السبت، 10 يوليو 2010

إلى المحاربين القدماء... مدوني 2006


سنة 2006.. كانت شاهدة على حاجات كتير قوي

شهدت بداية العصر الذهبي للتدوين وخروج مدونين أقوياء للنور

شباب وكبار لقوا المتنفس الوحيد ليهم في العالم الافتراضي وكونوا شبكة علاقات واسعة استفادوا بيها في حياتهم

احنا دلوقتى في 2010.. ياااااه

فاتت 4 سنين .. 4 سنين من عمر البشرية ولا حاجه طبعا

لكن في عمر التدوين كانت شاهده على تألقه .. ومن بعديه انحداره

4 سنين .. فيهم ناس عاشت وماتت

ناس عليت وظهرت وناس اختفت واندثرت

اللي كمل المشوار واللي قال اكتفيت... واللي رقصوا على السلم

مدوني 2006.. منهم اللي بقى كاتب مشهور ونزل رواياته ودواوينه وبنسمع كل يومين عن حفلات توقيعه ورواياته اللي بقت بتتعرض على الشاشات

ومنهم اللي بقى مطرب مشهور هز خشبات المسرح بحفلاته وغناه

منهم اللي لسه مستمر بالكتابة عن وجهات نظره في الحياه والدنيا والعيشه اللى عايشينها

منهم اللي اتجوز وخلف وشاف انه كفايه لحد كده ومش لاقي وقت

ومنهم اللي غير مبادئه وتفكيره ودماغه كلها عشان يفضل راكب الموجه

منهم اللي بيضحك واللي بيبكي

منهم اللي وقفه الاكتئاب واللي خده تيار الواقع والحياه .. واللي مات بمعنييه الحقيقي والمجازي

مدوني 2006.. كنتو شهود على أقوى وأعنف المراحل في حياتنا

الدنيا اتغيرت بشكل سريع جدا خلال فترة تألقكم

ابتديتوا وآثار معركة تعديل الدستور لسه صابغه الأفق بدم وكرامة الصحفيين.. وكرامة الوطن قبليه

خرج من ساعتها مدوني 2005 اللي كانت كل توجهاتهم سياسية بحته وكانت اتجاهاتهم محددة وواضحة، إلا من رحم ربي

أما سنه 2006 فخرجت بمدونين توجهاتهم للدنيا كلها

كنتو شهود على كل حاجه حصلت وبتحصل هنا

كنا بنتجمع ونتوحد وبنزور أفكار بعض وكنا أصدق أصدقاء لبعض مع اننا ما اتقابلناش فى الواقع

اتكلمت عننا الصحف والمجلات والإذاعة وعملنا لقاءات فى التليفزيون.. ماحنا كنا موضة العصر بقى.. شوية شباب بيغيروا من بيوتهم وسلاحهم أفكارهم

وايه اللى حصل بعد كده

من وجهة نظري واحساسي.. المحاربين القدماء ابتدوا يتناقصوا واحد ورا التاني.. أبص حواليا الاقي جيل جديد فاكر ان الموضوع شهرة وأصحاب وكوول... لدرجة انه مستعد يحط في خانة المهنة فى بطاقته الشخصية كلمة: مدون

أي كلام بقى بيتكتب على أي افكار على شويه شتايم في أي حاجه وكل حاجه وخلاص

جعجعة ودق طبول

مش هانكر.. كنت واحده من اللي ماعجبهمش الحال.. وفضلت اني أبعد بهدوء

ساعتها كان التحول الخطير الحاصل من التدوين للفيس بوك ابتدى يتغلغل وينتشر

لما وقفت.. مالقيتش حواليا أصحابي المخلصين اللي كانوا بيسألوا عليا

ولما رجعت.. كان لازم أنا كمان أساير التطور والموضة وأجري على الفيس بوك برغم عدائي الواضح ليه

ولقيت ناس تانيه بأفكار تانيه وعالمهم التاني اللي مش قادره أتكيف عليه

زحمه زحمه زحمه وكله بيرغي

كله بيتكلم قبل ما يفكر.. ويالسعادتي لما ألاقي حد بيفكر قبل ما يكتب

وتستمر الحياه.. وأستمر أنا كمان في رحلتي

مابين التدوين والفيس بوك والواقع والحياة العملية وصراعات كل انسان عشان يحقق أهدافه

إلى المحاربين القدماء.. جيل مدوني 2006

بجد وحشتوني.. صعب نبقى زي زمان.. لكن عزائي ان كل واحد اختار طريقه بإرادته

وبجد باتمنالكم التوفيق من كل قلبي في حياتكم... أو باتمنالكم الرحمة في الدار الآخرة

شكرا انكم كنتم رفاقي في لحظة غيرت كتير مني

7 حط دماغك:

Unknown يقول...

