوق الذكريات

لدي خصلتين؛ لم استطع على مدى عمري الطويل الفكاك منهما
أولا: لازلت تلك الطفلة الفوضوية التي تلقي باشيائها أينما وكيفما اتفق.. فلا تستغربوا ارجوكم ان وجدتم جواربي بين صفحات كتبي الدراسية، أو فرشاة شعري تحت سريري "هذه حقيقة للأسف"
ثانيا: أنا لا أرمي شيئا أبدا... لذا من الطبيعي ان تجد كميات مهولة من أكوام الاوراق المتكدسة فى كل مكان وأغطية المشروبات الغازية مع قليل من زجاجات العطور الفارغة، و....
تسالونني لماذا احتفظ بكل هذه القمامة داخل حجرتي
حسنا.. كل شيء تقع عليه يدي له ذكرى حميمة في نفسي
تنشأ بيني وبين اشيائي علاقات وطيدة لا تنتهي بعد استخدامي لها.. بل أستبقيها علي أستطيع إعادة تدويرها واستخدامها بشكل آخر..

أحيانا.. أجد لهذه الفوضى فائدة.. فحين أضطر للبحث عن بعض أوراقي الهامة، أجبر نفسي على الابحار في كومة ذكرياتي تلك.
هذه الصورة التقطها منذ سنوات حين كنت في المدرسة، هذه الطوابع التذكارية اخذتها من صديقة لي .. تبخرت صداقتنا مع مرور الزمن ولم تتبقى إلا الذكرى

أبحث وابحث.. أجد كل شيء كنت ابحث عنه في يوم من الايام ولم اجده حين كنت احتاجه.. وبالمقابل أجد ما أنا بحاجته الآن وقد كنت فيه من الزاهدين
تبا للاعيبك أيتها الحياة
تستوقفني بعض التفاصيل الصغيرة.. التي لابد أن أقف أمامها حائرة
أمام جزء من ذكرياتي قد ضل
هذه زهرة مجففة داخل كتابي... لا أذكر لماذا وضعتها ومن اين اتتني.. ومن كان صاحبها أو كانت
شعرت بقبضة باردة تعتصر صدري... هذا تذكار جاءني في يوم من الايام يحمل مشاعر صادقة... لماذا طواها النسيان لهذا الحد؟؟
أستمر في الابحار عبر عوالم ذكرياتي.. لتزداد علامات الاستفهام سطوعا
تذكارات لصداقات فقدت صلاحيتها.. ممن كانوا أصدقاء بالامس.. فقلبتهم الايام على النقيض
قصاصات ورقية تحمل كلمات الثناء والتشجيع، ولا أذكر ممن كانت ولم كتبت؟
أشعر بدمعة اسى تترقرق بين ضلوعي.. كم انت قاسية ايتها الحياة
ثم تستوقفني فكرة؟
هل لي أن احمل الحياة كل المسئولية؟؟.. هل دقات الثواني والدقائق والسنوات، هي من سرقت مني سنوات عمري وصداقات الطفولة، بل وبراءة قلبي
أتطلع في المرآة لأطالع وجه المرأة التي حلت ضيفة بداخلي
لم أتغير.. لأ أشعر بأني أتغير.
نفس ملامحي مذ كنت طفلة
لم تكسبني الأيام إلا بسطة في الطول، ونحولا في الجسد.. وحمقا فوق حمق
إذن ماذا حدث؟
لشد ما تغيرت الأيام..
لا أعرف ماذا دهاني.. لكني كففت عما كنت احاوله
اكتفيت من الابحار عبر تاريخي الطويل.. رحلة مرهقة مثيرة للشجون
أود الانسحاب قبل أن يحترق أسطولي.. فأجد نفسي وحيدة على جزيرة قاحلة.. ذرات رمالها صاغتها الذكريات

الملم اشيائي المبعثرة.. لازال هناك الكثير مما لم اسبر غوره بعد
لكن في هذا الكفاية
فالاكرر التجربة مرة أخرى لاحقا... حين أعزز من قواتي
واتسلح بجبال الصبر الثلجية
علها تقاوم احتراق الحنين بداخله
.
.
صندوق الذكريات

