الجمعة، 16 يوليو 2010

مفاجأة!!!


أنا حامل!!!!!!!؟؟

والمرادى بجد
أنا مش مصدقه نفسي...راجعت التقارير مره واتنين وعشره
المرادى بجد , وبعد خمس سنين انتظار ولف على الدكاتره.. انا حامل
رجعت البيت طايره.. لقيت محمود قاعد على الكمبيوتر كعادته لما يكون زهقان
اترميت فى حضنه وانفجرت فى البكا وقلتله
حبيبى...أخيرا أنا حامل
-----------------------------------
أنا دلوقتى فى الشهر التانى
الوحم مجننى... ماكنتش فاكره ان المسائل دى متعبه جدا كده
لكن كله يهون عشان خاطر ولى العهد يشرف للدنيا
أرجع بأفكارى للسنين اللى فاتت... أفتكر حماتى وغلاستها اللامتناهيه
وأمى القلقانه لدرجة محاولة اقناعى انى أزور الشيخ عطعوط يمكن يكون معمولى عمل
جارتنا أم سيد اللى كل ماتشوفنى ترفع حاجبها وتمصمص شفايفها وتنعى حظ محمود الغلبان اللى وقعه الوقعه السودا دى..وتتحسر على حال بنتها واه لو كانت مكانى ..كانت ملت البيت بالأطفال
وجوزى حبيبى اللى ماكانش بيحاول يبين أى قلق او استياء خوفا على مشاعرى.. ورحلاتنا المشتركه لكل الدكاتره الموجودين فى شرق الجمهورية وغربها
وأنا وسط كل العذاب ده صابره ومستحمله
دلوقتى ..أنا المدللة بلا منازع
ومافيش أى مخلوق يجرؤ انه يفتح بقه ويشكك فيا او فى حبيبى محمود
-----------------------------
الشهر الرابع
وعرفت من الكشف ان جنينى ولد
ابتسامه حنونه من محمود وهو يهمس فى ودنى
مبروك علينا يا أم أشرف
انت خلاص هاتسميه أشرف؟؟
احنا اتفقنا..لو ولد أنا اللى أسميه ولو بنت انتى اللى هاتسميها
البيبى هاينزل باسمه... ماتستعجلش
---------------------------------
عند حمايا وحماتى العزيزين....جداااااااااااااا
مبروك يا محمود يابنى...ربنا عوض صبرك خير
الله يبارك فيكى ياماما..بابتسامه محرجه من محمود اللى عارف وقع الكلمه دى عليا
ها...وناويين تسموا الولد ايه ان شاء الله يا محمود يابنى
ماجده ماعندهاش اسم محدد..وانا نفسي أسميه أشرف ان شاء الله
أشرف مين يابنى.. اخص عليك.. بقى بعد كل الانتظار ده, ودعواتى لربنا انه يرزقنى بالحفيد اللى هايخلد اسم العيله.. ييجى ومش عاوز تسميه على اسم جده؟
سرحت بخيالى فى اسم الطفل لو سميته باسم جده
محمد محمود محمد محمود محمد
وكأن السلسله ناقصه حلقه ..أبدا..دا مش هايحصل
يابابا.. اسمك على عينى وعلى راسى... لكن انت مش شايف ان اسم الولد هايبقى تقيل شويه؟؟
تقيل...اخص عليك يا محمود
استنى بس يابو محمود...أنا عارفه ابنى حبيبى هايسمع كلامى..وهايسمى الواد على اسم أبويا
ايه..مين...ازاى....هى الست دى عاوزانى أسمى الواد عليش؟؟؟؟؟
دا مستحيل...يقولوا عليه ايه فى المدرسه
ياماما... بس اسم جدو مابقاش موضه والولد هايتعقد فى المد....؟
انت بتقول ايه يا واد...مش عاجبك اسم جدك
بتعصانى ياواد بعد ما شلتك فى بطنى 9 شهور وربيتك وكبرتك
مش عاوز تحقق لأمك المسكينه أمنية انها تسمع اسم أبوها حى من حواليها تانى؟؟؟
يا أم محمود.. ماهو كمان ماينفعش ان الولد ينزل ويشيل اسم تانى غير اسم جده
انت بتقول ايه يا محمد؟؟... الواد هايتسمى باسم أبويا أنا..دا لو كان عاجبك
ولو مش عاجبنى يا رتيبه
أسحب محمود من دراعه ونجرى برا البيت قبل ما تشتعل خناقه مؤكده
--------------------------
بابا وماما.... حبايبييييييييييييييي
ألف مبروك يا ماجده.. انتى دلوقتى تقدرى تعيشي يومك طبيعى خالص..فترة الوحم خلصت
أهم حاجه بس تهتمى بأكلك وتعملى رياضه خفيفه
حاضر ياماما
ونويت تسمى الولد ايه بقى يا محمود يابنى
انا ومحمود بصينا لبعض وتوجسنا خيفه , قبل ما يرد محمود
فى الحقيقة يا عمى احنا شايفين ان الطفل بينزل باسمه,عشان كده ماحبيناش نسبق الأحداث
طب مادام الموضوع كده ماتفكروا تسموه عامر.. على اسم أخويا الشهيد ,واهو الواحد يحس انه لسه موجود بينا
امتعضت جدا من انى اسمى ابنى على اسم واحد مقتول...حتى ولو كان عمى
ياعمى..اسم أخوك على عينى وراسي..بس احنا مش عاوزين نفكر فى الموضوع ده دلوقتى
وليه مايسموش الواد زيد... أنا بحب الاسم ده قوى
زيد ايه بس يا ماما...هو عشان بطل المسلسل بتاع الساعه 9 عاجبك نقوم نسمى ابننا على اسمه؟؟