لففتيني معاكي فى اربع سنين فاتوا .. فعلا كل حاجة تقريبا اتغيرت على كل المستويات .. وجوانا اتغيرت حاجات أكتر .. بس للأسف بلدنا زي ماهي مش عارفة تتغير

ربنا يسامحك على آخر البوست دموعي نزلت

عقبال ما نكلم بعض بعد 50 سنة تدوين كمان
:)
تحياتي

شــــمـس الديـن يقول...

:)
لي فترة طويلة لم اعلق بأكون التدوين

انا كنت من الجيل بتاع 2006 بس لحقت به من اخره
و بعدين سنة 2007 كانت سنة التدوين الذهبية في رايي
و شوية شوية الموضوع زي ما قلتي ابتدي يوسع جدا جدا جدا

الدنيا بتطور و الفيس انقذ ناس كتير جدا كان التفاعل معاهم هينعدم وسط انهم ناس جادين و مش بتوع الشلل اللي حضرتك بتقول يعليهم و بالتالي عشان هما ناس جد مش بيجوملوا اي حد و يعلقوا عند اي حد و بالتالي الناس مش بترد لها الزيارات

اعتقد ان الفيس مش وجش اوي كدا بس زي ما بيقولوا الدنيا بتطور

فيه ناس لازالت بتكتب بس لا غنت ولا نزلت كتب لان مادتها متنفعش كتب ولا كتئبت ولا اتجوزت و بطلت
لسة فيه ناس بتكتب و بتفكر قبل ما تكتب :)
بس صدقيني دول قليل اوي ما تلاقيهم

بس فعلا التدوين اضاف لي كتير جدا جدا فوق اي حد ما تصور

مش عارفة ليه فتحتي نفسي علي التعليق

دمتي بكل خير

No Fear يقول...

LIKE Very Much
:))
أنا فاكر كمان البوست اللي نشرتي فيه حفلة سلمي و أنا رحت و شفتكم و مكلمتكمش
:))

мαησηα يقول...

اسمحيلى اشكرهم معاكى يمكن ف 2006 كنت متفرجة بس لكن بجد اتعلمت منهم كتير وياما اسعدونى وخففوا عنى
ووالله وحشونى وبجد مفتقداهم جداااا

ياريتهم يرجعوا كلهم تانى ويرجعوا ع

رايك العصر الذهبى للتدوين

غير معرف يقول...

صباح الفل يا سمرا، أو مساء (لأن عندك غالباً مساء).
يياااة فينك يا شيخة منورة والله ماحدش شافك من زمان، إية أخبارك وأخبار أسرتك الصغيرة (تساوي حياة أفضل). والله بوست منعش إستمتعت وأنا بأقراة ونيولوك للمدونة وتشطيب سوبر لوكس وحاجات كدة.
أوعي تكوني قصدتيني في الناس إللي كنت بتتكلمي عنهم دول؟؟؟
أنا من الأول أعلنتها واضحة صريحة مدوية....:-)
عموماً Nice to read foe you again.


Iron Cobra

غير معرف يقول...

والله أنا أسف جداً إعتذار شديد اللهجة للأخ المدون.
أدي أخرةإللي بيجي من السربعة وعدم التركيز.
أنا شفت اللنك في الفييد بتاع الفيسبوك وعلية سمراء النيل إفتكرتها تدوينة جديدة لأنجي، وبعد مادققت أكتشفت إنها كانت تاجد فيها.
آسف مرة أخرى.


Iron Cobra

دنـيـا محيراني(ايناس لطفي يقول...

يعني اللي دخل 2007 ما ينفعش
:)))
عندك حق يا وينكي حاجات كتير خدتنا من بعض بس ما ننكرش ان التدوين هو الاب الروحي والشرعي لكل نجحات الاصدقاء كلهم وصدقني هانفضل اصدقاء كلنا في اي مكان افتراضي بصيلها من الناحيه الايجايبه ان بعد التدوين الشبكه زادت وطبعا سلبياتها زادت بشباب وعقول جديده دخلت وظهرت وده في حد ذاته حاجه قويه جدا
ولكن يظل التدوين جزء من شخصياتنا وافكارنا للناس اللي بتحب التدوين فعلا بدون اغراض اخري او بهدف يكتبها في البطاقه كوظيفه عامه له
وحشتني علي فكره
:))