حق مكتسب

البوست ده ممكن يكون فيمينست شوية... بس أنا كانثى حابة أتكلم براحتي المرادي

من كام يوم اتكلمت مع صديق من احدى الدول العربية عن عادات وتقاليد بلدينا... واستغرب جدا لما عرف ان الراجل في مصر لما بيتقدم لواحدة الحاجات اللي بيجيبوها في شقتهم بتتقسم بينهم بالنص.. استغرب اصلا من فكرة ان الست المفروض انها تجيب حاجة أصلا.. وقالي:

وهي ذنبها إيه؟؟ المفروض الراجل هو اللي يعمل كل حاجة

دا خلاني اسرح في شوية أفكار كده.. حبيت أشرككم معايا فيها:

لما ييجي راجل يتقدم لواحدة ست... العائلتين غالبا بيتخانقوا على مين يجيب ايه..

تصوروا بقى ان شرعا المفروض الست ما تدفعش تمن عود قصب داخل بيتها

ولا حتى تيجي بشنطة هدومها.. لأن الراجل اللي جاي ياخدها من بيت اهلها وهي مكرمة فيه لازم يكرمها

اتغير الكلام ده بتغير المجتمع في ظل الازمات الاقتصادية وبقى الراجل لما ييجي يتجوز بيدور على الموظفة اللي ممكن يحط مرتبه على مرتبها عشان يعيشوا حياتهم، والبنات لما لقت ان الشغل شرط أساسي للجواز نزلوا يشتغلوا

كون ان البنت بقت بتشارك فى تكاليف الحياة فدا تفضل منها وتفهم للظروف الاقتصادية المهببة اللي بقينا فيها

بس بالنسبة للراجل... بقى حق مكتسب

تعرفوا يابنات.. ان ربنا ما كلفناش صراحة ان تكون وظيفتنا في الحياة اننا نقوم بشغل البيت؟

يعني الراجل اللي يتجوز واحدة على اساس انها تغسل وتطبخ وتكنس وفاكر ان دي وظيفتها غلطان تماما

بالعكس بقى.. الراجل ملزم انه يجيب للست اللي هايتجوزها خدامة.. لانه ما اخدهاش من بيت اهلها عشان يبهدلها ويتعبها

بس اللي بيحصل في مصر دلوقتي هو ان الراجل اتعود على ان الست هي اللي تعمل وتسوي وياويلها لو قصرت في الحاجة دي

ونسى ان ده في الأساس تفضل منها عليه..

بس هو بقى حق مكتسب

ولو هايتكلم بـ قال الله وقال الرسول، احب اقوله ان كل الصحابة كانوا عارفين المعلومة دي، والرسول عليه الصلاة والسلام كان خادم نفسه, وكان عنده خادم فى البيت كمان..

بقى دلوقتى سبع الليالي يدخل بيته يقعد يجعر ويزعق ويقول فين الاكل.. ايه القرف ده.. الواحد اتجوز عشان يرتاح ولا عشان يقعد فى الخرابة دي.. وتبقى مراته واقفه بهدوم الشغل قدام البوتاجاز وابنها مفلوق من العياط على دراعها.. شغاله خمسة سيستم لوحدها وياريت عاجب

عشان بسلامته فاكر ان الراجل اللي يدخل المطبخ او يساعد مراته مايبقاش راجل... حلاوتك

هما ليه الرجالة بالانانية دي؟

ليه هما غير متحملين المسئولية للدرجادي

حاجة كمان

بصوا دلوقتى على حالات الطلاق الشنيعة الموجودة في مصر

انا لو هاتكلم على اللي بشوفه حواليا والقصص اللي اعرفها بشكل شخصي ممكن املا مجلدات.. مش هاتكلم على قصص قد ما هتكلم على نهاية بقت عادية من كتر ما اتكررت

راجل اتجوز واحدة.. ايا كان السبب اللي ما اتفقوش عليه واتطلقوا.. اللي بيحصل بعد كده ان الراجل بيرمي ابنه او بنته لطليقته وما بيصرفش عليهم ولا بيعبرهم ولا كأنه خلفهم اصلا

ويرجع بيت اهله حلو وجميل معزز مكرم يدور على "ست ستها" .." اصل هي مالهاش في النعمة".. على اساس انه ملاك منزل م السما