أصله واد قمور قوى..ويارب ابنك يطلع زيه
طيب ياماما ...ربنا يسهل
طب عن اذنكوا بقى...هانروح دلوقتى عشان ماجده تعبانه شويه
تعبانه يابنتى...لأ انتى هاتفضلى قاعده معايا هنا لحد ماتقومى بالسلامه
انتى عاوزاها تسيب بيت جوزها يا كريمه
بنتى حبيبتى ودى اول فرحتها
يا طنط مش هاينفع ان ماجده تسيبنى وتسيب بيتها 5 شهور بحالهم
أمال انت عاوز ايه يا روح طنط؟؟..بنتى وهى حامل وعاوزها تخدمك وتراعيك
انت ناسي انها بكريه وان دى اول فرحتها بعد خمس سنين دوخه
دانت المفروض تقعد تحت رجليها وتخدمها برموش عنيك
ياماما مالهوش لازمه الكلام ده
هو انا غلطت يابنتى؟؟ مش دى الحقيقه...انتى ناسيه انه كان عاوزك تقعدى مع امه عشان تخدميها ..كل ده وانتى عارفه انها نازله زن على ودانه عشان يتجوز عليكى..ودلـــ ..
كريمه...بس كده كفايه
خد مراتك واتكل على الله يابنى..ومعلش اعذر أم ماجده... انت عارفها من زمان
خرجنا من البيت وانا خلاص هابكى من اللى بيحصل
وأتفاجئ بوجود أم سيد جارتنا على السلم ,وهى بتحاول ترسم ابتسامه صفرا على وشها وبتقول
مبروك ياحبيبتى..ألف مبروك
ناويين تسموا الواد ايه بقى؟؟
أسحب دراع محمود وأنزل السلم بسرعه عشان ما أتكلمش معاها..
يدور فى عقلى صورة لسناء جارتنا اللى فى الشارع الخلفى..اليوم اللى راحت تولد فيه كان أم قويــ....قصدى أم سيد معاها لوحدها
وبعد ما جابت بنت بيسألوها هاتسمى البنت ايه...راحت أم سيد وبسرعه قبل ما الأم الغلبانه تدرى قالت: هانسميها فتحيه
والطفله المسكينه لحد دلوقتى بتعانى تبعات الاسم ده فى المدرسه
يبقى من الأسلم انى ابعد عن وشها خاااااالص
--------------------
ماكنتش فاكره ان ابنى القادم هايعمل كل المشاكل دى
كل واحد عاوز يسميه على مزاجه دون الالتفات ليا انا او محمود
مافاضلش غير ان الماشيين فى الشارع يدلوا برأيهم فى الموضوع ده
وبعد كده الموضوع ينزل فى الجرايد ويعملوا عليه استفتاء
هو فيه ايه بالضبط
يعنى اللى عاوزين يسموا الولد على اسم أهاليهم فاكرين ان ده هايخلدهم ؟؟؟
وبعد كده يبقى ابنى واحد من 50 مليون بنى ادم له نفس الاسم واللخبطه فى الاوراق الرسميه تبقى على ودنها
أفتكر انى فى مدرستى الثانوى كنت واحده من 20 واحده اسمها ماجده
وواحده من 5 اسمها ماجده سعيد
وواحده من الخمسه اسمها الثلاثى هو نفس اسمى
وماقولكوش على اللخبطه كانت بتبقى شكلها ايه...خصوصا فى الشهاده والدرجات والعك ده
ابنى مستحيل يتسمى اى اسم عشان خاطر اى حد عاوز كده
-----------------------
صحيت من النوم الساعه 3 بعد نص الليل على آلام رهيبه
محمود..الحقنى..انا هاولد
مش فاكره حاجه خالص...كنت متألمه وباصرخ ومحمود محتاس بيا
مش عارف يسوق العربيه بإيد واحده عشان يمسك ايدى بالإيد التانيه
وصلنا للمستشفى وانا فى حاله مزريه...حاسه انى هاموت
خلاااااااااااااااااص...توبه يارب مش هاولد تانى
ااااااااااااااااااااااااااااااه
مش فاكره تفاصيل أكتر من الألم
وصوت ابنى الضعيف الصغير فى ودنى ...راحه كبيره ما بعدها راحه
انا مش عاوزه اى حاجه تانيه من الدنيا غير انى اعيش اللحظه دى
محمود بيمسح العرق عن جبينى..والممرضه بتناولنى ابنى عشان اضمه لصدرى
احاول ارسم ابتسامه مجهده على شفايفى بس مش قادره
محمود يكاد يبكى من الفرح.. ومن بعيد...أسمع أصوات أهلى وأهله بره الغرفه اللى اتمنعوا مؤقتا من دخولها
تدخل الممرضة ومعاها نوت صغير وسألتنى
مبروك يا مدام...ناويه تسمى الولد ايه ان شاء الله
احاول ابتلاع ريقى..ومحمود يشدد الضغط على كفى..حانت اللحظه المنتظره
ساعتها افتكرت صورة ضبابيه عدت قدام عينى وانا فى غرفة العمليات
وبدون تفكير قلت: فارس... هاسمى الولد فارس
بانت الدهشه على وش محمود وهو بيقول بعتاب باسم
بقى كده برضه... تسمى الولد لوحدك؟؟.. كمان انتى منين جبتى الاسم ده؟؟
ابتسمت على قد ما قدرت وهمست
فارس راكب على حصان , شايل سيفه ودروعه
فارس نزل باسمه يا...يا أبو فارس
ورحت فى نوم عمييييييييييييييييييييييييييييييييييق
قبل ماتتعالى صيحات الاستنكار والدهشه من الجمهور الواقف على باب الغرفة بعد ما عرفوا الخبر

