الأحد، 18 نوفمبر، 2012

ألم



وانا ف تالته ابتدائي
كان فيه يوم رحت فيه المدرسة وانا مش عامله الواجب
وكنت بدعي من كل قلبي يارب أموت قبل ما أروح المدرسة عشان الأبله ما تضربنيش!!


ياترى كام طفل شاركني الدعوة دي وربنا استجاب له ورزقه بالشهادة؟


لما كنت بدعي من خوفي ما فكرتش في امي احساسها ايه لو ده حصل فعلا
ياترى كام ام دلوقتى قلبها انفطر وكام أب قلبه انحرق على ابنه.. بنته.. أولاده اللي بدل ما يستناهم فى البيت بعد الظهر.. راح جمع أشلاءهم في أكياس وراح بيهم على المدافن عشان مافيش عربية اسعاف جتلهم


لما كنت صغيرة كنت بستنى اليوم اللي أمرض فيه عشان أروح المستوصف اللي جنب البيت.. الدكاترة بيلعبوا معيا والممرضات بيبتسموا ف وشي والدوا كان طعمه حلو
ياترى كام واحد راح مستشفى اسيوط وهو شايل ضناه على دراعاته وبيصرخ.. ياعاااااااااااالم حد يلحق ابني.. ابني بيموت

ومافيش أمصال
مافيش علاج
مافيش دكاترة
مافيش اهتمام
لكن كان فيه باعة جائلين بالهبل والحمد لله.. اهي حاجة موجوده




مش قادره أكتب أكتر من كده
كفاية عليا دموعي... يارب ارحمهم
وارحمنا يارب زي ما رحمتهم

3 حط دماغك:

Entrümpelung Wien يقول...

موفقين ... لكل ما هو جديد و قيم

Entrümpelung Wien
Entrümpelung
Wohnungsräumung
Wohnungsräumung WIEN

يا مراكبي يقول...

:-(

الله يرحمهم جميعاً
وربنا ما يقدَّر فُراق الأولاد ده على حد، ده أصعب ألم على الإطلاق

وينكى يقول...

امين يارب
ربنا يصبر اهاليهم