زمان قوي
كنت ببص للسما
وأشوف السحاب عالي قوي
اعلى حاجة قدام عنيا
عشان كده لما كنت بتخيل شكل ربنا
كنت بتخيله شبه السحابة
عنده وش زي البشر
وعشان ينزل علينا المطر
كان بينفخ جامد اوي في السحاب اللي حواليه
ولما يخبط السحاب في بعض يطلع شرار
وينزل المطر
وكبرت شوية
وحاولت ابعد الصورة دي عن دماغي
فيه الاعلى من السحاب
فتخيلته شخص رجولي.. مش قادره أحدد ملامحه
بيبص علينا من فوق السحاب
ومستخبي وراه
وعشان ينفذ أي مشيئة
كفاية انه يشاور بصباعه عشان تتحقق
وكبرت حبه كمان
ولما حسيت ان اللي فكرت فيه ده حرام
اكتشفت اني مش لوحدي اللي تخيلت شكل ربنا
ابراهيم من زمان
رفع عينه للكواكب والشمس والقمر
وقال هذا ربي
ماعرفش كان عنده كام سنة
بس اكيد كان اكبر مني
وفيه الاكبر واكبر مني
وعلى حيطانهم راسمين صورة ربنا
بس من جوايا
مش مهم أشوف ربنا
مادام هو دايما جوا قلبي
وبحس انه جنبي
حاميني.. راعيني.. بيحبني
يمكن بزعله كتير وعارفه اني هازعله اكتر
لكن ماقدرش استحمل فكرة انه زعلان مني
لاني بحبه قوي
بحبك يا ربنا.. ونفسي تفضل تحبني على طول
2 حط دماغك:
صحيح وينكي كلنا حصل معانا ده وتخيلنا كما تخيلتي
لكن المهم هو خاتمة تدوينتك والعلاقة التي بين الانسان وربه
تحياتي
حسن أرابيسك
اهلا بيك دايما يا ارابيسك
واتمنى التدوينة دى تكون ثقب بسيط نكون بصينا منه على طفولتنا
إرسال تعليق