5 حط دماغك:

فوكش يقول...

لو فاكرة إنو تشابه الأسماء بيعمل خربطيطة, فما بالك لما الواحد يكون ليه اسمين؟ نعم اسمين!
خدي دي

إبن خالي لما تولد اختلفوا على اسمو...

في النهاية وبعد المحاورات والمشاورات بقى فيه فريقين في الحلبة, على الزاوية اليمين فريق بيشجع اسم "معتصم" وعلى الزاوية الشمال فريق بيشجع اسم "أحمد"...

ديلوقتي الولد كبر وبقى شاب, وأهو عايش في جنين (مدينة في فلسطين), اسمو في الهوية معتصم, وفي شهادة الميلاد وجواز السفر أحمد!

باباه بيناديه أحمد, ومامتو بتناديه معتصم...
عيشي كتير هتشوفي كتير!

ربنا يباركلكم في فارس, وتحية على المقالة المهلبية...

وينكى يقول...

طبعا دي لخبطة ما بعدها لخبطة
والولد يطلع بعد كده يقول انا ميييييييييين
ربنا يكون فى عونه يا فوكش بجد دى حاجه تزهق

تصحيح بسيط
ربنا يباركلهم فى فارس
انا لسه ما اتجوزتش اصلا :))
وما اسميش ماجده

فوكش يقول...

بالنسبة للتصحيح, أقصد بعد المقارنة مع أحمد/معتصم, ربنا يباركلكم في فارس :)

يا مراكبي يقول...

هههههه

حلوة

مبروك يا ماجده

;-)

وينكى يقول...

ههههههههههههههههه
الله يبارك فيكم جميعا