الأحد، 10 مايو، 2009

موقف يفرس

ماشيه فى حالي النهارده الصبح
رايحه لشغلي وانا نص نايمه
ابص قدامى ألاقى شاب عشريني لابس جلابية بيضا وبدقن ومعاه واحد تانى لابس كاب وجينز وتيشيرت ماشيين عكسي
اول ما عدوا من جنبي راح اللى لابس جلابيه قال:
- ما تلبسي حاجه عدلة.. هو انتي مش مسلمة؟
وكمل طريقه هو والتانى اللى معاه
بصراحه انا ما عرفتش اخد رد فعل
وفكرت فى عشروميت حاجه فى جزء من الثانية
فى الاول كنت فاكراهم بيتكلموا مع بعض عن حد تانى
وبعد كده قلت يمكن يقصد حد ماشي فى الشارع غيري بس اكتشفت ان ماكانش فيه على الرصيف ساعتها غيري
اتغاظت جدا
اولا انا لبسي محتشم جدا وعادي.. يعنى مش بادي واستريتش
وحتى لو كنت لابسه ايه.. هو ماله عشان يقولى كده
فكرت فى نفسي وقلت: اهدي يابنتى هو ماشتمش ولا قال حاجه قبيحة زي غيره
بس الكلمة جرحتني
هو ماله يحكم على تدينى ولبسي بأى حق
طب مايمكن قصده يسدي نصيحة
وهو اللى يقول نصيحة يقولها بصوت واطي وييجري بنفس طريقة العيال السافله اللى بتعاكس
لو واحد عاوز يقول نصيحة اكيد هايقولها بقوه لأنه عارف انه معاه حق
هما بيعلموهم يامروا بالمعروف وينهوا عن المنكر إزاي بالضبط؟
كمان دا ان دل على حاجه فهو بيدل على انه رافض أساسا شكلي عشان انا مش منقبة او لابسه خمار.. وانا باعتبر دى عنصرية
ربنا هو اللى هايحاسبنى مش هو
فكرت انى اتخانق واقوله مالكش دعوه او اى حاجه.. لقيت ان المعركه مش هاتكون فى صالحي
دقنه حامياه والموضوع باين جدا في بلد لو فيه راجل وست متشاكلين هاينصفوا الراجل
وياسلام لو كان بدقن بقى
عالم بتاعت مناظر
وقفت على رصيف المترو حاسه بالغلاسة بتقطع فيا
ولقيتنى باقول من كل قلبي
ربنا يديه على قد نيته.. ان خيرا فخير وان شرا فشر
وبس

7 حط دماغك:

micheal يقول...

ايه الهبل ده..يا بنتي لبسك عادي جدا..وحتي لو لابسه بادي ولا ستريتش محدش له عندك حاجة..موقفك صح لأنك لو اتخناقتي معاه الكل حيغلطك
تحياتي

المجهولة يقول...

ههههههههههههههههههههههههه
الحمد لله انها جت على قد كدة
:)
تلاقيه لما لقاكي حلوة ما قدرش يغض بصره قام جاب الحق عليكي

وينكى يقول...

مايكل
انا مستفزية لأنى حاسه انه تعدى حدوده معايا بطريقة ماتخلينيش اقدر امسك فى خناقه
جررررررررررر

المجهولة
او جايز شاف انه بالطريقة دى هايلم حسنات لأنه قال نصيحة
عموما حسبي الله ونعم الوكيل فيه
وربنا يديله على قد نيته

أبو أمك يقول...

يمكن إنتي ماخدتيش بالك
أكيد أبو كاب وجينز وتيشيرت هو اللي اتكلم
الصيف دخل والجو نار ومافيش غيرك على الرصيف يبص عليه ويلاقي لبسك محتشم جداً
دي حاجة تفقع
ما تلبسي حاجة عدلة

وينكى يقول...

ابو امك
لأ انا متأكده انه هو ابو دقن اللى اتكلم
التانى كان ساكت ساعتها
طب ايه تعريف الحاجة العدلة اللى هو يقصدها
عاوزنى ألبس نقاب؟
ولما ألبس نقاب الناس هاتقول دى لابسه نقاب عشان تداري على البلاوى اللى بتعملها
حصلي موقف فى مره ان محفظتى ضاعت فى ميكروباص
وقعدت ادور عليها والسواق بيولى مين اللى كان قاعد جنبك
قلتله واحده منقبة
قالى تلاقيها هى ماهى البلاوى ما بتطلعش الا منهم
مع احترامي الكامل لكل من اختارت انها تلبسه عن اقتناع
بس انا مش هاعمل حاجه عشان خاطر حد
ولا ممكن الحاجه العدله اللى هو عاوزها انى اقعد فى بيتى زى ما كل يوم فى المترو الرجاله اللى بتركب عربيات السيدات بتقول
( ماتقعدوا فى بيوتكو.. زاحمين البلد على الفاضي)
حكم

رجل من غمار الموالى يقول...

أنت طيبة قوى بقى
.....
كمان بتدعيلله ربنا يديلله على قد نيته
....
يا أختى الفاضلة
الأمر بالمعروف والنهى عن المنكر
ليس بهذه البساطة
ليس كل شخص مؤهل أن يأمر بالمعروف وينهى عن المنكر
ويجب أن يكون هناك قبول من الطرف الأخر للنٌصح
...
رغم أنى نصف سلفى وأحب الجماعة دول
لكن بأزعل عليهم علشان بعض أفكارهم الغلط
الدين لا يتقلص فى لحية ونقاب
الدين أكبر من كده
---- تحياتى

وينكى يقول...

رجل من غمارالموالي
امال المفروض اقول ايه؟؟
ماليش فى الشتايم