الثلاثاء، 30 أغسطس، 2011

الحلم

يامرايتي يا مرايتي
ياللي عمرك ما جملتيني ف نظري ولا خبيتي عليا
محتاجه افضفض معاكي بكلمتين
تسمحيلي؟؟
عاوزه اتكلم عن الحلم.. مش باقصد حلم معين
لكن اي حلم بيراود الانسان وبيتمنى انه يحققه
فيه ناس بتحلم بالحاجه وتفضل عايشه على امل انها تحقق الحلم ده..
يابتتقدم خطوات لقدام يا بتفضل واقفه فى مكانها وتكتفي انها تتحسر عليه
وفيه ناس حلمها بيبقى مجرد نجمة عالية فى السما.. بيعيشوا حياتهم على نورها.. بيتونسوا باحلامهم حتى لو مش هايحققوها
جايز عشان لو حققوا حلمهم ده هايختفي السبب اللي هما عايشين عشانه
وفيه ناس بتحلم.. لكن بتتوه من حلمها وسط زحمة الحياة

قد ايه مهم قوي.. انك ما تبعدش نظرك أبدا عن حلمك
وعن كل ماهو مهم في حياتك

2 حط دماغك:

حسن ارابيسك يقول...

عزيزتي الجميلة وينكي
كل سنة وانتي طيبة
ومتشكر على زيارتك وهي مثابة نسمة رقيقة
ثم انتي عارف من زمان على كده مسألة التدوين او الفترة بين تدوينة وأخرى لاتقل تقريبا عن شهر

المهم خلينا في تدوينتك الجميلة والتي لم يشغلني فيها الجزء الخاص بالموت، بقدر ما أعجبني جدا الجز الخاص بالحاج بطوط ورجعتيني ذكريات جميلة زمان لما كنت صغير وأنتظر بفارغ الصبر وقت صدورها كل أسبوع

المهم سيبك من موضوع الموت ده
وكلمينا عن تجربتك في الغناء
عن تجربتك في أول مرة تجلسين فيها أمام كاميرا التلفزيون عندما التقى بعض المدونين في برنامج لحسين فهمي ومع الفنان خالد الصاوي والمدونة عاليا ورسام الكاريكاتير ياسر حسين
المهم اتمنى لكي التوفيق من كل قلبي في حياتك الشخصية والمهنية
تحياتي

وينكى يقول...

ارابيسك
معلش اتاخرت في الرد عليك اكتر من اللازم

انا ابتديت غناء فعليا مع الفرقة اللي انا باغني فيها دلوقتي من 4 سنين
الفرقة اسمها انا مصري.. وفيها بنقدم طبق سلطة متكامل من مختلف الوان الفن المصري
عشان تعرف طعمها لازم تسمع وتشوف بنفسك :))

بالنسبة لبرنامج الناس وانا.. دى ماكانتش اول مرة ليا اظهر على شاشة تليفزيون :)
بس تقدر تقول دى كانت انطلاقة شهرة برضه.. قبلها بكام يوم خالد كلمنى وقالي على موضوع البرنامج وانهم حابين يستضيفوه كمدون هو وبعض الاصدقاء اللي عرفهم عن طريق التدوين
اتجمعنا قبل التصوير بيوم عشان ندرس ارض المعركة
كان هدفنا اننا نطرف نشوط في مواضيع وافكار جامده جدا ونجيب اجوان في مشاكل حياة معاصرة وسياسة وادب ودين
لكن اللي حصل ان البرنامج طلعنا بصورة تانية خالص ما حققتش المطلوب منها، لكن كانت تجربة لطيفة
معلش سؤال بس: انت ليه افتكرت البرنامج ده دلوقتي؟؟
كنت فاكره انه اتنسى من زماااااااااااان :)