كوني على الحياد بيحميني من خيبات الأمل المتكررة حتى لو كان ده معناه اني أعيش على الهامش.
جربت الانغماس بمشاعري وقلبي في حاجات كتير وكل مرة كنت باتقطع جزل.
العيب الوحيد في البقاء جوة الثلاجة دي.. هو الملل
كله شبه بعض.. مفيش حاجة ليها طعم.
بس فيه حاجات محورية في حياة الواحد غصب عنه بتخليه يحاول ينغمس فيها.
أنا مؤمنة ان فيه حاجة لو انت عاوزها يبقى لازم تعوزها بجد.. طاقة الانغماس دي هي اللي هتخليها تحصل.. حتى لو القدر متحالف ضد رغبتك.
فتفضل تغصب نفسك انك تطلع بره التلاجة.. وتعوز
تعوز انك تعوز الحاجة اللي انت عايزها عشان ترضى تجيلك.
وواحدة واحدة قلبك ومشاعرك يغرقوا فيها.. وترجع تلبس القضية تاني.. وتتعرض لخيبات الأمل تاني.. وقلبك يتخرط للوز.
بس الجديد انك هتتقبل كل ده المرادي.. وتؤمن انك وصلت لمرحلة النضج الكافية اللي تخليك تستعذب العذاب في سبيل هدفك.. وتقبل خيبات الأمل .. ولسه يفضل عندك شوية أمل فاضلين للمرة الجاية
واللي بعدها.. واللي بعدها.
0 حط دماغك:
إرسال تعليق