اللطيف ان اللي بتعمل كده في الراجل وتنمرده وتقويه هي كمان ست.. بس دخلت مصنع القهر بدري بدري وماعادش ينفع غير انها تقهر غيرها.. مع انها بتتجنن جدا لو حد جه وقهر بنتها.. وعجبي

نيجي للست اللي اتطلقت دي.. مطلوب منها تشيل همها وهم عيالها، تقعد بيهم في بيت اهلها.. غالبا غير مرغوب فيهم.. تدور على شغل تعيل بيه نفسها واطفالها.. ملامة على انها بتسيبهم لوحدهم.. ملامة على طلاقها.. ملامة على جوازها لو اتجوزت تاني.. ملامة على انها قاعدة من غير جواز لو عايزه تربي عيالها..م الآخر.. ملامة على انها انثى في مجتمع لا يحترم الإناث

اه المجتمع لا يحترم الإناث.. ولو قلتولي ارجعي لكل اللي انتي قلتيه من شوية عن الدلع اللي الستات بتتدلعه احب اقولكم.. وهو مين بينفذ الكلام ده دلوقتي؟؟؟

ولو قلتولي الستات واخدين حقهم وزيادة في المجتمع.. مش كفاية ليهم عربيات مترو لوحدهم.. مش كفاية ماعندهمش جيش؟ 

ساعتها بجد انا هاعمل بالآية الكريمة: "وإذا خاطبهم الجاهلون قالوا سلاما"

ببساطة هاقولك لو دي الحاجات اللي مضايقاك وحارقاك قوي سيبها للست ياخويا.. بس بالمقابل شيل الطين اللي هي شايلاه كل يوم وف كل مكان وف كل لحظة

احنا في مجتمع ذكوري ابن كلب.. بيظهر في كل حاجة حوالينا.. من اول الاطفال الصغيرين اللي "لا انا ما بلعبش مع بنات"، "ازاي تخلي بنت تجيب درجات اعلى منك في المدرسة".. لحد  "النساء فتنة فاجتنبوهن" و "تلاقيها ست اللي سايقة العربية".. وخد عندك بقى.. تمييز في البيت.. تمييز في الشغل.. تمييز في الشارع... تمييز حتى في السلوك والأخلاقيات.. حتى الصح والغلط ياجدع.. بقى فيه منه غلط رجالي يغتفر وغلط حريمي تستحق عليه الاعدام.

جربوا كده يارجالة تعيشوا يوم واحد باحساس الاضطهاد ده.. وقولولي رأيكوا بعد كده هايبقى ايه؟

الانثى وظيفتها الحيوية في المجتمع انها تكون سكن ومودة ورحمة.. زي ما زوجها لازم يكون سكن ومودة ورحمة ليها

الانثى اهم وظيفة ليها في الدنيا انها تربي اطفالها صح.. والتربية مش بالاكل واللبس.. دي بالعقل والفكر وحسن التصرف والجلد والصبر عند الشدة

الانثى لو حبت انها تشتغل بره بيتها فهي حرة.. عندها من المؤهلات العقلية والجسدية والنفسية اللي يخليها قادرة على اداء المهام دي.. حبت انها تقعد في بيتها براحتها وبإرادتها واختيارها.. ماحدش يمنعها منه أو يجبرها عليه.

كل اللي انا قلته فوق ده من حقوق الانثى 100% اللي كفلها ربنا ليها.. بس قولولي كام أنثى تعرف ان هي دي حقوقها؟؟؟

المجتمعات كل يوم تسرق منها حته من حقوقها وتضيف عليها بدالها حتة واجب زيادة

لحد ما الحقوق ضاعت.. وتنفيذ الواجبات بقى حق مكتسب

مفيش كلمة شكر.. مفيش امتنان

مفيش حتى تقدير لأي تضحية هي بتعملها في حياتها

بتسيب احلامها ورا ظهرها عشان اولادها يتعلموا انهم يحلموا

تفضل تضحي وتضحي.. ومن كتر التضحية ماحدش ياخد باله

لأنه بيتحول بعد كده لحق مكتسب

تبا لك ايها العالم الذكوري السلطوي الظالم

اللي بتاخد حقوق غيرك.. عشان تبقى بالنسبالك

حق مكتسب